Alikui si̱chajiaan nga toje Jeobá xi bakinle batéxoma
“Katabe chjota nga ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde” (SAL. 83:18).
KJOAJNDA 46, 136
1, 2. 1) Jmé kjoani xi nʼio tjínle kjoandosin bʼakaotʼaná ngatsʼiaa. 2) Ánni nga nʼio tjínnile kjoandosin nga koa̱njinná xi tʼatsʼe jebi.
NʼIO nkjín chjota xi kui tao̱n ngisa mandosinle. Kuinga nʼio bʼénenile yaole nga básjai kʼoa tsín mele sícha jokji jetjínle. Kʼoa tjínkʼa xi kui ngisa mandosinle je familiale, nga tsín chʼin sʼe̱le kʼoa tsakuije̱ xi bichótjenngi.
2 Tonga tjín jmeni xi ngisa tjínle kjoandosin tikʼoajinni ngayeje jmeni xi jekanikʼaxkiaa. Je xi ngisa tjínle kjoandosin kuinga jchale nga toje Jeobá xi bakinle batéxoma. Tsa tsín si̱kuindaa yaoná, kuijin nʼio si̱kjáojiaan jmeni xi nʼia nga nyaon nyaon kʼoa tsakuije̱ kjoa xi tjínná, kʼoa tsínjin tikuenta sʼianñá jmeni xi ngisa nʼio tjínle kjoandosin. Kʼianga ngisasa nda koa̱njinná jokji chjíle nga je Jeobá bʼainganʼiolee, ngisaa koa̱nná josʼin kʼoéndajiaan je kjoa xi sʼená nga nyaon nyaon kʼoa ngisaa koa̱nchriantʼasalee Niná.
ÁNNI NGA NʼIO TJÍNNILE KJOANDOSIN
3. Jméni xi kitso je Na̱i tʼatsʼe Jeobá.
3 Je Na̱i kʼoakitso nga tsín bakinle Jeobá nga je koatexoma, nga tsín kixi josʼin batéxoma kʼoa nga tsínkui xi ndatjín tsjoáná, kʼoa nga ngisa nda kuiyoaa kʼiatsa toñá chʼaa yaoná (Gén. 3:1-5). Kʼoati kitso nga nijngojin chjota xi kixi koaitʼale Niná kʼiatsa kjoa kjoaʼatojin (Job 2:4, 5). Je Jeobá títsjoáʼndee nga kataʼyale nga tsín ndasʼin bichómani kʼiatsa tsín je koatexomaná.
4. Ánni nga tjínnenile sʼe̱ndajin jmeni xi kitso je Na̱i.
4 Je Jeobá be nga tsín kʼoatjín jokitso je Na̱i. Tonga ánni nga títsjoáʼndenile nga katabakó tsa kʼoatjín jmeni xi kitso. Kuinga títsjoáʼndeni Niná nga̱ kʼoati bʼakaotʼale je ánkje kʼoa kao je chjotasonʼnde (tʼexkiai Salmo 83:18). * Nʼio nkjín chjota xi tjíobʼasjengi josʼin batéxoma Niná, tojo kisʼin je Adán kao Eva. Nga kʼoakjima, tjínjinkʼa xi kʼoasʼin sikjaʼaitsjen nga kʼoatjín jokitso je Na̱i. Kʼoa nga kjesa sʼendajinjin kjoa jebi, tsín nyʼán tiyoaa kʼoa tsín jtín tiyoaa. Tonga kʼianga jejchale nga toje Jeobá xi bakinle batéxoma, ñaki ndasʼin kuiyoaa ngantsjai nichxin kʼianga je koatexomaná (Efes. 1:9, 10).
5. Jósʼin bʼainganʼiolee nga toje Jeobá xi bakinle batéxoma.
5 Ñaki jchale nga kixi josʼin batéxoma je Niná. Kʼoati jchale nga tsín ndasʼin bichótsjoá josʼin batéxoma je Na̱i kao chjotasonʼnde, kʼoa kuinga si̱kjesonni. Jé Chjotaxále Niná koatexoma. Kʼoa jé koatio chjota xi tsjoánganʼiole josʼin batéxoma je Jeobá (Is. 45:23, 24). A mená nga ya kuiyojinlee je chjota xi koatio kʼianga jekoatexoma Chjotaxále Niná. Tsa jaon, machjén nga kuenta sʼiaan kʼoa katamajinná jokji kjoandosin tjínle nga kataʼyale nga toje Jeobá xi bakinle batéxoma.
