KJOAʼMIYA XI CHOTʼAYA 26
“Nroanrʼoe ijngokʼanáo”
“Nroanrʼoe ijngokʼanáo kʼoa an kjuíkon ijngokʼano” (MAL. 3:7).
KJOAJNDA 102 Kuinyakoaa je xi tsínle nganʼio
XI TÍNCHJA̱NI *
1. Jósʼe kon Jeobá kʼianga síchriantʼa ijngokʼanile je choʼndale xi jekisikjin tsakai.
TOJOSʼIN tsaʼyaa ya kjoaʼmiya xi jaʼato, je Jeobá yaa síngósonkao yaole jngo chjota xi nda síkuinda barréle kʼoa básjai je xi cha. Ñandia nga i̱ kitsole je chjota israelita xi kisikjinle: “Nroanrʼoe ijngokʼanáo kʼoa an kjuíkon ijngokʼano”. Kʼoa tojo kʼoatjín kon ndʼaibi, nga̱ itso: “Ali bʼantjaiyajian” (Mal. 3:6, 7). Xi ijngosani, je Jesús kʼoakitso nga je Jeobá kao ánkje tsjoa satío kon kʼianga jngo choʼndale Niná síchriantʼa ijngokʼanile (Luc. 15:10, 32).
2. Jmé xi chótʼayajiaan i̱ kjoaʼmiya jebi.
2 I̱ kjoaʼmiya jebi jan choa̱ xi tsakatío Jesús chótʼayajiaan xi kui ngisa nchja̱ni tʼatsʼe xi jekisikjinle Jeobá. Jchañá jósʼin koa̱n kuinyakoaa nga sichriantʼa ijngokʼanile Jeobá kʼoa ánni nga nʼio tjínnile kjoandosin nga kʼoainganʼiolee.
KJOÁSJEE JE TAO̱N XI KICHA
3, 4. Tojo tso Lucas 15:8-10, ánni nga nʼio tsakásjaini chjoón jebi je tao̱nle xi kicha.
3 Tjínnele si̱kʼayaa nichxin nga kjoásjee je xi mele nga sichriantʼa ijngokʼanile Jeobá. Ya Evangelio xi tsʼe Lucas, jngo choa̱ faʼaitʼa xi kitso je Jesús tʼatsʼe jngo chjoón xi jngo tao̱nchxoa kisicha. Je xi ngisa tínchja̱ni choa̱ jebi kuinga básjai josaʼnda nga sokóle (tʼexkiai Lucas 15:8-10). *
4 Kʼianga nichxinle Jesús, nga bixan je yánchjín xi Judea tsʼe, tjínkʼa na̱ xi te tao̱nchxoa xi dracma ʼmi kitsjoale xtiyánchjínle. Tsakui nichxin kui tao̱n jebi xi kisicha je chjoón xi kinchja̱ni Jesús. Tobʼelañá, tsa kiskajinʼnde tao̱nle chjoón jebi, tsín koansjaile ningalani tsakaká lʼí. Tsakui nichxin likui nʼio kisiʼisen je lʼí xi tsakaká. Kuinga bʼéchani ngakjijnda ndʼiale. Chaan be nga fate kji xi tíjnajin je tjé xi bʼéxkó kʼoa kʼoasʼin masjainile je tao̱nchxoale. Je Jesús kʼoakitso nga nʼio tsjoa sʼe kon chjoón jebi, kʼoa nchjaale je yánchjín miyole kao yánchjín ndaindʼiale nga bʼéyanajmíle nga jemasjainile je tao̱nle.
5. Ánni nga tse kjoama̱ sʼengini nga fasjee xi jekisikatío xále Niná.
