Kʼoainganʼioá nga toje Jeobá xi bakinle batéxoma
“Señor [Jeobá], bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi” (APOC. 4:11).
KJOAJNDA 2, 49
1, 2. Jméni xi tsín jao kʼoé tokoán (chótsenlai sén xi faʼaitʼa ibi).
TOJOSʼIN tsaʼyaa ya kjoaʼmiya xi jaʼato, je Na̱i kʼoakitso nga tsínle ʼnde je Jeobá nga koatexomale chjota kʼoa nga ngisa nda koatio kʼiatsa toje kʼoa̱ yaole. A kʼoatjín jokitso. Si̱kjaʼaitsjenla jebi: Tsa koa̱nlani koatio ngantsjai nichxin je chjota nga toje kʼoa̱ yaole, a ngisaa nda koatio tsa tsín je Niná koatexomale. Kʼoa ji, jósʼin nikjaʼaitsjain, a ngisaa tsjoa sʼe̱ tokuin kʼiatsa koa̱nlani kuijnai ngantsjai nichxin kʼoa tsín je Niná koatexomali.
2 Alikui ʼya xi kʼoakuitsoná josʼiaan, nga jngó jngóñá nga si̱kjaʼaitsjenjiaan xi tʼatsʼe jebi. Alikui jao kʼoé tokoán nga tjínle ʼnde Niná nga koatexoma kʼoa nga je xi ngisa nda batéxoma, kʼoa tjínnele je kʼoainganʼiolee. Kataʼyala jotso je Biblia ánni nga je Jeobá xi tjínnile ʼnde nga batéxoma.
TJÍNLE ʼNDE NGA JE JEOBÁ KOATEXOMA
3. Ánni nga toje Jeobá xi tjínnile ʼnde nga koatexoma.
3 Tojé Jeobá xi tjínle ʼnde nga koatexoma, nga̱ jé xi ngisasa tse nganʼio tjínle kʼoa jé kisinda ngayeje jmeni xi tjín (1 Crón. 29:11; Hech. 4:24). Je xi 144,000 mani xi koatexomakao je Cristo itso: “Señor [Jeobá], bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan” (Apoc. 4:11). Jé Jeobá kisinda ngayeje jmeni xi tjín, kuinga tjínnile ʼnde nga je koatexoma ya ngʼajmi kao i̱ Sonʼnde.
4. Ánni kʼoabixónsíñá nga tsín nda tinichjén je kjoandái xi tjínná kʼiatsa yándsʼiaan kuinyalee Jeobá.
4 Je Na̱i alikui jme xi je kisinda, kuinga tsínnile ʼnde nga je koatexoma. Ngʼakon koan je Na̱i, Adán kao Eva kʼianga yátsʼi̱n tsakinyale Niná (Jer. 10:23). Ninga kisʼele kjoandái nga kiskoejin jmeni xi kisʼin, a tjínle ʼnde nga je kʼoakitso nga tsín timenile nga je Niná koatexomale. Mai. Ningalani tjínná kjoandái nga ñá chjoéjiaan jmeni xi mená sʼiaan, je kjoandái jebi, alikui tsjoáná ʼnde nga yándsʼiaan kuinyalee Niná. Kʼiatsa yándsʼiaan kuinyalee je Jeobá, alikuijin nda tinichjén je kjoandái xi tjínná. Xi chjota ʼminá, machjénná nga je Niná koatexomaná.
5. Ánni nga tsín jao sʼeni tokoán nga kixi jmeni xi sʼín je Jeobá.
5 Ijngosa koya anni nga toje Jeobá xi tjínnile ʼnde nga koatexoma, kuinga ñaki kixi je kjoatéxomale. Je Niná itso: “Anña Jeobá. Je xi tíbakó kjoatsjoacha xi ñaki kjoakixi kao kjoatéxomakixi i̱ sonʼnde, kui jebi xi tsjoa bʼé tokoan” (Jer. 9:24). Je Jeobá alikui kui kjoatéxoma xi bʼasje chjota fitjenngi kʼianga kʼoatso jmeni xi kixi tíjna kʼoa jmeni xi mai. Je kjoatéxoma xi tsjoáná yaa bʼangini je kjoatéxomakixile. Je Biblia kʼoatso nga je Jeobá kao kjoatéxomakixi batéxomani. Kuinga likui jao sʼeni tokoán nga kixi ngayeje kjoatéxomale, je kjoafaʼaitsjen xi tsjoá kʼoa kao jmeni xi sʼín (Sal. 89:14; 119:128). Je Na̱i kʼoatso nga tsín nda batéxoma je Jeobá, tonga je alikui kjimale tífaʼaikao kjoatéxomakixi i̱ Sonʼnde.
