A tsakʼexkianí je Xo̱n xi Bájinkonná xi chriansʼa kitjo. A koaanli kʼoasí jmeni xi kjonangi ibi:

Jméni xi ño koya koa̱n kʼoasʼiaan nga ngisa nda kuijndá.

Nda kuisenjnaa kʼianga kuijndá, nda chjénjtaa, nda chjóxʼá ndsoʼbaa kao na̱xa̱jta̱ná kʼoa nʼio kuijndá. Tsa kʼoasʼiaan, ngisaa nda kuijndá (w17.11, p. 5).

Jmé xi bakóyaná josʼin kisatio je naxinandá jñani kitoka je chjota xi tokjoataon xi koanle nga kʼien kisikʼien.

Jaon naxinandá kisatio ngakjijnda naxinandá Israel, kʼoa je chjota israelita kisindachon je ndiaa xi bichóni naxinandá jebi, ánni nga ngotjo kuichosíni je chjota xi tokjoataon xi koanle nga kʼien kisikʼien (w17.11, p. 14).

Nga kitsjoa je ʼNdíle Niná, ánni nga kuisíni je kjoatjao xi ngisa nʼio chjíle.

Koaan kuiyoaa ngantsjai nichxin kʼoa koaan ndái kuiyonilee je jée kao kjoabiya. Nga tsjoakená je Niná tsakʼéchjíntjainá ninga tojo jée kichʼá (wp17.3, p. 6, 7).

Ánni kʼoabixónsíñá nga kjoafaʼáyale Jesús tínchja̱ni je Salmo 118:22.

Kichʼasjengi kʼoa kinikʼien je Jesús. Tjínnele nga jaʼáyanile nga “la̱jao̱xi̱ngi̱ xi jko̱ tíjna” koan (w17.12, p. 9, 10).

A tjínnele ʼndítjon koan je xi chjotajchíngale Mesías koan.

Tsín tongatsʼi nga ʼndítjon koan je xi chjotajchíngale koanni je Jesús. Je chjota judío koanjinle jebi. Tobʼelañá, nga je Cristo yaa kjoaʼaíni ntje̱le David, je tile Jesé xi tojetʼani (w17.12, p. 14, 15).

Jmé kjoafaʼaitsjen tsjoá je Biblia xi tʼatsʼe xki.

Je Kjoatéxomale Moisés kʼoakitso nga je xi fiʼndojon yaole tʼaxin katanikatío, nga tjínnele tsje sʼin je xi kʼien síkao kʼoa nga tsín tojña kataxinyándo yʼe. Kʼoati kitso nga tjínnele jtíndai yaole je xtiʼndí kʼianga jekuichole jin nichxin nga katsin, nga̱ kʼiaa nda síxá je njínle (wp18.1, p. 7).

A chʼaotjín nga koa̱ntsjoachaa yaoná.

Machjén nga tsjoacha koaan xíngiaa joni yaoná (Mar. 12:31). Kʼoa je xi xʼin tjínnele tsjoake katama yánchjínle joni yaole (Efes. 5:28). Je xi tsín ndatjín kuinga to yaoná koa̱ntsjoachaa kʼoa tsín tsjoacha koaan xikʼa (w18.01, p. 23).

Jméni xi sʼiaan nga nʼio katasʼejna je kjoamakjainná.

Nda chótʼayá je Énle Niná kʼoa si̱kjaʼaitsjenjiaan. Si̱tjosoán jmeni xi majinná. Kʼoaiʼndee nga je nganʼiotsje katabándiaaná kʼoa si̱tjosoán jmeni xi tsoná xi ngikʼa kʼoa kʼoailee kjoanda (w18.02, p. 26).

Ánni tsín koa̱n astrología kao xi kotʼason si̱chjénñá nga jchaa jme xi koa̱n nichxin xi nroaján.

Nkjín koya anni, tonga je xi ngisasa chjíle kuinga tsín sasénle Niná kjoa jebi (wp18.2, p. 4, 5).

Kʼiatsa ʼya xi kʼoakuitsoná nga ya koanngínchonlee, jméni xi sʼiaan.

Tjínnele si̱tjosoán jmeni xi kuixoán (Sal. 15:4). Alikui koa̱n totjín totjen xi chʼa̱ngiñá yaoná nga tsín koanngián. Kʼiatsa tsín kʼoasʼiaan, toxitsjoajinni jmeni xi kasʼín je xi kanchja̱ná ya niʼyale (w18.03, p. 18).

Jmé xi bakóyale je ndsʼee xi xá tjínle jinjtín je choa̱le Timoteo.

Nʼio koanndosinle tʼatsʼe xi ngikʼa kʼoa kui títjon xále Niná kisikʼéjna. Nʼio tsakʼénele yaole nga kisixále Jeobá kʼoa kʼoakisʼin jmeni xi tsakʼinyale. Tosi tonda kiskotʼaya je Énle Niná kʼoa kui nganʼiotsjele Jeobá kisinʼiotʼa. Koaan chjénngiaa ngatsʼiaa je choa̱le Timoteo (w18.04, p. 13, 14).