1. Jméni xi tsole Jeobá je xi kʼoamanile nga bajngijée.

 JÉ Jeobá kisindaná, jé xi Juez tíjnaná kʼoa xi tsjoáná kjoatéxoma. Tonga kʼoati Nʼainá mani kʼoa nʼio tsjoakená (Sal. 100:3; Is. 33:22). Nga kʼoamaniná kʼianga bijnyijée ngixko̱n Jeobá, koaanle sichatʼaná kʼoa mele kʼoasʼin (Sal. 86:5). Jé profeta Isaías kisichjén Jeobá nga i̱ kitso: “Ningalani je jéeno ñaki ní kjoan, ñaki koa̱nkjoanxóxó joni tsa nyʼán” (Is. 1:18). Nʼio tsjoánganʼioná én jebi.

2. Jméni xi sʼiaan tsa mená nda kjuinkoaa xíngiaa.

² Nga chjotajée maa ngatsʼiñá nga kui kʼoabixoán kʼoa kui kʼoanʼia jmeni xi tsín sasénle xi ngikʼa (Sant. 3:2). Koaan nda cho̱bá kao xíngiaa tsa koa̱nná si̱chatʼaa (Prov. 17:9; 19:11; Mat. 18:21, 22). Je Jeobá kui xi mele nga si̱chatʼalee xíngiaa tsa ʼya xi jokuitsoná kʼoa tsa ʼya xi josikaoná (Efes. 4:32). Kuinga si̱chatʼanilee xíngiaa nga̱ je Jeobá síchatʼaná (Is. 55:7).

3. Jmé xi chótʼayajiaan i̱ kjoaʼmiya jebi.

³ I̱ kjoaʼmiya jebi kui chótʼayajiaan jósʼin koa̱n chjénngilee Jeobá nga si̱chatʼalee xíngiaa ningalani chjotajée maa. Jñánile je jée xi machjén nga sʼe̱jinle xi chjotajchínga sʼin tjío. Ánni nga menile Jeobá nga si̱chatʼalee xíngiaa. Kʼoa jmé xi bakóyaná je choa̱le ndsʼee xi tse kjoa tsakatiojin xi totʼatsʼe nga kjaʼaí xi tsakajngijée.

4. 1) Jméni xi tjínnele sʼin jngo chjotale Cristo xi ai jée bajngi. 2) Jmé xá xi kjinele xi chjotajchínga sʼin tjío.

⁴ Kʼianga ʼya xi ai jée bajngi machjén nga sʼe̱jinle xi chjotajchínga sʼin tjío. Yaa 1 Corintios 6:9, 10 nchja̱ kʼani je jée xi ai tjío. Je jée jebi nʼio ai tjío nga̱ faʼatoné kjoatéxomale Niná. Tsakui jée jebi koa̱njngí jngo chjotale Cristo machjén nga kʼoetsʼoale Jeobá nga sijéle kjoanichatʼa kʼoa kʼoeyanajmíle xi chjotajchínga sʼin tjío (Sal. 32:5; Sant. 5:14). Jmé xá xi kjinele xi chjotajchínga sʼin tjío. Jé Jeobá xi tiʼndele tondiaa sichatʼaná xi totʼatsʼe nga tsakʼéchjíntjainá Jesús. * Tonga je Jeobá kui xá bánele xi chjotajchínga sʼin tjío nga ya Biblia kʼoangini tsa koa̱n nga tosi tonda kʼoéjnajin naxinandále Niná jngo xi tsakajngijée kʼoa tsa mai (1 Cor. 5:12). Jngo koya jmeni xi sʼín xi chjotajchínga sʼin tjío kuinga básjaiya xi tʼatsʼe jebi: A toxá tsakʼéndajinni chjota jebi nga tsakajngijée. A tsakʼéʼma jmeni xi kisʼin. A tsee nga kʼoasʼin tsakajngijée. Kʼoa xi ngisa chjíle, a tíbakó nga kʼoama kjoaixinile je jée xi tsakajngi. Jméni xi bakóná nga jekisichatʼale Jeobá (Hech. 3:19).

