1. Jméni xi tísʼín je Jeobá xi tʼatsaan nga jngó jngoá.

JÉ Jeobá xi kʼoasʼin koanmele nga koanchriantʼalee (Juan 6:44). Si̱kjaʼaitsjenla xi tʼatsʼe jebi: ninga millón mani chjota tjín jngo tjíjtsa Sonʼnde, tsabe je Jeobá jotjín ni̱ma̱ná kʼoa tsabe nga koa̱n tsjoacha koaan (1 Crón. 28:9). Nʼio nda bexkonná je Jeobá, majinle jotjín tokoán kʼoa tsjoakená. Nʼio nda bʼé tokoán nga kʼoasʼín je Jeobá.

2. Jmé choa̱ xi tsakʼéjna je Jesús nga katamajinná nga nʼio tsjoakená je Jeobá nga jngó jngoá.

² Je Jeobá nʼio tsjoakená nga jngó jngoá. Nga koa̱njinná xi tʼatsʼe jebi, je Jesús kui choa̱ kisichjén tʼatsʼe josʼín jngo xi barré koʼnda. Jósʼin tsa 100 mani je barréle kʼoa tsa jngo sicha. A tsí sikatío je xi 99 nga koaikásjai je xi kacha. Kʼoa nga jekoa̱nsjaile alikuijin koa̱njtile, tosajin tsjoa sʼe̱ kon. Jebi kui bakóyaná nga nʼio chjí be je Jeobá nga jngó jngó je choʼndale. I kitso je Jesús: “Likui mele Nʼaino xi tíjna ya ngʼajmi nga cha̱ jngo xi je ʼndíxtibi” (Mat. 18:12-14).

3. Jmé xi chótʼayajiaan i̱ kjoaʼmiya jebi.

³ Alikui mená nga kui kʼoasʼiaan kʼoa kui kʼoakuixoán xi sikaténgi je ndsʼee. I̱ kjoaʼmiya jebi kui chótʼayajiaan jméni xi sʼiaan nga tsín si̱katéngiaa je ndsʼee, kʼoa jméni xi sʼiaan tsa ʼyani xi sikiʼaonná. Tonga títjonkjoanla kui chótʼayajiaan tʼatsʼe xi “ʼndíxtibi” kitsole je Jesús, xi bʼaxki̱ ya capítulo 18 xi tsʼe Mateo.

4. ʼYáni je xi “ʼndíxtibi” ʼmile.

⁴ Je xi “ʼndíxtibi” ʼmile jéní ngatsʼi chjotatjenngile Jesús. Tojotjín nóle yaa mangóson joni ʼndíxti nga̱ tsjoáʼnde nga  bakóyale je Jesús (Mat. 18:3). Ninga xinxin tsʼe kʼoa ninga kjaʼaí kjaʼaí sʼín, ngatsʼi makjainle xi tʼatsʼe Jesús. Kʼoa je Jesús kʼoati nʼio tsjoake (Mat. 18:6; Juan 1:12).

5. Jósʼe kon je Jeobá kʼiatsa ʼyani xi síkaténgi je choʼndale kʼoa síkiʼaon kjoafaʼaitsjenle.

⁵ Ngatsʼi je “ʼndíxtibi”, xi tsonile, je choʼndale Jeobá, nʼio chjí bekon. Kʼianga koa̱njinná josʼin bekon Jeobá je choʼndale, si̱kjaʼaitsjenla josʼin ʼyatokoán ñá je ʼndíxti. Nʼio chjí ʼyatokoán kʼoa nikuindañá, nga̱ tsín kʼoakji nganʼio tjínle kʼoa tsín kʼoakji kjoafaʼaitsjen kao kjoachjine tjínle joni jngo xi jejchínga. Alikui sasénná kʼianga ʼya xi nikiʼaon, tonga ngisaa majtiná tsa jngo tiʼndí nikiʼaon. Kʼoatisʼinni xi kao Jeobá, nga̱ kui xi mele nga sikuinda je choʼndale. Tsa ʼyani xi sikaténgi kʼoa tsa sikiʼaon je choʼndale, nʼio majtile je Jeobá (Is. 63:9; Mar. 9:42).

