1, 2. ʼYáni xi Sadoc tsakʼin (1 Crónicas 12:​22, 26-28).

 CHA̱NIYALA jkoaa jokoan nichxin kjoatse nga tsʼato 340,000 mani chjota tjíojtín nga rey kisikao je David nga je koatexoma ngakjijnda naxinandá Israel. Jan nichxin nga kinoʼya ʼndeʼndele chjota saʼnda chrian Hebrón nga tsakjáonajmí nga tsjoa kisatio kon kʼoa kisee (1 Crón. 12:39). Yaa tsakʼejnajinle jngo ti xi Sadoc tsakʼin, alikui matsen nga ya tsakʼejnajinle chjotankjín. Tonga je Jeobá tsabe kʼoa kui xi mele nga kʼoati kataʼyaa nga ya tsakʼejna ti jebi (tʼexkiai 1 Crónicas 12:​22, 26-28). a ʼYáni xi Sadoc tsakʼin.

² Naʼmi koan je Sadoc kʼoa yaa kisixákao je naʼmitítjon Abiatar. Tsee kjoachjine kitsjoale Jeobá je Sadoc nga koanjinle jmeni xi tjínndajinle (2 Sam. 15:27). Yaa kichokonle chjota nga kichosíjéle kjoafaʼaitsjen kʼoa nʼiojin koan. I̱ kjoaʼmiya jebi kui chótʼayajiaan nga nʼiojin koan Sadoc.

3. 1) Ánni machjénni nga nʼiojin koaan. 2) Jmé xi chótʼayajiaan i̱ kjoaʼmiya jebi.

³ Nga to jetífikjetʼa nichxin, je Na̱i nʼio tíbʼetʼale naxinandále Niná (1 Ped. 5:8). Machjén nga nʼiojin koaan nga kjesa síkjesonjin Jeobá je Na̱i kao jme xi chon sonʼnde (Sal. 31:24). Janla koya kataʼyaa josʼin koa̱n chjénngilee nga nʼiojin koan je Sadoc.

TʼAINGANʼIOLAI JE CHJOTAXÁLE NINÁ

4. Ánni kjoanʼiojin machjénniná nga kʼoainganʼiolee je Chjotaxále Niná (kʼoati chótsenlai sén xi faʼaitʼa).

⁴ Xi choʼndale Jeobá maa, ñaki kʼoatjío tokoán nga bʼainganʼiolee Chjotaxále Niná, tonga kʼoati machjén nga nʼiojin  koaan nga kʼoasʼiaan (Mat. 6:33). Tobʼelañá, kjoanʼiojin machjénná kʼianga ʼmiyasoán je Énle Niná kʼoa nga kʼoasʼin mangínkoaa yaoná jotso kjoatéxomale (1 Tes. 2:2). Makjoanni nga xkoa̱ya tjío je chjota, sakʼoa ñʼai maná nga kixi mangínkoaa yaoná (Juan 18:36). Nkjín ndsʼee xi tse kjoa tjíofaʼatojin nga ñʼai kjimale tao̱n, nga totaon tjíoʼya kʼoa nga ndoyá tjíonikatíoʼya nga tsín política tsjonjin yaole kʼoa nga tsín kjoajchán fijin.

5. Ánni nga tjínnenile nʼiojin koan je Sadoc nga ya tsakasenkao je David.

⁵ Kʼianga kicho Sadoc ya Hebrón nga kichokotsenle je David nga rey koan, tjennda kʼoa yʼa xi machjénle nga koai kjoajchán (1 Crón. 12:38). Tíjnanda nga koaikao je David nga koaikján kʼoa nga sitoánntjai je naxinandá Israel. Tsakui nichxin tsín nʼio nda koanle kiskan, tonga nʼiojin koan.

6. Jósʼin tsakasenkao je Sadoc nga nʼiojin koan je David (Salmo 138:3).

⁶ Jókoanni nga nʼiojin koanni je Sadoc. Kuijin tsakasenkao je choa̱le chjota xi nʼiojin koan, jolani je David. Je David nʼiojin koan nga tsakándiaale je chjota israelita nga ki kjoajchán, kuinga koanmenile ngatsʼi chjota israelita nga rey kisikao (1 Crón. 11:​1, 2). Jé Jeobá kisinʼiotʼa David kʼoa jé kisijéle nganʼio kʼianga chjota kitjenngike (Sal. 28:7; tʼexkiai Salmo 138:3 b). Je Sadoc kʼoati tsakasenkao je choa̱le chjota xi nʼiojin koan nga kui nichxin, jolani je Jehoiadá kao tile, xi Benaya tsakʼin, xi 22 chjota xi tsakinyatítjon xi ya kitsjoanganʼiole David (1 Crón. 11:​22-25; 12:​26-28). Ñaki kʼoatsakatío kon nga kitsjoanganʼiole je David nga rey koan.