5. Jósʼin binyakao jtín je xá xi kjinele xi chjotajchínga sʼin tjío.

⁵ Kʼianga batiojtín je xi chjotajchínga sʼin tjío kao xi tsakajngijée, kui xi mele nga kʼoatisʼin kʼoendajin kjoa josʼin jekisʼendajin ya ngʼajmi (Mat. 18:18). Jósʼin basenkao je jtín nga kʼoama. Tsa tsín kʼoakoa̱nnile je jée xi tsakajngi alikui tjoʼndele nga tosi tonda ya kʼoéjnajin je jtín. Kʼoasʼin makuindani je ndsʼee xi ngikʼa nga̱ nʼio chjí be je Jeobá (1 Cor. 5:6, 7, 11-13; Tito 3:10, 11). Kʼoati koasenkao je chjota xi tsakajngijée nga kʼoakoa̱nnile jme xi kisʼin kʼoa nga koasjai kjoanichatʼale Jeobá (Luc. 5:32). Xi chjotajchínga sʼin tjío bʼétsʼoantjai je xi kʼoamanile je jéele kʼoa kʼoatsole Jeobá nga katabasenkao nga ndasʼin kʼoéjna ijngokʼani ngixko̱n (Sant. 5:15).

6. A sichatʼale Jeobá jngo chjota xi jetsakichonsjejin naxinandále. Tʼeyanajmí.

⁶ Si̱kjaʼaitsjenla tsa jngo xi tsín kʼoakoa̱nnile je jéele kʼianga koatiojtín kao xi chjotajchínga sʼin tjío. Tsa kʼoalani, kuichonsjejin naxinandále Niná. Kʼiatsa kui jée tsakajngi chjota jebi xi ai tíjna ngixko̱n kjoatéxoma, alikui je kjoáyojin xi chjotajchínga sʼin tjío jmeni xi koa̱ntʼain chjota jebi ngixko̱n kjoatéxoma. Je Jeobá tsjoáʼndele je chjotaxá nga bʼéndajin kjoa kʼoa nga kjoañʼai tsjoále toʼyani xi faʼatone kjoatéxoma, ni kjoakjimanile jme xi kisʼin kʼoa ni mai (Rom. 13:4). Tonga tsa skanni sikjaʼaitsjenjin chjota jebi nga chʼao kisʼin, tsa kʼoakoa̱n kjoaixinile je jéele kʼoa sikʼantjaiya josʼin síkjaʼaitsjen kʼoa josʼín, tíjnandaa Jeobá nga sichatʼale (Luc. 15:17-24). Ningalani nʼio ai jée xi tsakajngi (2 Crón. 33:9, 12, 13; 1 Tim. 1:15).

7. Jósʼin tíjna nga nichatʼalee jngo chjota xi josíkaoná.

⁷ Nda sʼe tokoán nga tsín ñá kjinená kʼoakuixoán tsa sichatʼale Jeobá jngo chjota xi kabajngijée kʼoa tsa mai. Tonga tjín jmeni xi koa̱nná ñá kʼoakuixoán. Kataʼyala jméni. Tsa ʼyani xi josikaoná, ni sijéná kjoanichatʼa kʼoa ni mai, koaan si̱chatʼalee ñá. Xi tsonile alikui kʼoéngijtiaa tokoán kʼoa tsín jtichaa koaan chjota jebi. Tsakui nichxin nʼio ñʼai koa̱nná  kʼoa tse kuichomani nga si̱chatʼalee, ngisaa tsa nʼio kisikiʼaon kjoafaʼaitsjenná. Je revista La Atalaya xi tsʼe 15 de septiembre de 1994, itso: “Nga nichatʼalee jngo xi bajngijée ali tsakuijin xi tsonile nga sasénná jmeni xi sʼín. Nga nichatʼalee tsa ʼyani kui xi tsonile nga tjínjngo tokoán nga ngisa nda be Jeobá josʼin kʼoendajin kjoa. Jé Jeobá xi Juez sʼin tíjna ya ngʼajmi kao i̱ Sonʼnde, ñaki kixi kʼoa ngisaa nda be kʼiáni nga kʼoendajin je kjoa”. Ánni nga menile Jeobá nga si̱chatʼalee xíngiaa kʼoa nga kʼoaiʼndelee nga je katabʼéndajin kjoa, nga̱ ʼyañá nga ñaki kixi je Jeobá.

