KJOAʼMIYA XI CHOTʼAYA 28
KJOAJNDA 123 Si̱tjosonlee jtínle Niná kʼoa kixi kjuintʼalee
Jméni xi ñaki kʼoatjín kʼoa jméni xi to énndiso
“Nda tʼekjáo xjoa̱xínkjándiano xi ngoyale xi ñaki kʼoatjín” (EFES. 6:14).
XI TÍNCHJA̱NI
Jósʼin jchañá xi ñaki kʼoatjín xi tʼatsʼe Jeobá nroani kʼoa jósʼin jchañá xi to énndiso xi ya nroani tʼatsʼe Na̱i kao tʼatsʼe chjota xi jtikená.
1. Jósʼe tokoán nga ʼyaa jokjoantjínni xi tʼatsʼe Niná.
XI CHOʼNDALE Jeobá maa tsjoachañá je Énle Niná kʼoa yaa chʼangiñá josʼin makjainná (Rom. 10:17). Tjínjngoo tokoán nga je naxinandále Niná kui je “xjáoja̱ma̱ xi tsjoánganʼiole xi kjoakixi” (1 Tim. 3:15). Kʼoa kao kjoatsjoa nitjosonlee je xi bándiaaná, nga̱ bakóyaná jmekjoanni xi bakóya je Biblia kʼoa tsjoáná kjoafaʼaitsjen xi binyakaoná nga kʼoasʼiaan josʼin mele Niná (Heb. 13:17).
2. Tojo tso Santiago 5:19, jméni xi koa̱nná tsa tsín si̱kuindaa yaoná.
2 Ningalani ʼyaa jokjoantjínni xi kjoakixi kʼoa ninga majinná nga tjínnele koanngíntjenngiaa je kjoafaʼaitsjen xi tsjoáná naxinandále Niná, tsa tsín si̱kuindaa yaoná koanle tjín xi kʼoanachaná (tʼexkiai Santiago 5:19). a Je Na̱i kui xi mele nga tsínti koa̱nkjainniná jmeni xi tso je Biblia kʼoa nga tsínti kjuintjenngiñá josʼin bándiaaná je naxinandále Jeobá (Efes. 4:14).
3. Ánni machjénni nga si̱tjosoán jotso Énle Niná (Efesios 6:13, 14).
3 (Tʼexkiai Efesios 6:13, 14). b Nʼio nda skósonnile je Na̱i josʼin ska̱nibason énndiso kʼoa tojeme kʼoasʼin, nga̱ kui xi mele nga kontra koatiole Jeobá je naxinandá xi tjín (Apoc. 16:13, 14). Kʼoati ʼyaa nga je Na̱i tosi tonda koasjaile josʼin nga kʼoanachale je choʼndale Jeobá (Apoc. 12:9). Kuinga machjénni nga kataʼyaa jméni xi kjoakixi kʼoa jméni xi to énndiso, kʼoa si̱tjosoán jotso je Énle Niná (Rom. 6:17; 1 Ped. 1:22). Machjén nga kʼoasʼiaan nga kuinje̱ngilee yaoná kʼianga kjoaʼaí kjoañʼai xi nʼio tse.
4. Jmé xi chótʼayajiaan i̱ kjoaʼmiya jebi.
4 I̱ kjoaʼmiya jebi jao koya tjínni xi chótʼayajiaan jméni xi machjén nga sʼiaan nga jchaa xi ñaki kʼoatjín kʼoa nga si̱tjosoán josʼin bándiaaná je naxinandále Niná. Kʼoa jan koya tjínni xi chótʼayajiaan jmeni xi tjínnele sʼiaan nga tosi tonda si̱tjosoán jotso je Énle Niná.
JMÉ XI TJÍNNELE SʼIAAN NGA JCHAA JE XI ÑAKI KʼOATJÍN
5. Jósʼin mangóson nga nokjonchá je Jeobá kʼoa nga ʼyaa xi ñaki kʼoatjín.
5 Kuijkónchaa je Jeobá. Nga nokjonchá Jeobá kui xi tsonile nga tsjoachaa kʼoa nga tsínkʼia kui kʼoasʼiaan jmeni xi tsín sasénle. Kʼianga nda kuiyoaa ngixko̱n, machjén nga kataʼyaa jméni xi ndatjín kʼoa jméni xi chʼaotjín. Kʼoati machjén nga jchaa jméni xi ñaki kʼoatjín kʼoa jméni xi to énndiso (Prov. 2:3-6; Heb. 5:14). Ngisa tsjoacha katamaa Jeobá kʼoa tsín chjota kuinókjonlee, nga̱ je chjota sakʼoa kui kʼoasʼín jmeni xi jtike Niná.
