JE SÉN xi faʼaitʼa libro xi tsakʼaile xijchána nʼio tse xi kisikjaʼaitsjenjinna. Saʼnda nga sʼa ʼndí kjiʼe̱ nʼio koanmena tsaʼbe xi tʼatsʼe Biblia, kʼoa je libro jebi nʼio ndasʼin kitsoyana.

Nichxin nga tífitsʼia je Kjoajchántse xi majaoni ya naxinandá India, tsee kjoa jaʼatojian. Je xijchána kitsjion xínkjín. Alikui koanjinna ánni kʼoakisʼinni, nga̱ nʼio tsjoake̱ koan je xijchána. Toʼan tijna koanna kʼoa kʼoasʼin kisikjaʼaitsjen nga jekitsjionkonna. Alikui xtindsʼe kisʼe kʼoa aliʼya xi kitsjoanganʼiona.

Je mana kao an, yaa tsakiyuijin ya naxinandá jñani Karachi ʼmi. Ñandia kʼianga ya xo̱ntjoanajin kichosíkjanetʼa je Fred Hardaker, jngo chjinexki xi jetjínle nó xi testigole Jeobá ma. Tikui relijión tíjnajinni joni je misionero xi kitsjoale libro je xijchána. Kʼoakitsole je mana tsa mele nga skótʼaya je Biblia. Je mana kʼoakitso nga tsín mandosinle, tonga kʼoakitso tsakui nichxin koa̱nndosinna an. Jngo xomana jaʼato kʼoa je ndsʼee Hardaker kʼiaa kichotsoyana Biblia.

 To choaa xomana jaʼato kʼianga kia je kjoajtín xi satío ya jñani tíjnale clínica je ndsʼee Hardaker. Tejaola mani je testigole Jeobá xi jechjotajchínga xi ya batiojtín, je ndsʼee jebi jo tile kisikaona, tsakinyakaona kʼoa kisikuindana. Faʼaitsjenna nga ñaki kʼoasʼin tsakjákaonajmína josʼín xi ñaki miyo. Kʼoa kuikjoán xi machjénna nga kui nichxin.

Tochoatsee jaʼato nga kʼoakitsona je ndsʼee Hardaker nga ñatjen koanngíkʼinyasuinjin. Tsakakóyana josʼin machjén je gramófono jña ma noʼyalee je kjoanokjoaya. Tjínkʼa je kjoanokjoaya xi ñaki kʼoakitsokixi jokjoantjínni xi kixi, kuinga tsín kisasen kʼanile je chjota. Tonga an nʼio tsjoake̱ koan nga kixinyasoan. Nʼio tsjoake̱ koan je Énle Niná kʼoa nʼio tsjoa kisʼe tokoan nga kixinyale xi kjaʼaí.

Kʼianga kicho ya naxinandá India je sondado xi Japón tsʼe, je chjotaxá xi tsakatéxoma ya Gran Bretaña ngisaa tinʼio kitjenngikengáni je testigole Jeobá. Kʼianga sá julio nó 1943, kʼoati tsʼakaotʼana kjoa jebi. Je director xi tsʼe skuela jñani fia, xi naʼmi anglicano ma, tsakʼaonsjena je skuela, kʼoakitsole je mana nga tsín nda choa̱ tíbʼejnale je xti xi ngikʼa nga kao je testigole Jeobá tikotʼaya. Je mana kʼoakitsona nga tsín tikoa̱n kjuíña je kjoajtín xi satíole je testigole Jeobá. Kʼoa xijekoan, yaa kisikasénna jñani tíjna je pana ya Peshawar, jngo naxinandá xi 1,370 kilómetro nkjín tíjna. Kʼoa nga tsín tikiskotʼayaña xi tʼatsʼe Niná kʼoa nga tsín tikoan kiña je kjoajtín, alikui tinʼio kisʼejnani je kjoamakjainna.

Kʼianga nó 1947, ki ijngokʼa ya Karachi nga kikajngixá. Kʼianga jeya tijna kiña ya clínicale je ndsʼee Hardaker kʼoa nda kiskoéyana.

“Jmé xi kjimali”, kitsona. Kʼoajinsʼin kisikjaʼaitsjen nga timʼe.

Kʼoa an i kixinle: “Alikui jme chʼin tjínna. Je xi machjénna kui je Énle Niná. Mena skotʼaya je Biblia”.

Kʼoa i kitsona: “Kʼianí meli kʼoétsʼiakoaa nga chótʼayá”.

I kixinle: “chótʼayákjoán ndʼaibi”.

Nga kui nichxin nʼio nda kichotʼayaijin je Biblia. Joxi familiana kichokon ijngokʼale koanna. Kui xi koanmele je mana nga tsín tiya koajtaña je testigole Jeobá, tonga ñaki kʼoatsakʼe tokoan nga je Jeobá sixále. Kʼiaa kisʼe̱nngindá nga 31 sá agosto nó 1947, kʼoa nga 17 nóna precursor regular sʼin kisixá.