8. Jósʼin bakoá nga chjí ʼyatokoán je kjoamatokonle Jeobá.

⁸ Kʼianga nichatʼalee xíngiaa kʼoasʼin bakoñá nga chjí ʼyatokoán nga bakóná kjoamatokon je Jeobá. Ñandia nga jngo choa̱ tsakʼéjna je Jesús kʼianga je kisingósonkao Jeobá jngo nai xi kisichatʼale choʼndale xi nʼio tse tao̱n kitjenle. Tonga choʼnda jebi alikui tsakakóle kjoamatokon je choʼndaxínkjín xi ngisa choa tao̱n kitjenle (Mat. 18:23-35). Jméni xi tsakakóya je Jesús nga kui choa̱ kisikʼéjna. Tsa chjí ʼyatokoán je kjoamatokon xi bakóná Jeobá, kʼoasʼin koakoñá nga si̱chatʼalee xíngiaa (Sal. 103:9). Jngo revista La Atalaya xi jekjoatse kitjo i kitso: ninga nʼio nkjín kʼa si̱chatʼalee xíngiaa alikuikʼia koa̱nngóson “josʼin síchatʼaná je Jeobá kʼoa josʼin bakóná kjoamatokon xi tʼatsʼe Cristo”.

9. ʼYáni xi bakóle kjoamatokon je Jeobá (Mateo 6:14, 15).

⁹ Tsa si̱chatʼalee xíngiaa kʼoati sichatʼaná Jeobá. Je Niná bakóle kjoamatokon je xi bakó kjoamatokon (Mat. 5:7; Sant. 2:13). Kui kinchja̱ni xi tʼatsʼe jebi je Jesús kʼianga kitsoyale je chjotatjenngile josʼin tjínnele kʼoetsʼoa (tʼexkiai Mateo 6:14, 15). * Jesa kʼoakitsole Jeobá je Job nga tjínnele koako kjoamatokon. Je Job kiskale jmeni xi kitsole je Elifaz, Bildad kao Zofar. Je Jeobá kʼoakitsole je Job nga katabʼétsʼoantjai chjota jebi. Kisichikontʼain Jeobá je Job nga kʼoakisʼin (Job 42:8-10).

10. Ánni nga síkiʼaonniná nga bʼengijtiaa tokoán (Efesios 4:31, 32).

¹⁰ Síkiʼaonná nga bʼengijtiaa tokoán. Nga bʼengijtiaa tokoán yaa mangóson joni tsa chʼá kichʼamiaa, kʼoa je Jeobá kui xi mele nga chja̱ʼaxinlee yaoná chʼá jebi (tʼexkiai Efesios 4:31, 32). * Je Jeobá itsoná: “Tikʼéjnai je kjoajti kʼoa titjoxinlai” (Sal. 37:8). Basenkaoná nga mangíntjenngiaa kjoafaʼaitsjen jebi, nga̱ tsjoáchʼinná nga bʼengijtiaa tokoán kʼoa tsín nda sʼe kjoafaʼaitsjenná (Prov. 14:30). Kʼianga bʼengijtiaa tokoán yaa mangóson joni tsa veneno tiʼyoá, toñá nikiʼoaan yaoná. Ñá xi nda biyoaa kʼianga nichatʼalee xíngiaa (Prov. 11:17). Nda sʼe tokoán kʼoa tosi tonda je Jeobá nixálee.

11. Jótso je Biblia tʼatsʼe nga nijndangajaoñá jme xi matʼeen (Romanos 12:19-21).

¹¹ Kʼoaiʼndee nga je Jeobá katasíjndangajaoni jmeni xi matʼeen. Je Jeobá kʼoatso nga tsín tiʼndená nga ñá si̱jndangajaoñá  jmeni xi síkaoná tsa ʼyani (tʼexkiai Romanos 12:19-21). * Nga chjotajée maa kʼoa nga tsín ʼyayeje jokjoantjínni kjoa alikui koa̱nná kʼoasʼin kʼoéndajiaan josʼín je Jeobá (Heb. 4:13). Xi ijngosani, sakʼoa tokui mangínñá josʼe tokoán. Jé Niná xi kʼoasʼin koanmele nga i̱ tso xi kiski Santiago: “Je chjota xi majtile likui sʼín xi kjoakixi ngixko̱n Niná” (Sant. 1:20). Tjínjngoo tokoán nga ndasʼin kʼoendajin kjoa je Jeobá nga̱ ñaki kixi jmeni xi sʼín.