NGISAA TJÍNLE KJOANDOSIN TIKʼOAJINNI NGA KUITJO̱NTJÉ
6. Jókji kjoandosin tjínle nga jchale nga toje Jeobá xi bakinle batéxoma.
6 Kʼianga jchale nga toje Jeobá xi bakinle batéxoma, kui xi ngisa tjínle kjoandosin tikʼoajinni nga ñá ndasʼin kuiyoaa. Tonga alikui kui xi tsonile tsa tsín jme kjoandosin tjínle nga kuitjo̱ntjé kʼoa tsa tsín mandosinle Jeobá xi tʼatsaan. Jósʼin ʼyañá.
7, 8. Jósʼin basenkaoná nga jchale nga toje Jeobá xi bakinle batéxoma.
7 Je Jeobá nʼio chjí bená. Nga tsjoakená, saʼnda kitsjoa je ʼNdíle nga koa̱n kuitjo̱ntjé kʼoa nga koa̱n kuiyoaa ngantsjai nichxin (Juan 3:16; 1 Juan 4:9). Tsa tsínlani sitjoson je Jeobá jmeni xi tongini tso, kuijin kʼoangini je Na̱i nga kʼoakuitso nga ndiso je Jeobá, nga tsín kixi josʼin batéxoma kʼoa nga tsínkui xi ndatjín tsjoáná. Kʼoajinti tsjoa koa̱nle je chjota xi besin kʼoa xi jtike Niná, xi i̱ tso: “Jñá tíjna ndai xi kitsjoa tsʼoa nga kjoaʼaí. Jo saʼnda nga kʼen xijcháná, tojo kʼoasʼin chon jo saʼnda nga kisʼenda sonʼnde” (2 Ped. 3:3, 4). Tonga je Jeobá sitjoson jmeni xi tso. Kʼoa nga kʼoasjentjai je chjota xi kixi koaitʼale, kʼoasʼin koakoni nga toje xi bakinle batéxoma (tʼexkiai Isaías 55:10, 11). * Xi ijngosani, kui kjoatsjoacha bʼangini josʼin batéxoma je Jeobá. Alikui jao tjínná nga tsjoake koa̱n ngantsjai je choʼndale xi kixi koaitʼale (Éx. 34:6).
8 Kʼianga majinná nga ngisa tjínle kjoandosin nga kataʼyale nga je Jeobá xi bakinle batéxoma, alikui kui xi tsonile nga tsín chjí ʼyaa nga kuitjo̱ntjé kʼoa tsa tsín chjí bekonná je Niná. Xi machjén nga kuenta sʼiaan, kuinga tsín si̱chajiaan jmeni xi ngisa tjínle kjoandosin kʼoa nga je kʼoainganʼiolee josʼin batéxoma je Jeobá.
JE JOB KISIKIXIYAA JOSʼIN KISIKJAʼAITSJEN TSAKAI
9. Jméni xi kitso je Na̱i xi tʼatsʼe Job (chótsenlai sén xi fitsʼiani kjoaʼmiya jebi).
9 Nʼio chjíle nga ngisa kʼoailee kjoandosin nga je Jeobá xi bakinle batéxoma. Je libro xi tsʼe Job kui bʼéyanajmí nga je Na̱i kʼoakitso nga tsín tije Niná sixánile je Job kʼiatsa nʼio tse kjoa kjoaʼatojin. Xi koanmele je Na̱i kuinga je Jeobá katatsjoále kjoañʼai je Job. Tonga je Niná alikui kʼoakisʼin, ninga kitsjoaʼnde nga kichotʼayakao je choʼndale. Je Jeobá i kitsole je Na̱i: “Ngayeje xi tjínle, ji xi ʼyani jonikoai” (tʼexkiai Job 1:9-12). * Je Job kisichaa je choʼndale, je tsojmi xi tjínle kao xi te mani xtile. Je Na̱i kui xi koanmele nga kʼoasʼin katasíkjaʼaitsjen je Job nga Niná títsjoále kjoañʼai (Job 1:13-19). Xijekoan, je Na̱i jngo chʼintáo kisikasénne je Job (Job 2:7). Kʼoa ʼndele nga tsjoánganʼiole je chjoónle kao xi jan chjota kichokonle, tosaa kisikʼajen kon jmeni xi kitsole (Job 2:9; 3:11; 16:2).
