KJOAʼMIYA XI CHOTʼAYA 29
KJOAJNDA 121 Machjén nga chjoéxkoá yaoná
Si̱kuindaa yaoná nga tsín jée jtsaojiaan
“[Tjenyatokon tiyo] kʼoa tʼetsʼoao, jméni nga tsín tsao̱jinsínio jée” (MAT. 26:41).
XI TÍNCHJA̱NI
Alikui kuijnyíjée kʼoa tsínkui kʼoasʼiaan jmeni xi jée ska̱nijinná.
1, 2. 1) Jméni xi kitsole Jesús je chjotatjenngile. 2) Kʼianga kindoa je Jesús, jókisʼin je chjotatjenngile, kʼoa ánni (kʼoati chótsenlai sén xi faʼaitʼa).
JE Biblia itso: “Je espírituná tíjnanda, tonga je yaoná tsínle nganʼiojin” (Mat. 26:41b). a Nga kʼoakitso je Jesús koanjinle nga chjotajée maa. Tonga kʼoati kitso nga tsín koa̱n kʼoasʼin si̱kjaʼaitsjeen nga tsínkʼia so̱kojéená. Nga tiʼakʼiani, je chjotatjenngile Jesús kʼoakitso nga tsínkʼia tsjiónkon (Mat. 26:35). Ñaki kʼoatjío kon nga kʼoakitso tonga tsínni koanjinle nga tsínni kʼoama kʼianga jekjoa tiyojiaan. Kuinga i̱ kitsonile Jesús: “[Tjenyatokon tiyo] kʼoa tʼetsʼoao, jméni nga tsín tsao̱jinsínio jée” (Mat. 26:41a).
2 Je chjotatjenngile Jesús alikuini kʼoakisʼin jotsakʼinle, kuinga kitsokjonni kʼianga kindoa je Jesús. Nga tsínni tjíonda nga kʼia, tokitsjionkon je Jesús. Kʼoakitso tsakai nga tsínkʼia tsjiónkon (Mat. 26:56).
Je Jesús kʼoakitsole chjotatjenngile nga tjenyatokon katabatio ánni nga tsín tsokjonni, tonga alikui kʼoakisʼin, tosaa tokitokachjinga kʼianga kindoa je Jesús (Chótsenlai párrafo 1, 2)
3. 1) Tsa mená nga kixi kjuintʼalee Jeobá, ánni nga tsín koa̱n kʼoasʼin si̱kjaʼaitsjenñá nga tsínkʼia kui kʼoasʼiaan xi chʼaotjín. 2) Jmé xi chótʼayajiaan i̱ kjoaʼmiya jebi.
3 Alikui koa̱n kʼoasʼin si̱kjaʼaitsjeen nga tsínkʼia kui kʼoasʼiaan xi chʼaotjín. Kui xi mená kʼoasʼiaan ngantsjai jmeni xi sasénle Jeobá, tonga nga chjotajée maa sakʼoa ñʼai maná nga kui xi ndatjín kʼoanʼia (Rom. 5:12; 7:21-23). Sakʼoajin kui sʼe̱jnabasenná nga kui kʼoasʼiaan xi tsín ndatjín. Tsa mená kixi kjuintʼalee je Jeobá kao Jesús, machjén nga si̱kuindaa yaoná nga tsínkui kʼoasʼiaan xi tsín ndatjín. Jmeni xi chótʼayajiaan i̱ kjoaʼmiya jebi koasenkaoná nga si̱kuindaa yaoná. Kui jebi xi chótʼayajiaan. Xi títjon, kʼiáni nga ngisa machjén nga si̱kuindaa yaoná nga tsínkui kʼoasʼiaan xi chʼaotjín. Xi majaoni, jósʼin si̱kuindaa yaoná. Kʼoa xi majanni, jmé xi sʼiaan nga tosi tonda si̱kuindaa yaoná nga tsínkui xi chʼaotjín kʼoasʼiaan.
