1, 2. Jósʼin sínʼio tokoán je Jeobá, kʼoa jósʼin basenkaoná jmeni xi tso je Énle.

JNGO ndsʼee xi sʼa xti kui kisikjaʼaitsjenjin jmeni xi tso 1 Corintios 7:28, jñani kʼoatso nga “kjoañʼai” sʼele je chjota xi bixan. Kuinga je kiskonangisínile jngo ndsʼee xi jechixan kʼoa xi jetjínle nó nga kuitsoyale jósʼin tsoyanile nga kjoañʼai sʼená nga jebixaan. Je ndsʼee jebi, kui títjon kʼoakitsole nga katasíkjaʼaitsjenjin jmesani xi kiski je pastro Pablo, nga Jeobá jéní “Niná xi tsʼe ngayije kjoanijetakon, xi síjekonná ngayije kjoañʼainá” (2 Cor. 1:3, 4).

² ʼYañá nga je Jeobá, je Nʼainá, sínʼio tokoán kʼianga kjoa bitjatojiaan. Tsakui nichxin faʼaitsjenli josʼin saje tsakasenkaoli Jeobá, nga kui Énle kisichjén nga kitsjoali kjoafaʼaitsjen. Tojo kisikao je choʼndale nichxin kjoatse, alikui jao tjínná nga je Jeobá kui xi mele nga ndasʼin  kuiyoaa (tʼexkiai Jeremías 29:11, 12). *

3. Jméni xi chótʼayajiaan i̱ kjoaʼmiya jebi.

³ Kʼianga koa̱njinná ánni nga kjoa sʼeni kʼoa kjoañʼai bitjatojinñá, ngisaa choa ñʼai koa̱nná nga chókjoajinná. Kuinga kui chótʼayajinñá i̱ kjoaʼmiya jebi, ánni nga sakʼoa kjoa sʼeniná nga jebixaan. Jmé choa̱ xi tsʼe nichxin kjoatse kao nichxin xi tiyoaa ndʼaibi koasenkaoná xi sinʼio tokoán. Kʼianga jchaa xi tʼatsʼe jebi, koasenkaoná nga chókjoajinná jme kjoa xi kuitjátojiaan.

4, 5. Tikʼaxki̱ kʼai je kjoa xi faʼatojin xi jebixan.

⁴ Kʼianga kisikixan Niná je chjota xi títjon, i kitso: “Kuinga je xʼin sikʼéjnasíni je nʼaile kʼoa kao na̱le kʼoa jé chjoónle kʼoéjnakao kʼoa tojngo yao koa̱nni” (Gén. 2:24). Kʼianga chjotajée maa, toxá sʼeni kjoa kʼianga jebixaan (Rom. 3:23). Kʼoa jé xi xʼin kjinele je xá xi kjinele xijchále tsakai, nga̱ Niná jé xi xʼin tsakánele nga jko̱ kʼoéjnale je chjoónle (1 Cor. 11:3). Tsakui nichxin tjínkʼa xi ñʼai koa̱nle nga kʼoasʼin xá jebi. Kʼoa je xi chjoón sakʼoajin ñʼai koa̱nle nga sitjosonle je xʼinle. Xi ijngosani, tsa tsín nda koatiokao xi xínkjín mani, yaa kjuinroani nga kjoa sʼe̱le.

⁵ Jósatío kon kʼianga sʼejinle nga ʼndí tjínle. Ningalani tsjoa satío kon, kʼoati makjáojinle tsa jme chʼin sʼe̱le nga sʼa yʼa ʼndí je chjoón kʼoa tsa kʼianga koa̱nskanni. Kʼoa sa tse sa tsee gasto sʼe̱le. Tonga ali tsa tokuijin, kʼianga jesʼe̱le je ʼndí, je xi chjoón ngisaa tse nichxin sikʼayale je ʼndíleele nga sikuinda. Kʼoa je xi xʼin ngisaa titse xá kjinengánile, nga̱ tjínnele kuenta sʼin jmeni xi machjénle je familiale. Alikui tinanda koa̱nʼanile nga nʼio sikʼayale nichxin xínkjín.

6-8. Jósatío kon xi jetjínle kjoabixan kʼianga tsín ma sʼele ʼndíxti.

