1, 2. 1) Jñánile xi jan koya kjoatjao xi títsjoáná Jeobá. 2) Jméni xi chótʼayajiaan i̱ kjoaʼmiya jebi.

ALIKUI ʼya xi mangóson jokji nyiná je Jeobá, tsʼee ngayeje jmeni xi tjín (1 Crón. 29:11, 12). Tonga je Jeobá nʼio tjínle kjoanda kʼoa nʼio ʼyachjiá je kjoatjao xi títsjoáná. Jñánile je kjoatjao jebi. Janla koya si̱kʼaxkiaa. Xi títjon, je Chjotaxále Niná. Xi majaoni, nga ʼmiyasoán. Kʼoa xi majanni, je kjoankjíntokon xi tsoyaná Énle Niná. Tonga tsa tsín si̱kuindaa yaoná, likuijin tichjí jchatokonñá. Nga tsín kʼoakatamaa, machjén nga tosi tonda tsjoacha katamaa. Je Jesús i kitso: “Ya jña tíjna kjoanyináno, kʼoati ya tíjna ni̱ma̱no” (Luc. 12:34).

² I̱ kjoaʼmiya jebi kui chótʼayajiaan jósʼiaan nga tosi tonda chjí jchatokoán kʼoa tsjoacha koaan je Chjotaxále Niná, nga ʼmiyasoán, kʼoa kao kjoankjíntokon xi tsoyaná Énle Niná. Kʼoa si̱kjaʼaitsjenjiaan jósʼiaan nga ngisasa tsjoacha koaan kjoatjao jebi, xi títsjoáná Niná.

3. Jókisʼin chjota xi kisikʼaxki̱ je Jesús kʼianga tsakatse je perla xi nʼio chjíle (chótsenlai sén xi fitsʼiani kjoaʼmiya jebi).

³ (Tʼexkiai Mateo 13:45, 46). * Je Jesús kui tsakʼéyanajmí tʼatsʼe jngo chjota xi kjoama̱ sʼín xi perla básjai. Kʼianga jngo perla xi nʼio chjíle kisokole, tsakaténaa ngayeje xi tjínle nga tsakatse. A majinná jokji chjí tsabekon je perla xi tsakatse.

4. Jméni xi sʼiaan tsa nʼio chjí ʼyaa je Chjotaxále Niná.

⁴ Jmé xi tsoyaná je choa̱ xi tsakʼéjna Jesús. Je perla xi nʼio chjíle kui tsoyanile jokjoantjínni xi tʼatsʼe Chjotaxále Niná. Tsa nʼio chjí ʼyaa je Chjotaxále Niná, tojosʼin chjí tsabe perla xi koansjaile je chjota xi kjoama̱ sʼín, alikuijin kui kjuinñá tojmeni xi si̱katioá tojoni nga je Chjotaxále Niná koatexomaná (tʼexkiai Marcos 10:28-30). * Jaola chjota si̱kʼaxkiaa xi kʼoakisʼin.

5. Jméni xi kisʼin je Zaqueo nga chjí tsabe Chjotaxále Niná.

⁵ Je Zaqueo tao̱nbasen tsakʼéña kʼoa nyiná koan, tonga kuinga nyiná koanni nga tao̱n kisichéson (Luc. 19:1-9). Tonga kʼianga kinrʼoéle je Jesús nga tínchja̱ni tʼatsʼe Chjotaxále Niná, koanjinle nga nʼio chjíle, kʼoa i kitso: “Koeni Señor, basen tsojmi xi tjínna tsjoale chjotayo̱ma̱”. Kʼoa kʼoakitso nga ño ya tsjoángajaonile jotjín kisichéle chjota. Je Zaqueo alikui ti xkaiʼa koanni.