KʼIÁNI NGA NGISA MACHJÉN NGA SI̱KUINDAA YAONÁ
4, 5. Ánni machjénni nga si̱kuindaa yaoná nga tsínkui kʼoasʼiaan jmeni xi jée tjenkao.
4 Kʼianga kui xi chʼaotjín kʼoanʼia ninga tsínkjoan nʼio tse jée kuijnyá tojo tsín nda biyoaa ngixko̱n Jeobá. Kʼoa tsa tosi tonda kʼoasʼiaan, chanjin tse jée ska̱jiaan.
5 Ngatsʼiñá nga satíobasenná je kjoa xi chʼaotjín, tonga kjaʼaí kjaʼaínile xi ñʼai maná nga jngó jngoá. Tjínkʼa xi kui símetokon xi tse jée tjenkao, jolani nga mele sichajngi, tonga alikui tsjoáʼndele yaole nga kʼoasʼín. Tjínkʼa xi kui kʼoasʼín jmeni xi jndí bekon Niná, jolani xi ntsja síchjén nga sítjosjeyale yaole kʼoa xi pornografía kotsenle. Kʼoa tjínkʼa xi tjíobʼénele yaole nga tsín tikui kʼoasʼinni josʼín je chjota xi tsín be tʼatsʼe Niná, jolani nga toje bʼa yaole, nga chjota tsokjónle, nga ngotjo síjtinile yaole. Kuinga kʼoakitsoni Santiago nga kui kjoa satíobasenná nga jngó jngoá jmeni xi nimetokoán (Sant. 1:14).
6. Jmé xi tjínnele kuenta sʼiaan.
6 Alikui koa̱n kʼoasʼin si̱kjaʼaitsjeen nga tsínkʼia kjoa jtsaojiaan, nga̱ ʼyañá jmeni xi ñʼai maná nga jngó jngoá (1 Juan 1:8). Ningalani nda tiyoaa ngixko̱n Niná, je Pablo kʼoakitso nga tjínnele si̱kuindaa yaoná nga tsínkui xi chʼaotjín kʼoasʼiaan (Gál. 6:1). Machjén nga kuenta sʼiaan jméni xi ñʼai maná nga jngó jngoá (2 Cor. 13:5).
7. Jméni xi ngisa si̱kuindalee yaoná. Jngo choa̱ tʼejnai.
7 Tsa ʼyaa jmeni xi ñʼai maná, machjén nga si̱kjaʼaitsjenjiaan jméni xi koasenkaoná nga tsín ya ska̱jiaan je kjoa xi sʼe̱jnabasenná. Si̱kjaʼaitsjenla jokoan nichxin kjoatse. Yaa xo̱ntjoale jngo naxinandá jñani ngisa nʼio koankuinda ánni nga tsín ʼya xi koa̱n kjoaʼasʼensíni. Tikʼoasʼinni tsanda ñá, tsa ʼyaa jmeni xi jée ska̱nijinná machjén nga si̱kuindaa yaoná nga tsínkui kʼoasʼiaan (1 Cor. 9:27).
JÓSʼIN SI̱KUINDAA YAONÁ
8, 9. Jméni xi tjínnele kisʼin tsakai nga tsín jée kiskajin je ti xi síkʼaxki̱ Proverbios capítulo 7 (Proverbios 7:8, 9, 13, 14, 21).
8 Kataʼyala jme xi bakóyaná ya Proverbios capítulo 7, nga̱ yaa bakóyaná jméni xi sʼiaan nga tsín jée jtsaojiaan. Kui nchja̱ni tʼatsʼe jngo ti xi kisichajngi kao jngo chjoónchajngi. Ya versículo 22 kʼoatso nga “kjitʼanangi” kitjenngile chjoón jebi. Kʼoa je versículo xi tjío nga tongini kʼoatso jme xi títjonkjoanla kisʼin ti jebi nga chan jée kiskajinni.
