NICHXIN fetʼa xi tiyoaa ndʼaibi, je Jeobá tísíkuindaa kʼoa tíbándiaale je naxinandále (2 Tim. 3:1). Tonga nga jngó jngóñá nga tjínnele si̱tjosoán jme xi tso. Yaa mangósoán josʼin tsakatio je chjota israelita ya ʼndekixí. Kʼianga kinrʼoéle je xjao tjínnele kʼoakisʼin jme xi tsakʼinle.

Je Jeobá kʼoakitsole Moisés nga jao xjao xi tao̱nchxoa katasíndani xi koa̱nchjén nga sikatíojtín je naxinandá kʼoa nga kʼoexkó je ndʼianajñole (Núm. 10:2). Je xi naʼmi sʼin tsakatio tjínnele kjaʼaí kjaʼaísʼin kisikjane je xjao ánni nga koanjinnile je chjota israelita jméni xi tjínnele sʼin (Núm. 10:3-8). Nichxin xi tiyoaa ndʼaibi, ñá xi choʼndale Jeobá maa jngoyale kjaʼaí kjaʼaísʼin tífane je xjao xi tinoʼyalee. Janla koya kataʼyaa jmeni xi nʼia ndʼaibi xi ya mangóson josʼin jane je xjao ngasʼa: Kʼianga kʼoaʼminá nga koanngían je kjoajtíntse, kʼianga ʼmiyale je xi chjotajchínga sʼin tjío, kʼoa kʼianga jmeni xi sʼa chjotse ʼmiyale je jtín.

Kʼianga kʼoakitso Jeobá nga ya katabatioxkó je naxinandá jña tjoni tsʼuí ya ndai ndʼianajñole Jeobá, je naʼmi síkjanee nga jao xjao (Núm. 10:3). Ngatsʼi je ntje̱ xi tjío ya ndai ndʼianajñole Jeobá jebe jmeni xi tsoyanile kʼianga fane je xjao. Je chjota israelita xi ya tjíochrian sasajin kichoni. Tonga je xi kjin tjío tochale ngisa ñʼai koanle nga kicho kʼoa ngisa tsʼachxinle. Tjínnele kicho ngatsʼi nga̱ jé Jeobá xi koanmele nga kjuinrʼoé jme xi kuitsole.

Nichxin xi tiyoaa ndʼaibi, kʼoati ʼminá nga koanngián kjoajtíntse xi satíoná. Tonga alikui tindʼianajñoni jñani mangián. Yaa mangián jñani satíoná je kjoajtíntse xi jan nichxin kʼoa kao kjoajtín xi kjaʼaísanile jñani ʼmiyaná. Ngakjijnda Sonʼnde, kʼianga mangián kjoajtíntse tikuini én xi ʼmiyaná ngatsʼiaa kʼoa tsjoa satío tokoán. Tjínkʼa xi kjin male nga bichó. Tonga ninga tse kjoama̱ bʼéngi ali tsa toxitsjoajin nga fi.

Jómani je jtín xi kjintʼa tjío kʼianga satío kjoajtíntse jebi. Nga jetjín ki̱cha̱ xi machjén, je ndsʼee ma kotsenle jmeni xi faʼa ya kjoajtíntsená kʼoa joxi yaani tjío male. Tobʼelañá, kʼianga kicho je representante xi ya jaʼaini jña tjen tísʼendiaanile xále Niná jngo tjíjtsa Sonʼnde ya Betel xi tíjna ya Benín, kʼoati kiskotsenle je xi ya tsʼe naxinandáʼndí xi Arlit (Níger) ʼmi xi ya tíjnajin ʼndekixí jña Sahara ʼmi. Kʼoa 21 koanni xi kicho. Ninga kjin tjío, joxi yaa tojngo tjío kao xi 44,131 koanni xi kicho ya kjoajtín koanle.  Jngo ndsʼee xi i̱ kitso: “Bʼainíjin kjoanda nga koan kichotsenlaijin kjoajtíntse jebi. Kui tsakakónajin nga faʼaitsjenno xi tʼatsainjin”.

Kʼianga tojngo xjao síkjane je naʼmi, tojé maxkó ya ndʼianajñole Jeobá je xi nyatítjonle nga jngó jngó jmi chjota israelita (Núm. 10:4). Je Moisés yaa tsoyale josʼin tjínnele koandiaale nga jngó jngó ntje̱ xi kjinele. Tsa chjotatítjonlani maa tsakʼenejinlee yaoná nga tsangínnoʼyá jme xi tsakʼinná.