6. Jókisʼin jngo chjoón xi totʼatsʼe Chjotaxále Niná kʼoa ánni nga kʼoakisʼinni.

⁶ Jngo chjoón xi yánchjín xínkjín tsjoake koan kʼoa xi je tsakasenjnatítjonle je jtín xi sítoánntjai chjota xi tixʼin xínkjín kʼoa xi tiyánchjín xínkjín tsjoake mani. Kʼianga kiskotʼaya Biblia, koanjinle nga nʼio chjíle je Chjotaxále Niná kʼoa koanjinle nga tjínnele sikʼantjaiya yaole (1 Cor. 6:9, 10). Nga tsjoake koan je Jeobá, kisikʼéjnaa je jtín xi tíjnajin kʼoa kitsjion je chjoón xi tsakʼejnakao. Kʼiaa kisʼenngindá nga nó 2009, kʼoa ñanó koanskanni, precursora regular koan. Kisikʼantjaiyaa yaole nga̱ nʼio tsjoake koan je Jeobá kao Chjotaxále tikʼoajinni jmeni xi chʼaotjín kisʼin tsakai (Mar. 12:29, 30).

7. Jméni xi sʼiaan nga tosi tonda tsjoacha koaan je Chjotaxále Niná.

⁷ Ninga ñʼai koanná, kinikʼantjaiyañá yaoná, nga̱ kui xi mená nga je Chjotaxále Niná koatexomaná (Rom. 12:2). Tonga tjínnele tosi tonda kuixkantʼakoaa xi chʼaotjín. Si̱kuindaa yaoná nga tsínkui si̱metokoán je tsojmi xi tjín sonʼnde kʼoa tsakuije̱ kjoachajngi (Prov. 4:23; Mat. 5:27-29, TNM). Je Jeobá ijngosa kjoatjao títsjoáná nga tosi tonda tsjoacha koaan je Chjotaxále.

8. 1) Ánni kʼoakitsosíni je Pablo nga je Énle Niná xi ʼmiyasoán yaa mangóson jngo tsojmi xi nʼio chjíle xi nya “tii xi niʼnde”. 2) Jósʼin tsakakó je Pablo nga tsjoake koan nga kitsoyason.

⁸ Je Jesús kui xá kitsjoaná nga kʼuínyasoán kʼoa koakoyalee chjota je énnda chjotse xi tʼatsʼe Chjotaxále Niná (Mat. 28:19, 20, TNM). Je Pablo koanjinle nga nʼio chjíle nga ʼmiyasoán kʼoa yaa kisingóson jngo tsojmi xi nʼio chjíle xi nya “tii xi  niʼnde” (2 Cor. 4:7; 1 Tim. 1:12). Nga chjotajée maa, yaa mangósoán je tii niʼnde, tonga je Énle Niná xi ʼmiyasoán yaa mangóson jngo tsojmi xi nʼio chjíle, nga̱ je chjota xi kjuinrʼoé kʼoa kao ñá koaan sʼe̱ná kjoabijnachon xi tsínkʼia fetʼa. Kuinga i̱ kitsosíni je Pablo: “Kʼoa jebi kʼoasʼian xi tʼatsʼe énnda tʼatsʼe Cristo, jméni nga tojngo kʼoakaotʼasínina kao je” (1 Cor. 9:23). Je Pablo nʼio kitsoyason je Énle Niná (tʼexkiai Romanos 1:14, 15; * 2 Timoteo 4:2 *). Nga tsjoake koan je énnda chjotse kui xi tsakasenkao nga kiskanile je kjoa xi nʼio ñʼai tjín jaʼatojin (1 Tes. 2:2). Jósʼin chjénngilee je Pablo.

9. Tikʼaxki̱ kʼai jósʼin bakoá nga chjí ʼyaa nga ʼmiyasoán.

⁹ Je Pablo kitsoyaa je Énle Niná tojñani tsakʼamje, kʼoa kʼoasʼin tsakakóni nga nʼio chjí tsabe nga kitsoyason. Tojo kisʼin je Pablo kao chjotale Cristo xi títjon tsakatio, ʼmiyasonñá nga xki̱ niʼya, ya yandiaa kʼoa tojñani nga tjín chjota (Hech. 5:42; 20:20). Kʼuínyasoán jokji tjen kʼoakoa̱nná. Tsakui nichxin precursor auxiliar kʼoa tsa precursor regular koaan. Koaan kjaʼaí én chótʼayá, kʼoa tsa maije̱ xin koanngínkʼainganʼioá xi tiyani naxinandáná kʼoa tsa kjaʼaí naxinandá (Hech. 16:9, 10).