Ya ʼnde jñani precursor sʼin kisixá títjoan yaa jñani Quetta ʼmi, jngo ʼnde jñani tsakatio je sondadole Gran Bretaña. Kʼianga nó 1947, je naxinandá koanxkoayaa, je xi India kʼoa xi Pakistán tsakʼin. * Nga kʼoakoan, kjoabixkan tsakʼétsʼiakao je relijión kʼoa nʼio nkjín chjota xi xin ʼnde ki. Kʼoa teñola miyón chjota xi xin tsʼe kitjo naxinandá jebi. Je xi relijión musulmán tjíojin xi India tsʼe yaa Pakistán ki kʼoa je xi relijión hindúes kao sijes xi Pakistán tsʼe yaa India ki. Ningalani kui kjoa kisʼe nga kʼia, koaan kikian jngo tren xi nʼio nkjín chjota tjíoya ya Karachi kʼoa me toya kitsoa ʼndeʼnde je ki̱cha̱ xi kjiotʼale je tren saʼnda nga kichoa ya Quetta.

Yaa Quetta tsaʼbexkoan je George Singh, jngo precursor especial xi jela tsʼato 20 nóle. Je George jngo bicicleta kitsjoana xi tsakʼamjekoa, ninga sakʼoa to tsakase̱nngia. Me tongantsjai nga toʼan kixinyasoan. Kʼianga jejaon sá jaʼato 17 chjota tsakakoyale Biblia kʼoa tjínkʼa xi testigole Jeobá koan. Jngo sondado xi kʼoati kiskotʼaya jé Sadiq Masih. Jé tsakasenkaonajin kao George nga kinikʼatoya kʼaijin je xo̱n xi Énle Niná yʼangini nga én urdu, jngo én xi nokjoa ya Pakistán. Nga jeki nichxin, je Sadiq nʼio nda kitsoyason.

Xijekoan, kinroa ijngokʼaña ya Karachi kʼoa yaa ñatjen tsakʼinyasuinjin kao Henry Finch kʼoa kao Harry Forrest xi misionero ma, xi tokʼia jaʼaini je Skuela xi tsʼe Galaad. ¡Nʼio chjí ʼbe josʼin kitsoyana! Ñandia kikoa je ndsʼee Finch nga tsangínkʼinyasuinjin jngo ʼnde ya Pakistán. Ya ʼnde jebi nindo tjín kʼoa nʼio nkjín chjota kitsaojinjin xi én urdu nchja̱ xi nda kinrʼoénajin nga tsakakoyalaijin je Énle  Niná. Nga jekoanni jao nó kʼoati kʼia je Skuela xi tsʼe Galaad, kʼoa nga kicho ijngokʼa ya Pakistán, sakʼoaa superintendente xi tsʼe circuito sʼin kisixá. Yaa tsakatejnaña jña bationi je misionero ya Lahore, kʼoa jan mani misionero xi ya tjío nga kʼia.

Kʼianga nó 1954, je misionero xi ya tjío ya Lahore kjoa kisʼele, kʼoa je sucursal xin kisikasén kʼa. Alikui nda kisʼian nga ya kitsjonjian yaona, kuinga nʼio kichjakaonina nga tsakʼaina kjoafaʼaitsjen. Alikui nda kisʼe tokoan, kʼoasʼin kisikjaʼaitsjen nga tsín nda tisixále Niná. Ki ijngokʼaña ya Karachi, kʼoa xijekoan yaa Londres (Inglaterra) kia.

Ya jtín jñani kichoa nʼio nkjín ndsʼee tjío xi ya Betel xi tsʼe Londres tjíosíxá. Je Pryce Hughes, xi siervo de sucursal sʼin tíjna, nʼio nda chjota kʼoa nʼio tsakasenkaona. Tsakʼéyanajmína nga nʼio tsakjákao ñandia kʼianga kitsjoale kjoafaʼaitsjen je Joseph Rutherford, xi tsakándiaale nga tsakʼinyason je Énle Niná jngo tjíjtsa Sonʼnde. Je ndsʼee Hughes tsakasenngi yaole, tonga je ndsʼee Rutherford nʼio tsakjákao nga kiskankao. Tonga nga tsakʼéyanajmína jebi je ndsʼee Hughes tsjoa tjínle. Kʼoakitsona nga koanjtile kʼianga tosʼa tsakʼaile kjoafaʼaitsjen, tonga nga jekoanni, koanjinle nga machjénle je kjoafaʼaitsjen xi tsakʼaile kʼoa nga kʼoasʼin tsakakónile kjoatsjoacha je Jeobá (Heb. 12:6). Jme xi kitsona ñaki kichokajin ni̱ma̱na kʼoa tsakasenkaona nga kao kjoatsjoa kisixá ngindianile je Jeobá.

Nga kui nichxin, je mana yaa Londres kikʼejna kʼoa koanmele nga tsakʼinyale je Biblia. Je xi kitsjoale estudio jé ndsʼee John Barr, xi ya Cuerpo Gobernante tsakʼejnajinle nga jekoanni. Sasa koantajani je kjoamakjainle kʼoa kʼiaa nga nó 1957 kisʼenngindá. Nga koanskanni, kisʼejinna nga kʼoati kiskotʼaya Énle Niná je pana nga kjesa mʼejin.

