1. Kʼiáni tjínnele kʼoakoa̱nkjoaan xi chjotale Cristo maa joni jngo yá (kʼoati chótsenlai sén xi faʼaitʼa).

 “JE YÁ xi bindiya alikui kjotʼáo je ntjao̱”. Tojo tso én jebi tjínkʼa yá xi tofayondsitin kʼianga nʼio faʼa je ntjao̱ kʼoa alijme xi male. Kʼoatisʼinni tsanda ñá, machjén nga kʼoati sʼiaan, xi tsonile nga chósonnilee josʼiaan nga tosi tonda je Jeobá si̱xálee. Tobʼelañá, kʼianga bʼantjaiya josʼin tiyoaa kʼoa nga jchaxkoán jmeni xi sʼín kʼoa josʼin síkjaʼaitsjen xi ngikʼa.

2. Jmé xi koasenkaoná tsa toxijña kʼoantjaiya josʼin tiyoaa kʼoa jmé xi chótʼayajiaan i̱ kjoaʼmiya jebi.

² Tjínnele nda chósonnilee josʼiaan ngatsʼiaa xi choʼndale Niná maa. Kʼoati tjínnele nga nangitokon koaan kʼoa nga koakoá kjoamatokon. I̱ kjoaʼmiya jebi kuila chótʼayajin kʼa josʼin tsakinyakao je chjotale Cristo nga kiskosonnile jokisʼin nga tsʼantjaiyajin josʼin tjíosíjchá yaole kʼoa jósʼin koa̱n chjénngiaa choa̱le. Tonga kuila títjon kataʼyaa josʼín je Jeobá kao Jesús, nga nda kosonnile jmeni xi sʼín.

3. Jósʼin ʼyañá nga nda kosonnile Jeobá josʼín.

³ Je Biblia kʼoatso nga je Jeobá yaa mangóson jngo “Na̱xi̱” (Deut. 32:4). Tonga kʼoati kosonnile josʼín. Tobʼelañá, kʼianga bʼantjaiya jme xi chon sonʼnde, je Jeobá básjaile josʼín nga katabitjoson jme xi tjínndajinle. Nga kʼoasʼin kisindaná jokjoan je, kʼoati fasjailee jonʼia kʼianga bʼantjaiyajin  josʼin tinijchá yaoná. Je Jeobá tsjoáná kjoafaʼaitsjen xi ya nroatʼa Biblia, xi basenkaoná nga kui chjoejiaan xi ndatjín ninga kjoa bitjatojiaan. Nga kʼoasʼin tsjoáná kjoafaʼaitsjen kʼoasʼin bakóni Jeobá nga kosonnile josʼín.

4. Jngo choa̱ tʼejnai xi bakó nga kosonnile Jeobá jme xi sʼín (Levítico 5:7, 11).

⁴ Je kjoatéxomale Jeobá ñaki kixiní kʼoa tsínkui síjéná jmeni xi ñʼai koa̱nná. Kataʼyala jmeni xi kisʼin je Jeobá xi kao chjota israelita. Kʼianga kʼoakitso nga tjín xi kʼoaitʼale alikui tongóson tjín kisijéle je chjota xi nyiná kao xi ma̱ kisijchá yaole. Je kjoatéxoma xi kitsjoa kʼoakitso nga kʼoakji katatsjoá chjota jokji tjen kʼoakoa̱nle (tʼexkiai Levítico 5:7, 11). b

5. Jngo choa̱ tikʼaxki̱ josʼin bakó je Jeobá nga nangitokon kʼoa nga tjínle kjoamatokon.

⁵ Nga nangitokon je Jeobá kʼoa nga tjínle kjoamatokon kosonnile josʼín. Tobʼelañá, tsakakó nga nangitokon kʼianga tojeme sikjeson tsakai je naxinandá Sodoma. Ánkje kisikasén nga kʼoakitsole Lot nga ya sonnindo katamanga, tonga je Lot kitsokjon nga ya koai. Kuinga kʼoakitsoni nga tosa ya ʼnde jña Zóar ʼmi koaikao familiale, jngo naxinandáʼndí xi kʼoati sikjeson tsakai Jeobá. Je Jeobá alikui kjoanʼio tsakʼénele Lot nga katasítjoson jmeni xi kitsole. Tosaa kitsjoaʼndele nga ya Zóar katafikatio kʼoa tsínni kisikjeson ʼnde jebi (Gén. 19:18-22). Kʼianga jesiento nó jaʼato, je Jeobá tsakakóle kjoamatokon je chjota xi Nínive tsʼe. Jé profeta Jonás kisikasén nga kʼoakitsole nga sikjeson naxinandá jebi nga kʼoasikji tsʼen chjota xi tjín. Nga kʼoakoannile je jéele, je Jeobá koanmake kʼoa kisichatʼale chjota jebi (Jon. 3:1, 10; 4:10, 11).