Nichxin xi tiyoaa ndʼaibi, je xi chjotajchínga sʼin tjío, alikui naile ma je jtín, kʼoa alikui naile ma je ndsʼee (1 Ped. 5:1-3). Tonga bʼénele yaole nga nda síkuinda je jtín. Kuinga kao kjoatsjoa fini je Skuela jña nichjine je ndsʼee xi xá kjinele. Nga fi skuela jebi binyakao nga ngisa nda bándiaale je jtín. Nga kʼoasʼin sakóyale binyakao je xi chjotajchínga sʼin tjío, je ndsʼee kʼoa kao tichjaa nga ngisa machriantʼale Jeobá. Ninga kje mangínjián skuela jebi tojo binyakaoná jme xi ʼmiyale je xi chjotajchínga sʼin tjío nga̱ kui síchjén ya jinjtín kjoafaʼaitsjen xi kaʼmiyale.

Je naʼmi sakʼoaa tongotjo ngotjo síkjane je xjao. Nga kʼoasʼin fane je xjao kui xi tsoyanile nga kui xi mele Jeobá nga xin koaikatio je chjota israelita (Núm. 10:5, 6). Nʼiojin naskánasʼin koantsen kʼianga chʼin chʼin sʼin tsakationda. Tonga kʼoajin titsakʼénele yaole nga jngó jngó nga kisitjoson. Tsakui nichxin tjínkʼa xi ñʼai koanle nga kʼoakisʼin. Ánni.

Tsakui nichxin tjínkʼa xi kʼoasʼin kisikjaʼaitsjen nga ngotjo ngosa janeni je xjao kʼoa nga totsín ʼyale kʼiani kjoane. Je Biblia kʼoatso nga sakʼoa tojngo nitje̱n síkjanni je yojbi, kʼoa nga sakʼoa jao nichxin, kʼoa tsa jngo sá kʼoa tsa tsesa síkjan ijngokʼani (Núm. 9:21, 22). Jótjín kʼa nga xinxin kikatio je chjota israelita. Ya capítulo 33 xi tsʼe Números to 40 ʼnde síkʼaxki̱.

Tsakui nichxin tjínkʼa je chjota israelita xi ya tsakatio sakʼoa jñani ngʼián chon ya ʼndekixí (Deut. 1:19). Tsakui nichxin kʼoasʼin kisikjaʼaitsjen nga tsín tikʼoachonni jña koatio tsa xin koai.

Ngatsʼi je chjota israelita nrʼoéle je xjao kʼianga tongotjo ngotjo fane, tonga alikui tsa tongatsʼi nga bationda nga kuitjo. Tsakui nichxin tjínkʼa chjota israelita xi chan koansile nga kiskoya saʼnda nga tsʼakaole nga kitjo. Kʼianga tongotjo ngotjo jane je xjao kui xi tsonile nga je títjon kuitjo je ntje̱le Judá, Isacar kao Zabulón (Núm. 2:3-7; 10:5, 6). Kʼianga jekitjo ntje̱ jebi, je naʼmi ijngokʼá tikisikjanengáni je xjao ánni nga koan kitjosíni je xi ngi jan ntje̱. Kʼoakisʼin josaʼnda nga kitjo ngatsʼi je ntje̱.

Tsakui nichxin sakʼoa ñʼai maná kʼianga jme xi bʼantjaiyajin ya jinnaxinandále Jeobá, kʼoa tsa kʼoabixoán nga nʼio nkjín koya jmeni xi tíbʼantjaiya kʼoa tsa maije̱ jekoannganá josʼin maxá tsakai kʼoa tsín mená nga kʼoantjaiyajin. Tsakui nichxin kʼoasʼin nikjaʼaitsjeen nga kui chotʼayakao jokji tsejtaa. Tsee bichómani nga mangakao ijngokʼaná jmeni xi bʼantjaiyajin. Tonga ʼyañá nga tjínnele si̱tjosoán. Tsa kʼoasʼiaan, je Jeobá sichikontʼainná.

Kʼianga tsakʼejna Moisés, je Jeobá millón chjota tsakándiaale kʼianga tsakʼetsoma ya ʼndekixí. Alikuijin ʼya xi kichokjoale tsa tsín je Jeobá tsakándiaale kʼoa kisikuinda. Ninga nʼio ñʼai chon nichxin xi tiyoaa ndʼaibi kʼoati je Jeobá tíbándiaaná kʼoa tíbasenkaoná nga nʼio katasʼejna kjoamakjainná. Kuinga kʼoénenilee yaoná nga si̱tjosoán tojo kisʼin je chjota israelita kʼianga kisitjoson nga kinrʼoéle nga jane je xjao.