9 Je ti jebi yaa jaʼachrian ya ndiaa ndʼiale chjoónchajngi kʼianga jekjimaʼña̱. Xijekoan, yaa ki ndʼiale chjoón (tʼexkiai Proverbios 7:8, 9). b Kʼianga jetsabe je chjoón alikui tikʼoasʼin kinroani, tosaa kitsjoaʼnde nga tsakʼéndsoʼa. Je chjoón jebi kʼoakitso nga jekisitjoson jmeni xi kitsole Niná nga tjín xi kitsjoatʼale tojoni nga katamakjainle ti jebi nga nda chjota (tʼexkiai Proverbios 7:13, 14, 21). c Tsa tsínlani kʼoakisʼin ti jebi alikuijin jée tsakajngi.
10. Tojo koan je ti xi síkʼaxki̱ ya Proverbios, ánni nga jée tsaojin kʼani nichxin xi tiyoaa ndʼaibi.
10 Tsa tsín si̱kuindaa yaoná kʼoajin koaan jokoan ti jebi. Kʼiatsa ʼya xi koa̱njngijée tsakui nichxin kʼoakuitso nga toxijña kʼoakoan kʼoa nga tsín majinle jókoannile nga jée kiskajinni. Koa̱nchoyajinle jókoanni nga kʼoakisʼin tsa sikjaʼaitsjenjin jméni xi kisʼin nga tongini nga kjesa jée kajinjin. Tsakui nichxin je kisimiyo xi tsín nda sʼín, tsa tsín ndatjín xi kiskotsenle ya Internet kʼoa tsa ya kije̱ jñani be nga jée ska̱jin. Tsa tsín titsakʼétsʼoani, tsa tsín titsakʼéxkiani Biblia, tsa tsín tikini kjoajtín kʼoa tsa tsín tikitsoyasonni. Tojo koan je ti xi síkʼaxki̱ ya Proverbios, alikui toxijña nga jée kajin jngo chjota.
11. Jméni xi tjínnele sʼiaan tsa tsín mená nga so̱kojéená.
11 Jokoan je ti xi síkʼaxki̱ ya Proverbios kui bakóyaná nga tsín koa̱n kui kʼoasʼiaan jmeni xi jée ska̱nijinná. Kui xi kitsoya je Salomón kʼianga kisikʼaxki̱ je ti kao je chjoónchajngi. I kitso tʼatsʼe chjoón jebi: “Ali yajin ʼmiyai je ndiaale” (Prov. 7:25). Kʼoati i̱ kitso: “Kjin tijnalai chjoón jebi; ali yajin nichrianlai xo̱ntjoa niʼyale” (Prov. 5:3, 8). Tsa tsín mená nga so̱kojéená, alikui koa̱n kui kʼoasʼiaan jmeni xi jée ska̱nijinná. d Tjín jmeni xi tsín chʼaotjín nga kʼoanʼia tonga tsín koa̱n kui kʼoasʼiaan tsa bele tokoán nga tsín ndasʼin kuichomani (Mat. 5:29, 30).
12. Jméni xi ñaki kʼoatsakʼé kon je Job, kʼoa jósʼin tsakasenkao nga kʼoakisʼin (Job 31:1).
12 Chjénngiaa choa̱le Job tsa tsín mená kui kʼoasʼiaan jmeni xi jée ska̱nijinná. Ñaki kʼoatsakʼé kon nga tsín kjaʼaí yánchjín simekon. I kitso: “Jngo kjoa tjínndajinna kao xkoan” (tʼexkiai Job 31:1). e Nga ñaki kʼoatsakʼé kon je Job, alikui kjoachajngi kiskajin. Kʼoati koa̱n ñaki kʼoakʼoé tokoán tsanda ñá nga tsínkui kʼoasʼiaan jmeni xi jée ska̱nijinná.
13. Ánni nga kuenta sʼianñá jmeni xi nikjaʼaitsjeen (kʼoati chótsenlai sén xi faʼaitʼa).