6. Jngo koya tikʼaxki̱, ánni nga tjínnile ʼnde je Jeobá nga koatexoma.
6 Ijngosa koya anni nga toje Jeobá xi tjínnile ʼnde nga koatexoma, kuinga tjínle kjoankjíntokon kao kjoachjine xi machjén nga makuinda ngayeje jmeni tjín ya ngʼajmi kao i̱ Sonʼnde. Tobʼelañá, kitsjoale nganʼio je ʼNdíle nga koan kisindaya je chʼin xi nijngojin chjinexki koanle kisindaya (Mat. 4:23, 24; Mar. 5:25-29). Jmeni xi kisʼin je Jesús nga kisindaya chjota, alikui tokoanxkónle je Niná, nga̱ be josʼin tjínnda yaoná kʼoa koaanle sindaya. Kʼoati koa̱nle sikjaʼáyale xi jekʼien kʼoa koaanle kʼoechjoale je kjoaxkón xi sʼe.
7. Ánni nga ngisa nʼio tjínnile kjoachjine je Jeobá tikʼoajinni toʼyani.
7 Je sonʼnde xi je Na̱i kjinentsja tsín kjoanyʼán, alikui nyʼán tjío chjota, ni yajinla jña naxinandáʼndí kʼoa ni yajinla naxinandáyʼai. Tojé Jeobá xi tjínle kjoachjine nga kjoaʼaíkao kjoanyʼán jngo tjíjtsa Sonʼnde (Is. 2:3, 4; 54:13). Kʼoati tjín tokoán jokitso je pastro Pablo nga kitso: “Li tokʼoakji tse tjín kjoachjinele kao kjoaʼisentakonle Niná. Niʼyajin xi [...] machoyale jotjín kjoatéxomale Niná. Niʼyajin xi male be ndiaale” (Rom. 11:33).
JÉ JEOBÁ XI NGISA NDA BATÉXOMA
8. Jósʼe tokoán tʼatsʼe josʼin batéxoma je Jeobá.
8 Tojosʼin tiʼyaa, je Biblia bakókixi nga je Jeobá xi tjínle ʼnde nga batéxoma. Kʼoati tsoya ánni nga jeni xi ngisasa nda batéxoma. Jngo koya anni, kuinga kao kjoatsjoacha batéxoma. Ngisaa machriantʼalee nga nikjaʼaitsjenjiaan nga je Jeobá “jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle kjoatsjoacha xi ñaki kjoakixi kʼoa kao xi ñaki kʼoatjín” (Éx. 34:6). Je Niná bakóle kjoaxkóntokon je choʼndale. Nʼio nda síkuindaná. Kui tsjoáná je xi ndatjín kʼoa saʼnda kitsjoa je ʼNdíle nga koa̱n sʼe̱ná kjoabijnachon xi tsínkʼia fetʼa (tʼexkiai Salmo 84:11; * Romanos 8:32 *).
9. Jósʼin ʼyañá nga mandosinle je Jeobá nga jngó jngó choʼndale.
9 Je Jeobá tsjoakee naxinandále kʼoa mandosinle nga jngó jngó je choʼndale. Si̱kjaʼaitsjenla jokoan nichxin kjoatse. Janla siento nó nga jues tsakinyánda Jeobá nga tsakʼasjentjai je naxinandále. Ninga nʼio tse kjoa kisʼe nga kui nichxin, je Jeobá kuenta kisʼin je Rut, jngo chjoón xi tsín chjota israelita kitjenni, tonga xi nʼio tsakʼénele yaole nga ya tsakʼejnajin naxinandále Niná. Je Jeobá kisichikontʼain nga nda chjota xi chixankao kʼoa nga jngo ʼndí kisʼele. Kʼianga jekjoaʼáyanile je Rut, kʼiajin sʼe̱jinle nga chjotajchíngale Mesías koanni je ʼndíle. Kʼoajinti sʼe̱jinle nga ya Biblia kisʼetʼaxo̱n jmeni xi kisʼin. A fiyaa jkoaa josʼe̱ kon je Rut kʼianga sʼe̱jinle jebi (Rut 4:13; Mat. 1:5, 16).