5 Je choa̱ xi tsakʼéjna Jesús kui bakóyaná nga tse kjoama̱ sʼengi nga masjainá tsa jmeni xi cha. Kʼoakjoán tima kʼianga fasjee xi jekisikatío xále Niná. Tsakui nichxin jenkjín nó nga tsín tisísinni tʼatsʼe Niná. Tsa xin ʼnde tjío ndʼaibi jñani tsín ʼya ndsʼee bexkon. Tonga alikui jao tjín tokoán nga tjíokʼa xi mele sichriantʼa ijngokʼanile Jeobá. Kui xi mele nga sixá ijngokʼanile Niná, tonga nganʼio machjénle.
6. Jósʼin koa̱n kʼoainganʼioá ngatsʼiaa nga kjoásjee xi jekisikatío xále Niná.
6 Koaan kjoásjee ngatsʼiaa xi jekisikatío xále Niná. Jolani je xi xínkjín mani, xi chjotajchínga sʼin tjío, je precursor kʼoa kao publicador. A tíjnaná jngo miyo kʼoa tsa xi xíngiaa mani xi jekisikʼéjna xále Niná. A kajinñá xi jekisikatío xále Niná kʼianga ʼmiyasoán jña nʼio tjín chjota kʼoa tsa kʼiaje̱ nga xki̱ ndʼia xki̱ ndʼia ʼmiyasoán. Tsa mele nga ʼya xi kuichosíxatʼa kʼoa tsa kʼoakuitsoná joʼmi, jñani tsʼe kʼoa tsa tsjoáná númerole teléfonole kʼoakʼuínlee nga je xi chjotajchínga sʼin tjío si̱kʼatolee én jebi. Kʼoati kuenta sʼiaan tsa tsjoáʼnde kjoatéxoma jñani tsaan nga koa̱n kʼoasʼiaan.
7. Jmé xi bakóyaná jotso je xi chjotajchínga sʼin tíjna, xi Thomas ʼmi.
7 Jmé xi koa̱n sʼin je xi chjotajchínga sʼin tjío nga koasjai je xi mele nga sichriantʼa ijngokʼanile Jeobá. Kataʼyala jotso jngo xi chjotajchínga sʼin tíjna ya España, xi Thomas ʼmi. * Tsʼato 40 ndsʼee xi jekisikatío xále Niná tsakasenkao. Itso: “Xi títjon sʼian kuinga kjonangile je ndsʼee kao tichjaa tsa be jñani tjío xi jekisikatío xále Niná, kʼoa tsa maije̱ kjonangile je ndsʼee tsa faʼaitsjenle tʼatsʼe jngo chjota xi tsín tibichóni kjoajtín. Me tongatsʼi nga kao kjoatsjoa tsjoánganʼio nga fasjee xi jekisikatío xále Niná. Kʼianga fisixatʼa je ndsʼee kʼoa tsa tichjaa xi jekisikatío xále Niná, kjonangile tʼatsʼe xtile kʼoa tsa tʼatsʼe xínkjín. Tjínkʼa xi kikao xtile kjoajtín ngasʼa, kʼoa tsa saʼnda jekitsoyason. Kʼoati koa̱n kuinyakoaa tsanda je nga katasíxá ijngokʼanile Jeobá”.
KUINYAKOAA XI JEKISIKJIN NGA JE JEOBÁ KATASÍXÁ IJNGOKʼANILE
8. Tojo tso Lucas 15:17-24, jókisikao je nʼaile ti xi kʼoakoannile jmeni xi kisʼin.
8 Jósʼin tjínnele si̱kjaʼaitsjeen tsa mená kuinyakoaa xi jekisikatío xále Niná. Kataʼyala jme xi bakóyaná je choa̱le ti xi ki (tʼexkiai Lucas 15:17-24). * Je Jesús kʼoakitso nga kʼoamanile ti jebi jme xi kisʼin kʼoa fi ijngokʼani ndʼiale. Kʼoa je nʼaile ndi̱toon fikʼáya je tile kʼianga be, tsoakjá kʼoa kʼoatsole nga tojo tsjoake. Je ti jebi kʼoamanile jme xi kisʼin kʼoa kʼoatso nga tsín tibakinnile nga tile kuitsole. Je nʼaile nroajen ndáxko̱n nga kʼoatsole je ʼndíle nga kʼoamanile jmeni xi kisʼin. Kuinga jngo sʼuí bʼéjnani kʼoa kʼoatsole je choʼndale nga kui najño katatsjoále je xi ngisasa nda kji. Kʼoasʼin bakóni nga ʼndíle mani kʼoa nga tsjoake, nga tsín jochoʼnda sʼin bekon.