6. Tojo tso 1 Corintios 1:26-29, jósʼin bekon chjota je chjotatjenngile Jesús.

⁶ Jósasʼin tínchja̱ni nga jo ʼndíxti sʼin ʼyatokon je chjotatjenngile Jesús. Je xi ngisa chjí bekon chjota jé chjotanyiná, xi nʼio ʼyale kʼoa xi tse nganʼio tjínle. Tonga nga me tongatsʼi je chjotatjenngile Cristo nga tsín kʼoakjoan, kuinga jo ʼndíxti sʼin ʼyatokonni, xi tsonile, alikui nʼio chjí bekon je chjota (tʼexkiai 1 Corintios 1:26-29). * Tonga je Jeobá nʼio chjí bekon.

7. Jósʼin mele Jeobá nga jchatokoán je ndsʼee.

⁷ Je Jeobá nʼio tsjoake ngatsʼi je choʼndale, ni chriansʼa kʼoa ni jekjoatse nga tjíosíxále. Tsa chjí bekon Jeobá ngatsʼi je ndsʼee, kʼoati tjínnele chjí jchatokoán tsanda ñá. Ali tsa tokʼajin xi tsjoacha koaan, tjínnele tsjoacha koaan ngatsʼi je ndsʼee (1 Ped. 2:17). Tjínnele nga si̱kuindaa kʼoa kuinyakoaa. Tsa sʼe̱jinná nga kjoafaʼaitsjenle ndsʼee kanikiʼoaan, alikui koa̱n nga tokjoa koa̱nná kʼoa tsa kʼoasʼin si̱kjaʼaitsjeen nga nʼio ʼnyi je ndsʼee, kʼoa nga tjínnele tosichajin jmeni xi koan. Ánni nga miʼaon kʼani kjoafaʼaitsjenle. Tsakui nichxin ya nroa sakʼoani josʼin koanjchínga kʼoa tsa kʼoasʼin síkjaʼaitsjen nga ngisa nangi tjío tikʼoajinni xi ngikʼa. Tsakui nichxin sʼa choatsele nga tíkotʼaya Énle Niná kʼoa sʼa ñʼai male nga síchatʼale xi ngikʼa. Tojosʼinni, tjínnele kʼoéndajiaan kʼianga kjoa sʼená kao ndsʼee. Xi ijngosani, tjínnele sindaya yaole tsa ʼyani xi ngotjo majtinile. Nʼio chjíle nga kʼoasʼin, nga̱ tokʼoasʼin nga tsjoa sʼe̱ kon kʼoa nda kʼoéjna kao xi ngikʼa.

8. Jósʼin kisikjaʼaitsjen je chjota nga nichxinle Jesús, kʼoa jósʼin tsʼakaotʼale je chjotatjenngile.

⁸ Kuinga tʼatsʼe ʼndíxti kinchja̱ni je Jesús, nga̱ itso xi kiskonangile je chjotatjenngile: “ʼYáni xi ngisa títjon ya kjoatéxomale ngʼajmi” (Mat. 18:1). Nga kui nichxin, nʼio nkjín chjota judío xi kui nʼio kitsjoale kjoandosin nga nda koatio kʼoa nga nʼio kataʼyale. Jngo chjota xi kui kotʼayason jokoan ngasʼa, itso: “Jokjitse tsakatio je chjota, kui xi nʼio koanmele nga kataʼyaxkón, nga nda katabʼaxki̱, nga nʼio kataʼyale, nga chjí kataʼyakon kʼoa nga katasakóle kjoaxkóntokon”.

