1. Ánni nga nʼio tsjoa tjíoni tokoán.

JE CHOʼNDALE Niná nʼio tjíosíxá jngo tjíjtsa Sonʼnde, kʼoa jebi tsjoa batío tokoán. Je nó xi jaʼato, tsʼato te miyón koanni chjota xi tsakʼinyale Biblia. Xi ijngosani, miyón koanni chjota xi tsakatiojtín nga jaʼaitsjenya je Kjoabiyale Cristo kʼoa koanjinle jokji kjoatsjoacha tsakakóná Niná nga kisikasén je ʼNdíle nga tsakʼéchjíntjainá (1 Juan 4:9).

2, 3. 1) Jméni xi tsín bʼéchjoaná nga chʼasjengʼaa je Nʼainá xi tíjna ngʼajmi. 2) Tojo tso ya Mateo 5:14-16, jméni xi chótʼayajiaan i̱ kjoaʼmiya jebi.

² Kjaʼaí kjaʼaí én male je xi tjíojin naxinandále Jeobá. Kʼoa jebi alikui bʼéchjoaná nga chʼasjengʼaa je Nʼainá xi tíjna ngʼajmi (Apoc. 7:9). Ninga kjaʼaí kjaʼaí én nokjoaa kʼoa ninga xinxin ʼndená koaan si̱ʼiseen “i̱ sonʼndebi joni tsa lʼí”, xi tsonile, koaan nga nda choa̱ koakoá (Filip. 2:15).

³ Kʼianga ʼyaa nga kjimankjínyaa, nga jtín sʼin tiyoaa kʼoa nga bakoá nga tjenyatokon tiyoaa jé Jeobá bitjojeya kʼoa kui xosíkao je chjota nga kʼoati kotʼayani. I̱ kjoaʼmiya jebi, kui chótʼayajiaan jósʼiaan nga nda choa̱ koakoá nga si̱tjosoán  nga jan koya jebi (tʼexkiai Mateo 5:14-16). *

4, 5. 1) Jmésani xi koa̱n sʼiaan kʼianga ʼmiyasoán. 2) Jmé kjoanda xi tjenkao nga nda nikoaa je chjota (chótsenlai sén xi fitsʼiani kjoaʼmiya jebi).

⁴ Je rebista xi tsʼe 1 de junio de 1925, xi én inglés kitjo je kjoaʼmiya xi jaʼaitʼa i tsakʼin: “Lʼí jñani njio chon” kʼoa i kitso: “Niʼyajin xi kixi koaitʼale je Nainá nichxin xi tiyoaa ndʼaibi [...] tokʼiaa tsa siʼisen je lʼíle”. Kʼoa i kitsosa: “Kʼianga siʼisen je lʼíle, kui xi tsonile nga kuitsoyason je énnda chjotse ngakjijnda ʼnde kʼoa nga kʼoasʼin koaikao yaole josʼin mele Niná”. Kʼianga ʼmiyasoán xi tʼatsʼe Chjotaxále Niná kʼoa nga chjotale Cristo nikoaa je chjota kui tsoyanile nga tiniʼiseen joni tsa lʼí (Mat. 28:19, 20). Kʼoati chʼasjengʼaa je Jeobá kʼianga ndasʼin mangínkoaa yaoná. Kʼianga ʼmiyasoán, je chjota kui kotsenle jonʼia. Nga nda nikoaa kʼoa nga nitiʼndaa ndasʼin nchja̱ni xi tʼatsaan kʼoa xi tʼatsʼe Niná.

⁵ Je Jesús i kitsole je chjotatjenngile: “Kʼia nga kuitjásʼaon niʼya, titiʼndao” (Mat. 10:12). Je chjota xi tjín ya ʼnde jñani kitsoyason je chjotatjenngile Jesús kisikʼasʼen ndʼiale je xi kichokonle. Tsakui nichxin tsín kʼoasʼín je chjota jñani tsaan. Saʼnda tjín chjota xi tsokjón kʼoa xi majtile nga ʼya xi síkjanetʼa je xo̱ntjoa ndʼiale. Tonga tsa nda si̱koaa je chjota kʼoa koakolee kjoaxkóntokon tsakui nichxin kjuinrʼoéná. Kʼianga ʼmiyasoán jña nʼio tjín chjota, ngisaa nda nrʼoé je chjota kʼianga ñaki tsjoa tjínná nga nitiʼndaa. Tjínkʼa xi síchrian, kjoé je xo̱n kʼoa saʼnda fákaonajmíná.