9. Jmé xi tjínnele sʼiaan nga kuinyakoaa xi jekisikatío xále Niná nga katasíchriantʼa ijngokʼanile Jeobá (chótsenlai je recuadro “ Jósʼin kuinyakoaa je xi mele nga sichriantʼa ijngokʼanile Jeobá”).
9 Je Jeobá yaa mangóson je nʼaile ti xi kinchja̱ni Jesús. Tojo tsjoake je choʼndale xi jekisikjin kʼoa kui xi mele nga je katasíxá ijngokʼanile. Kʼiatsa chjénngilee je Jeobá koaan kuisenkoaa xi jekisikjin. Kuinga machjénni nga tsejta katamaa, nga si̱jinlee yaoná jotjío kon kʼoa koakolee kjoatsjoacha. Ánni machjénsíni nga kʼoasʼiaan, kʼoa jósʼin koakoá kjoatsejta, nga si̱jinlee yaoná jotjío kon kʼoa nga koakolee kjoatsjoacha.
10. Ánni machjénsíni nga tsejta katamaa kʼianga kuisenkoaa xi jekisikatío xále Niná.
10 Machjén nga tsejta koaan nga̱ nichxin machjénle ndsʼee nga nda kʼoéjna ijngokʼani ngixko̱n Jeobá. Nga koan kisichriantʼa ijngokʼanile Jeobá, nʼio nkjín ndsʼee xi kʼoatso nga nkjín kʼa kichosíxatʼa je xi chjotajchínga sʼin tjío kao xi ngikʼa ndsʼee. Jngo tichjaa xi Nancy ʼmi, xi Asia tsʼe, itso: “Nʼio tsakasenkaona jngo miyona ya jinjtín. Jo ndichja sʼin tsabekonna. Kjitʼaa kisikjaʼaitsjenna jokji tsjoa kisatio tokuinjin nga ñatjen tsakitsomaijin. Kʼianga tsakʼeyanajmíle jotjín tokoan, ngasin nganda kinrʼoéna kʼoa kitsjoana kjoafaʼaitsjen. Tsakakó nga miyona ma kjoaixi kʼoa tsakasenkaona ngantsjai”.
11. Ánni nga tjínnenile si̱jinlee yaoná jotjín kon jngo ndsʼee xi tjínngijti kon.
11 Nga nijinlee yaoná josatío kon xi ngikʼa yaa mangóson joni xki xi síndaya jñani miʼoaan. Tjínkʼa xi kui kisikjinni nga tjín xi kisikiʼaon kjoafaʼaitsjenle ya jinjtín, kʼoa jenkjín nó nga tjíongijti kon. Kuinga tsín titsoni kon nga sichriantʼa ijngokʼanile Jeobá. Kʼoa tjínjinkʼa xi kʼoasʼin síkjaʼaitsjen nga tsín kixi tíjna jme xi koantʼain. Tsakui nichxin machjén nga ʼya xi kjuinrʼoéle kʼoa sijinle yaole jotjín kon (Sant. 1:19). Jngo tichjaa xi María ʼmi, xi kisikʼéjna choatse xále Niná, itso: “Koanmena nga jngo miyo tsakʼeyanajmíle jotjín tokoan, xi koasenkaona kʼoa xi tsjoánganʼiona”.
12. Ánni kʼoatsoni je Biblia nga ya mangóson jngo nʼó je kjoatsjoachale Jeobá.