9. Jmé xi tjínnele kisʼin je chjotatjenngile Jesús.

⁹ Koanjinle je Jesús nga tjínnele nʼio kʼoenele yaole je chjotatjenngile nga tsín  kʼoasʼin sikjaʼaitsjen josʼin síkjaʼaitsjen je chjota judío. I kitsole: “Je xi títjon jinno, katama joni tsa je xi maʼndí. Kʼoa je xi chjotatítjon, katama joni tsa je xi síxá” (Luc. 22:26). Nga kʼoasʼiaan “joni tsa je xi maʼndí”, tjínnele kʼoasʼin si̱kjaʼaitsjeen nga ngisa ngʼa tjío xi ngikʼa (Filip. 2:3). Kʼianga kʼoasʼin si̱kjaʼaitsjeen, alikui ʼya xi si̱katéngiaa.

10. Jñánile je kjoafaʼaitsjen xi kitsjoa Pablo xi tjínnele si̱tjosoán.

¹⁰ Ngatsʼi je ndsʼee kao tichjaa, tjín jmeni xi male kʼoasʼín xi tsín maná kʼoanʼia ñá. Choa ñʼai maná nga ʼyaa jebi kʼianga kui kuenta nʼia jñani nda sʼín. Tjínnele si̱tjosoán je kjoafaʼaitsjen xi kitsjoale Pablo je chjotale Cristo xi Corinto tsʼe, nga kitso: “ʼYáni xi faʼájinli, kʼoa jmé xi tjínli xi tsín kitsʼaili. Tsa kitsʼaili, ánni nga ngʼa manili joni tsa xi tsín kitsʼaili” (1 Cor. 4:7). Kuinga tsín koa̱n kʼoasʼin si̱kjaʼaitsjenñá nga katabʼasjengʼaná xi ngikʼa, kʼoa likui koa̱n kʼoasʼin si̱kjaʼaitsjeen nga ngisa ngʼa tiyolee. Tsa jngo ndsʼee xi nʼio nda tsjoá kjoanokjoaya, kʼoa tsa jngo tichjaa xi nkjín estudio tsjoá, jé Jeobá tjínnele kʼoasjengʼa ngantsjai.

11. Jméni xi bakóyaná tʼatsʼe choa̱ xi tsakʼéjna je Jesús tʼatsʼe rey kao xi choʼnda ma.

¹¹ Kʼianga kʼoakitsole Jesús je chjotatjenngile nga tsín ʼya xi katasíkaténgi, je Jesús jngo choa̱ kisikʼéjnale xi tʼatsʼe jngo rey kao choʼndale. Je rey kʼoakitsole je choʼndale nga tsín tikatasíjndanile jotjín tao̱n kitjenle, nga̱ choʼnda jebi alikʼiajin so̱kole tao̱n xi sijndani. Xijekoan, je choʼnda jebi alikui kisichatʼale je choʼndaxínkjín, kjoanʼio kʼoakitsole nga katasíjndale ningalani ngisa choa tao̱n kitjenle. Xijekoanni, je rey ndoyá kisikʼéjnaʼya je choʼnda xi tsín tsakakó kjoamatokon. Jméni xi bakóyaná jebi. Je Jesús i kitso: “Kʼoati sikaono Nʼaina xi tíjna ngʼajmi, tsa tsín si̱chatʼalao kao ni̱ma̱no nga jngójngó ndsʼao” (Mat. 18:21-35).

12. Jósʼin nikiʼoaan xi ngikʼa tsa tsín si̱chatʼalee.

¹² Jmeni xi kisʼin je choʼnda xi kinchja̱ni Jesús, ali tsa tojejin kisikiʼaon yaole, kʼoati kisikiʼaon xi kjaʼaí. Tobʼelañá, totaon tsabe je choʼndaxínkjín kʼoa ndoyá kisikʼéjnaʼya saʼnda nga sijndale jotjín kitjenle. Kʼoa kʼoati kisikiʼaon choʼnda xi ngikʼa, nga̱ tsabe jme xi kisʼin. Je Jesús i kitso: “Kʼia nga tsabe xikʼa choʼndaxínkjín je kjoa xi koan, nʼio koanbale”. Kʼoatisʼinni jme xi nʼia ñá. Kʼoati síkiʼaon xi ngikʼa. Jméni xi koa̱n tsa tsín si̱chatʼalee tsa ʼya xi josikaoná. Si̱kiʼaonñá tsa tsín si̱chatʼalee, kʼoa tsakui nichxin saʼnda tsín tikuenta sʼianñá. Kʼoa kʼoati tsín nda sa̱tío kon je ndsʼee xi tjío jinjtín kʼianga skoe̱ nga tsín nda mangínkoaa tsa ʼyani xi jokasíkaoná.