10. 1) Jósʼin tsakakó je Job nga kixi kitʼale Niná. 2) Tonga ánni koanchjénni nga kinikixiyanda.
10 A kʼoatjín jokitso je Na̱i. Mai. Nga̱ je Job alikui yátsʼi̱n tsakasénle je Niná (Job 27:5). Tonga je Job kisichajin jmeni xi ngisa tjínle kjoandosin. Kui ngisa kini nga koanmele tsakakó nga kixi kjima kʼoa saʼnda koanmele nga sʼe̱yanajmíle ánni nga kjoañʼai tíjnajinni (Job 7:20; 13:24). Tsakui nichxin kʼoakuixoán nga kixi tíjna nga kʼoakitso nga̱ nʼio tse kjoañʼai jaʼatojin. Tonga je Jeobá kisikixiyanda. Jméni xi kitsole.
11, 12. 1) Jméni xi koanjinle je Job nga tsakasenkao Jeobá. 2) Jókisʼin je Job.
11 Jmeni xi kitso Jeobá yaa faʼaitʼa kapítulo 38 saʼnda 41 xi tsʼe librole Job. Tonga alikui jña kʼoatso tsa tsakʼinyale je Job ánni nga kjoañʼai tíjnajinni. Je Niná tsakasenkao nga katamajinle nga tsín mangósonkao josʼin tíjna je Niná, nga̱ je Job nʼio nangi tíjna kʼoa je Jeobá nʼio jeya tíjna. Kʼoa tsakasenkao nga koanjinle nga tjín kjoa xi ngisa tjínle kjoandosin (tʼexkiai Job 38:18-20). * Jmeni xi kitsole Jeobá kui xi tsakasenkao je Job nga kisikixiya je kjoafaʼaitsjenle.
12 Nga jenʼio tse kjoa tífaʼatojin je Job, a nʼio tsakjákao Jeobá nga kʼoakitsole. Mai. Kʼoa je Job kʼoati tsín kʼoasʼin kisikjaʼaitsjen. Koanjinle jokjoantjínni je kjoa. Saʼnda i kitso: “Tsín nda sʼe tokoan tʼatsʼe jme xi kaxian, yaa koatejnajian jinchao kao chaolʼí nga kʼoamanina” (Job 42:1-6). Nga títjon, jngo ti xi Elihú tsakʼin kʼoati tsakasenkao nga sikixiyanda je kjoafaʼaitsjenle (Job 32:5-10). Je Job kinrʼoé jotsakʼinle kʼoa kisikixiyanda kjoafaʼaitsjenle. Je Jeobá tsabee nga ndasʼin kisikjaʼaitsjen je Job kʼoa kʼoakitso nga kixi kitʼale (Job 42:7, 8).
13. Jósʼin tsakasenkao je Job jmeni xi kitsole Jeobá ninga kʼia nga jenda tsakʼejnani.
13 Jmeni xi kitsole Jeobá je Job tojo tsakasenkao ninga kʼia nga jenda tsakʼejnani. “Je Jeobá, ngisaa kisichikontʼain je Job tikʼoajinni nga títjon”. Kʼoa nga jeki nichxin, “ngi ñato xtixʼin kisʼesale kʼoa jan xtiyánchjín” (Job 42:12-14). Je Job kisikjáojin je xtile xi kisicha xi totʼatsʼe Na̱i. Tochajinle tse kichajinnile je kjoañʼai xi jaʼatojin. Kʼoa ningalani koanjinle ánni nga kjoañʼai tsakjaʼáni, tsakui nichxin kui kisikjaʼaitsjen ánni kitsjoaʼndeni Niná nga kʼoasikji kjoañʼai tsakjaʼá. Nga kui kisikjaʼaitsjen jmeni xi kitsole Jeobá, kui xi tsakasenkao kʼoa xi kitsjoanganʼiole (Sal. 94:19).
Kuenta sʼiaan jmeni xi ngisa tjínle kjoandosin nga kjoa bitjatojiaan (Chótsenlai párrafo 14)
14. Jméni xi bakóyaná nga kjoa jaʼatojin je Job.
14 Nga nikjaʼaitsjenjiaan je kjoa xi jaʼatojin Job, kʼoati basenkaoná kʼoa tsjoánganʼioná. Je libro xi tsʼe Job kui xá kichjini “nga koakoyaná, jméni nga sʼe̱síniná kjoachoya[...] xi totʼatsʼe kjoatsejta kao kjoanijetakon xi tjínle xo̱n Escrituras” (Rom. 15:4). Xi bakóyaná kuinga tsínkui nʼio si̱kjaʼaitsjeen jme kjoa xi bitjatojiaan kʼoa tsín si̱chajiaan nga ngisa tjínle kjoandosin nga kataʼyale nga je Jeobá xi bakinle batéxoma. Tojo kisʼin je Job, jé Jeobá bʼainganʼiolee kʼianga kixi mangíntʼalee ninga kʼia nga nʼio ñʼai tjín kjoa bitjatojiaan.