6. Jósʼin tsakakó Jesús nga kosonnile josʼín joni Jeobá.

⁶ Kʼianga jaʼai Jesús i̱ Sonʼnde tsakakó nga kʼoati kosonnile josʼín joni Jeobá. Ninga kui xá kinikasénni nga je chjota israelita kuitsoyasonle Énle Niná, tsakasenkao jngo chjoón xi tsín chjota israelita kitjenni. Chjoón jebi kʼoakitsole Jesús nga katasíndaya tsotiʼndíle nga sénnichxin xi chʼaokjoan tíjnajinle. Je Jesús koanmake kʼoa kisindaya tsotiʼndíle chjoón jebi (Mat. 15:21-28). Ijngola choa̱ kataʼyaa jokisʼin je Jesús. Kʼianga jejaʼato choatse nga títsoyason i kitso: “Toʼyanibe xi kuitso ngixko̱n chjota nga tsín tsʼan, kʼoati an kʼoaxián nga tsín tsʼan” (Mat. 10:33). Je Jesús alikui tsakʼasjengi je Pedro ninga jan kʼa kʼoakitso nga tsín bexkon. Koanjinle nga kʼoakoannile Pedro jmeni xi kitso kʼoa nga kixi tífitʼale je Niná.  Kʼianga jejaʼáyanile Jesús kichokonle Pedro, tsakui nichxin kʼia kʼoakitsole nga jekisichatʼale kʼoa nga tsjoake (Luc. 24:33, 34).

7. Tojo tso Filipenses 4:5, jósʼin mená nga kataʼyaná.

⁷ Jekaʼyaa nga je Jeobá kao Jesús kosonnile josʼín. Je Jeobá kui xi mele nga kʼoati sʼiaan tsanda ñá (tʼexkiai Filipenses 4:5). c Si̱kjaʼaitsjenjiaan jebi: “A kʼoasʼin síkjaʼaitsjen xi ngikʼa nga kosonnile josʼian kʼoa nga ndʼé. Axo kʼoasʼin ʼyana nga nʼio xíjian kʼoa nga totsʼan bitjoson. A kʼoasʼin ʼyana nga kjoanʼio bitjoson jmeni xi xian. A kuenta sʼian josʼin síkjaʼaitsjen xi ngikʼa kʼoa a nrʼoele jotso”. Tsa chósonnilee josʼiaan kʼoati koa̱nkjoaan jokjoan je Jeobá kao Jesús. Jaola koya kataʼyaa kʼiáni machjén nga chósonnilee josʼiaan: nga bʼantjaiya josʼin tiyoaa, kʼoa nga tsín mangóson josʼin nikjaʼaitsjeen kʼoa josʼin síkjaʼaitsjen xi ngikʼa.

8. Jmé xi koasenkaoná nga nda chósonnilee josʼiaan kʼianga bʼantjaiya josʼin tiyoaa (kʼoati chótsenlai nota).

⁸ Kʼianga bʼantjaiya josʼin tiyoaa machjén nga nda chósonnilee josʼiaan. Tsa toʼi̱ koa̱n nga chʼin ska̱tʼaná, tsa tao̱n koa̱ntsínná kʼoa tsa chjota político kʼoetʼaná, nʼiojin ñʼai koa̱nná (Ecl. 9:11; 1 Cor. 7:31). Kʼoa tsa kʼia nga bʼantjaiya josʼin tinixálee Niná, kʼoati ñʼai maná. Ningalani kʼoakoa̱n koasenkaoná nga kjuintjenngiaa nga ño koya jebi. Xi títjon, kʼoakʼoé tokoán nga tsín tikʼoasʼin kuiyoñá josʼin tiyoaa tsakai. Xi majaoni, kjoásjailee josʼiaan. Xi majanni, kui xi ndatjín si̱kjaʼaitsjeen. Kʼoa xi mañoni, kuinyakoaa xi ngikʼa. d Kataʼyala josʼin tjíobinyakao kʼa je ndsʼee nga tjíofitjenngi kjoafaʼaitsjen jebi.