7. 1) ʼYáni xi nda choa̱ tjíobatío nga nʼiojin kjima nichxin xi tiyoaa ndʼai. 2) Tojo tso video, jmé xi bakóyaná je choa̱le ndsʼee Nsilu.

 ⁷ Basenkaoná nga nʼiojin maa kʼianga chotʼayajiaan je choa̱ xi batío choʼndale Jeobá xi toje tsjoánganʼiole. Je Jesús, xi Rey sʼin tíjnaná alikui política kitsjonjin yaole (Mat. 4:​8-11; Juan 6:​14, 15). Jé Jeobá kisijéle nganʼio ngantsjai. Kʼoati nda choa̱ batío je ndsʼee xi sʼa xti nichxin xi tiyoaa ndʼai nga tsín política fijin kʼoa nga tsín kjoajchán fijin. Koaan tjasjai ya jw.org je choa̱ xi tjíobatío kʼa je ndsʼee xi sʼa xti. c

TISENKOAI JE NDSʼEE

8. Jósʼin bakó kjoanʼiojin je xi chjotajchínga sʼin tjío nga binyakao je ndsʼee.

⁸ Xi choʼndale Jeobá maa binyakaongañáñá xíngiaa (2 Cor. 8:4). Sakʼoa kjoanʼiojin machjén nga binyakoaa je ndsʼee. Tobʼelañá, ya jñani kjoajchán tjín, je xi chjotajchínga sʼin tjío be nga nganʼio machjénle je ndsʼee xi ya tjío. Fikaole tsojmi xi machjénle kʼoa tsakuije̱ nga koaikaole Biblia kao xo̱n xi Énle Niná faʼaitʼa. Kuinga tsjoake je ndsʼe̱ nga kʼoasʼínni ninga xkón batio (Juan 15:​12, 13). Nʼiojin kjima je ndsʼee joni Sadoc.

9. Tojo tso ya 2 Samuel 15:​27-29, jmé xi kitsole David je Sadoc (kʼoati chótsenlai sén xi faʼaitʼa).

⁹ Xkón tsakʼejna je David, nga tijéni tile xi Absalón tsakʼin koanmele tsakatéxomangajaole (2 Sam. 15:​12, 13). Kuinga kitokachjingani je David kʼoa i kitsole je choʼndale: “Tjían, tókachjinga nga̱ tsa mai i̱jin sikʼienná je Absalón” (2 Sam. 15:14). Kʼianga jetjenyandiaa kʼiaa jaʼaitsjenle je David nga ngisa nda tsa tjín xi kʼoéjna ya Jerusalén ánni nga je kʼoeyanajmísínile jme xi tíbʼéndajin Absalón. Kʼiaa kisikasén Sadoc kao naʼmi xi ngikʼa (tʼexkiai  2 Samuel 15:​27-29). d Tjínnele kisikuinda yaole chjota jebi nga̱ xkón tsakʼetsoma. Je Absalón to yaole kini, tsʼeen koan kʼoa tije kitjenngikeni nʼaile. Alikui ʼyaa jokisikao je chjota xi kichokonle tsa kisʼejinlanile nga je David kisikasén.

10. Jméni xi kisʼin Sadoc kao xi ngikʼa nga tsakinyakao je David.

¹⁰ Je David tsakʼéndajin jme xi sʼin kʼoa kʼoakitsole je Sadoc kao Husái, xi kʼoati nʼio miyole koanni (2 Sam. 15:​32-37). Je Husái kʼoakisʼin jokitsole David. Kʼoakitsole Absalón jméni xi sʼin nga koaikján kao David. Nga kʼoakisʼin je Husái, je David tsakʼejnanda nga kikján kao Absalón. Je Husái kʼoakitsole je Sadoc kao Abiatar jmeni xi jetsakʼéndajin kao Absalón (2 Sam. 17:​8-16). Kʼoa je Sadoc kao Abiatar kʼiaa kisikasénʼénle je David (2 Sam. 17:17). Jé Jeobá tsakasenkao je Sadoc kao naʼmi xi ngikʼa nga tsakinyakao David nga kitjontjaile yaole (2 Sam. 17:​21, 22).