⁶ Xi ijngosa kjoa faʼatojin xi jebixan, kʼiaa nga tsín sʼele xti ninga nʼio mele tsakai nga xti sʼe̱le. Kʼoa tjínkʼa yánchjín xi nʼio ba satío kon nga tsín ma sʼele ʼndí (Prov. 13:12). Nichxin kjoatse, kʼianga tsín koan kisʼele ʼndí jngo chjoón nʼio tse kjoasoa tsakʼejnajin. Tobʼelañá, je Raquel, xi chjoónle koanni je Jacob, nio ba koanle nga tsín koan kisʼele ʼndíxti kʼoa nga tsabe nga koan kisʼele ndichja (Gén. 30:1, 2). Tjínkʼa xi misionero ma, xi ya tjío ya naxinandá jñani nʼio nkjín xti tjínle je chjota, kʼoa je chjota kjonangile ánni nga tsínsínile xti. Ningalani ngasin nganda tsoyale anni, tonga tjín chjota xi i̱ tsole: “Kʼoétsʼoantjailaijin nga katasʼe jngono ʼndí”.

⁷ Kataʼyala choa̱le jngo tichjaa xi Inglaterra tsʼe, xi tsín koan kisʼele ʼndí ninga nʼio koanmele tsakai nga sʼe̱le. Kʼianga jetsabele kon nga tsín tikoa̱n ʼndí sʼe̱nile nʼio aon koanle. Tsakjáoyani kao xʼinle nga jngo ʼndí sijchá. Xi koanskanni, i kitso: “Nkjín nichxin nga tsín nda kisʼe tokoan, kʼoakoanna jomaná kʼianga tjín xi mʼená. ʼBeña nga tsín mangóson nga ñaki ñá sʼená je ʼndí kao nga to nijchá”.

 ⁸ Je Biblia kʼoatso nga je yánchjín xi chjotale Cristo ma “kuitjontjainí nga sʼe̱le xti” (1 Tim. 2:15). Tonga jebi alikui kui xi tsonile nga sʼe̱le kjoabijnachon xi tsínkʼia fetʼa kʼiatsa ʼndíxti tjínle. Kui xi tsonile nga je chjoón xi tjínle ʼndíxti kʼoa xi niʼyale síkuinda alikui énndiso sísin kʼoa alikui ya tsjonjin yaole je kjoa xi tjínle xi kjaʼaí chjota (1 Tim. 5:13). Tonga tojo sʼeele kjoa xi sʼele xi jebixan.

9. Jmé kjoa xi nʼio ñʼai tjín faʼatojin kʼa je chjota.

⁹ Je kjoa xi kʼoati faʼatojin xi jebixan, kuinga mʼe jngo, tsa je chjoón kʼoa tsa je xʼin. Ngatsʼiñá nga tsín mená nga kui kjoa jebi kuitjátojiaan. Je chjotale Cristo makjainle nga sʼe̱ kjoafaʼáya, kʼoa jebi kui xi sínʼio kon je xi mʼe je chjoónle kʼoa tsa xʼinle (Juan 5:28, 29). Je Nʼainá Jeobá kui Énle síchjén nga sínʼio kon je xi kjoaba faʼatojin. Kataʼyala kʼaa choa̱ josʼin sínʼio kon je choʼndale kʼoa jósʼin tíbasenkao.

10. Jméni xi kisinʼio kon je Ana (chótsenlai sén xi fitsʼiani kjoaʼmiya jebi).

¹⁰ Je Ana, xi chjoónle koanni je Elqaná, je kjoa xi jaʼatojin kuinga tsín koan kisʼele xti, kʼoa je Peniná, xi ijngo chjoónle Elqaná kisʼele xti (tʼexkiai 1 Samuel 1:4-6). * Nga xki̱ nó, je Peniná nʼio tsabesin, kʼoa kui xi nʼio aon tsakʼé kon Ana. Jméni xi kisinʼio kon. Je Biblia kʼoatso nga je Jeobá tsakʼétsʼoale nga tsakʼéyanajmíle je kjoa xi tífaʼatojin. Je Ana kui xi koanmele nga kjuinrʼoéle Niná. Kʼoa nga jetsakʼétsʼoa “alikui tiba kisʼenile” (1 Sam. 1:12, 17, 18). Jé Jeobá kisinʼiotʼa yaole nga tsjoále kjoanda nga koa̱n sʼe̱le ʼndí kʼoa tsa mai koaanle josasʼin sinʼio kon.

