Kʼiaa kitsian nga 19 sá mayo nó 1940 ya naxinandá Amiún (Líbano). Kʼoa nga jejaʼato jngo jao nó, yaa tsangínkiyuijin ya naxinandá Trípoli. Nʼio tsjoachaijin xíngijin kao familiana kʼoa nʼio tsjoake je Jeobá. Jan koanni xi yánchjín kʼoa jao koannijin xi xʼinjin, kʼoa an xi maʼndía. ʼNdele nga tao̱n ngisa tsjoále kjoandosin je xijchána, tosaa kui ngisa kitsjoale kjoandosin nga kiskotʼaya Biblia, nga ki kjoajtín kʼoa nga kuinyakao xi kjaʼaí chjota nga skoe̱ xi tʼatsʼe Niná.

Ya jtín jñani kia, nkjín mani je ndsʼee xi ya tjínle kjoachoya ya ngʼajmi xi kʼoati ya jtín jebi ki. Jolani je ndsʼee Michel Aboud, xi tsakándiaale nga chotʼaya je libro ya jinjtín. Je ndsʼee jebi yaa Nueva York kiskotʼaya je Énle Niná, kʼoa kʼiaa nga tífitsʼia nó 1920 kicho tsoyason ya Líbano. Faʼaitsjenna nga nʼio tsabexkón kʼoa nʼio tsakasenkao je tichjaa Anne kao Gwen Beavor, jao tichjaa xi ya ki Skuela xi tsʼe Galaad. Nʼio miyo koanle familiana nga jao tichjaa jebi. Kʼoa nga jenʼio nkjín nó jaʼato, nʼio tsjoa kisʼe tokoan nga kisatejin ijngokʼa je Anne ya Estados Unidos. Kʼoa nga jeki nichxin, kʼoati tsaʼbe ijngokʼa je Gwen, xi je Wilfred Gooch chixankao,  kʼoa yaa tjíosíxá ya sucursal xi tíjna ya Londres (Inglaterra).

Kʼianga sʼa ʼndí kjiʼe̱, tochoaa mani je testigole Jeobá ya Líbano. Ninga kʼoalani, tsakʼinyalaijin xi kjaʼaí jmeni xi ʼyaijin xi tʼatsʼe Biblia. Tsakʼinyasonníjin ninga tsakatiochjoa kʼanajin je xi nyatítjonle religión. Tonga nda faʼaitsjenna jmeni xi koan nga kʼia.

Ñandia nga ñatjen tiʼmiyasuinjin kao tichja Sana ya jñani kjio ndʼia xi nʼio yʼai kjoan, ya jñani nkjín chjota tjío. Kʼianga tichjakaonajmínijin Énle Niná je chjota, yaa kicho jngo naʼmi, tochale tsa tjín xi kʼoakitsole nga ya tiʼmiyasuinjin. Je naʼmi kinchja̱tikao je tichja, kʼoa yaa jñani tjío escalón kitsonjtsá. Kʼoa tjín xi kinchja̱le je policía, kicho kʼoa tsakasenkao je Sana, nga̱ kitsiʼaon nga kiska. Je policía kikao je naʼmi ya ndʼiabasen kʼoa tsaʼyale nga jngo pistola yʼa. Je xi séntítjonle policía i kitsole: “A tʼatsʼe Niná ʼmiyalai je chjota, axo kjoatsʼen ʼmiyalai”.

Kʼoati tsín chajinna jokoan kʼianga jngo carro kinijékinyaijin kʼianga ya tsangínkʼinyasuinjin kao je ndsʼee jngo ʼnde xi kjintʼa. Nʼio ndasʼin tiʼmiyasuinjin tsakai, tonga kʼianga kisʼejinle je naʼmi xi ya tíjna ya ʼnde jebi, kisikatíojtín je chjota nga katafinenajin. La̱jao̱ tsakasénnajin je chjota kʼoa yaa jko̱ pana tsʼakaole. Faʼaitsjenna nga síxkón kisʼe njín nkjaín, kʼoa yaa kikin kao mana je carro xi tsangínkoaijin, kʼoa kʼoati tsangínnrʼoaijin tsanda jinjin, nga̱ nʼio kinikjáojinjin. Je mana i kitso kʼianga tísítsje nkjaín je pana: “Jeobá, tichatʼalai nga̱ tsín be jmeni xi tjíosʼín”.