11. Jósʼin koakoá kjoanʼiojin tojo kisʼin je Sadoc kʼiatsa kʼoakʼuínná nga kuinyakoaa je ndsʼee.

¹¹ Jósʼin koakoá kjoanʼiojin tojo kisʼin je Sadoc kʼiatsa kʼoakʼuínná nga kuinyakoaa je ndsʼee ya ʼnde jñani xkón chon. Xi títjon, kʼoasʼiaan jokuitsoná naxinandále Jeobá. Kʼianga kjoa sʼe, ngisaa nda nga nitjosoán joʼminá nga̱ kui xi basenkaoná nga jtín biyoaa. Kuinga machjénsíni nga si̱tjosoán josʼin sʼe̱ndiaaná (Heb. 13:17). Je xi chjotajchínga sʼin tjío, machjén nga nda skótʼayajin je xo̱n xi nikasénle xi kui tínchja̱ni josʼin koationda kʼiatsa jngolani kjoaxkón sʼe̱ (1 Cor. 14:​33, 40). Xi majaoni, nʼiojin katamaa tonga kʼoati machjén  nga si̱kuindaa yaoná (Prov. 22:3). Si̱nkjínlee tokoán josʼiaan kʼoa si̱kuindaa yaoná. Xi majanni, je Jeobá si̱nʼiotʼaa. Je Jeobá kui xi mele nga tsín jme xi katamaná ngatsʼiaa. Kuinga tsjoániná kjoafaʼaitsjen josʼiaan nga kuinyakoaa je ndsʼee ánni nga si̱kuindañá yaoná.

12, 13. Jméni xi bakóyaná je choa̱le ndsʼee Víktor kao Vitali (kʼoati chótsenlai sén xi faʼaitʼa).

¹² Kataʼyala choa̱le Víktor kao Vitali. Chjotajchínga sʼin tjío ndsʼee jebi kʼoa jé kikaole nandá kao tsojmi xi ma chine je ndsʼee xi tjío ya Ucrania. Itso je Víktor: “Tsakijnyisjainíjin ngakjijnda je tsojmi xi koanchjénle je ndsʼee, xi i̱ xi ján tsin chʼinsá jñani titomjaijin. Jngo ndsʼee xi tienda tíjnale xi kitsjoakjoatjaole je ndsʼee tsojmi xi nyale. Nga kʼoakisʼin, tsakinyakao choatse je ndsʼee nga kisʼele je tsojmi xi koanchjénle. Ñandia nga tibinyaijin tsojmi ya carro, kanla metro kjin kiska jngo bomba tonga tsín kitsinnga. Nga kʼia, kjitʼa kʼoakixinle Jeobá nga katatsjoána kjoanʼiojin nga tosi tonda koasenkoa je ndsʼee”.

¹³ Je Vitali itso: “Tjínnele nʼiojin koan, tejao hora kinʼiaijin jñani tsangínjin. Nga tjenyandiaijin, tsakʼetsʼoa ʼndeʼndele je Jeobá”. Nʼiojin koan je Vitali tonga kʼoati kisikuinda yaole. Itsosa: “Kjitʼaa kisijéle Jeobá nga katatsjoána kjoachjine, nga katasíchoyana jmeni xi sʼian. Tokui ndiaa kinichjainjin jñani kitsjoaʼnde je chjotaxá, kʼoa ngisaa nʼio kisʼejna kjoamakjainna kʼianga tsaʼbe nga tjíosíxájtín je ndsʼee, tsakjaʼáxin jmeni xi tjíochjoa yandiaa, tsakʼéxkó tsojmi xi ma chine, najño kʼoa tsa jmesani xi machjén kʼoa tijé binyáni carro tsojmi jebi. Tsakásjainajin jñani tsakiyonijin je Víktor kao an kʼoa kitsjoanajin xi kichinaijin”.

KIXI TʼINTʼALAI JEOBÁ

14. Jósʼe tokoán kʼianga jngo xíngiaa kʼoa tsa jngo miyoná sikjinle je Jeobá.

¹⁴ Nʼio aon sʼe tokoán tsa jngo xíngiaa kʼoa tsa jngo miyoná sikjinle Jeobá (Sal. 78:40; Prov. 24:10). Ngisaa aon maná tsa nʼio tjentʼalee xíngiaa. Tsakui kjoa jebi tibitjatojin koasenkaoli je choa̱le Sadoc.

15. Ánni nga kjoanʼiojin koanchjénnile Sadoc nga kixi kitʼale Jeobá (1 Reyes 1:​5-8).

