JNGO testigole Jeobá, xi Don ʼmi xi Canadá tsʼe, fákaonajmí je chjota xi ʼnyo kaye batio. Kʼoatso jmeni xi koan ñandiale, itso: “Je Peter toyaa ʼnyo kaye bʼejna kʼoa toje xi nʼiosa jndí fa. Chʼao kjoan, likui sasénle jmeni xi ʼmile kʼoa tokjaʼaí tso. Alikui kitsjoaʼnde nga jme kjoanda kisakole”. Ninga kʼoalani, tsʼato 14 nó nga tsakʼénele yaole je Don nga nda kisikao.

Je Peter ñandia nga i̱ kitsole je Don: “Ánni nga nikjáojinni xi tʼatsʼan. Nga̱ tsín ʼya xi kuenta sʼínna”. Je Don ngasin nganda tsakjákaonajmí kʼoa jan testo xi tsʼe Biblia tsakakóle xi kichokajin ni̱ma̱le. Kui títjon kiskonangile tsabe joʼmi je Niná kʼoa kʼoakitsole nga jesoa katabʼéxkia Salmo 83:18. Xijekoan, kʼoakitsole anni nga fákaonajmíni, kʼoa nga katabʼéxkia Romanos 10:13, 14, jñani kʼoatso nga kuitjontjai je xi sikʼaxki̱ je jaʼaínle Jeobá. Xijekoan, je Don yaa tsakʼéxkiale Mateo 9:36, jñani kʼoatso nga je Jesús koanmake nga tsabe je chjotankjín, nga kʼoasʼin tjíotsaoba joni barré xi tsínle xi koʼnda. Kʼoa je Don jesoaa kisikʼéxkia je Peter testo jebi. Kʼianga tíbʼéxkia ñaki tikjiʼnda kaoni nga i̱ kitso: “A yaa maxki̱koa je xi síkʼaxki̱ ibi”.

Je Peter kisikʼantjaiyaa yaole. Tsakangoyaa, tsakʼéjon ntsja̱ʼale kʼoa kui tsakʼakjá je najño xi Don kitsjoale. Saʼnda nga kʼia, kisikuindaa yaole kʼoa tsje tsakja.

Je Peter jngoo xo̱n kiski nga nyaon nyaon jñani tsakʼétʼa jmeni xi kisʼin. Je xi títjon kiski ba tjín jmeni xi tso, tonga je xi fʼetʼani xi kiski, jebʼantjaiya jotso, itso: “Ndʼaibi, kaʼbeña joʼmi je Niná. Kʼianga kʼoetsʼoa, tojé Jeobá kuinchjale. Nʼio naskánatjín nga ʼyaa joʼmi je Niná. Je Don kʼoatso nga koa̱n miyona koa̱n  je Jeobá, nga kjuinrʼoéna ngantsjai jmeni xi xínle nga kuinchjale tokʼiani kʼoa tojñani nga tijna”.

Jé ndsʼe̱ kiskile xi tojetʼani, i kitso:

“Alikui ndatjín tokoan ndʼaibi. Kuila nga jejchínga. Tonga tsa tondʼaisa nga tijnakoan, ʼbeña nga skoe ijngokʼa je miyona [Don] ya sonʼndenaxó. Kʼiatsa kui kʼoéxkiao jebi, kuinga jetsín tiʼi̱ tijnakaonino. Tonga kʼianga jekijna̱kʼien tsa jchao jngo chjota xi tsín ʼyaxkon, tinókjoakao, tʼiaon kjoanda, tʼexkiao je libro xi azul kji [kui je libro xi machjén nga chotʼayá je Biblia, je xi La verdad que lleva a vida eterna ʼmi]. * Libro jebi kʼoatso nga skoe ijngokʼa je miyona ya sonʼndenaxó kʼoa makjainna nga kʼoakoa̱n. Je ndsʼao xi tsjoakeno, Peter”.

Kʼianga jekisʼeñe Peter, je ndichja xi Ummi ʼmi, i kitso: “Jela jao nó tjínle nga kinchja̱na je Peter. Nga kʼia, tsjoa tjínle kʼoa saʼnda tsakijno”. Je Ummi i kitsole je Don: “Kʼoexkiaña je libro, nga jmeni xi kichokajin ni̱ma̱le je ndsʼe, nʼiojin chjíle”. Kʼoa je kʼoati koanmele nga jngo testigole Jeobá kichosíxatʼa kʼoa nga kiskotʼaya je libro Jmé kjoanni xi bakóya je Biblia.

Ñá, kʼoati koa̱n koakolee kjoatsjoacha je chjota kʼoa tsejta katamaa nga tsín tokui kjuinñá josʼin matsen (1 Tim. 2:3, 4). Tsa kʼoasʼiaan, tsakui nichxin kuichokajin ni̱ma̱le je Énle Niná, jokoan je Peter. Alikui jao tjínná nga je Niná kui kotsenle jotjío ni̱ma̱ná, kʼoa jé basenkao je chjota xi ndatjío ni̱ma̱le nga machriantʼale (1 Sam. 16:7; Juan 6:44).