Kʼianga tsangínchotsenlaijin xíngijin ya naxinandá jñani kitsian, nga kichuijin ya ndʼiale pajchána, tokʼoakoannajin nga ya tíjna je obispo, jngo chjota xi séntítjonle religión. Je chjota jebi be nga testigole Jeobá je xijchána. Kʼoa ninga tosʼa jaon nóna, i kitsona: “Kʼoa ji, ánni nga kje saténdásíni”. Kʼoakixinle nga sʼa ʼndí kjiʼe̱, kʼoa nga koa̱n kjuísʼe̱nngindá tjínnele skoesa xi tʼatsʼe Biblia kʼoa nga nʼio sʼe̱jna kjoamakjainna. Alikui kisasenle jokixinle kʼoa kʼoakitsole je pajchána nga tsín tsakakole kjoaxkóntokon.

Alikui tongantsjai nga kjoa jaʼatojian, nga̱ je chjota xi Líbano tsʼe nda chjota kʼoa nda kjoéyaná. Nda kichjakaonajmínijin je chjota xi tʼatsʼe Biblia kʼoa nkjín chjota tsakʼinyalaijin.

Kʼianga sʼa tsoʼba̱ skuela, jngo ndsʼee xi Venezuela tsʼe kicho ya Líbano. Yaa ki kjoajtín jñani mangínjin, kʼoa yaa tsabexkon je tichja Wafa. Nga jeki nichxin chixán kʼoa yaa Venezuela kikatio. Kʼianga kjinajin je Wafa kʼoatsole je pana tsa koa̱n  nga ya Venezuela koanngínkiyonijin nga̱ nʼio síkjáonajin. Kʼoa chaan tsangíntjenngilaijin.

Kʼiaa nga nó 1953 kichuijin ya Venezuela, kʼoa yaa tsakiyuijin ya Caracas, chrian jñani tíjna je presidente. Kʼoa nga sʼa ʼndía, tokʼoamana nga ʼbe je presidente nga faʼakao carrole xi síxkón kji. Tonga nʼio ñʼai koanngale je xijchána, nga̱ kjaʼaí chon ya naxinandá jñani kichuijin, kjaʼaí én nokjoa, kjaʼaísʼin ngale chjota kʼoa kjaʼaí kjoan tsojmi xi bichiñá. Kʼianga jekjimangale tsakai je xijchána, tjín jmeni xi koan xi nʼio ba tsakatío tokuinjin.

Tokʼoakoannajin nga toxijña kitjochʼinle je pana, nga̱ tjínle nganʼio kʼoa nʼio nda tíjna. Alikui faʼaitsjenna tsa sa jekitjochʼinle. Kʼoatsakʼinle nga cáncer tjínle kʼoa kitiyá. Tonga tojngo xomanasa tsakʼejnakon.

Nʼio ba kisatio tokuinjin. Tosʼaa 13 nóna nga kʼia. Tokʼoakoannajin kʼoa tsín titsaʼyanijin jmeni xi sʼiainjin. Alikui choa ñʼai koanle je mana nga jekʼien pana. Tonga chaan koanjinnajin nga tsín koa̱n tokjoaba kuiyojin ʼndeʼndaijin, kʼoa tsakasenkaonajin je Jeobá. Kʼiaa 16 nóna nga jetʼana skuela ya Caracas, kʼoa kʼoasʼin kisikjaʼaitsjen nga tjínnele koasenkoa je familiana.

Nga kui nichxin, je Sana jé chixankao Rubén Araujo, xi ya ki Skuela xi tsʼe Galaad kʼoa yaa kicho ijngokʼa ya Venezuela. Xijekoan, yaa Nueva York kikatio. Kʼoa je familiana kʼoakitsona nga tjínnele skotʼaya universidad, kʼoa yaa kikatejnakoa je Sana kao Rubén ya Nueva York nga̱ yaa kiskotʼaya. Nʼio tsakinyakaona nga nʼio kisʼejna kjoamakjainna jokjitse nga ya tsakatejnakoa. Xi ijngosani, nʼio nkjín ndsʼee xi nʼio nda tjíosíxále Niná xi ya tjío ya jtín jñani kia, jñani Brooklyn Spanish ʼmi. Nʼio tsjoa kisʼe tokoan nga tsaʼbexkoan je ndsʼee Milton Henschel kao Frederick Franz, xi ya Betel xi tíjna Brooklyn tjíosíxá.