15. Jósʼin bichómani kʼianga kixi mangíntʼalee Niná kʼianga kjoa bitjatojiaan.
15 Nga nikjaʼaitsjenjiaan nga kjoañʼai jaʼatojin je Job nʼio basenkaoná, nga̱ bakóná nga tsínkui nga jtile je Jeobá nga kjoa bitjatojinñá. Kʼianga kjoa bitjatojiaan, tjoʼndená nga bakoá nga je Jeobá bʼainganʼiolee (Prov. 27:11). Kʼianga chókjoajinná je kjoa xi bitjatojiaan, nda sʼe kon je Jeobá kʼoa ngisaa nʼio sʼejna je kjoachoya xi tjínná (tʼexkiai Romanos 5:3-5). * Josʼin kisichikontʼain Jeobá je Job, bakó “nga je Nainá [Jeobá] kjaínga tjínle kjoamatakon” (Sant. 5:11). Kʼiatsa kʼoainganʼiolee nga toje Jeobá xi bakinle batéxoma, tse kjoanichikontʼain tsjoáná. Nga ʼyaa jebi, basenkaoná nga sʼená kjoatsejta kʼoa nga tsjoa satío tokoán ninga nʼio tse kjoa bitjatojiaan (Col. 1:11).
ALIKUI SI̱CHAJIAAN NGA TOJE JEOBÁ XI BAKINLE BATÉXOMA
16. Ánni nga nʼio tjínnile kjoandosin nga si̱kjaʼaitsjenjiaan nga kataʼyale nga toje Jeobá xi bakinle batéxoma.
16 Kʼianga kjoa tiyojiaan, tsakui nichxin likui kui fiya jkoaa nga nʼio tjínle kjoandosin nga toje Jeobá xi bakinle batéxoma. Ninga tosʼa choa kjoa tibitjatojiaan, tokuijin sʼe̱ya jkoaa kʼiatsa kui nʼio si̱kjaʼaitsjeen. Kuinga ndatjínsíni nga kjitʼa si̱kjaʼaitsjeen nga nʼio tjínle kjoandosin nga kʼoainganʼiolee nga toje Jeobá xi bakinle batéxoma kʼiatsa kjoa tibitjatojiaan.
17. Kʼianga nitjosoán je xá xi bánená Jeobá, ánni nga basenkaoniná nga tsín nichajiaan jmeni xi ngisa tjínle kjoandosin.
17 Kʼianga nitjosoán je xá xi bánená Jeobá, basenkaoná nga tsín nichajiaan jmeni xi ngisa tjínle kjoandosin. Jngola choa̱ kataʼyaa. Jngo tichjaa xi Renee tsakʼin kitsiʼaon, kjineya ʼndeʼndee koan yaole kʼoa cáncer kisʼele. Kʼianga koanxkile, kitsoyale Énle Niná je chjinexki, xi kjaʼaí chjota xi kʼoati ya kjimaxkile kʼoa kao je xi kichokonle. Ñandia nga 80 ora koansonni jokjitse tsakjákaoni Énle Niná je chjota, xi jao xomana basen tsakajna ya hospital. Alikui kisichajin jmeni xi ngisa tjínle kjoandosin, ninga kʼia nga tojeme kuiyá. Kui xi tsakasenkao nga nyʼán kisʼe kon.