12. Jósʼin bakoá nga makjainná nga je Jeobá xi ngisa nda be josʼin kʼoendajin kjoa.

¹² Kʼianga nichatʼalee xíngiaa kʼoasʼin bakoñá nga makjainná nga je Jeobá xi ngisa nda be josʼin kʼoendajin kjoa. Nga je Jeobá ninʼiotʼaa kʼoasʼin bakoñá nga ñaki tjínjngo tokoán nga je kʼoendajin kjoa xi bijnyaa nga chjotajée maa. Ya sonʼnde chjotse alikui tikui kjoaʼaítsjenniná jmeni xi aon bʼé tokoán (Is. 65:17). Kʼiatsa ʼyani xi josikaoná, a kʼoakoa̱n kjoaixiná nga tsín yaoná si̱jtilee kʼoa nga tsín kʼoéngijtiaa tokoán. Kataʼyala kʼa choa̱.

13, 14. Jmé xi bakóyali je choa̱le Tony kao José.

¹³ Nkjín ndsʼee xi kisichatʼale je chjota xi nʼio kisikiʼaon. Jósʼin tjíobinyakao nga kʼoasʼín.

¹⁴ Kataʼyala xi tʼatsʼe Tony * xi Filipinas tsʼe. Nʼio nkjín nó tongini nga kjesa testigole Jeobá majin, jngo ndsʼe̱ xi majchínga kinikʼien. Kisʼejinle nga jngo chjota xi José ʼmi kisikʼien je ndsʼe̱. Nga nʼio tsʼen je Tony koanmele kisijndangajaoni. Je José ndoyá kinikʼéjnaʼya nga kʼoakisʼin. Kʼianga jekitjoni ndoyá, je Tony ñaki kʼoatsakʼé kon nga koasjai kʼoa nga sikʼien, kuinga jngo pistola tsakatseni. Kʼoa kʼiakjoán kiskotʼaya Biblia kao testigole Jeobá. Itso: “Kʼianga Biblia kiskotʼaya koanjinna nga tjínnele sikʼantjaiya  yaona. Nga tsín koa̱n tosi tonda yaona sijtile”. Je Tony kisʼenngindá kʼoa chjotajchínga sʼin tsakʼejna nga jeki nichxin. Tokʼoakoanle nga kisʼejinle nga kʼoaniti jetestigole Jeobá je José. Kʼianga kitsaojin xínkjín kitsoakjá xínkjín, kʼoa je Tony kʼoakitsole José nga jekisichatʼale. Je Tony kʼoatso jokji tsjoa kisʼe kon nga jekisichatʼale je José. Je Tony koanle kisichatʼa, kʼoa je Jeobá kisichikontʼain nga kʼoakisʼin.

15, 16. Jméni xi bakóyali jokoan je Peter kao Sue.

¹⁵ Kʼianga nó 1985, je Peter kao Sue yaa tjío ya Ndʼia jña chotʼayá nga tísʼejnale kjoajtín kʼianga toxijña jngo bomba kitsinnga. Tjín xi bomba kichokʼéjna ya Ndʼia jña chotʼayá. Nga nʼio kitsiʼaon je Sue alikui tikinje̱nile tsa jmeni, tsín tikoantsennile kʼoa tsín tikinrʼoéni. * Je ndsʼee kao chjoónle kui kisikjaʼaitsjenjin ʼyáni xi bomba kichokʼéjna ya Ndʼia jña chotʼayá. Nga jenkjín nó jaʼato kindoaa je xokisʼin kʼoa ndoyá kinikʼéjnaʼya kʼoa kʼoatsakʼinle nga tsín tikʼia kuitjoni. Kʼianga kʼoatsakʼinle je Peter kao Sue tsa jekisichatʼale, i kitso: “Je Jeobá kui bakóyanajin nga tjochʼinná kʼoa tsín tinda satíoni tokoán kʼianga yaoná nijtilee kʼoa nga bʼengijtiaa tokoán. Saʼnda nga kʼoakoan kinijélaijin Jeobá nga katabasenkaonajin nga tsín yaonajin si̱jtilaijin kʼoa nga tsín kʼoéngijtijin tokuinjin”.