¹⁵ Kʼianga jekoanjchínga David kʼoa nga jeme kuiyá, je Adonías, xi tile koanni jé koanmele tsakatéxomangajaole. Tonga je Jeobá kʼoakitso nga je Salomón koatexomangajaole David (1 Crón. 22:​9, 10). Je Sadoc kixi kitʼale Jeobá, tonga je miyole xi Abiatar tsakʼin tosaa je Adonías kitsjoanganʼiole (tʼexkiai 1 Reyes 1:​5-8). e Nga kʼoakisʼin Abiatar, alikui tikixi kitʼanile David kʼoa tsín tikixi kitʼanile Jeobá. Alikuijin nda kisʼe kon je Sadoc nga kʼoakisʼin je Abiatar. Tsʼato 40 nó nga naʼmi sʼin kisixá nga jao (2 Sam. 8:17). Ñatjen tsakʼaa je kaxa̱ jña kixinya je kjoa xi kisʼendajin (2 Sam. 15:29). Ñatjen kitsjoanganʼiole David tsakai kʼoa nkjín nó nga ñatjen kisixále Jeobá (2 Sam. 19:​11-14).

16. Jmé xi tsakasenkao Sadoc nga kixi kitʼale Jeobá.

¹⁶ Je Sadoc kixi kitʼale Jeobá ningalani tsín tikʼoakisʼinni je Abiatar. Tsín jao tsakʼé kon je David nga kixi je Sadoc,  nga̱ kʼianga kʼoatsakʼinle jme xi tíbʼéndajin je Adonías, tokjoan kʼoakitsole je Sadoc, Natán kao Benaya nga rey katasíkao Salomón (1 Rey. 1:​32-34). Kuijin tsakasenkao je Sadoc choa̱le choʼndale Niná xi tsakatio nga kʼia, jolani je Natán nga kixi kitʼale Jeobá kʼoa nga kitsjoanganʼiole je rey David (1 Rey. 1:​38, 39). Kʼianga rey koan Salomón, jé Sadoc kitsjoale je xá xi kisʼin Abiatar (1 Rey. 2:35).

17. Jósʼin chjénngilee je Sadoc tsa jngo xíngiaa sikjinle Jeobá.

¹⁷ Jósʼin chjénngilee je Sadoc. Kixi kjuintʼalee je Jeobá ninga jngo xíngiaa xi tsín tije sixánile (Jos. 24:15). Jé Jeobá koasenkaoná kʼoa tsjoáná kjoanʼiojin. Koaan kʼoétsʼoalee kʼoa tsín si̱kjinlee je ndsʼee. Nʼio chjí be je Jeobá nga kixi mangíntʼalee kʼoa sichikontʼainná (2 Sam. 22:26).

18. Jmé xi bakóyaná je choa̱le Marco kao Sidse.

¹⁸ Kataʼyala je choa̱le Marco kao Sidse, xi chjoónle mani. Alikui tije Jeobá kisixánile nga jao xtiyánchjínle kʼianga jekoanjchínga. Je Marco itso: “Saʼnda nga sʼa tsin je ʼndíxtiná, nʼio tsjoa satío tokoán kʼoa nʼio ndasʼin nikuindaa. Kʼoa kʼianga síkjinle Jeobá nʼio aon maná”. Itsosa: “Je Jeobá alikuikʼia títsjionkonnajin. Jé basenkaonajin nga bʼainganʼiongañálaijin xíngijin. Kʼianga an xi sikʼajenle tokoan, jé chjoónna tsjoánganʼiona. Kʼoa kʼianga je xi síkʼajenle kon an tsjoanganʼiole”. Je Sidse itso: “Tokui nga tíkaninajin nga je Jeobá tíbasenkaonajin kʼoa títsjoánajin nganʼio. Nʼio chʼao kisʼe tokoan nga̱ kʼoasʼin kisikjaʼaitsjen nga totʼatsʼan nga kʼoasʼin kisikjinle Jeobá je xtiyánchjínnajin. Tsakʼeyanajmíle Jeobá jokisʼe tokoan. Xijekoan, jngo tichjaa xi jekjoatse kiskajinña kichokonna kʼoa i kitsona: Sidse, alikui ji tjínli jée. Jé Jeobá tíbasenkaona nga tosi tonda kao kjoatsjoa tisixále”.

19. Jméni xi koa̱n sʼiaan.

¹⁹ Kui xi mele Jeobá nga kʼoati nʼiojin katamaa jokisʼin je Sadoc (2 Tim. 1:7). Je Jeobá kui xi mele nga je si̱nʼiotʼaa, alikui mele nga toñá chʼaa yaoná. Je Jeobá si̱nʼiotʼaa tsa jme kjoa kuitjátojiaan kʼoa alikui jao kʼoé tokoán nga je koasenkaoná nga nʼiojin koaan joni Sadoc (1 Ped. 5:10).