9. Jmé xi kisʼin jngo ndsʼee kao chjoónle xi misionero sʼin tjíosíxá kʼianga kjoa jaʼatojin.

⁹ Kʼoakʼoé tokoán nga tsín tikʼoasʼin kuiyoñá josʼin tiyoaa tsakai. Je Emanuele kao Francesca misionero sʼin tjíosíxá kʼoa xin naxinandá kinikasén. Kʼianga kicho ya ʼnde jña kinikasén tokjoan kiskotʼayá je én xi ya nokjoa, kʼoa kisimiyo je ndsʼee ya jtín jñani kicho. Tonga kʼiakjoán kitsʼia je chʼin COVID-19 kʼoa tsín tikoan tsakatiojtínni kao je ndsʼee. Xi ijngosani, toʼi koan kʼien je male Francesca. Je tichjaa koanmele kikonle je xínkjín, tonga nga chʼin tjín alikui koan kisíxatʼa xínkjín. Je xi tsakasenkao nga kui kjoa jaʼatojin kuinga tsakʼétsʼoale Jeobá kʼoa kisijéle kjoachjine nga je katabándiaale jmeni xi sʼin, kʼoa je Jeobá kinrʼoéle. Jé naxinandále kisichjén nga tsakinyakao. Tobʼelañá, nʼio tsakinyakao nga kiskotsenle jngo video jña i̱ kitso jngo ndsʼee: “Ngisaa ndi̱to̱n sʼejngo tokoán kʼianga nijinlee yaoná nga tsín tikʼoasʼin tiyoñá josʼin tiyoaa tsakai. Kʼoa ngisaa ʼyaa jonʼia nga jemani”. e Xi majaoni koya xi kisʼin kuinga teléfono kinchja̱le chjota nga kitsoyason, kʼoa saʼnda jngo chjota kiskajin xi kitsoyale Énle Niná. Kʼoa xi majanni, kitsjoaʼnde nga kitsjoanganʼiole je ndsʼee kʼoa kitsjoa kjoanda nga kʼoakoantʼain. Ñanóla nga jngo tichjaa xi nyaon nyaon kisikasénle mensaje nga kisinʼio kon kao jngo textole Biblia. Jmé xi bakóyaná jebi. Kui bakóyaná kʼianga bʼantjaiya josʼin tiyoaa tsjoa sʼe tokoán  nga kui kʼoanʼia jmeni xi bele tokoán nga koa̱nná kʼoasʼiaan.

10. Jmé xi kisʼin jngo tichjaa nga kitjoxin jtín jñani títsjoánganʼio tsakai.

¹⁰ Kjoásjailee josʼiaan kʼoa kui xi ndatjín si̱kjaʼaitsjeen. Jngo tichjaa xi Christina ʼmi xi Rumania tsʼe, xi ya Japón tíjna, tokʼoakoanle nga kʼoatsakʼinle nga jchangi je jtín jñani títsjoánganʼio nga én inglés. Tonga tsín totsakʼéjngo kon ninga kʼoakoan. Tosaa ya kitsjoánganʼio ya jngo jtín jñani én japonés nokjoa kʼoa kao kjoatsjoa kitsoyason. Kʼoakitsole jngo chjoón xi ñatjen kisixá ngasʼa nga katatsoya je én japonés ánni nga ngisa nda koa̱nnile kuinchja̱, kui Biblia kao folleto Koaan nda kuiyoaa kisichjén tichjaa nga tsakʼinyale je én japonés. Chjoón jebi tsakasenkao je tichjaa kʼoa ngisaa nda koanle kinchja̱ je én japonés. Kʼoa je chjoón xi tsakasenkao tichjaa koanmesale tsabe xi tʼatsʼe Biblia. Jebi kui bakóyaná nga tse kjoanda so̱koná kʼiatsa kjoásjailee josʼiaan kʼoa tsakui xi ndatjín si̱kjaʼaitsjeen ninga bʼantjaiya josʼin tiyoaa.

11. Jméni xi kisʼin jngo ndsʼee kao chjoónle nga ñʼai koanle tao̱n.

¹¹ Kuinyakoaa xi ngikʼa. Jngo ndsʼee kao chjoónle xi ya tjío ya jñani tíchjoale je xále Niná ñʼai koanle tao̱n nga jaʼajen chjíle tao̱n ya naxinandá jñani tjío. Nga kʼoakoan, je ndsʼee tokoannile josʼin tsakatio, kʼoa ʼndele nga tokui koaini jme kjoa xi tjíofaʼatojin tosaa tsakinyakao xi ngikʼa kʼoa ngisaa tse kitsoyason (Hech. 20:35). Je ndsʼee i kitso: “Nga ngisa tse tsakʼinyasuinjin ngisaa choa ñʼai koannajin nga tsínkui kinikjaʼaitsjainjin jme kjoa xi tjínnajin, kʼoa tosi tonda tsakʼinyasuinjin”. Jebi kui bakóyaná nga tsínkui nʼio si̱kjaʼaitsjeen kʼiatsa kʼoantjaiya josʼin tiyoaa, tosa kuinyakoaa xi ngikʼa, kʼoa ngisa nda kʼuínyasoán.