10. Ánni kʼoabixónsíñá nga tsín kao kjoatsʼen batéxoma je Jeobá.
10 Je Jeobá alikui kao kjoatsʼen batéxoma. Je chjota xi batéxomasonle tjínle kjoandái kʼoa tsjoa satío kon (2 Cor. 3:17). Je David kʼoakitso nga nʼio jeya tíjna je Jeobá, kʼoa tjín nganʼio kao kjoatsjoa ya jñani tíjna (1 Crón. 16:7, 27). Kʼoa je salmista xi Etán tsakʼin itso xi kiski: “Tsjoa tjínle je naxinandá xi kao kjoatsjoa bʼasjengʼa Niná. Ji Jeobá, ji tiniʼisenlai nga tjíotsoma. Nʼio tsjoa satío kon bʼajnda nichxin xi totʼatsʼe jaʼaínli, kʼoa kui kjoatéxomakixili bʼasjengʼa” (Sal. 89:15, 16).
11. Jméni xi sʼiaan nga ngisa sʼe̱jngo tokoán nga toje Jeobá xi nʼio nda batéxoma.
11 Nga ni̱kjaʼaitsjenjiaan je kjoanda xi tjínle Jeobá, ngisaa sʼe̱jngo tokoán nga toje xi nʼio nda batéxoma. Kʼoati sʼe̱ tokoán jokisʼe kon je salmista nga i kitso: “Jngo nichxin ya nitsinli ngisaa nda tikʼoajinni jngo jmi ʼnde jña xin” (Sal. 84:10). Jé Jeobá kisindaná kʼoa jé xi ngisa be jmeni xi machjénná nga tsjoa sa̱tío tokoán. Tojmeni xi tsoná je Jeobá kjoanda tsaanñá. Kʼoa ninga ñʼai ma sakʼoaná, nʼio tsjoa satío tokoán kʼianga nitjosoán jmeni xi tsoná (tʼexkiai Isaías 48:17). *
12. Ánni nga je Jeobá bʼainganʼionilee.
12 Kʼianga jekjoaʼato xi jngo jmi nó koatexoma je Cristo, je Biblia kʼoatso nga tjínkʼa chjota xi kontra koatiole nga toje Jeobá xi bakinle batéxoma (Apoc. 20:7, 8). Ánni nga kʼoasʼinni. Je Na̱i kʼoanacha ijngokʼale je chjota nga kʼoasʼin katamakjainle nga koa̱n sʼe̱le kjoabijnachon xi tsínkʼia fetʼa ninga tsín sitjosonle Niná. Tonga ʼyañá nga tsín kʼoakoa̱n. Kʼiatsa tsjoachaa je Jeobá kʼoa tsakui nga nixánilee nga nda chjota kʼoa nga je xi bakinle batéxoma jngo tjíjtsa Sonʼnde, alikuijin koa̱nkjainná jokuitso je Na̱i. Kui xi mená nga je Niná koatexomaná, nga̱ tojé xi tjínle ʼnde nga batéxoma kʼoa kao kjoatsjoacha batéxomani.
KʼOAINGANʼIOÁ NGA TOJE JEOBÁ XI BAKINLE BATÉXOMA
13. Kʼianga chjenngilee je Niná, jósʼin bʼainganʼiolee nga toje xi bakinle batéxoma.
13 Tojosʼin tiʼyaa, je Jeobá tjínle ʼnde nga je koatexoma kʼoa jé xi ngisasa nda batéxoma. Alikui jao tjínná nga tjínnele je kʼoainganʼiolee. Kʼoasʼin bʼainganʼionilee nga kixi mangíntʼalee, nga je nixálee kʼoa nga kʼoanʼia josʼin mele. Kʼianga kʼoanʼia, bakoñá nga tsjoachaa kʼoa bʼainganʼiolee josʼin batéxoma (tʼexkiai Efesios 5:1, 2). *