11. Jósʼin sínʼio tokoán nga bʼetsʼoalee Niná.

¹¹ Toxá kjoa kuitjátojinñá nga chjotajée maa kʼoa nga je Na̱i kjinentsja jme xi chon sonʼnde (1 Juan 5:19). Tonga ʼyañá nga je koasenkaoná “Niná xi tsʼe ngayije kjoanijetakon”. Sinʼio tokoán kʼianga kjoa kuitjátojiaan, tsa kʼoasʼiaan jokisʼin Ana, nga ñaki ni̱ma̱ná kjuinroajinni nga kʼoétsʼoalee. Alikui tokui xi machjén nga kʼoakʼuínlee je kjoa xi tibitjatojiaan, machjén nga kʼoakʼuínlee jotjín tokoán kʼoa nga ñaki ni̱ma̱ná kjuinroajinni nga kʼoakʼuínlee nga katabasenkaoná (Filip. 4:6, 7).

12. Jméni xi tsakasenkao je Ana nga tsjoa kisʼe kon.

¹² Ninga nʼio tse kjoaba síkatíojinná nga tsín ma sʼená xti kʼoa tsa xíngiaa kuiyáje̱, koaan so̱koná kjoanʼiotokon. Sikjaʼaitsjenla je Ana, xi tsakʼejna kʼianga nichxinle Jesús. Nga jeñato nó chixan kʼieen xʼinle, kʼoa je Biblia alikui kʼoatso tsa kisʼele xti. Je xi kitsjoanganʼiole Ana, kuinga tsín “tsakasenxinle yo̱ngo̱ jña tsabexkón Niná”. Ninga jeñokan nóle, tosi tonda ki ya yo̱ngo̱ nga tsakʼétsʼoa kʼoa nga tsabexkón Jeobá (Luc. 2:37). Nga kʼoakisʼin, kisinʼio kon kʼoa tsjoa kisʼele.

13. Jngo choa̱ tʼejnai, jósʼin basenkaoná je miyo xi tjínná kʼianga tsín sínʼio tokoán je familianá.

 ¹³ Kʼoati sínʼio tokoán je miyo xi tjínná ya jinjtín (Prov. 18:24). Jngola choa̱ kataʼyaa. Kʼianga tosʼa aon nóle je Paula, je male kisikʼéjnaa je Énle Niná, kʼoa je Paula nʼio ba koanle. Tonga jngo precursora xi Ann ʼmi kitsjoanganʼiole. Je Paula itso: “Ningalani tsín xíngia mani je Ann, nʼio tsakasenkaona nga tjao tsabena kʼoa nga koanndosinle xi tʼatsʼan”. Kʼoa itsosa: “Kui xi tsakasenkaona nga tosi tonda kisixále je Jeobá”. Kʼoa nʼio tsjoa kisʼe kon nga kicho ijngokʼani je male ya jinjtín. Kʼoa je Ann kʼoati tsjoa tjín kon nga tsakasenkao je Paula nga tosi tonda kisixále Jeobá.

14. Jósʼin basenkaoná nga ninʼioá kon xi kjaʼaí.

¹⁴ Kʼianga bakoá kjoatsjoacha kʼoa nga mandosin kjoaixiná xi kjaʼaí, alikui kui nʼio nikjaʼaitsjeen je kjoa xi tjínná. Tobʼelañá, nʼio nkjín je tichjaa, xi jechixan kʼoa xi tjíotoje, xi tjíobe nga nʼio nda sʼe tokoán kʼianga ʼmiyasoán je énnda chjotse. Jé Jeobá tjíobʼasjengʼa kʼoa kui kʼoatjíosʼín josʼin mele Jeobá. Nga kʼoasʼín nʼio tsjoa satío kon. Alikui jao tjínná nga jtín sʼin biyoaa kʼianga mandosinná je ndsʼee kʼoa kao je chjota xi ʼmiyasonlee (Filip. 2:4). Je pastro Pablo kʼoakisʼin.  Kisikuindaa je ndsʼe̱ xi tsakatio ya Tesalónica tojo sʼín “jngo na̱”, kʼoa kisinʼio kon tojo sʼín jngo nʼai nga sínʼio kon je xtile (tʼexkiai 1 Tesalonicenses 2:7, 11, 12). *

15. ʼYáni xi kjinele nga kuitsoyale tʼatsʼe Jeobá je ʼndíxti.