6. Jósʼin kichomani nga chjota kitsokjonle je chjota xi te mani.
6 Tsa je chjota ngisa kuijkónlee tikʼoajinni je Niná, chanjin tsín tikoa̱nkjainniná nga koa̱nle kʼoasjentjainá Jeobá. Si̱kjaʼaitsjenjinla jokoan je xi 12 chjota xi kikotsenché ya ʼnde jñani kʼoakitsole Jeobá nga tsjoále chjota israelita. Je chjota xi te mani alikui tsakakó nga tsjoake Jeobá, tosaa je kitsokjonle chjota cananeo. I kitso: “Alikui koa̱n kjuinrʼoé chjota jebi nga̱ ngisaa taja tikʼoajinni ñá” (Núm. 13:27-31). Kjoaixi nga tse nganʼio kisʼele chjota cananeo, tonga nga kʼoakitso chjota israelita nga tsín sikinjele chjota jebi yaa tsakakóni nga tsín tije Jeobá kisinʼiotʼani. Tjínnele kui kisikjaʼaitsjen tsakai jmeni xi kitsole Jeobá nga sʼin kʼoa josʼin sa jetsakasenkao Jeobá. Tsa kʼoalani kisʼin, tsabejin nga ngisa nʼio tse nganʼio tjínle Jeobá tikʼoajinni je chjota cananeo. Tonga je Josué kao Caleb jé Jeobá kisinʼiotʼa kʼoa koanmele nga nda koatio ngixko̱n. Kuinga i̱ kitsonile naxinandá: “Tsa tsjoa tjín kon Jeobá xi tʼatsaan, jé koasenkaoná nga kuitjásʼeen ʼnde jebi kʼoa tsjoáná” (Núm. 14:6-9).
7. Jméni xi koasenkaoná nga tosi tonda kuijkónchaa je Jeobá (kʼoati chótsenlai sén xi faʼaitʼa).
7 Tosi tonda kuijkónchaa je Jeobá tsa kuenta sʼiaan jmeni xi sasénle kʼianga jme xi nʼia (Sal. 16:8). Kʼianga kʼoéxkiaa je Biblia, si̱kjaʼaitsjenjiaan jebi: “Jókisʼian an tsa yalani tsakatejna nga kui nichxin”. Tobʼelañá, si̱kjaʼaitsjenla tsa tinoʼyalee jotjíotso chjota xi te mani. A koa̱nkjainná jmeni xi tjíotso kʼoa a kuinókjonñá. Axo kui kuenta sʼiaan nga tsjoachaa je Jeobá kʼoa nga mená nda kuiyoaa ngixko̱n. Nʼio nkjín chjota israelita xi tsín koankjainle jmeni xi kitso je Josué kao Caleb. Nga kʼoakisʼin, alikui jaʼasʼen ya ʼNde jña tsakʼinle nga kʼoaile (Núm. 14:10, 22, 23).
ʼYáni xi kichʼaʼénlai tsa jilani (Chótsenlai párrafo 7)
8. Ánni machjénni nga nangitokon koaan.
8 Nangitokon katamaa. Je Jeobá bʼéjnatsenle jókjoantjínni xi kixi je chjota xi nangitokon (Mat. 11:25). Nangitokon koan kʼianga tsakʼinyaná Énle Niná (Hech. 8:30, 31). Tonga machjén nga si̱kuindalee yaoná nga tsín ngʼakon katamaa. ʼYañá nga nʼio chjíle je kjoafaʼaitsjen xi tsjoá Biblia kao kjoafaʼaitsjen xi tsjoáná naxinandále Jeobá. Tonga tsa ngʼakon koaan, kʼoajin kuixoán nga kʼoati nʼio chjíle josʼin nikjaʼaitsjeen.
