JE EVANGELIO xi tsʼe Mateo itso: “Jesús jaʼasʼen ya yo̱ngo̱, kitsʼaonsje ngatsʼi xi tjíobaténa, xi tjíobatse ya yo̱ngo̱be. Kiskanitíkjá yámixa̱le je xi tjíosíkʼantjai taon. Kiskanitíkjá yáxilele je xi tjíobaténa nise paloma. Kitsole: Tjítʼaní: Je ndʼiana kʼuínle ndʼia jña sʼetsʼoaya, tonga jon ngijaole ché tinʼiao” (Mat. 21:12, 13).

Je xi bʼéyanajmí jmeni xi koan nichxin kjoatse xi tʼatsʼe chjota judío, kʼoatso nga je chjota xi cho̱ tsakaténa ya yo̱ngo̱ nʼio chjí tsakʼa. Tojo tso je xo̱n xi Misná (Keritot 1:7) ʼmi, kʼianga siglo 1, kisʼe nichxin nga saʼnda jngo denario chjí koan nga jao nisechxoa. Jngo chjota xi tochoa njele, tjínnele 25 nichxin sixá kʼianga jngo denario kuinje̱le. Je Kjoatéxomale Niná kʼoatso nga je chjota xi ma̱ tjío koaan nga tójoo tsjoátʼa kʼoa tsa nisechxoa, tonga nga jetsakin chjíle, jelikui tikinjenile (Lev. 1:14; 5:7; 12:6-8). Je chjota xi Simeón ben Gamaliel tsakʼin, alikui kisasenle nga kʼoakoan. Kuinga kisichoayani jmeni xi tsjoátʼa je chjota. Nga kʼoakisʼin, je chjíle nisechxoa nʼio jaʼajen, saʼnda jngo sientola ya kinroajen chjíle.

Tojosʼin tiʼyaa, kixi tíjna nga “ché” kitsole Jesús je chjota xi cho̱ tsakaténa ya yo̱ngo̱, nga̱ nʼio chjí tsakʼa kʼoa nʼio xkaiʼa koan.