13. Jmé xi bakóyaná jokoan jngo tichjaa xi precursora sʼin tísíxá.

¹³ Kʼianga nichatʼalee je ndsʼee ndasʼin biyoaa kʼoa nda satío kon xi ngikʼa. Kʼoakoan jngo tichjaa xi precursora sʼin tísíxá, xi Crystal ʼmi. Kʼoatso nga tsín nda kikao jngo tichjaa ya jinjtín. Itso: “Jmeni xi tso je tichjaa sakʼoaa nʼio síkiʼaonna. Kʼianga ʼmiyasuinjin saʼnda tsín mena nga ya ñatjen tsangínyaijin carro kao tichjaa jebi, alikui titsjoa kisʼeni tokoan”. Je Crystal kʼoasʼin kisikjaʼaitsjen nga toxá majtininá kʼianga ʼya xi josíkaoná. Tonga alikui tsakʼéngijti kon kʼoa alikui tije tsabema̱ni yaole, tosaa nangitokon koan kʼoa kitjenngi je kjoafaʼaitsjen xi faʼaitʼa je revista La Atalaya xi tsʼe 15 de octubre de 1999, jñani “Perdonemos de corazón” tso, kʼoa kisichatʼale je tichjaa.  Itso: “Ndʼaibi, majinna nga tibʼenelee yaoná ngatsʼiaa nga tinindayaa yaoná, kʼoa nga nyaon nyaon síchatʼaná je Jeobá. Ndatjín tokoan ndʼaibi kʼoa tsjoa tjínna”.

14. 1) Tojo tso Mateo 18:21, 22, jméni xi ñʼai koanle je pastro Pedro, kʼoa jmé xi bakóyaná jokitsole je Jesús. 2) Jméni xi koasenkaoná tsa kʼoati kui kjoa kuitjátojiaan.

¹⁴ ʼYañá nga tjínnele si̱chatʼalee xíngiaa. Tonga alikui choa ñʼai maná nga kʼoanʼia. Kʼoati koan sakʼoa je pastro Pedro (tʼexkiai Mateo 18:21, 22). * Jmé xi koasenkaoná. Xi títjon, si̱kjaʼaitsjenjiaan jótjín kʼa síchatʼaná je Jeobá (Mat. 18:32, 33). Alikui bakinná nga sichatʼaná, tonga kʼoasʼín (Sal. 103:8-10). Xi ijngosani, tjínnele nga tsjoacha koaan xíngiaa. Alikui ñá xi kuixónñá tsa mená si̱chatʼalee xíngiaa kʼoa tsa mai, tjínnele kʼoasʼiaan (1 Juan 4:11). Xi majaoni, si̱kjaʼaitsjenjiaan nga nda bichómani nga nichatʼalee je ndsʼee. Bisenkaoñá xi jokasíkaoná, nda biyoaa ya jinjtín, nda biyoaa kao Jeobá kʼoa nda satío tokoán (2 Cor. 2:7; Col. 3:14). Xi majanni, kʼoétsʼoalee je Jeobá, nga̱ jé xotsoná nga si̱chatʼalee xíngiaa. Alikui kʼoaiʼndee nga je Na̱i sikitsónjin nga nda tiyoaa kao ndsʼee (Efes. 4:26, 27). Machjén nga je Jeobá koasenkaoná nga tsín ya jtsaoyaa che̱nle Na̱i.