12. Jósʼin koasenkaoná choa̱le Pablo nga chósonnilee josʼin kʼuínyasoán.

¹² Machjén nga chósonnilee josʼin kʼuínyasoán nga̱ je chjota xi kajiaan kjaʼaí kjaʼaísʼin makjainle kʼoa kjaʼaí kjaʼaí kjoan nga jngó jngó. Nʼio koasenkaoná je choa̱le pastro Pablo, nga̱ kiskosonnile josʼin tsakjákaonajmí je chjota nga kitsoyale. Je Jesús kui xá kitsjoale nga pastrole naxinandá koa̱n (Rom. 11:13). Je Pablo nda kisitjoson je xá xi tsakʼaile. Kitsoyasonle je chjota judío, chjota griego, chjota xi chjine, chjota xi jinjñá síxá, xi xángʼa tjínle kʼoa kao xi rey sʼin tjío. Je Pablo kitsoyale Énle Niná toʼya chjotani (1 Cor. 9:19-23). Kʼianga kitsoyale kuenta kisʼin josʼin ngale chjota kʼoa josʼin makjainle. Jebi kui bakóyaná nga ngisa nda kʼuínyasoán tsa kuenta sʼiaan josʼin ngale chjota, josʼin makjainle, kʼoa jmeni xi mandosinle.

13. Jósʼin kuichomani tsa jchaxkoán josʼin síkjaʼaitsjen xi ngikʼa (1 Corintios 8:9).

¹³ Kʼiatsa chosonnilee jonʼia kʼoati jchaxkoán josʼin síkjaʼaitsjen xi ngikʼa. Tobʼelañá, tjínkʼa tichjaa xi síkʼi yaole kʼoa tjínkʼa xi tsín kʼoasʼín. Tjínkʼa ndsʼee xi ʼbi choa xi xán tjínle kʼoa tjínkʼa xi mai. Ngatsʼiñá nga nikuindaa yaoná nga tsín jme chʼin katakatʼaná, tonga kjaʼaí kjaʼaísʼin nikuindaa yaoná nga jngó jngoá. Kʼiatsa kʼoasʼin si̱kjaʼaitsjeen nga ngisa ndatjín jmeni xi nʼia kʼoa tsa kʼoakʼuínlee xi ngikʼa nga kʼoati katasʼín, si̱katéngijián je ndsʼee kʼoa xkoa̱yajin sʼin kuiyoaa ya jinjtín. Tsín mená nga kʼoakoa̱n (tʼexkiai 1 Corintios 8:9; f 10:23, 24). Jaola choa̱ kataʼyaa josʼin basenkaoná je Énle Niná nga tsín  nikʼatoné choa̱le josʼin nikjaʼaitsjeen kʼoa nga nda biyokoaa xíngiaa.

14. Jñánile texto xi faʼaitʼa Biblia xi koasenkaoná jokjoan najño xi chʼa̱kjá kʼoa josóyoaa.

¹⁴ Jokjoan najño xi chʼakjá kʼoa josoyoaa. ʼNdele nga kʼoenená, je Jeobá to kjoafaʼaitsjen tsjoáná jokjoan najño xi chʼa̱kjá kʼoa josóyoaa. Tjínnele nga je Niná chʼa̱sjengʼaa josóyoaa kʼoa jokjoan najño xi chʼa̱kjá. Tjínnele koakoá nga maná nikjaʼaitsjeen kʼoa nga chosonnilee jonʼia (1 Tim. 2:9, 10; 1 Ped. 3:3). Alikui mená nga tokui kuenta katasʼín xíngiaa jokjoan najño xi chʼakjá. Je kjoafaʼaitsjen xi faʼaitʼa Biblia kʼoati kuinyakao xi chjotajchínga sʼin tjío nga tsín sikʼatone choa̱le jokuitso tʼatsʼe jokjoan najño xi chʼa̱kjá kʼoa jokʼoé ntsja̱jkoaa. Tobʼelañá ya jngo jtín, tjínkʼa xti xi nʼio koto bate ntsja̱jko̱ kʼoa tsín basénʼa. Kui kʼoafayoni nga kʼoabatío ntsja̱jko̱ xi sʼa xti. Je xi chjotajchínga sʼin tjío koanmele tsakinyakao xti jebi, tonga jótjínnele sʼin ndsʼee nga tsín sikʼatone choa̱le jokuitso. Je superintendente xi tsʼe circuito kui kjoafaʼaitsjen kitsjoale nga i̱ kuitsole xti jebi: “Kʼiatsa yalani plataforma kuitjái, kʼoa tsa tokui kuenta sʼin je ndsʼee jotisui tikʼoajinni jmeni xi sí, kuijin xi tsonile nga tsín tinikuindai jokjoan najño xi kichʼakjái kʼoa jotisui”. Kʼianga tsín kisikʼatone choa̱le jokitso xi chjotajchínga sʼin tjío, tsakinyakao xti jebi nga kisindaya yaole. g