Kʼianga jeme jngo nó tikotʼaya universidad ya Nueva York, chaan to jao kisʼe tokoan tʼatsʼe jmeni xi tisʼian. Kui kisikjaʼaitsjenjian jmeni xi tso je Xo̱n xi Bájinkonná jñani kui nchja̱ni tʼatsʼe josʼin nixálee je Jeobá. Tsaʼbeña nga nʼio tsjoa tjío kon je ndsʼee xi precursor kao xi betelita sʼin tjíosíxá ya jtín jñani fia, kʼoa kʼoati koanmena nga tsjoa sʼe̱ tokoan tsanda an. Tonga nga kje fisʼe̱nngindájian nga kʼia, koanjinna nga nʼio chjíle nga bʼaitʼalee yaoná je Jeobá. Kʼiaa kisʼe̱nngindá nga 30 sá marzo nó 1957.

Kʼianga jekisʼe̱nngindá kui kisikjaʼaitsjenjian nga ñaki to xále Niná sʼian. Mena nga precursor koa̱n, tonga kʼoati koanjinna nga tsín choa ñʼai koa̱nna. Kui kisikjaʼaitsjen jókoa̱n sʼian nga skotʼaya universidad  kʼoa nga precursor koa̱nkaoña. Nkjín kʼa nga carta kiskile je mana kao xtindsʼe, kʼoakji an kjinile tjen Nueva York kʼoa kʼoakji je síkasénna carta tjen Venezuela nga kʼoaxinle nga tsín tiskotʼayaña universidad, nga ya Venezuela kjuía kʼoa nga precursor koa̱n.

Kʼiaa nga sá junio nó 1957 ki ijngokʼa ya Caracas. Tsaʼbeña nga tsín nda tjío je familiana nga kʼia. Tao̱nsa koanchjénle, kʼoa koaan tsakasenkoa nga̱ banco kisixá. Tonga kui xi koanmena tsakai nga precursor koa̱n, nga̱ kui xá kicho ijngokʼaña ya Venezuela. Nkjín nó nga ya banco kisixá kʼoa kʼoati precursor koan. Alikuikʼia koanʼana, tonga kʼoati tsjoa kisʼe kaoni tokoan.

Je xi kʼoati tsjoa tsakʼé tokoan, kuinga tsaʼbexkoan je Sylvia, jngo tichjaa xi naskánakji xi Alemania tsʼe. Je tichjaa jebi nʼio tsjoake je Jeobá kʼoa yaa Venezuela kichokatio kao xijchále. Nga jeki nichxin, chixanníjin kʼoa jao xti kisʼenajin: je Michel (xi Mike ʼmilaijin) kao Samira. Kʼoatisʼin tsakʼendajinjin nga ya koaikʼejnakaonajin je mana ánni nga koa̱n si̱kuindanijin. Ninga tsínti precursor sʼin kisixáña kʼianga jetse xá kisʼenena ya yaniʼya, tojo kʼoatjín tokoan joni jngo precursor. Kʼianga sʼena vacación, precursor auxiliar sʼin nixáijin kao Sylvia.

Je xtinajin sʼa skuela tjíotsoma kʼianga kʼoakoan jme xi sa jekasikʼaxkia nga títjon. Nʼio nda tsakiyuijin kʼoa nda tsabekonna je chjota xi ñatjen kinixáijin ya banco. Ninga kʼoalani, kui xi mena nga kʼoasʼin katabena nga testigole Jeobá ma. Tokui kisikjaʼaitsjen ʼndeʼnde. Kichobayanijin kao Sylvia jmeni xi sʼian. Tsa sikʼéjna xána ya banco tsejin tao̱n kʼoaina. Kʼoa nga tsín jme tao̱n kitjennajin, tsejin koa̱nle je tao̱n xi kʼoaina, tsa tokoa̱nninajin josʼin kuiyuijin.