9. Jmé xi koasenkaoná nga tosi tonda nangitokon koaan.
9 Xi koasenkaoná nga tosi tonda nangitokon koaan kuinga si̱kjaʼaitsjeen nga tsín mangósoán xi kao Jeobá (Sal. 8:3, 4). Kʼoati koa̱n kʼoakʼuínlee Jeobá nga katabasenkaoná nga nangitokon katamaa kʼoa kʼoaiʼndee nga je katatsoyaná. Koasenkaoná nga tsín tokui kjuinñá josʼin nikjaʼaitsjeen, nga tosa kʼoasʼin si̱kjaʼaitsjeen josʼin mele. Nga bakóyaná kui síchjén je Énle kao naxinandále. Kʼianga kʼoéxkiaa je Biblia, kuenta sʼiaan nga sasénle Jeobá je chjota xi nangitokon kʼoa nga jtike je xi ngʼakon. Kʼoa tsa jme xá sʼe̱ná ya jinjtín alikui ngʼa chʼa̱sjee yaoná.
JMÉ XI TJÍNNELE SʼIAAN NGA TOSI TONDA SI̱TJOSOÁN JOTSO JE ÉNLE NINÁ
10. Jokji tífaʼato nichxin, ʼyáni xi tísíchjén Jeobá nga tíbándiaale je choʼndale.
10 Katamakjainná jotso je naxinandále Jeobá. Nichxin kjoatse, jé Moisés kao Josué kisichjén Jeobá nga kʼoakitsole naxinandále jmeni xi tjínnele sʼin (Jos. 1:16, 17). Je chjota israelita nda tsakatio kʼianga kisitjosonle je chjota xi je Jeobá tsakinyánda. Kʼianga jenʼio nkjín nó jaʼato, jé xi 12 pastro kisichjén Jeobá nga tsakándiaale je jtín xi kisatio nga kʼia (Hech. 8:14, 15). Xijekoanni, kʼoati kitjoejin kʼa xi chjotajchínga sʼin tsakatio ya Jerusalén xi tojngo kisixá kao pastro. Kʼianga kisitjoson chjotale Cristo josʼin kisʼendiaale, sa nʼio sa nʼio kisatio kjoamakjainle kʼoa sa nkjín sa nkjín koanni nga nyaon nyaon (Hech. 16:4, 5). Kʼoa nichxin xi tiyoaa ndʼaibi, kʼoati síchikontʼainná je Jeobá kʼianga kʼoasʼin mangíntjenngiaa josʼin bándiaaná je naxinandále. Jósʼe̱ kon je Jeobá tsa tsín si̱tjosonlee je chjota xi binyánda nga bándiaale naxinandále. Nga jchaa, chótʼayajinla jokoan nga tjíofi chjota israelita ya ʼNde jña tsakʼinle nga kʼoaile.
11. Jmé xi koantʼain je chjota xi kisixíjinkao Moisés (kʼoati chótsenlai sén xi faʼaitʼa).
11 Kʼianga tjíofi chjota israelita ya ʼNde jña tsakʼinle nga kʼoaile, tjínkʼa chjota xi kʼoati xá kjinele xi tsín kisasenle nga je Moisés kiskoéjin Jeobá nga kitsjoaxále, kʼoa i kitso: “Ngatsʼi naxinandá tsjení, [ali tojejin Moisés] ngatsʼi xi tjío kʼoa je Jeobá yaa tíjnajinbasenle” (Núm. 16:1-3). Tsje sʼin tsabekon Jeobá “ngatsʼi naxinandá” tonga jé Moisés kiskoéjin nga tsakándiaale (Núm. 16:28). Nga chʼaosʼin kisikʼaxki Moisés jékjoánni Jeobá xokitsole. Alikui kuenta kisʼin jmeni xi koanmele Jeobá to yaole kini kʼoa tokui xi koanmele kʼianga kʼoaile xá kʼoa sʼele nganʼio. Kisikjeson Jeobá je chjota israelita xi xíjin koan kao je xi ya kitsjoanganʼiole. Nkjín jmi koanni xi kʼoakisʼin (Núm. 16:30-35, 41, 49). Kʼoa nichxin xi tiyoaa ndʼaibi, je Jeobá alikui sasénkon ʼyani xi tsín sítjoson josʼin bándiaa je naxinandále.