6. Jméni xi sʼín jngo ndsʼee kao chjoónle xi jekoanjchínga nga tosi tonda tjíotsoyason.

⁶ Jngo ndsʼee kao chjoónle xi jekoanjchínga xi ya Inglaterra tsʼe, alikui tinanda chókjoanile nga xki̱ ndʼia tsoyason. Tonga nga ñaki kʼoatjío kon nga tosi tonda kuitsoyason, yaa tsoya ya chrian xo̱ntjoa ndʼiale, jngo yámixa̱ basénjna xi binyáson je xo̱n xi Énle Niná yʼangini. Kʼoa kʼiakjoán bichó nga jefikʼá xtile je xijchá ya ndʼiaskuela xi ya kijnachrian. Nʼio nkjín xijchá jebi xi kotsenle je xo̱n xi ya nya kʼoa bʼaa nga jao je libro Los jóvenes preguntan kʼoa kʼoati bʼa kʼa foyeto. Jngo precursora xi ya ñatjen kitsoyason kao nga jao ndsʼee jebi. Nga ndʼé tichjaa jebi kʼoa nga bʼénele yaole je ndsʼee nga tsoyason, jngo xijchá xi jetíkotʼaya Biblia.

7. Jósʼin koa̱n kuinyakoaa je xi xin naxinandá faʼaini.

⁷ Nichxin xi tiyoaa ndʼaibi, nʼio nkjín chjota xi xin naxinandá faʼaini. Jósʼin kuinyakoaa chjota jebi nga katamale xi tʼatsʼe Jeobá kao jme xi tjínndajinle. Je xi títjon sʼiaan kuinga koa̱nná si̱tiʼndaa kao én xi male kʼoa si̱chjén je aplicación JW Language. Kʼoati machjén nga katama kʼaná je én xi male ánni nga koa̱nndosinnile jmeni xi kʼuínlee. Xijekoa̱n, koaan koakolee je pájina xi tíjnaná ya Internet ya jw.org kʼoa koakolee video kao xo̱n xi énle faʼaitʼa (Deut. 10:19).

8, 9. 1) Jósʼin basenkaoná je kjoajtín xi satíoná nga jinle xomana. 2) Jósʼin koa̱n kuinyakao je xi xijchá ma je xtile nga katatsjoá comentariole nga satíoná je kjoajtín.

⁸ Je Jeobá tsjoáná jmeni xi basenkaoná nga ngisa nda koa̱nná kʼuínyasoán. Tobʼelañá, kʼianga satíoná je kjoajtín Tʼatsʼe  chjotale Cristo kao Xále Niná bʼainá kjoafaʼaitsjen xi basenkaoná nga mangínnixatʼa ijngokʼá je chjota kʼoa nga bʼailee estudio.

⁹ Je chjota xi faʼai kʼianga satíoná je kjoajtín, nʼio nkjín xi tokʼoamale kʼianga nrʼoé nga tsjoá comentariole je xtiʼndí. Je xi xijchá ma, nda sʼín nga tsoyale je xtile nga tsʼe én síchjén nga tsjoá comentariole. Kʼianga ñaki ni̱ma̱le nroajinni je xtiʼndí nga tsjoá comentariole kʼoasʼin bakóni je kjoamakjainle, kʼoa binyakao je chjota xi faʼai nga satíoná je kjoajtín (1 Cor. 14:25).

10. Jósʼin basenkaoná nga chotʼayajtían je Énle Niná ya niʼyaná nga jtín sʼin biyoaa.

¹⁰ Ijngo koya xi koa̱n sʼiaan kuinga jtín sʼin kuiyoaa kao je familianá kʼoa kao je jtín. Tobʼelañá, nʼio tjínle kjoandosin nga je xi xijchá ma ntsjaintsjai skótʼayajtín Énle Niná ya niʼyale. Nʼio nkjín xi kui kotsenle je programa xi tsʼe JW Broadcasting xi xki̱ sá satío. Kʼianga jeskótsenle, machjén nga kjaoyani josʼin koaitjenngi jmeni xi kamajinle. Xi ijngosani, je xi xijchá ma tjínnele kuenta sʼin jmeni xi machjénle je xi sʼa xtiʼndí kao je xi jekjimajchínga. Kuinga tjínnenile koasjai jmeni xi machjénle ngatsʼi xi tjío ya yaniʼyale (Sal. 148:12, 13).

11-13. Jósʼiaan nga jtín sʼin kuiyoaa ngatsʼiaa ya jinjtín kʼoa nga tosi tonda kuinyakoaa xi ngikʼa nga kʼoati katasʼín.