¹⁵ Jósʼin koa̱n kuinyakoaa je xíngiaa ya jinjtín. Je ndsʼee xi sʼa choatsele nga tjíojin naxinandále Niná, sakʼoaa je síjéle nganʼio ndsʼee xi jetjínle kjoafaʼaitsjen nga kuitsoyale je xtile xi tʼatsʼe Jeobá, kʼoa saʼnda kʼoatsole nga je katatsjoále estudio. Je Biblia kʼoatso nga je xi xijchá ma kjinele kuitsoyale je ʼndíxtile (Prov. 23:22; Efes. 6:1-4). Ningalani sakʼoa kjaʼaí xi kuinyakao, nʼio chjíle nga jesoa kuitsoyale je ʼndíxtile. Kuinga machjénsíni nga je xi xijchá ma kjitʼa kjoakaonajmí je ʼndíxtile.

16. Jméni xi kuenta sʼiaan kʼiatsa ʼndíxti kʼuínyalee.

¹⁶ Kʼiatsa je xi xijchá ma kʼoakuitsoná nga ñá kʼuínyalee Biblia je ʼndíxtile, xi kuenta sʼiaan, kuinga tsín ñá kjinená je xá xi kjinele xi xijchá ma. Tsa kʼiaje̱ nga je kʼuínyalee Biblia xti xi tsín mandosinle Énle Niná je xijchále. Kʼianga kʼuínyalee Biblia xti xi tsín tsaan, ndatjín nga ya chótʼayá ya niʼyale kʼianga ya tjío xijchále kʼoa tsa maije̱ je kjuinkoaa jngo ndsʼee xi jetjínle kjoafaʼaitsjen. Kʼoati koa̱n ya chótʼayá jñani nkjín chjota tjín. Tsa kʼoasʼiaan alikui kjaʼaísʼin sikjaʼaitsjen xi ngikʼa. Nga koa̱nskanni, jesoaa xijchále kjinele nga kuitsoyale xi tʼatsʼe Jeobá.

17. Jósʼin tsjoánganʼio je xi sʼa xti.

¹⁷ Je xti xi tsjoake Niná kʼoa xi sítjosonle, nʼio binyakao je xi tjío ya yaniʼyale, bexkón je xijchále kʼoa tsjoánganʼio tsa jmeni xi machjén ya yaniʼya. Kʼoa kʼianga kixi fitʼale Jeobá, kʼoati kui xi tsjoánganʼiole ngatsʼi xi tjío ya yaniʼyale. Je Lamec, xi tsakʼejna nichxin kjoatse kʼianga kjesa faʼaijin Jtsínʼio, jé Jeobá tsabexkón. Kʼoa i kitso xi tʼatsʼe Noé, xi tile koanni: “Jéní xi sitja̱ná xi tʼatsʼe xáná, kʼoa xi tʼatsʼe nga aon kjima ndsaa nga tinixásoán je nangi xi kinchja̱ʼaonle Jeobá”. Je én jebi kʼiaa kitjoson kʼianga jejaʼato Jtsínʼio (Gén. 5:29; 8:21). Nichxin xi tiyoaa ndʼaibi, je xti xi tjínle kjoamakjain tʼatsʼe Jeobá, nʼio sínʼio kon je xi tjío ya yaniʼyale. Koaan kuinyakao ngatsʼi xi tjío ya yaniʼyale nga ska̱le je kjoa xi kjoaʼatojin ndʼaibi kʼoa kao nichxin xi nroaján.

18. Jméni xi koasenkaoná nga chókjoajinná je kjoa xi kuitjátojiaan.

¹⁸ Nichxin xi tiyoaa ndʼaibi, je xi tsjoánganʼiole choʼndale Niná kuinga bʼétsʼoa, nga síkjaʼaitsjenjin je choa̱ xi faʼaitʼa Biblia kʼoa nga je símiyo ndsʼee kao tichjaa (tʼexkiai Salmo 145:18, 19). * Je Jeobá tíjnandaa ngantsjai nga sinʼio tokoán kʼoa alikui jao tjínná nga je koasenkaoná nga chókjoajinná je kjoa xi kuitjátojiaan.