10. Jmé kjoanichikontʼain tísokóle Irene nga tíbʼénele yaole nga títsoyason.

¹⁰ Jngo tichjaa xi Irene ʼmi xi Estados Unidos tsʼe, kui xi koanmele nga kitsoyale Énle Niná je chjota xi én ruso male. Kʼianga nó 1993 tosʼaa 20 mani je xi tsoyason Énle Niná nga én ruso ya Nueva York. Xijekoanni 20 nó, je Irene kʼoatso nga kjesa nʼio nda nchja̱jin je én ruso. Je Jeobá tísíchikontʼain jokji tjíobʼénele yaole je Irene kao ndsʼee xi kjaʼaí nga tjíotsoyason. Nichxin xi tiyoaa ndʼaibi, jaon mani jtín tjío xi én ruso ya Nueva York. Je tichjaa 15 koanni chjota kitsoyale xi jekisʼenngindá. Tjínkʼa xi ya Betel tjíosíxá ndʼaibi, xi precursor ma kʼoa xi chjotajchínga sʼin tjío. Je Irene itso: “Sakʼoaa sikjaʼaitsjen jmeni xi koan kisʼian tsakai, tonga likuijin jme xi nʼio tsjoa tsakáya tokoan jokji tsjoa tjínna ndʼaibi”. Alikui jao tjínná nga nʼio bechjí je tichjaa nga tsoyason.

11. Jósʼin bichómani nga tosi tonda ʼmiyasoán ninga chjota fitjenngikená.

¹¹ Tsa chjí ʼyaa nga ʼmiyasoán, tojo kisʼin je Pablo, tosi tondajin kʼuínyasoán ninga chjota koaitjenngikená (Hech. 14:19-22). Kʼianga nó 1930 kʼoa nga tosʼa tífitsʼia  nó 1940, je ndsʼee xi Estados Unidos tsʼe nʼio tse kjoa jaʼatojin. Tonga kixi koan kʼoa tosi tonda kitsoyason, tojo kisʼin Pablo. Nkjín kʼa ki ngixko̱n chjotaxá kʼianga kisitoánntjai yaole. Kʼianga nó 1943, je ndsʼee Nathan Knorr kui kinchja̱ni tʼatsʼe nga kinjele je kjoa xi tsakʼéndajin ya Tribunal Supremo de Estados Unidos, kʼoakitso nga kuinga tosi tonda kitsoyason je ndsʼee nga kinjenile je kjoa ngixko̱n kjoatéxoma. Kʼoa nga jekisʼendajin je kjoa, je ndsʼee xi tjío jngo tjíjtsa Sonʼnde títjoʼndele nga tjíotsoyason je Énle Niná. Kʼoati nkjín naxinandá jñani kʼoati kui kjoa tjíofaʼatojin je ndsʼee kʼoa tjíonjele ngixko̱n kjoatéxoma. Nga nʼio tsjoachaa nga ʼmiyasoán, tosi tonda kʼoanʼia ninga chjota fitjenngikená.

12. Jméni xi ngisa kuenta sʼiaan nga kʼuínyasoán.

¹² Kʼiatsa nʼio chjí ʼyatokoán je xá xi bánená Jeobá, alikuijin tokui kjuinñá jótjín ora kʼuínyasoán. Tosajin kui kjuinñá jósʼin nga ngisasa nda kʼuínyasoán (Hech. 20:24; 2 Tim. 4:5). Tonga jméni xi kʼuínyalee je chjota. Ijngolasa koya kataʼyaa kjoatjao xi títsjoáná Niná.

13, 14. 1) Jmé xi kinchja̱ni je Jesús tojo tso ya Mateo 13:52. 2) Jósʼiaan nga koa̱nsjaisaná je kjoankjíntokon xi nʼio chjíle.