ʼYáni xi tsakʼainganʼiolai tsa jilani (Chótsenlai párrafo 11)
12. Ánni nga koa̱n koa̱nkjainniná jotso naxinandále Niná.
12 Koaan koa̱nkjainná jotso naxinandále Niná. Kʼianga majinle je ndsʼee xi bándiaa nga machjén kʼianga kʼoantjaiyajin josʼin majinná je Biblia kʼoa tsakuije̱ josʼin tinixálee Niná tokjoan síkʼantjaiyajin (Prov. 4:18). Kuinga kʼoasʼínni nga̱ kui xi mele nga nda sʼe̱ kon Jeobá kʼoa yaa Biblia bʼangini jmeni xi sʼín. Machjén nga kʼoati sʼiaan tsanda ñá nga ya Biblia chʼa̱ngiñá jmeni xi sʼiaan.
13. Jméni “je én xi nda” ʼmile, kʼoa jméni xi tjínnele sʼiaan.
13 “Nda tʼejintakuin jo tso je én xi nda” (2 Tim. 1:13). “Je én xi nda” tsole texto jebi kui ngayeje jmeni xi tsoya je Biblia (Juan 17:17). Kʼoa jmeni xi makjainná yaa chʼangiñá jmeni xi tso je Biblia. Je naxinandále Jeobá kʼoatsoná nga tjínnele ya Biblia chʼa̱ngiñá jmeni xi makjainná. Tsa kʼoasʼiaan, nda kuiyoaa.
14. Jókisʼin kʼa chjotale Cristo nga tsínti kisitjosonni jotso Énle Niná.
14 Jósʼin kuichomani tsa tsínti si̱tjosonñá jmeni xi bakóya Énle Niná. Kataʼyala jokoan kʼianga siglo 1, tjínkʼa chjotale Cristo xi kʼoakitso nga jejaʼai nichxinle Jeobá. Tsakui nichxin jngo carta kichole kʼoa kʼoasʼin kisikjaʼaitsjen nga je Pablo kisikasén. Tjínkʼa chjotale Cristo xi Tesalónica tsʼe xi koankjainle jmeni xi tsakʼinle kʼoa tsín tsakásjaiya tsa kʼoatjín kʼoa tsa mai, kʼoa kʼoakitsole xi kjaʼaí jmeni xi kisʼejinle. Alikuijin kʼoakisʼin tsa kisikjaʼaitsjenjin jmeni xi tsakakóyale Pablo nga kichokonle (2 Tes. 2:1-5). Je Pablo kʼoakitsole nga tsín tsa to katamakjainle ngayeje jmeni xi kjuinrʼoé. Kʼoa nga tsín tikʼoa katamani, i kitsole kʼianga kiskile xi majaoni carta: “An xi Pablo ʼmina kao ndsa̱ tikjinino. Kʼoasʼin yʼa choa̱ ngayije xo̱n xi tsʼan. Kʼuisʼin kjia” (2 Tes. 3:17).
15. Jméni xi sʼiaan nga tsín énndiso si̱siaan. Jngo choa̱ tʼejnai (kʼoati chótsenlai sén xi faʼaitʼa).
15 Jmeni xi kiskile Pablo je chjotale Cristo xi Tesalónica tsʼe, kui bakóyaná nga tsínkui si̱siaan tsa jmeni xi sʼe̱jinná xi tsín mangóson kao jmeni xi bakóya Biblia. Kataʼyala jokisʼin chjota xi jtike naxinandále Niná ya Unión Soviética. Jngo carta kisikʼabíson jñani kʼoatso nga totsen katabatiojtín je ndsʼee. Kʼoatsakʼinle nga ya jaʼaini xo̱n jebi ya jña tjen sʼendiaanile xále Niná. Ningalani kʼoasʼin kichji carta jebi jobatío xi síkasén naxinandále Niná, je ndsʼee xi kixi kitʼale Niná alikui koankjainle. Koanjinle nga tsín kʼoatso carta jebi jotso je Énle Niná. Nichxin xi tiyoaa ndʼaibi, je chjota xi jtike Énle Niná kui Internet síchjén nga kaníbason xi tsín kixi tíjna nga̱ kui xi mele nga xkoa̱ya sʼin kuiyoaa. Kuinga machjénni nga tsín tokoa̱nkjainyejená jmeni xi noʼyá, jmeni xi bʼexkiaa tosa kuenta sʼiaan tsa mangóson jmeni xi tíʼminá kʼoa kao jotso je Énle Niná (2 Tes. 2:2; 1 Juan 4:1).