15. Tojo tso Efesios 4:32, jméni xi sʼiaan tsakui kʼoasʼin jngo ndsʼee xi tsín sa̱sénná.

¹⁵ Jméni xi sʼiaan tsakui kʼoasʼin jngo ndsʼee xi tsín sa̱sénná. Alikui koa̱n nga koa̱njtichaa. Kʼoétsʼoalee je Jeobá kʼoa kʼoéyanajmílee jotjín tokoán. Kʼoakʼuínlee nga katasíchikontʼain tsa ʼyani xi jokatsoná kʼoa kʼoakʼuínlee nga katabasenkaoná nga  kui chótsenlee jñani nda sʼín, tojo sʼín je Jeobá nga kui kotsenle jñani nda sʼín je ndsʼee (Luc. 6:28). Kʼoa tsa tsín chajinná jokisikaoná kʼoa tsa jokitsoná ndsʼee, si̱kjaʼaitsjeen josʼin koa̱n chja̱kaonajmiá. Ngisaa nda nga kʼoasʼin si̱kjaʼaitsjeen nga tsín toxá kisʼinni (Mat. 5:23, 24; 1 Cor. 13:7). Kʼianga chja̱kaonajmiá ali tokjoan chʼaosʼin si̱kjaʼaitsjeen xi tʼatsʼe, tosa kʼoaiʼndelee nga katabʼéyanajmíná jokjoantjínni kjoa. Kʼoa jósʼiaan tsa tsín mele kʼoendajin kjoa. Je Biblia kʼoatso nga tosi tonda katakaná kʼoa tosi tonda koakolee kjoatsejta je ndsʼee (tʼexkiai Efesios 4:32). * Tonga xi ngisa chjíle kuinga tsín kʼoéngijtiaa tokoán. Nga̱ tsa kʼoasʼiaan likuijin tinda kuiyoñá kao Jeobá. Tsa tsín kʼoaiʼndee nga jme xi sikaténginá, kʼoasʼin koakoñá nga ngisa tsjoachaa je Jeobá tikʼoajinni tojmeni (Sal. 119:165).

16. Jmé xi kjinená nga jngó jngoá.

¹⁶ Nʼio chjí ʼyatokoán nga tojngojtín tinixálee je Jeobá kao ndsʼee kʼoa kao tichjaa, kʼoa jé Jesús tíbándiaaná ngatsʼiaa (Juan 10:16). Ya libro Organizados para hacer la voluntad de Jehová, página 165, itso: “Tjínnele kʼoainganʼioá ngatsʼiaa nga jtín sʼin kuiyoaa”. Kʼoa itsosa: “Ndasʼin kuiyoaa ngantsjai kao je ndsʼee tsa kʼoasʼin jchatokoán josʼin bekon je Jeobá”. Jo ʼndíle sʼin bekonná ngatsʼiaa je Jeobá kʼoa bechjíná. Kʼoa kʼoatisʼin tjínnele jchatokoán je ndsʼee. Kuenta sʼín je Jeobá ngayeje jmeni xi nʼia kʼoa nʼio chjí be kʼianga nikuindaa kʼoa binyakoaa je ndsʼee (Mat. 10:42).

17. Jméni xi ñaki tjínjngo tokoán nga kʼoasʼiaan.

¹⁷ Tsjoachañá je ndsʼee, kuinga ñaki tjínjngoni tokoán nga kʼoasʼiaan jotso je Biblia, nga tso: “Tikjaʼaitsjaon nga tsín kʼoéjnao xi sa̱téngi ndsʼao, axo tsín si̱kajngio jée ndsʼao” (Rom. 14:13). Kʼoasʼin si̱kjaʼaitsjeen nga ngisa ngʼa tjío je ndsʼee tikʼoani ñá, kʼoa ni̱ma̱ná katanroajinni nga si̱chatʼalee. Alikui kʼoaiʼndee nga kui sikaténginá jmeni xi sʼín xi ngikʼa. Tosa “kʼoasʼin kjuintjenngilee kjoa xi síkinjenyʼánjinná, kʼoati je xi síkinngʼa xínkjín” (Rom. 14:19).