14. Jósʼin skénngile Jeobá je xi jko̱ tjíole yaniʼya kʼoa kao je xi chjotajchínga sʼin tjío.
14 Je Biblia tsoya nga kao kjoatsjoacha batéxoma je Jeobá. Kuinga je xi jko̱ tjíole yaniʼya kʼoa kao je xi chjotajchínga sʼin tjío, xi tsjoake josʼin batéxoma je Jeobá, jé skénngile kʼoa alikui kʼoene. Kʼoakisʼin je Pablo, jé kiskenngile Jeobá kʼoa kao ʼNdíle (1 Cor. 11:1). Alikui kisisoale kʼoa tsín tsakʼénele xi kjaʼaí nga kui kʼoakatasʼín je xi kixi tíjna, tosaa ngasin nganda tsakjákao nga kitsjoanganʼiole (Rom. 12:1; Efes. 4:1; Filem. 8-10). Nga kʼoakisʼin je Pablo, jé Jeobá kiskenngile. Kʼoa kʼoati tjínnele kʼoasʼin je xi tsjoake kʼoa xi tsjoánganʼiole josʼin batéxoma je Jeobá.
15. Kʼianga bʼainganʼiolee je xi xá kjinele jinnaxinandále Niná, ánni kʼoabixónñá nga je tibʼainganʼiolee josʼin batéxoma Jeobá.
15 Jósasʼin bʼainganʼiolee josʼin batéxoma Niná. Kʼiaa nga bʼainganʼiolee je xi xá bánele. Tobʼelañá, bʼainganʼioñá josʼin maxá jinnaxinandále Niná, ninga sakʼoa tsín majinná jmeni xi sʼendajin. Kʼianga kʼoanʼia, jé bʼainganʼiolee josʼin batéxoma Jeobá, nga̱ jé bándiaale naxinandále josʼin síxá (Efes. 5:22, 23; 6:1-3; Heb. 13:17). Ndasʼin kuichomani tsa si̱tjosoán, nga̱ kui xi mele Jeobá nga ndasʼin kuiyoaa.
16. Nga bʼainganʼiolee josʼin batéxoma Jeobá, jméni xi kuenta nʼia.
16 Jmeni xi nʼia kʼoati kao kui bakoñá nga bʼainganʼiolee nga toje Jeobá xi bakinle batéxoma. Je Jeobá alikui ñaki jngo kjoatéxoma tsjoáná josʼiaan nga nyaon nyaon. Tosaa kui tsoyaná josʼin síkjaʼaitsjen. Tobʼelañá, alikui ñaki tsakʼétʼaxo̱n jñani kʼoatsoná jokjoan najño xi koa̱n chʼa̱kjá. Je xi kʼoatsoná kuinga je najño xi chʼa̱kjá tjínnele koako nga testigole maa (1 Tim. 2:9, 10). Xi ijngosani, alikui mele nga ʼya xi si̱katéngiaa (1 Cor. 10:31-33). Kʼianga kuenta nʼia josʼin síkjaʼaitsjen Jeobá kʼianga jmeni xi nʼia, bakoñá nga tsjoachaa kʼoa nga bʼainganʼiolee josʼin batéxoma.
Kʼoainganʼiolee josʼin batéxoma je Jeobá kʼianga jme xi chjoéjiaan kʼoa nga niʼyaná tiyoaa (Chótsenlai párrafo 16 saʼnda 18)
17, 18. Jósʼin koako xi jechixan nga tsjoánganʼiole josʼin batéxoma je Jeobá.
17 Kataʼyala jmeni xi koa̱n sʼin xi jechixan nga tsjoánganʼiole josʼin batéxoma je Jeobá. Tjínkʼa xi tsínni nda batio kʼianga jebixan. Jméni xi koa̱n sʼin. Koaan kui sikjaʼaitsjen jokisikao Niná je naxinandá Israel. Je Jeobá joxi xʼinle koanni je naxinandále (Is. 54:5; 62:4). Je naxinandá Israel nʼio tse nga chʼao kisʼin, kʼoa yaa koanngóson jngo chjoón jngo xʼin xi jechixan xi tse kjoa sʼele. Tonga je Jeobá tosi tonda kisichatʼale je chjota israelita kʼoa kuenta kisʼin jmeni xi tsakʼéndajinkao (tʼexkiai Salmo 106:43-45). *
18 Je chjotale Cristo xi jechixan xi tsjoake Niná, jé kjenngile. Ninga tse kjoa sʼele, alikui tsjion xínkjín. Majinle nga jetojngo yao mani ngixko̱n Jeobá kʼoa nga kui xi mele Jeobá nga tondiaa koatiokao xínkjín. Tojo tso je Énle Niná, tokʼiakjoán nga koa̱n tsjión xínkjín xi jechixan kʼiatsa jngo xi sichajngi, kʼoa tokʼiaa nga jendái koatiole xínkjín (Mat. 19:5, 6, 9). Kʼianga bʼénele yaole xi jechixan nga ndasʼin batiokao xínkjín, bakó nga tsjoánganʼiole josʼin batéxoma je Jeobá.