Tsínkui si̱siaan je énndiso xi ñaki kʼoatjín maná (Chótsenlai párrafo 15) d
16. Tojo tso Romanos 16:17, 18, jósʼin jchatokoán je chjota xi kui kaníbason je én xi tsínni kʼoatjín.
16 Likui kuinyatʼaxinlee je xi kixi fitʼale Jeobá. Je Jeobá kui xi mele nga jtín sʼin kuiyoaa, kʼoa tokʼiaa nga jtín sʼin kuiyoaa kao je ndsʼee tsa si̱tjosoán jotso je Énle Niná. Je chjota xi kui kaníbason je én xi tsínni kʼoatjín xkoa̱ya sʼin síkatíoná ya jinjtín. Kuinga kʼoatsoniná Niná nga tsínkui én si̱siaan ánni nga tsín si̱kjinnilee (tʼexkiai Romanos 16:17, 18). c
17. Jósʼin kuichomani tsa ʼyaa jotso je Énle Niná kʼoa tsa tosi tonda si̱tjosoán.
17 Kʼiatsa ʼyaa jokjoantjínni je Énle Niná kʼoa tsa si̱tjosoán, tosi tonda koa̱nchriantʼalee je Jeobá kʼoa nʼio sʼe̱jna kjoamakjainná (Efes. 4:15, 16). Kʼianga jetíjna kjoañʼai xi nʼio tse, jé Jeobá sikuindaná kʼoa alikui kʼoanachaná je Na̱i ninga énndiso ska̱nibason. Je Jeobá alikui tsjiónkonná tsa tosi tonda si̱tjosoán je Énle (Filip. 4:8, 9).
KJOAJNDA 122 Kixi katamaa ngantsjai
a Santiago 5:19: “ʼNdíndsʼe, tsa jngo xi jon xi xin kile ndiaakixi, kʼoa tsa xijngo nchjale nga sikʼófayatʼanile Niná”.
b Efesios 6:13, 14: “Kui nga kʼoasʼin chjoénio ngayije ki̱cha̱ xi tsʼe Niná, jméni nga kuiyotajasínilao je nichxin xi ñʼai tjín. Kʼoasʼin tojo kuiyotajao, nga jekʼoasʼin kinijngo ngayije. 14 Kʼoasʼin nʼio tiyondao. Nda tʼekjáo xjoa̱xínkjándiano xi ngoyale xi ñaki kʼoatjín. Tjakjáo ʼme̱no najñoki̱cha̱ xi ngoyale kjoa xi tjínle kjoakixi”.
c Romanos 16:17, 18: “Kʼoa bʼetsʼoano ndsʼe, nga chósonnilao je xi síjaoya xínkjín, xi síkajngi jée xínkjín, kontrale je kjoafaʼaitsjen xi kichotʼayao nga jon. Chja̱ʼaxinlao yaono nga je. 18 Je chjota xi kʼoakjoan alikui Nainá Jesucristo síxátʼale joni choʼnda, tonga toyaole síxántjai. Kjaí ntsjén én xi nchja̱, kʼoa kjaínga male nchja̱. Kʼoasʼin bʼanachale ni̱ma̱le xi tsínkui be”.
d XI TÍNCHJA̱NI SÉN XI FAʼAITʼA: Nichxin kjoatse je ndsʼee xi Unión Soviética tsakatio jngo carta kichole xi kʼoasʼin kichji josʼin kji je ndsʼee xi tjío ya jñani tjen sʼendiaanile xále Niná tonga jéni kisikasén je chjota xi kontra tjíole naxinandále Niná. Nichxin xi tiyoaa ndʼaibi, je chjota xi jtikená yaa tjen Internet kaníbasonni énndiso xi tʼatsʼe naxinandále Niná nga mele kʼoanachaná.