18. Jméni xi bakóyaná jokisʼin jngo tichjaa xi Jennifer ʼmi.
18 Ninga tosʼa choa je kjoa xi bitjatojiaan nga nyaon nyaon, kʼoati machjén nga kuenta sʼiaan nga nʼio tjínle kjoandosin nga toje Jeobá xi bakinle batéxoma. Jngo tichjaa xi Jennifer ʼmi xi jan nichxin nga ya tsakʼejna ya aeropuerto nga kiskoyale je avión xi koaikao ya jñani tsʼe. Tonga nijngojin avión kitjo nga kʼia. Nga jenʼio aonyale je tichjaa koanjin nga tokisikjáya tsakai. Tonga ʼndele nga kʼoasʼin, tosaa je Jeobá kisijéle nga katabasenkao jósʼin tsjoánganʼiole je chjota xi kʼoati ya tjíokoya ya aeropuerto. Je tichjaa nʼio nkjín chjota tsakjákaonajmíni je Énle Niná kʼoa nʼio nkjín xo̱n xi Énle Niná yʼangini kisikáyo. Je tichjaa itso: “Ningalani kui kjoa jaʼatojian nga kʼia, je Jeobá kisichikontʼainna kʼoa kitsjoanganʼiona nga kixinya xi tʼatsʼe”.
19. Jméni xi tsín mangóson je naxinandále Niná kao relijión ndiso.
19 Je naxinandále Niná títsjoánganʼio nga toje Jeobá xi bakinle batéxoma kʼoa machoyale nga nʼio tjínle kjoandosin jebi. Alikui mangóson kao relijión ndiso. Nga jngó jngoá machjén nga si̱kjaʼaitsjenjiaan xi tʼatsʼe jebi, nga̱ kʼoasʼin ʼyaxkoán je Jeobá josʼin mele.
20. Jósʼin bekon Jeobá nga je bʼainganʼiolee.
20 Alikui jao kʼoé tokoán nga nʼio bechjí Jeobá nga je bʼainganʼiolee, nga kaná kʼianga kjoa bitjatojiaan kʼoa nga je tinixálee (Sal. 18:25). Ya kjoaʼmiya xi ijngo, kui chótʼayasaa ánni machjénni nga kʼoainganʼiolee nga toje Jeobá xi bakinle batéxoma kʼoa jósʼin kʼoainganʼiolee.
^ párr. 4 Salmo 83:18: “Katabe chjota nga ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde”.
^ párr. 7 Isaías 55:10, 11: “Nga̱ tojo ma nga ya tjen ngʼajmi bʼani jtsí kʼoa tjon nyʼán, tsín ya bichó ijngokʼani tsa tsín kjoanla basénndále nangi, nga mantje kʼoa bitjo tsojmintje, kʼoa je chjota xi bʼéntje sʼeele na̱xi̱n kao nioxtila xi kjen, kʼoakoa̱n je én xi bitjoni ndsoʼba. Alikui tokjitia nga kjoaʼaínrʼoenina, ñaki kʼoakoa̱n jmeni xi mena, kʼoa ñaki kʼoasʼin kuichotsjoá jme xá tisikasénña”.
^ párr. 9 Job 1:9-12: “Kʼoa je Satanás i kitsole Jeobá: A toxkia tíbexkón Niná je Job. A tsí tsa ji tinikuindai jngotjondaile kʼoa jngotjondaile niʼyale kʼoa jngotjondaile ngayeje xi tjínle. Ngayeje jme xi sʼín nichikontʼainní, kʼoa je cho̱ntjele kjimankjínya ya sonʼnde. Tonga, chja̱ʼalalai ngayeje jme xi tjínle, a tsílaxó ñaki ngixkuin kuinchja̱ʼaonli. Kʼoa je Jeobá i kitsole Satanás: Ngayeje xi tjínle, ji xi ʼyani jonikoai. ¡Tonga je alijojin nikoai! Kʼoa je Satanás kitjoo ngixko̱n Jeobá”.
^ párr. 11 Job 38:18-20: “A majinli jokji kijna je sonʼnde. Kʼoatʼinnái kʼiatsa ʼyai ngayeje jebi. Jñáni kijna je ndiaale jñani isen chon, kʼoa jñani njio chon, jñáni tíjna ʼndele. A ʼyaní josʼin ndiaa fi kʼoa a majinli josʼin nroa ijngokʼani”.
^ párr. 15 Romanos 5:3-5: “Ali tsa tokui jebi, tonga kʼoati chʼasjejeyaa yaoná tʼatsʼe kjoañʼai xi tjínná, nga ʼyaa nga je kjoañʼaibe síjchájinná kjoatsejta. Je kjoatsejtabe síjchájinná nga nda kuitjoaa. Kʼoa nga nda kuitjoaa, kui xi síjchájinná kjoachoyakaokjoa. Kʼoa je kjoachoyakaokjoa alikui sísoa, nga̱ je kjoatjaochale Niná kisitseya ni̱ma̱ná xi totʼatsʼe je Espíritu Santo xi tsakʼainá”.
