Tjínkʼa xi kjonangi
A tokui xi faʼaitʼa ya Gálatas 5:22, 23 je “kjoanda xi tsjoájin ni̱ma̱ná je Espíritu Santo”
Je versículo jebi ñajan koya faʼaitʼa jotjínnele koa̱nkjoan chjotale Cristo. Itso: “Je kjoanda xi tsjoájin ni̱ma̱ná je Espíritu Santo, xi kui: Kjoatjaocha, kjoatsjoa, kjoa xi nyʼán tjín, kʼoa nga nikjaínlee xíngiaa, kjoandʼé, kjoanda, kʼoa nga makjainná, kjoaʼindajintakon, kʼoa nga chjoéxkoá yaoná”. Jé nganʼiotsjele Niná basenkaoná nga kʼoamakjoaan, tonga nkjínsa koya tjín jotjínnele koa̱nkjoaan.
Kataʼyala jmeni xi kiski je pastro Pablo ya versículo xi tongini: “Je kjoa xi sʼín yaoná, tjíotsen, xi kui: Kjoachajngi, kjoajndí, kjoachi̱nga̱, xi bexkón xkóson, kjoabʼenda, kjoakontra, kjoabixkan, kjoachi̱ni̱, kjoajti, xi fáotiʼa, xi jaoya tjín, xi xin tjíole xínkjín, kjoaxintakon, xi kʼen síkʼen, xi kjoachʼi̱, je xi toxkia sʼínjin sʼuí, kʼoa je ngayije kjoa xi kʼuisʼin kjoan” (Gál. 5:19-21). Koanjin nga nkjínsa koya kisikʼaxki̱ Pablo je “kjoa xi sʼín yaoná”, jolani xi faʼaitʼa ya Colosenses 3:5. Kʼoatisʼinni je xi ñajan koya síkʼaxki̱ ya Gálatas 5:22, 23. Alikui síkʼaxki̱ ngayeje kjoanda xi machjén nga sʼe̱ná xi tsjoáná nganʼiotsjele Niná.
Majinná nga kʼoatjín jebi kʼianga ningósonkoaa jmeni xi tso Gálatas kao jmeni xi kiskile Pablo je jtín xi kisʼejna ya Éfeso: “Je Espíritu Santo tsjoántje̱jin ni̱ma̱ná je xi kjoanda, xi tjínle kjoakixi, kʼoa je xi ñaki kʼoatjín” (Efes. 5:8, 9). Tojo tso texto jebi, je kjoanda, je kjoakixi kao je xi ñaki kʼoatjín, kʼoati ya tjíojin je kjoanda xi tsjoá je “Espiritu Santo”.
Je Pablo jaon koya tjínni xi kitsole je Timoteo jotjínnele koa̱nkjoan. I kitsole: “Kʼoasʼin tʼinkoai yaoli kao xi kjoakixi, kao kjoaxkóntakon tʼatsʼe Niná, kao xi nda makjainli, kao kjoatjaocha, kao kjoatsetakon, kao kjoaʼindajintakon” (1 Tim. 6:11). To jan koya kjoanda xi tsjoá “je Espíritu Santo” síkʼaxki̱, je kjoamakjain, kjoatjaocha kʼoa kao kjoaʼindajintakon. Nga kʼoati sʼe̱le Timoteo je kjoakixi, kjoaxkóntokon tʼatsʼe Niná kao kjoaka, machjén nga je nganʼiotsjele Niná koandiaale (tingósonkoai Colosenses 3:12; 2 Pedro 1:5-7).
Ya Gálatas 5:22, 23 alikui síkʼaxki̱yeje kjoanda xi tjínnele sʼe̱ná xi chjotale Cristo maa. Jé nganʼiotsjele Niná koasenkaoná nga sʼe̱ná xi ñajan koya “kjoanda xi tsjoájin ni̱ma̱ná je Espíritu Santo”. Tonga nkjínsa koya jotjínnele koa̱nkjoaan nga nʼio sʼe̱jna kjoamakjainná kʼoa nga tosi tonda si̱ndayaa yaoná josʼin mele Niná nga kjuintjenngiaa “xi tjínle kjoakixi kʼoa kao xi ñaki tsje” (Efes. 4:24).