¹³ Je kjoatjao xi majanni si̱kʼaxkiaa xi títsjoáná je Jeobá kuiní ngayeje jmeni xi títsoyaná, nga̱ tʼatsʼe tínroani je kjoakixi (2 Sam. 7:28; Sal. 31:5). Je Jeobá jngo Nʼai xi nʼio nda chjota, kʼoa je chjota xi tsokjónke tsoyale je kjoatéxomale. Saʼnda nga kinoʼya títjoán je xi kixi, sa tse sa tsee jmeni xi kjimajinná nga chotʼayá je Biblia kao xo̱n xi Énle Niná yʼangini, kʼoa kao jmeni xi majinná nga mangián je kjoajtín kao kjoajtíntse xi satíoná. Nga jefi nichxin kui sʼená xi kinchja̱ni je Jesús nga kui kisikʼaxki̱ je kjoankjíntokon xi nʼio chjíle, xi sʼa chjotse kʼoa kao xi jekjoatse kichotʼayá (tʼexkiai Mateo 13:52). * Tsa kʼoasʼin kuijnyísjee je xi kixi josʼin bijnyisjé je tao̱nchjí xi tjíoʼma, je Jeobá koasenkaoná nga jchasaa je kjoankjíntokon xi nʼio chjíle (tʼexkiai Proverbios 2:4-7). * Jméni xi tjínnele sʼiaan.

¹⁴ Machjén nga nʼio nda chótʼayajiaan je Biblia kao jmeni xi síkasénná je naxinandále Niná. Kui xi koasenkaoná nga jchaa jmeni xi kje ʼyajián (Jos. 1:8, 9; Sal. 1:2, 3). Je rebista xi kitjo títjon kʼianga sá julio nó 1879, kʼoakitso nga je xi kixi yaa mangóson jngo naxó xi ya séjna ʼndekixí, xi kui jñá xi tsín nda kijnajtsane. Kʼiatsa mená nga koa̱nsjainá, machjén nga nʼio nda kjoásjee. Kʼoa nga jekoa̱nsjainá, alikui tokʼoéjngoaa tokoán. Tjínnele tosi tonda kuijnyísjesaa. Tikʼoasʼinni, kʼianga jemajinná jmeni xi tsoya je Énle Niná, alikui tokʼoéjngoaa tokoán, tosi tonda chótʼayasaa nga koa̱njinná xi kjaʼaísanile.

15. 1) Jmé kjoankjíntokon xi “jejchá” koa̱n kʼuínlee. 2) Jñánile xi nʼio chjí ʼyatokuin.

¹⁵ Je kjoankjíntokon xi “jejchá” koa̱n kʼuínlee, kui jmeni xi koanjinná kʼianga tosʼa kichotʼayá je Biblia, nga̱ kui xi títjon tsaʼyaa kʼoa nʼio chjí ʼyatokoán. Koanjinná nga je Jeobá kisindaná kʼoa kao jmeni xi tjínndajinle xi kao chjotasonʼnde. Kʼoati koanjinná nga nʼio tsjoakená nga kitsjoa  je ʼNdíle nga tsakʼéchjíntjainá xi tʼatsʼe jée kao kjoabiya. Tsakʼinyaná nga je Chjotaxále kjoaʼaxin je kjoañʼai kʼoa nga koa̱n kuiyoaa ngantsjai nichxin, nga nyʼán sʼin kuiyoaa kʼoa nga nʼio tsjoa sa̱tío tokoán (Juan 3:16; Apoc. 4:11; 21:3, 4).

16. Jméni xi sʼiaan kʼianga bʼantjaiyajin sakʼoa josʼin majinná jmeni xi tsoya je Biblia.

¹⁶ Bʼantjaiyajin sakʼoa josʼin majinná je én xi tongini kinokjoa xi faʼaitʼa Biblia. Kʼianga kʼoasʼin bʼantjaiyajin, machjén nga si̱kʼayaa nichxin nga nʼio nda chótʼayajiaan kʼoa si̱kjaʼaitsjenjiaan (Hech. 17:11; 1 Tim. 4:15). Alikui tokui xi machjén nga jchaa jmeni xi bʼantjaiyajin, kʼoati machjén nga kataʼyaa jñáni nga tsín mangósonkao josʼin koanjinná ngasʼa. Tsa kʼoasʼiaan, kʼoasʼin so̱kosaná je kjoankjíntokon xi nʼio chjíle tsoya Énle Niná. Ánni nga nʼio chjínile nga kʼoasʼiaan.