13 Kʼoati machjén nga kuenta sʼiaan jmeni xi nikjaʼaitsjeen (Éx. 20:17). Tjínkʼa xi kʼoatso nga tsín jme xi tjínle ninga kui si̱kjaʼaitsjeen xi chʼaotjín, nga̱ tsín ñaki kʼoanʼia jmeni xi nikjaʼaitsjeen. Tonga alikui kʼoatjín jotso, nga̱ tsa tosi tonda kui si̱kjaʼaitsjeen xi chʼaotjín, sakui sakuijin si̱metokoán. Tsa kʼoasʼiaan, tiñá tibʼejnabasennilee yaoná xi chʼaotjín. ʼYañá nga toxá kui faʼaitsjen sakʼoaniná xi chʼaotjín, kʼianga kʼoama alikui tosi tonda kui si̱kjaʼaitsjeen, tosa kjitʼanangi kui xi ndatjín si̱kjaʼaitsjeen ánni nga tsínkui si̱metokonñá xi chʼaotjín. Tsa tosi tonda kui xi chʼaotjín si̱kjaʼaitsjeen chanjin kuijnyíjée (Filip. 4:8; Col. 3:2; Sant. 1:13-15).
Tsínkui kʼoasʼiaan jmeni xi jée ska̱nijinná (Chótsenlai párrafo 13)
14. Jmésani xi koasenkaoná nga tsínkui kʼoasʼiaan xi jée ska̱nijinná.
14 Xi kʼoati koasenkaoná nga tsínkui kʼoasʼiaan xi jée ska̱nijinná kʼiaa nga ñaki kʼoakʼoé tokoán nga basenkaoná nga nitjosoán jotso kjoatéxomale Jeobá. Ningalani ñʼai koa̱n sakʼoaná nga kʼoasʼin si̱kjaʼaitsjeen josʼin mele Jeobá. Nda sʼe̱ tokoán tsa kʼoasʼiaan.
15. Jósʼin basenkaoná kʼianga kui xi ndatjín nikjaʼaitsjeen.
15 Machjén nga kui xi ndatjín si̱kjaʼaitsjeen, tsjoacha katamaa xi ndatjín kʼoa jticha katamaa xi chʼaotjín (Amós 5:15). Tsakui xi ndatjín si̱kjaʼaitsjeen, ngisaa choa ñʼai koa̱nná nga kui xi ndatjín kʼoasʼiaan kʼoa alikuijin kui kʼoasʼiaan jmeni xi jée ska̱nijinná. Kʼoa kʼianga kui xi chʼaotjín sʼe̱jnabasenná alikuijin kui kʼoasʼiaan.
16. Jósʼin basenkaoná kʼianga kui kʼoanʼia jmeni xi sasénle Jeobá (kʼoati chótsenlai sén xi faʼaitʼa).
16 Kʼianga kui kʼoasʼiaan jmeni xi sasénle Jeobá kui xi koasenkaoná nga kui kʼoasʼiaan xi ndatjín. Kui kʼoanʼia jmeni xi sasénle Jeobá kʼianga ʼmiyasoán kʼoa nga mangián kjoajtín. Nga kʼoanʼia alikui kui xi chʼaotjín nikjaʼaitsjeen (Mat. 28:19, 20; Heb. 10:24, 25). Kʼoati basenkaoná nga tsjoacha maa xi ndatjín kʼoa nga jticha maa xi chʼaotjín kʼianga chotʼayá Biblia kʼoa nga nikjaʼaitsjenjiaan jmeni xi tso (Jos. 1:8; Sal. 1:2, 3; 119:97, 101). Kuenta sʼiaan nga i̱ kitso je Jesús: “Tʼetsʼoao, jméni nga tsín tsao̱jinsínio jée” (Mat. 26:41). Kʼianga bʼetsʼoalee je Jeobá, basenkaoná kʼoa tosi tonda kui kʼoanʼia jmeni xi sasénle kʼoa tsjoa sʼe kon (Sant. 4:8).