Kʼiaa nga nó 1958 chixankoa je Lene. Yaa Dinamarca tsʼe, tonga yaa kichokʼejna ya Londres. Nga kicho ñanó kʼiaa kitsin je Jane, je tsotinajin xi títjon. Aon koanni je xtinajin. Kʼoati kisʼena xá ya jtín xi tíjna ya Fulham. Tonga nga chʼin kisʼele je Lene, kʼianga nó 1967 yaa tsangínkiyuijin ya Adelaida (Australia), jngo ʼnde jñani ngisa sjeya.

Ya jtín xi tíjna ya Adelaida, 12 mani je ndsʼee xi jejchínga tjío, xi ya tjínle kjoachoya ya ngʼajmi. Nʼio nda choa̱ tsakatío nga kitsoyason. Nda tsakʼendajinjin josʼin kichʼasjeʼaijin nichxin nga kinixálaijin Niná.

Kʼiaa nga nó 1979 kitsin je tinajin xi mani aon, je xi Daniel tsakʼin. Nga kui kisʼele je xi síndrome  de Down * ʼmi, kʼoa nga to chʼin kisʼe ʼndele, je chjinexki kʼoakitso nga tsín nʼio tse kʼoéjnakon. Tojo ñʼai mana nga bʼeyanajmía jokoan je tinajin. Tsakisenkaoníjin jokji tjen kʼoakoannajin, tonga kʼoati likui kinjiotokuinjin je xtinajin xi ngikʼa. Je Daniel jao kʼa kisʼetixʼa̱ je ni̱ma̱le, sakʼoaa ñaki kitjojma nga tsín tikoan kiskenjtani kʼoa kjitʼanangi mangínkoaijin ya hospital. Ningalani tse chʼin kisʼele, nʼio koanle kisikjaʼaitsjen, nda chjota koan kʼoa nʼio kisʼele kjoamakjain. Kʼianga bʼetsʼoaijin nga jekuichijin, bákjao je ntsja, mjéjen jko̱ kʼoa “kʼoakatama” tso. Kʼoa nga jesʼejna je kjoabʼetsʼoa kʼiaa kjen.

Kʼianga ño nóle je Daniel, leucemia kisʼele. Je Lene kao an alikui ti kichokjoajinninajin kʼoa kinikʼajenníjin tokuinjin. Kʼoasʼin kisikjaʼaitsjen nga kʼoati tjóchʼinna saʼnda an. Kʼianga nʼio tse kjoa tibitjatojinjin, kichosíxatʼanajin je ndsʼee Neville Bromwich, xi superintendente xi tsʼe circuito sʼin tíjna. Nga kʼia, kitsoakjánajin kʼoa kichjiʼndáníjin. Nʼio kitsjoanganʼionajin jokitsonajin. Jetsʼato basennitje̱n kini. Je Daniel alikui titse tsakʼejnakonni. Nʼio aon koannajin nga kʼien. Ninga kʼoalani, tíkanajin je kjoaba, kʼoa alikui jao tjínnajin nga nijmejin xi xin sikʼéjnale Daniel jokji tsjoake koan Jeobá ni jejinla kjoabiya (Rom. 8:38, 39). ¡Nʼio menajin nga jcha ijngokʼaijin nga kjoaʼáyanile kʼianga jesʼe̱jna sonʼnde chjotse! (Juan 5:28, 29).

Jejao kʼa nga kui kisʼena je xi derrame cerebral ʼmi. Ninga kʼoalani, tojo chjotajchínga sʼin tijna ya jinjtín. Je kjoa xi tifaʼatojian tíbasenkaona nga ngisa tibakoa je kjoamatokon kʼoa ngisaa majinna josatío kon je xi kjoa faʼatojin. Alikui joxinle tsa jmeni xi sʼin. Tosaa i̱ xian: “Jósʼin tjíosíkiʼaon je kjoa xi tjíofaʼatojin. Jósʼin koakole nga mandosinna xi tʼatsʼe. Jósʼin koasenkoa nga katasítjosonle je Jeobá”. Nʼio tsjoake̱ nga fikonle je ndsʼee kʼianga fakaonajmíña Énle Niná. Nga tsjoanganʼiole kʼoa nga basenkoa je xi ngikʼa, kʼoati tjonganʼiona tsanda an.

Kʼoatjín tokoan jokisʼe kon je salmista kʼianga kitso: “Kʼianga nʼio kisikjáojian, ji tsakʼainganʼionái kʼoa kinikinjenyʼánjin ni̱ma̱na” (Sal. 94:19). Je Jeobá kisikuindana nga kjoa kisʼena kao xíngia, nga kjoa kisʼena tʼatsʼe relijión, tísíkuindana nga sakʼoa likui nda sʼe tokoan kʼoa nga sakʼoa sikʼajenle tokoan. Je Jeobá ñaki tíbakóna nga Nʼaina mani.