¹¹ Ninga sʼa xtiaa kʼoa ninga jekoanjchíngaa koaan kʼoainganʼioá nga jtín sʼin kuiyoaa ya jinjtín kʼoa kuinyakoaa je xi ngikʼa nga kʼoati katasʼín. Tobʼelañá, je xi sʼa xti koaan kjoakaonajmí je ndsʼee xi jekoanjchínga, koaan skónangile tʼatsʼe josʼin tjíosíxále Niná. Jebi nʼio kuinyakao je xti kʼoa kao je ndsʼee nga tosi tonda Niná sixále. Xi ijngosani, ngatsʼiaa koaan chjoéyaa je xi faʼai je kjoajtínná. Koaan nda si̱koaa kʼoa kjoásjailee jña koatio kʼoa kʼoakʼuínlee joʼmi je ndsʼee xi ngikʼa. Kʼiatsa kʼoasʼiaan, nda sa̱tío kon.

¹² Je xi bándiaa nga satíoná je kjoajtín nga bitjokʼinyasoán, koaan kuinyakao je ndsʼee xi jekoanjchínga nga tosi tonda katabakóyason. Nga sʼe̱le ʼnde jñani koakoyason kʼoa nga kʼoasʼin sʼe̱ndajin nga kao jngo xi sʼa xti kuitsoyason ánni nga koa̱n tsjoánganʼionile. Je xi chjotajchínga sʼin tjío kʼoati tjínnele kuenta sʼin  je xi tsín tinanda kʼoamanile nga tsoyason tʼatsʼe nga chʼin bʼetʼale kʼoa tsa josasʼin koa̱nchjénle nganʼio. Tsa kʼoasʼin jebi, kuinyakao nga kao kjoatsjoa kuitsoyason ngatsʼi, xi sʼa xti, xi jechjotajchínga, xi sʼa tjíobʼétsʼiakao nga tjíotsoyason kʼoa xi jekjoatsele nga tsoyason (Lev. 19:32).

¹³ Je xi kiski jngo salmo, i kitso: “¡Nʼio nda kʼoa nʼio naskásʼin matsen nga jtín tjío je xi ndsʼe̱ fáo!” (tʼexkiai Salmo 133:1, 2). * Kʼianga jtín sʼin tsakatio je chjota israelita nʼio tsakinyakao nga tsakʼétsʼoale Jeobá, je salmista kʼoasʼin kisingósonkao joni tsa siti̱ kisʼejtenson jko̱, xi nʼio nda nje̱ kʼoa xi síkinjenyʼánjonná. Nichxin xi tiyoaa ndʼaibi, koaan kʼoainganʼioá i̱ jinjtín nga jtín sʼin kuiyoaa. Tonga jméni xi sʼiaan nga ngisa koa̱nmiyoaa je ndsʼee (2 Cor. 6:11-13).

14. Jméni xi koa̱n sʼiaan nga ndasʼin sikʼaxki̱ná je chjotandaindʼianá.

¹⁴ Koaan koakoyalee Énle Niná je chjotandaindʼianá. Tsa nda mangínkoaa koa̱nndosinjinle jotjínni xi kixi. Chjónangilee yaoná jebi: “Jósʼin síkjaʼaitsjen xi tʼatsʼan je chjotandaindʼiana. A tsje sichoan je ndʼiana. A nda nchja̱ni jochonna. A basenkaoña xi ngikʼa”. Kʼianga chja̱kaonajmiá je ndsʼee koaan chjónangilee jósʼin síkjaʼaitsjen je chjotandaindʼiale xi tʼatsʼe, xi xínkjín mani, xi ñatjen fi skuela kʼoa tsa xi ñatjen síxá. Tsakui nichxin kʼoakuitsoná nga nʼio ndasʼin bʼaxki̱ (Efes. 5:9).

15. Ánni nga nʼio tjínnile kjoandosin nga tjenyatokon kuiyoaa.

¹⁵ Kʼiatsa mená nga tosi tonda si̱ʼiseen joni tsa lʼí, kuenta sʼiaan je nichxin xi tiyoaa ndʼaibi. Je Jesús kjitʼaa i̱ kitsole je chjotatjenngile: “Tjenyatakon tiyo” (Mat. 24:42; 25:13; 26:41). Kʼiatsa kʼoasʼin si̱kjaʼaitsjeen nga nʼiosa tse cha nga kjoaʼaí je “kjoañʼai xi nʼio tse” kʼoa tsa kʼoasʼin si̱kjaʼaitsjeen nga tsín tijchañá nga kʼoakoa̱n, kuijin xosikaoná nga tsín tinʼio kʼuínyasonñá (Mat. 24:21). Likuijin titsjoa sa̱tíoni tokoán kʼoa tsakui nichxin saʼnda tsín tikʼuínyasonñá.

16, 17. Jméni xi sʼiaan nga tjenyatokon kuiyoaa.

