A tsakʼexkianí je Xo̱n xi Bájinkonná xi chriansʼa kitjo. A koaanli kʼoasí jmeni xi kjonangi ibi:

Kʼianga tjín xi bʼéndajin je naxinandále Niná, jméni xi tjínnele sʼin je superintendente xi tsʼe circuito, je xi chjotajchínga sʼin tjío kʼoa kao xi kjaʼaísa ndsʼee.

Tjínnele kjitʼanangi sitjoson. Koaan skónangile yaole jebi: “A basenkaoña xi ngikʼa nga ngisa nda sixále Niná. A tsjoanganʼioña kʼoa a kjitʼanangi sitjosoan jmeni xi bʼéndajin naxinandále Niná” (w16.11, p. 14).

Kʼiáni kisikatíonʼio Babilonia xi nʼioje je chjotale Cristo.

Kʼiaa kʼoakoan nga tosʼa choatse jaʼato nga jekʼien pastro. Kʼiaa tsʼatsen je xi koanmele tsakinyatítjon. Je yo̱ngo̱ kao chjotaxá, jé xi kʼoakitso nga relijión sʼin kataʼyale josʼin kitsoya je xi yátsʼi̱n tsakinyále Niná kʼoa koanmele kisichangi jmeni xi kitsoya je chjotale Cristo. Tonga tonginile nó 1914, je chjotale Cristo xi ya ngʼajmi koai, kʼiaa tsakʼétsʼiakao nga tsakationdái (w16.11, p. 23-26).

Jmé xi tsoyanile nga kui nisinlee “kjoale yaoná” kʼoa nga kui nisinlee “kjoa xi tsʼe Espíritu Santo” (Rom. 8:6).

Je xi kjoale yaoná sísinle, tokui síkjaʼaitsjen xi chʼaotjín símekon kʼoa tokui nchja̱ni. Kʼoa je xi kui sísinle kjoa xi tsʼe Espíritu Santo, kui síkjaʼaitsjen xi tʼatsʼe Niná kʼoa kʼoasʼin síkjaʼaitsjen josʼin síkjaʼaitsjen Niná. Tsjoáʼndee nga je nganʼiotsjele Niná bándiaale. Nga kui nisinlee kjoale yaoná kjoabiya bichómani, tonga nga kui nisinlee kjoa xi tsʼe Espíritu Santo kjoabijnachon bichómani kʼoa nyʼán satío tokoán (w16.12, p. 11-14).

Jméni xi koasenkaoná nga tsín nʼio si̱kjáojiaan.

Kui títjon kʼoasʼiaan xi ngisa chjíle, kuenta sʼiaan jokji tjen kʼoakoa̱nná, chʼa̱sjeʼaa nichxin nga nikjáyaa, tsjoa kʼoé tokoán nga chótsenlee jmeni xi koannda, tsjoa kʼoé tokoán, sʼiaan ejercicio kʼoa nda sóyofe (w16.12, p. 18, 19).

Ánni nga nʼio chjínile nga nangitokon koaan.

Tsa nangitokon maa, kuentajin sʼiaan nga tsín toñá kʼoakoa̱nná kʼoasʼiaan tojmeni. Machjén nga si̱kjaʼaitsjeen nga bʼakaotʼale xi kjaʼaí jmeni xi nʼia, kʼoa tsín kʼoasʼin si̱kjaʼaitsjeen nga ngisa ngʼa tiyolee xi ngikʼa (w17.01, p. 16).

Jósʼin ʼyañá nga je Niná tsakándiaale cuerpo gobernante nga siglo 1 tojosʼin tíbándiaale ndʼaibi je xi ya tjíojin Cuerpo Gobernante.

Jé nganʼiotsjele Niná tsakinyakao nga tsabe jokjoantjínni je Énle Niná, jé ánkje tsakinyakao nga tsakándiaale josʼin kitsoyason kʼoa kui Énle Niná tsakándiaale. Kʼoati ma nichxin xi tiyoaa ndʼaibi (w17.02, p. 24-26).

Jméni xi koasenkaoná nga chjí jchatokoán je kjoabʼechjíntjai.

Ño koya xi koasenkaoná kui jebi: ʼyáni xi kitsjoa, ánni nga kitsjoani, jókji kjoama̱ tsakʼéngi, kʼoa jmé kjoanda xi kisoko. Machjén nga si̱kjaʼaitsjenjiaan xi tʼatsʼe jebi (wp17.1, p. 4, 5).

Jngo chjotale Cristo, a koaan sikʼantjaiya ijngokʼa jmeni xi jekabʼéndajin.

Ningalani tjínnele si̱tjosoán je énná, sakʼoaa machjén nga nikʼantjaiya ijngokʼa jmeni xi bʼendajiaan. Kʼianga kʼoakoannile je chjota xi Nínive tsʼe jmeni xi kisʼin, je Niná likuini kisikjeson. Sakʼoajin kʼoati tjínnele si̱kʼantjaiya ijngokʼá jmeni xi bʼendajiaan, jolani kʼianga bʼantjaiyajin jotjínni je kjoa (w17.03, p. 13, 14).

Ánni nga xkón tíjnani tsa chʼaosʼin si̱kʼaxkiaa xi kjaʼaí.

Tsa kʼoasʼiaan, ngisaa koa̱ntse je kjoa. Ni kʼoatjín josʼin tinikjaʼaitsjeen kʼoa ninga mai, tsakui én xi síkiʼaonná kʼoakʼuínlee tsa ʼyani tsínkui kʼoendajin je kjoa (w17.04, p. 18).