15. Jñánile kjoafaʼaitsjen xi faʼaitʼa Biblia basenkaoná nga chjoejiaan josʼin nixkiaa (Romanos 14:5).

¹⁵ Josʼin nikuindaa yaoná nga tsín chʼin katakatʼaná. Ñá xi kuixónñá nga jngó jngoá josʼin si̱kuindaa yaoná nga tsín chʼin katakatʼaná (Gál. 6:5). Kʼianga si̱xkiaa kuenta sʼiaan jotso kjoatéxomale  Niná xi tʼatsʼe njín kao tʼatsʼe kjoabʼenda (Hech. 15:20; Gál. 5:19, 20). Kʼiatsa tsín kjoatéxomale Niná tibitjatoné, ñá xi kuixónñá josʼin si̱xkiaa. Tjínkʼa ndsʼee xi toje síxkile yaole kʼoa tjínkʼa xi chjinexki fikonle. Ningalani kjaʼaí kjaʼaísʼin nikjaʼaitsjeen nga jngó jngoá machjén nga jchaxkoán josʼin síxkile yaole je ndsʼee. Kuinga machjénni nga si̱kjaʼaitsjenjiaan jebi: Xi títjon, tojé Chjotaxále Niná xi koa̱nle kjoaʼaxin ngayeje chʼin xi tjín (Is. 33:24). Xi majaoni, nga jngó jngó chjotale Cristo xi kuitsoni josʼin sixkile yaole (tʼexkiai Romanos 14:5). h Xi majanni, alikui koa̱n xíngiaa si̱kʼaxkiaa josʼin síxkile yaole kʼoa tsín ñá bʼechjoalee jmeni xi sʼín (Rom. 14:13). Kʼoa xi mañoni, tsjoachañá xíngiaa kʼoa ngisaa chjíle nga jtín sʼin kuiyoaa tikʼoajinni nga kui kuenta sʼiaan jmeni xi sʼín nga jngó jngó (Rom. 14:15, 19, 20). Kʼiatsa kuenta sʼiaan nga ño koya jebi jtín sʼin kuiyoaa kʼoa nda kjuinkoaa je ndsʼee.

16. Jósʼin koako xi chjotajchínga sʼin tjío nga kosonnile josʼin bekon xínkjín (kʼoati chótsenlai sén xi faʼaitʼa).

¹⁶ Je xi chjotajchínga sʼin tjío tjínnele nda choa̱ koatio nga skósonnile josʼin (1 Tim. 3:2, 3). Tobʼelañá, alikui toje kuitjosonntsjaile jngo xi chjotajchínga sʼin tíjna tokuini nga jengisa tjínle nó, bení nga koa̱n tsjoále Jeobá nganʼiotsjele tojokjini xi chjotajchínga sʼin tíjna nga nda kuichotsjoá jmeni xi kuitso. Kʼiatsa tsín kjoatéxomale Niná tjíofaʼatone, je chjotajchínga xi ngikʼa tsjoánganʼiole xínkjín jmeni xi bʼéndajin ningalani tsín mangóson josʼin síkjaʼaitsjen.

17. Jmé kjoanda xi so̱koná kʼiatsa chósonnilee josʼiaan.

¹⁷ Tsee kjoanda so̱koná kʼiatsa chósonnilee josʼiaan. Tobʼelañá, ngisaa nda koanngínkoaa je ndsʼee kʼoa nda kuiyoaa ya jinjtín. Nga je Jeobá ʼyaxkoán, jtín sʼin tiyoaa ningalani kjaʼaí kjaʼaí nʼia nga jngó jngoá. Kʼoa tsjoa satío tokoán nga̱ jé Jeobá tichjenngilee, nga̱ je kosonnile josʼín.