19. Jméni xi sʼiaan kʼianga saténgi sakʼoaa.
19 Nga chjotajée maa, sakʼoaa kui kʼoanʼia jmeni xi tsín sasénle Jeobá. Je Niná be nga kʼoama. Kʼoa nga tsjoakená, kisikasén je ʼNdíle nga tsakʼéchjíntjainá. Kuinga machjénsíni nga si̱jélee kjoanichatʼa je Jeobá kʼianga kui kʼoanʼia jmeni xi tsín sasénle (1 Juan 2:1, 2). Alikui koa̱n nga kui nʼio si̱kjaʼaitsjeen jñani chʼao kanʼia, tosa kʼoénelee yaoná nga tsín tikʼoasʼianñá. Kʼiatsa si̱chriantʼalee je Niná, sichatʼaná kʼoa koasenkaoná nga koa̱nná kuitjátojiaan je kjoa xi sʼe̱ná nichxin xi nroa, ánni nga tosi tonda si̱xánilee (Sal. 103:3).
20. Ánni machjénni nga kʼoainganʼiolee nga toje Jeobá xi bakinle batéxoma.
20 Kʼianga jekjoaʼaí sonʼnde chjotse, jé Jeobá koatexomale ngatsʼi chjota xi koatio, kʼoa kuitsoyaná je kjoatéxomale (Is. 11:9). Nichxin xi tiyoaa ndʼaibi, jekjimajinná jotjínni kjoatéxomale. Kʼoa jemachrianle nichxin nga tsín tiʼya xi koatiochjoanile nga toje Jeobá xi tjínle ʼnde nga batéxoma. Ndʼaibi, nga kʼoainganʼiolee nga toje Jeobá xi bakinle batéxoma, machjén nga si̱tjosonlee, nga ñaki kixi kjuintʼalee nga si̱xálee kʼoa nga kʼoénelee yaoná nga chjénngilee.
^ párr. 8 Salmo 84:11: “Nga̱ je Jeobá Niná jngoní tsʼuí kʼoa jngoní escudo; tsjoá kjoanda kao kjoajeya. Je Jeobá alikui kjoaʼaxinle xi ndatjín je xi ñaki kixi tjíofitʼale”.
^ párr. 8 Romanos 8:32: “Je xi likui tsakʼéchjoale nga kisʼele kjoañʼai, nda tsa titsʼeni ʼndíle, tonga kitsjoatʼa xi tʼatsaan ngatsʼiaa, a tsín kʼoati tsjoákjoatjaoná ngayije kjoa kao Cristo”.
^ párr. 11 Isaías 48:17: “Kui jebi xi títso Jeobá, je xi tsakatseyali, je xi Tsje sʼin tíjna i̱ Israel: An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai”.
^ párr. 13 Efesios 5:1, 2: “Chjénngilao Niná, joni tsa ʼndí xi kjaínga tjaocha. Kao kjoatjaocha timakao xíngio, josʼin Cristo koantsjoakená, kitsjoantjainá yaole, joni jngo kjoatjao, kʼoa joni xi kitsʼaintjainá xi naská nje̱ ngixko̱n Niná”.
^ párr. 17 Salmo 106:43-45: “Nkjín kʼa nga tsakʼasjentjai, tonga xíjin koan kʼoa tsín tsakʼaʼén, kʼoa tosi tonda kui xi chʼaotjín kʼoakisʼin. Tonga je tsabee kjoañʼai xi tjíofaʼá kʼoa kinrʼoéle nga kisijé nganʼio. Jaʼaitsjenle jmeni xi tsakʼéndajinkao, kʼoa koanmake xi totʼatsʼe nga tjínle kjoatsjoacha xi ñaki kjoakixi”.