12 Je Biblia kʼoatso nga je kjoatsjoachale Jeobá yaa mangóson joni jngo nʼó. Ánni nga kui síngósonkaoni. Jngola choa̱ si̱kʼéjnaa. Tikjaʼaitsjenlai tsa jngo nga̱jao̱ xi nʼio na̱nga̱ ska̱yai, kʼoa tsa tsín tikoa̱n kuitjoni, tokʼiajin nga koa̱n kuitjui tsa ʼya xi jngo nʼó sikʼatjenli. Tikʼoasʼinni, je Jeobá i kitso tʼatsʼe chjota israelita xi kisikjinle: “Tosi tonda kiskenʼndóa [...] kao nʼó xi kjoatsjoacha tjenkao” (Os. 11:4). Nichxin xi tiyoaa ndʼaibi, je Jeobá tojo kʼoasʼin síkjaʼaitsjen tʼatsʼe xi jekisikjinle, xi tse kjoanikjáojin tjínle. Mele koasenkao nga katasíchriantʼa ijngokʼale kʼoa nga katabe nga tsjoake. Je Jeobá koaanle ñá sichjénná nga kuinyakoaa.
13. Jngo choa̱ tʼeyanajmí josʼin bichómani nga bakolee kjoatsjoacha xi jekisikatío xále Niná.
13 Nʼio tjínle kjoandosin nga kʼoakʼuínlee xi jekisikjin nga tojo tsjoake je Jeobá kʼoa nga tojo tsjoachaa tsanda ñá. Je Pablo, xi jenása kinikʼaxkiaa ya kjoaʼmiya xi ijngo, tsʼato 30 nó nga tsínti Niná kisixánile. Itso: “Ñandia nga tanjio, jngo tichjaa xi jejchínga kisatejian, kisitiʼndana kʼoa kichokajin ni̱ma̱na josʼin tsakjákaonajmína, ñaki kinroajen ndáxkoan jokitsona. Kʼoakixinle nga je Jeobá kisikasén nga kichokjákaonajmína. Saʼnda nga kʼia, koanmena kisichriantʼa ijngokʼanile Jeobá”.
KAO KJOATSJOACHA KUINYAKOAA XI NGANʼIO MACHJÉNLE
14. Tojo tso Lucas 15:4, 5, jmé xi sʼín je chjota xi barré koʼnda kʼianga jemasjaile barré xi cha.
14 Kʼianga faʼaijin ijngokʼani naxinandále Niná xi jekisikjin, machjén nga tosi tonda kuinyakoaa kʼoa kʼoainganʼiolee. Tsakui nichxin kʼoatjío kon jokisʼe kon ti xi kinchja̱ni je Jesús. Kʼoa nga tosʼa faʼaijin ijngokʼani naxinandále Niná, machjén nga sichriantʼa ijngokʼale Jeobá. Kuinga machjénsíni nga kuinyakoaa nga nʼio katasatío ijngokʼa kjoamakjainle. Kʼianga kitsoya je Jesús tʼatsʼe barré xi kicha, kʼoakitso nga je xi koʼnda básonxja kʼoa fikao ngindiani jña tjío xikʼa barré. Je chjota xi koʼnda jekisikʼaya nichxin kʼoa tsee kjoama̱ tsakʼéngi nga koansjaile. Tonga be nga tjínnele koasenkao nga̱ tsín chókjoale nga toje (tʼexkiai Lucas 15:4, 5). *
15. Jósʼin koa̱n kuinyakoaa je xi nganʼio machjénle nga sichriantʼa ijngokʼanile Jeobá (chótsenlai je recuadro “ Je folleto xi nʼio nda basenkaoná”).