Alikui jée jtsaojiaan kʼiatsa kui kʼoasʼiaan jmeni xi sasénle Jeobá (Chótsenlai párrafo 16) g
TOSI TONDA SI̱KUINDAA YAONÁ
17. Jméni xi ñʼai koanle je Pedro.
17 Tjín jmeni xi choa ñʼai maná nga tsín tikui kʼoanʼiañá, tonga kʼoati tjín jmeni xi ñʼai maná. Kʼoakoan je pastro Pedro. Nga chjota kitsokjonle jan kʼa kʼoakitso nga tsín bexkon je Jesús (Mat. 26:69-75). Tonga nga koanskanni alikui tikitsokjonni, nʼiojin koan nga kitsoya tʼatsʼe Jesús ngixko̱n chjotaxá (Hech. 5:27-29). Kʼoa nga je jaʼato nichxin, alikui tiya tsakjenkaoni je chjotale Cristo xi tsín chjota judío nga̱ kui kitsokjonle josʼin sikjaʼaitsjen je chjotale Cristo xi chjota judío (Gál. 2:11, 12). Nga kʼoakisʼin Pedro, yaa tsakakóni nga tojo chjota tsokjónle. Alikui ʼyaa tsa kicho nichxin nga tsín tiʼya xi kitsokjonnile.
18. Jméni xi ma sakʼoa ninga kʼoasʼin nikjaʼaitsjeen nga jetsín tikui nimetokonñá xi chʼaotjín.
18 Joni Pedro, tsakui nichxin kʼoati tjín jmeni xi tojo ñʼai maná. Jngo ndsʼee xi i̱ tso: “Te nó nga tsínti pornografía kiskotsennile. Ninga kʼoalani, sakʼoa koanmena nga kui kiskotsenle. Kʼoasʼin kisikjaʼaitsjen tsakai nga jetsín tikui simetokonña”. Tonga je ndsʼee jebi alikui kisikʼajenle kon, koanjinle jmeni xi tjínnele sʼin nga nyaon nyaon tsa mele nga tsínti pornografía skótsennile. Koanjinle nga tsínkui kʼoasʼin jmeni xi kui simekon nga pornografía skótsenle, kʼoa tsakui nichxin machjén nga kʼoasʼin jokjitse kʼoéjna nga kjesa faʼaijin sonʼnde chjotse. Tjíobinyakao je chjoónle kao xi chjotajchínga sʼin tjío jméni xi koa̱n sʼin nga tsínti pornografía skótsennile.
19. Jméni xi koa̱n sʼiaan nga tsín kuijnyíjée.
19 Je xi koasenkaoná nga tsín kuijnyíjée kʼiaa nga kjuintjenngiaa kjoafaʼaitsjen xi kitsjoa Jesús, nga i̱ kitso: “Tjenyatokon tiyo”. Kui xi kitsonile nga si̱kuindaa yaoná nga tsínkui kʼoasʼiaan xi jée ska̱nijinná. Ningalani tsínkui xi chʼaotjín nimetokoán, alikui kui kʼoasʼiaan jmeni xi bele tokoán nga jée ska̱nijinná (1 Cor. 10:12). Tosi tonda kui kʼoatʼiain jmeni xi basenkaoli nga tsínkui nimetokuin xi chʼaotjín. Proverbios 28:14 itso: “Je chjota xi síkuindantsjai yaole tsjoa sʼe̱ kon” (2 Ped. 3:14).
JÓSʼIN BASENKAONÁ NGA NIKUINDAA YAONÁ
20, 21. 1) Jósʼin basenkaoná nga nikuindaa yaoná. 2) Jméni xi sʼin Jeobá tsa kʼoénelee yaoná nga tsínkui xi chʼaotjín kʼoasʼiaan (2 Corintios 4:7).