17, 18. Jósʼin basenkaoná je nganʼiotsjele Niná.

¹⁷ Je Jesús kʼoakitso nga kui nganʼiotsjele Niná koasenkaoná nga kjoaʼaítsjenná jmeni xi chotʼayá (Juan 14:25, 26). Jósʼin basenkaoná kʼianga ʼmiyasoán je énnda chjotse. Kataʼyala jokoan je ndsʼee xi Peter ʼmi nga nó 1970, nga kʼia 19 nóle kʼoa tokʼiaa kichosíxá ya Betel xi tíjna ya Gran Bretaña. Kʼianga kikakóyason nga xki̱ niʼya, jngo chjota kitjo xi ntsja̱nkjaín kji. Je ndsʼee Peter kiskonangile tsa mele nga koa̱njinle jotso je Biblia. Je chjota jebi rabino ma kʼoa maestro judío ma. Tokʼoakoanle nga tosʼa ti xi kʼoakitsole nga Biblia kuitsoyale. Kʼoa chjota jebi kui kiskonangile je ndsʼee tsa be jmé én xi kichjini je libro xi tsʼe Daniel. Je Peter kʼoakitsole nga tjín jñani nga én arameo kichji. Je chjota jebi tokʼoakoanle nga be je ndsʼee xi tʼatsʼe jebi. Tonga je xi ngisa tokʼoakoanle tijéni ndsʼee Peter. Jósʼin beni tʼatsʼe jme xi kichjonangile. Je ndsʼee itso: “Kʼianga kichoa ya niʼyana kiskotʼaña je rebista La Atalaya kao ¡Despertad! xi chriansʼa kitjo, kʼoa koansjaina jñani tsoya nga én arameo kichjini je libro xi tsʼe Daniel” (Dan. 2:4). Je nganʼiotsjele Niná basenkaoná nga faʼaitsjenná jmeni xi jetsakʼexkiaa kʼoa xi nʼio chjí ʼyatokoán (Luc. 12:11, 12; 21:13-15).

¹⁸ Tsa chjí ʼyaa jmeni xi tsoyaná je Jeobá, tosi tondajin kjoásjaisaa je kjoankjíntokon xi nʼio chjíle. Tsa kʼoasʼiaan, ngisaa nda koa̱nsaná nga kʼuínyalee xi kjaʼaí.

19. Ánni machjénsíni nga si̱kuindaa je kjoatjao xi títsjoáná Jeobá.

¹⁹ I̱ kjoaʼmiya jebi, kui kachotʼayá nga nʼio tjínle kjoandosin nga chjí ʼyaa je kjoatjao xi títsjoáná Jeobá. Tonga machjén nga si̱kuindaa yaoná nga tsín je Na̱i kao sonʼndele kʼoanachaná, nga si̱chaa jmeni xi nʼio chjíle tjínná. Tsa tsín si̱kuindaa yaoná, kuijin ngisa kʼoailee kjoandosin nga ngisasa tse tao̱n si̱kinjee kʼoa tsakui nʼio si̱metokoánje̱ je tsojmi xi tjín sonʼnde. Je pastro Juan kʼoakitso nga tofaʼato jmeni xi chon sonʼnde (1 Juan 2:15-17). Kuinga nʼio machjénsíni nga tosi tonda kʼoénelee yaoná nga tsjoacha koaan je kjoatjao xi títsjoáná Jeobá.

20. Jméni xi sʼiain nga si̱kuindai je kjoatjao xi títsjoáná je Jeobá.

²⁰ Ñaki kʼoatʼai tokuin nga tsín si̱chai je kjoatsjoacha xi tjínli kao Chjotaxále Niná. Tosi tonda kao kjoatsjoa tʼinyasuin kʼoa alikʼiajin nikʼéjnai je xále Niná. Tosi tonda tjasjaiyai jmeni xi tsoya je Biblia. Tsa kʼoasʼiain, yaa tibʼejnatjoai je kjoanyináli ya ngʼajmi, “jña tsín chjotachéjin, nicho̱kixojin síkitsón”. Je Jesús i kitso: “Ya jña tíjna kjoanyináno, kʼoati ya tíjna ni̱ma̱no” (Luc. 12:33, 34).