15 Tsakui nichxin machjén nga si̱kʼayalee nichxinná kao nganʼioná xi jekisikatío xále Niná nga katasímiyo ijngokʼa je Jeobá (Rom. 15:1). Kui koasenkaoná je nganʼiotsjele Jeobá, je Biblia kao xo̱n xi bʼasje naxinandále Niná. Jósʼin koa̱n kuinyakoaa. Jngo xi chjotajchínga sʼin tíjna itso: “Kʼianga faʼai ijngokʼa jinnaxinandále Niná, me tongatsʼi nga machjénle nga sa̱kóya ijngokʼale Biblia”. * Kao kjoatsjoa si̱tjosoán tsa ñá kʼoakuitsoná xi chjotajchínga sʼin tjío nga kuinyakoaa xi jekisikatío xále Niná. Je ndsʼee xi saje kanikʼaxkiaa itsosa: “Miyo machjénle xi jekisikatío xále Niná, kuinga machjénni nga simiyo je ndsʼee xi kuitsoyale ánni nga koa̱n sinʼiotʼani”.
SʼEE KJOATSJOA YA NGʼAJMI KAO I̱ SONʼNDE
16. Jósʼin ʼyañá nga binyakaoná je ánkje.
16 Nkjín choa̱ tjín xi bakóná nga je ánkje binyakaoná nga masjainá xi jekisikjin tonga xi mele sixá ijngokʼanile Jeobá (Apoc. 14:6). Tobʼelañá, je ndsʼee xi Silvio ʼmi, xi Ecuador tsʼe, tsakʼétsʼoale je Jeobá nga katabasenkao nga kuicho ijngokʼani jinjtín. Kʼianga tíbʼétsʼoa kʼiakjoán kicho síkjane je timbrele ndʼiale jao xi chjotajchínga sʼin tjío. Nga tiʼakʼiani, kitsoyale nga kʼoatso je Biblia nga tsín tsjionkon Jeobá je choʼndale.
17. Jmé kjoanda xi sokóná nga binyakoaa je xi nganʼio machjénle.
17 Tsjoa sa̱tío tokoán nga kuinyakoaa xi jekisikatío xále Niná nga sichriantʼa ijngokʼanile Jeobá. Kataʼyala jotso je ndsʼee xi Salvador ʼmi, xi precursor sʼin tísíxá. Je ndsʼee jebi bʼénele yaole nga binyakao xi jekisikatío xále Niná. Itso: “Nga faʼaikao ijngokʼa Jeobá jinnaxinandále xi jekisikjin, tsjoa sʼe tokoan kʼoa sakʼoaa ñaki nroajen ndáxkoan, kʼoa nda sʼe tokoan nga kui kjoanda tjínna nga tsjoanganʼioa” (Hech. 20:35).
18. Tsa jekinikjinlai naxinandále Niná, jméni xi tsín jao kʼoái tokuin.
18 Tsa jekinikjinlai naxinandále Niná, ali jaojin bʼai tokuin nga tojo tsjoakeli Niná kʼoa mele nga si̱chriantʼa ijngokʼanilai. Tonga tjínnele nga kʼoati kʼoénelai yaoli. Je Jeobá tíjnandaa nga skoéya ijngokʼanili, tojo kisʼin je nʼaile ti xi ki xi kinchja̱ni je Jesús. Je Jeobá tíkoyali nga si̱chriantʼa ijngokʼanilai.
KJOAJNDA 103 Xi bándiaaná jngoo kjoatjao xi tsʼe Niná
^ párr. 5 Je Jeobá itsole je ndsʼee xi jekjoatse nga tsín titsoyasonni kʼoa xi tsín tifini kjoajtín: “Nroanrʼoe ijngokʼanáo”. Koaan kʼoainganʼiolee ngatsʼiaa je xi mele sichriantʼa ijngokʼanile Jeobá. I̱ kjoaʼmiya jebi kui chótʼayajiaan josʼin koa̱n kuinyakoaa ndsʼee jebi.