20 Ndasʼin bichómani nga nikuindaa yaoná nga tsínkui kʼoanʼia jmeni xi jée ska̱nijinná, nga̱ tongotjo tsjoa sʼe tokoán nga bijnyijée tonga alikui mangóson jokji tsjoa sʼe tokoán nga nitjosoán jmeni xi tsoná Jeobá (Heb. 11:25; Sal. 19:8). Kʼoati ʼyaa nga kui xá tiyoñá nga si̱tjosoán josʼin mele (Gén. 1:27). Tsa kʼoasʼiaan, nda sa̱tío tokoán kʼoa koaan kuiyoaa ngantsjai nichxin (1 Tim. 6:12; 2 Tim. 1:3; Jud. 20, 21).
21 ʼYañá nga chjotajée maa, tonga ali tsakuijin xi tsonile nga tsín koa̱n josʼiaan nga kui xi chʼaotjín nimetokoán. Jé Jeobá koasenkaoná (tʼexkiai 2 Corintios 4:7). f Je Biblia kʼoatso nga je Jeobá tsjoáná “je nganʼio xi nʼio tse”. Tonga kʼoati machjén nga chʼa̱sjee nganʼio tsanda ñá. Xi tsonile, tjínnele kʼoénelee yaoná nga nyaon nyaon nga tsínkui kʼoasʼiaan jmeni xi jée ska̱nijinná. Tsa si̱kuindaa yaoná jokji tjen kʼoakoa̱nná, jé Jeobá tsjoáná nganʼio xi koa̱nchjénná kʼianga si̱jélee (1 Cor. 10:13). Nga je Jeobá koasenkaoná alikui kui kʼoasʼiaan jmeni xi jée ska̱nijinná.
KJOAJNDA 47 Nyaon nyaon kʼoétsʼoalee Jeobá
a JÓSʼIN TSOYANILE: Nga “espíritu” síkʼaxki̱ ya Mateo 26:41 kui nchja̱ni nga kʼoatjío tokoán nga mená kui kʼoasʼiaan xi ndatjín. Kʼianga “yaoná” síkʼaxki̱ kui nchja̱ni nga chjotajée maa. Ninga kʼoatjío tokoán nga kui xi ndatjín mená kʼoasʼiaan, kuijin kʼoasʼiaan xi chʼaotjín tsa tsín si̱kuindaa yaoná.
b Proverbios 7:8, 9: “Yaa jaʼachrian ya ndʼiale chjoón kʼoa yaa ndiaa ki 9 kʼianga jekjimaʼña̱, nga toje koa̱nnjion”.
c Proverbios 7:13, 14, 21: “Tsoakjá kʼoa bʼéndsoʼa; nga koʼa i tsole: 14 Ndʼai kasitjosoan jmeni xi kixinle Niná nga tjín xi katsjoatʼale. 21 Koankjainle je ti jmeni xi kitsole je chjoón”.
d Tsa ʼyani xi jée koa̱njngí yaa koa̱nsjaile kjoafaʼaitsjen xi koasenkao ya libro Koaan nda kuiyoaa ngantsjai nichxin, kjoaʼmiya 57 punto 1 saʼnda 3, kao jñani “Kui si̱kjaʼaitsjeen nichxin xi sʼa nroa” tso, xi faʼaitʼa Xo̱n xi Bájinkonná xi tsʼe noviembre 2020, página 27 saʼnda 29, párrafo 12 saʼnda 17.
f 2 Corintios 4:7: “Tonga tjínnajin je kjoabi xi nʼio nda joni tsa jayale jngo tii xi niʼnde, jméni nga jchasínile nga je nganʼio xi nʼio tse tsʼe Niná ní, ali tsainjinjin”.
g XI TÍNCHJA̱NI SÉN XI FAʼAITʼA: Jngo ndsʼee xi kui texto xi maxkia nga nyaon nyaon tíbʼéxkia, Biblia tíbʼéxkia kʼianga tísíkjáya ya tʼaxále kʼoa fi kjoajtín nga jemaxon.