Tonga tsín choa ñʼai koanna nga kʼoakisʼian. Kitsjoanganʼiona je chjoónna kao mana. Kʼoa tsa tsín tiya banco sixáña koa̱njin nga ñaki to xále Niná sʼin ijngokʼa. Nʼio tsjoa kisʼe tokoan, tonga tjínsa jmeni xi koan.

Je chjinexki kʼoakitsonajin nga ʼndí yʼa je Sylvia. Alikui kui tichoyalaijin, tonga tsjoa kisʼe kaoni tokuinjin. Tojo kui kisikjaʼaitsjenjian nga mena precursor koa̱n. A kʼoakoa̱nna tsokʼoa. Nga kui kinikjaʼaitsjainjin nga  ʼndí sʼe̱le je Sylvia, nʼio tsjoa kisatio tokuinjin. Kʼoa ñaki kao kjoatsjoa kichoyalaijin nichxin kʼianga jtsín. Tonga jókoa̱nni jme xi tsakʼendajian tsakai.

Kinikjaʼaitsjenjinníjin kʼoa tosi tonda kʼoatsakʼaijin tokuinjin nga si̱tjosuinjin jmeni xi sa jetsakʼendajinjin. Je tinajin Gabriel, kʼiaa kitsin nga sá abril nó 1985. Alikui tiya banco kisixáña kʼoa precursor regular koan ijngokʼa nga sá junio nó 1985. Nga jeki nichxin, kui kjoanda kisʼena nga ya tsakatejnajinle je comité xi tsʼe sucursal ya Venezuela. Ñokanla kilómetro (50 milla) kjin tíjnale je sucursal ya Caracas. Kʼoa nga kjin tíjna sakʼoaa jao kʼa kʼoa tsa jan kʼa fia nga jngo xomana.

Je sucursal yaa tíjna ya naxinandá jña La Victoria ʼmi, kʼoa yaa tsangínkiyonijin nga ngisa chrian koannajin ya Betel. Titsʼantjaiyangáni josʼin tsakiyuijin. Nʼio tsjoale kjoanda je familiana nga kitsjoanganʼiona. Je tichja Baha kʼoakitso nga je sikuinda je mana. Je Mike tokʼoa jechixan nga kʼia, tonga je Samira kao Gabriel tojo yaa tjíokaonajin kʼoa kisikatío miyole ya Caracas. Kʼoati tsʼantjaiya jochon jña tsakʼejna je Sylvia, nga̱ tsín tikʼoachonni jochon jñani sa jetsakiyuijin. Ngisaa ʼndí kji ndʼia jñani tsakiyoʼyaijin ngatsʼijin. Tsʼantjaiyaa josʼin tsakiyuijin ya naxinandá La Victoria.

Nkjínsa koya jmeni xi tsʼantjaiya. Je Gabriel chixán kʼoa xin kikʼejna je Samira. Xi ijngosani, nga nó 2007, je Sylvia kao an yaa kinokjoanajin ya Betel nga ya koanngínnixáijin kʼoa nʼio tsjoa tjío tokuinjin saʼnda ndʼai. Je Mike, tinajin xi majchínga, chjotajchínga sʼin tíjna kʼoa precursor sʼin tjíosíxá kao Mónica, xi chjoónle mani. Je Gabriel kʼoati chjotajchínga sʼin tíjna, kʼoa yaa Italia tjío kao Ambra, xi chjoónle mani. Je Samira precursora sʼin tísíxá kʼoa yaa tjen ndʼiale tsjoánganʼioni nga síxákao Betel.

Jokjitse nga tisijchá yaona, nkjín koya jmeni xi tikjoejian, tonga alikui kʼoamanina jme xi tisʼian. Nʼio tsjoa kjoanda nga kjima tisixále je Jeobá. Jokji tífaʼato nó, tiʼbeña nga nʼio chjíle nga miyoná mani je Jeobá. Tojmeni xi sʼiaan, jé Jeobá tsjoáná je kjoanyʼán “xi ñaki faʼatole ngayije kjoafaʼaitsjenle chjota” (Filip. 4:6, 7). Je Sylvia kao an nʼio tsjoa tjío tokuinjin nga Betel tinixáijin, kʼoa ndasʼin tíbichómani jmeni xi tinʼiaijin nga̱ kuenta tinʼiaijin ngantsjai je Jeobá.