^ párr. 3 Lucas 15:8-10: “Axo ʼyá chjoónni xi tíjnale te ʼndítao̱nchxoa, kʼia tsa jngo ʼndítao̱nchxoa sicha, a tsí koa̱ká lʼí, kʼoa kʼoecha ndʼiale, nʼio nda koasjai jo saʼnda nga koa̱nsjaile. 9 Kʼia nga jekoansjaile, kuinchja̱mañale miyole kao yánchjín xi chrian ndʼiale, kuitsole: Katamatsjoano kao an, nga̱ jekamasjaina je ʼndítao̱nchxoabi xi kisicha. 10 Kʼoaxinno nga kʼoasʼin tjín kjoatsjoa ngixko̱n ánkjele Niná xi tʼatsʼe jngo chjotatsʼen xi sikʼantjaiya kjoafaʼaitsjenle”.
^ párr. 7 Alikui tsa ñaki kʼoaʼmi kʼa chjota xi bʼaxki̱ i̱bi.
^ párr. 8 Lucas 15:17-24: “Kʼia nga jekoanndayani kjoafaʼaitsjenle, kitso: Jó tjín mani choʼndale nʼaina xi kjaínga tjínle nioxtila saʼnda njengile, kʼoa anʼni tibiyanía kjinrá ibi. 18 Kuisotjen, kjuíkonle nʼaina, kʼoaxínle: Nʼai, tsajngia jée xi tʼatsʼe ngʼajmi, kʼoa xi tʼatsi. 19 Likui tibakinnina nga ʼndíli kʼuínna, kʼoasʼin tikaonái joni tsa jngo choʼndali. 20 Kʼia tsakisótjen, jinroanrʼoe nʼaile. Kʼia nga kjinsa tíjna, nʼaile tsabe koanmake, kitokanʼio, kitsoakjá, nʼio tsakʼéndsoʼa. 21 Je ʼndíle kitsole: Nʼai, tsajngia jée xi tʼatsʼe ngʼajmi, kʼoa xi tʼatsi. Likui tibakinnina nga ʼndíli kʼuínna. 22 Tonga nʼaibe kitsole choʼndale: Chʼa̱sjao najño xi naská kjoan, tikʼakjáo nga je, kʼoa tʼeyao jngo tao̱nngo najmántsja, kʼoati tjayalao jté. 23 Nroakao nra̱ja̱ʼndí xi nchjá, tikʼaon. Chi̱nee, kʼoa sʼuí kuinosjee. 24 Nga̱ je ʼndína jebi jekʼen tsakai, kʼoa tíjnakon ngijngokʼangáni. Jekicha tsakai, tonga jekoansjainiʼni, kʼoa tsakʼétsʼiakao sʼuí”.
^ párr. 14 Lucas 15:4, 5: “ʼYá xʼin xi jonbi xi tjínle jngo siento barré, kʼia tsa jngo barrébe cha̱, a tsí sikatío xi ñokan kaoni xjaʼaonñobe ya jinjñábe, kʼoa koai kásjai xi kacha jo saʼnda koa̱nsjaile. 5 Kʼia nga koa̱nsjaile, koantjaixja kao kjoatsjoa”.
^ párr. 15 Je xi jekisikatío xále Niná tjínkʼa xi kui kuinyakao nga skótʼayajin jmeni xi tso libro “Tosi tonda katasʼeno kjoatsjoachale Niná”, kʼoa tjínkʼa xi kui kuinyakao nga skótʼayajin kʼa je capítulo xi tsʼe libro Acerquémonos a Jehová. Jé Comité de Servicio xi tsʼe Jtín xi kuitsoni ʼyáni xi koa̱n kuitsoyale Biblia xi jekisikatío xále Niná.
^ párr. 71 XI TÍNCHJA̱NI SÉN XI FAʼAITʼA: Jan ndsʼee binyakao jngo xi jekisikʼéjna xále Niná xi mele nga sixá ngindianile je Jeobá. Síkasénle mensaje, kʼoatsole nga tojo tsjoake, nrʼoéle kʼoa síjinle yaole jotjín kon.