¹⁶ Tonga alikui tongantsjai nga choa ñʼai male je ndsʼee jebi kao chjoónle nga síchatʼa. Itso: “Nga nʼio kitsiʼaon je Sue sakʼoa nʼio majtinajin nga faʼaitsjennajin jmeni xi koan. Tonga nga tsínkui nʼio nikjaʼaitsjainjin chajinninajin kʼoa ñaki kʼoatjín tokuijin nga nda chjoéyaijin chjota jebi tsa testigole Jeobá koa̱n. Choa̱ jebi kui bakóyaná nga nʼio binyakaoná je kjoafaʼaitsjen xi tsjoáná Niná nga nda sʼe tokoán. Ñaki matjaná kʼoa tsjoánganʼioná nga jeme kjoaʼaxin Jeobá  ngayeje chʼin kʼoa nga nda kuiyoaa”.

17. Jmé xi bakóyali jokoan je Myra.

¹⁷ Kʼiaa tsabe Myra je Énle Niná kʼianga jechixan kʼoa nga jejao ma xtiʼndíle, tonga tsín kiskotʼaya je xʼinle. Nga jeki nichxin, je xʼinle tichjaa kjaʼaí chjoón kikao, kʼoa tokitsjionkon. Je Myra itso: “Ñaki tokʼoakoanna nga kitsjionkonnajin je xʼinna. Kʼoati kisʼe tokoan tojo satío kon ngatsʼi xi kʼoamatʼain, likui tiʼya xi kisinʼiotʼaña, aon kisʼe tokoan, ba koanna, an tsakane jée yaona kʼoa nʼio jti koanna”. Ninga jekitsjion xínkjín tojo aon tjín kon Myra. Itsosa: “Nkjín sá nga kʼoakisʼe tokoan kʼoa kʼiaa koanjinna nga kuini xokisikaona nga tsín tindasʼin tsakatejnaña kao xi ngikʼa kʼoa tsín titsjoa kisʼeni tokoan nga je Jeobá kisixále”. Je Myra alikui titjínngijtini kon ndʼaibi, kʼoa tsín mele nga kui xi chʼaotjín kʼoakatamatʼain je xi xʼinle koanni. Tosaa kui xi koyale nga kuicho nichxin nga skótʼaya Énle Niná je xi xʼinle koanni. Je Myra kui síkjaʼaitsjenjin jme xi sʼa kʼoakoa̱n, ali tsakuijin síkjaʼaitsjenjin jme kjoa xi jaʼatojin. Ningalani toje kisijchá nga jao ʼndíxtile tsjoa tjín kon ndʼaibi nga je Jeobá tjíosíxále ngatsʼi.

18. Nga je Jeobá xi Juez sʼin tíjna ya ngʼajmi kao i̱ Sonʼnde, jméni xi tsín jao tjín tokoán.

¹⁸ Nga je Jeobá xi Juez sʼin tíjna ya ngʼajmi kao i̱ Sonʼnde, alikui ñá xi kuixónñá josʼin sʼe̱ndajinle kjoa xi ngikʼa. Nda sʼe tokoán nga je Jeobá xi bʼéndajin kjoa (Rom. 14:10-12). Alikui jao tjínná nga nʼio nda be Jeobá jmeni xi ndatjín kʼoa jmeni xi chʼaotjín kʼoa kui kjoatéxomale sichjén nga kʼoendajin kjoa (Gén. 18:25; 1 Rey. 8:32). Alikuikʼia kui kʼoasʼin Jeobá jmeni xi tsín kixi tjín.

19. Nga ñaki kixi jmeni xi sʼín je Jeobá, jméni xi sʼin nichxin xi sʼa nroa.

¹⁹ Je Jeobá kjoaʼaxin ngayeje kjoañʼai xi tísíkjaʼáná je jée. Jemená nga kʼoakatama. Jé Jeobá sindayaná jñani kitsiʼoaan kʼoa koasenkaoná nga nda sʼe̱ tokoán tokʼia saʼndani (Sal. 72:12-14; Apoc. 21:3, 4). Alikui tikui kjoaʼaítsjenniná. Nga kjesa kʼoamajin, chjénngilee je Jeobá nga si̱chatʼalee xíngiaa.