¹⁶ Nga sa chʼao sa chʼao kjimachon je nichxin xi tiyoaa ndʼaibi, nʼio machjén nga tjenyatokon kuiyoaa. Alikui jao tjínná nga je Jeobá jetíjnachoa̱le je nichxinle (Mat. 24:42-44). Nga kjesa faʼaijin nichxin jebi, machjén nga tsejta koaan kʼoa nga tjenyatokon kuiyoaa ngantsjai. Nyaon nyaon kʼoéxkiaa je Énle Niná kʼoa ntsjaintsjai kʼoétsʼoaa (1 Ped. 4:7). Kuenta sʼiaan je choa̱le ndsʼee xi tjenyatokon tjío kʼoa xi tosi tonda tjíosíxále Niná. Jngo choa̱ faʼaitʼa je rebista La Atalaya xi tsʼe 15 de abril de 2012, ya pájina 18 saʼnda 21, jñani tso: “Siete décadas aferrado a la falda de un judío”.

¹⁷ Tosi tonda je Jeobá si̱xálee, kui kʼoasʼiaan xi ndatjín tʼatsʼe xi kjaʼaí kʼoa si̱kʼayalee nichxin je ndsʼee. Tsa kʼoasʼiaan, tsjoa sa̱tío tokoán kʼoa ngotjo koaini nichxin (Efes. 5:16). Nichxin kjoan jngo siento nóján, nʼio tse jmeni xi kisʼin je ndsʼee kʼianga kisixále Niná. Tonga josʼin tíbándiaale Jeobá je naxinandále ndʼaibi ngisaa nʼio tse xá xi tíbitjoson. Saʼnda tsín majinná jokji tse xá xi kjima.

18, 19. Jósʼin koa̱n tsjoánganʼio je xi chjotajchínga sʼin tjío nga tjenyatokon kuiyoaa. Jngo choa̱ tʼejnai.

¹⁸ Ninga chjotajée maa, je Jeobá títsjoáʼndená nga tinixálee. Kʼoa nga tjenyatokon kuiyoaa, títsjoáná je “kjoatjao”, xi tsonile, je xi chjotajchínga sʼin tjío  (tʼexkiai Efesios 4:11, 12). * Kʼianga kuichosíxʼatʼaná xi ngindia je xi chjotajchínga sʼin tjío, kjuintjenngiaa je kjoafaʼaitsjen xi tsjoáná.

¹⁹ Ya Inglaterra, jngo ndsʼee xi kjoa kisʼele kao chjoónle. Kisijéle nganʼio je xi chjotajchínga sʼin tjío. Je tichjaa kʼoakitso nga tsín sítjoson je xʼinle je xá xi kjinele nga jko̱ sʼin tíjnale je familiale. Kʼoa je ndsʼee kʼoakitso nga ñʼai ma kjoaixile nga bitjosonle je xá xi kjinele, kʼoakitso nga tsín nda bakóyale je familiale kʼoa nga tsín kjitʼa kotʼayajtín Énle Niná. Je xi chjotajchínga sʼin tjío kui tsakjákaoni xi tʼatsʼe Jesús josʼin kisikuinda je chjotatjenngile kʼoa nga kuenta kisʼin jmeni xi koanchjénle. Je xi xʼin kui kjoafaʼaitsjen tsakʼaile nga kui choa̱le Jesús katafitjenngi, kʼoa je xi chjoón kʼoatsakʼinle nga tsejta katama. Kʼoati tsakʼaile kjoafaʼaitsjen josʼin tsjoánganʼiole xínkjín kʼoa kao nga jao xtiʼndíle nga katakotʼayajtín Énle Niná ya niʼyale (Efes. 5:21-29). Nga jekoanskanni, je ndsʼee kʼoatsakʼinle nga nʼio ndasʼin tíbasenkao je familiale. Kʼoatsakʼinle nga tosi tonda kʼoakatasʼín kʼoa nga je nganʼiotsjele Niná koasenkao ánni nga nda koandiaanile je familiale. Nga tsakakó kjoatsjoacha je xi chjotajchínga sʼin tjío, nga koanndosinle kʼoa nga tsakinyakao familia jebi, nda tjíosíxále Niná.

20. Jósʼin kuichotsjoá kʼiatsa nda si̱xále Niná.

²⁰ Ya Salmo 128:1 itso: “Tsjoa tjínle je xi tsokjónke Jeobá, je xi ya tsoʼbaya ndiaale”. I̱ kjoaʼmiya jebi kui kaʼyaa nga kʼoakʼuínlee chjota nga je Jeobá katasíxále, nga tosi tonda jtín sʼin kuiyoaa kʼoa nga tjenyatokon kuiyoaa. Kʼiatsa kʼoasʼiaan tsjoa sa̱tío tokoán, kʼoa skoee xi ngikʼa nga nda choa̱ tibakoá kʼoa nʼio nkjín chjota xi koa̱nmele kʼoasjejeya je Nʼainá xi tíjna ngʼajmi (Mat. 5:16).