KJOAʼMIYA XI CHOTʼAYA 24
Je Jeobá tíjnandaa nga síchatʼaná
“Ji, Jeobá, nda chjotai kʼoa tijnandaní nga nichatʼai; nʼio bakolai kjoatsjoacha ngatsʼi je xi nchja̱li” (SAL. 86:5).
KJOAJNDA 42 Jme xi síjé choʼndale Niná nga bʼétsʼoa
XI TÍNCHJA̱NI *
1. Jméni xi kitso je rey Salomón tojosʼin faʼaitʼa ya Eclesiastés 7:20.
JE REY Salomón i kitso: “I̱ sonʼnde tsín jngo chjota xi kixi xi kui kʼoasʼínntsjai xi ndatjín xi tsínkʼia bajngijée” (Ecl. 7:20). Kʼoatjín kjoaixi jokitso je Salomón, ngatsʼiñá nga chjotajée maa (1 Juan 1:8). Kuinga machjénniná ngatsʼiaa nga sichatʼaná je Niná kʼoa nga sichatʼaná xíngiaa.
2. Jósʼe tokoán kʼianga síchatʼaná je miyoná.
2 A jesa kinikiʼoaan kjoafaʼaitsjenle jngo miyoná. Ngatsʼiñá nga kʼoamaa. Kʼoa nga mená nga tosi tonda miyo cho̱bá nijélee kjoanichatʼa. Jósʼe tokoán kʼianga jesíchatʼaná je miyoná. Tsjoa sʼená kʼoa nda satío tokoán.
3. Jmé xi chótʼayajiaan i̱ kjoaʼmiya jebi.
3 Kui xi mená ngatsʼiaa nga je Jeobá xi ngisasa nda miyoná katamani, tonga sakʼoa kui kʼoanʼia kʼoa kui kʼoabixoán jmeni xi tsín sasénle. Tonga ánni nga kʼoéjngosíñá tokoán nga mele sichatʼaná. Ánni nga tsín mangósonni josʼin síchatʼaná Jeobá kʼoa josʼin nichatʼalee xíngiaa. Kʼoa ʼyáni xi síchatʼale je Niná.
JE JEOBÁ TÍJNANDAA NGA SÍCHATʼANÁ
4. Ánni nga tsín jao tjínni tokoán nga tíjnanda Jeobá nga síchatʼaná.
4 Je Biblia kʼoatso nga tíjnandaa Jeobá nga síchatʼaná. Tobʼelañá, ya nindo Sinaí, je Jeobá kʼoakitsole Moisés jokjoan. Jngo ánkje kisichjén nga i̱ kitsole: “Jeobá, Jeobá, jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín, kʼoa jmi mani xi bakóle je kjoatsjoacha, síchatʼa jñani tsín kʼoanʼia, jñani saténgiaa kʼoa jñani bijnyijée” (Éx. 34:6, 7). Je Jeobá tsjoakená, mamakená kʼoa tíjnandaa nga síchatʼale je xi kʼoamanile je jéele (Neh. 9:17; Sal. 86:15).
Je Jeobá kuenta sʼín jña nroani jokjoaan (Chótsenlai párrafo 5)
5. Tojo tso Salmo 103:13, 14, jósíkaoná Jeobá nga nda bexkonná.
5 Je Jeobá be ngayeje xi tʼatsaan nga jé kisindaná. Tokʼoamaná nga be Jeobá xi tʼatsʼe nga jngó jngó chjota (Sal. 139:15-17). Be jñani sakʼoa tsín nda nʼia xi totʼatsʼe jée xi kisikakinná je Adán kao Eva. Xi ijngosani, be josʼin majchíngaa kʼoa nga ya nroani jokjoaan. Bakóná kjoamatokon je Jeobá nga̱ nʼio nda bexkonná (Sal. 78:39; tʼexkiai Salmo 103:13, 14 *).
6. Jósʼin tsakakó Jeobá nga mele sichatʼaná.
6 Je Jeobá tsakakó nga mele sichatʼaná. Nʼio nda majinle nga totʼatsʼe Adán nga chjotajée maa kʼoa nga biyaa (Rom. 5:12). Nga chjotajée maa alikui koa̱nná nga tiñá chʼa̱sjentjaiñá yaoná kʼoa tsa kjaʼaí xi chʼa̱sjentjé (Sal. 49:7-9). Nga tjínle kjoamatokon je Niná kʼoa nga tsjoakená kisikasén je ʼNdíle nga kʼienntjainá tojo tso ya Juan 3:16 (Mat. 20:28; Rom. 5:19). Jé Jesús kʼienntjainá ngatsʼiaa kʼoa koaan ndái koatiole je jée kao kjoabiya je xi koa̱nkjainle xi tʼatsʼe (Heb. 2:9). Nʼiojin aon koanle je Jeobá nga tsabe nga kjoañʼai kinikjaʼá kʼoa nga kinikʼien je ʼNdíle. Toxitsjoajinni nga kʼoasʼin kinikʼien je ʼNdíle tsa tsínlani sichatʼaná.
7. Tikʼaxki̱ kʼai chjota xi síkʼaxki̱ Biblia xi kisichatʼale Jeobá.
7 Ya Biblia nkjín chjota síkʼaxki̱ xi kisichatʼale Jeobá (Efes. 4:32). A faʼaitsjenli tsa ʼyani. Tsakui nichxin je nikjaʼaitsjain je rey Manasés. Nʼio tsʼen koan kʼoa tsee jée tsakajngi ngixko̱n Jeobá. Jé xokisʼin nga niná ndiso tsakʼétsʼoale chjota kʼoa tsakaká je xtile nga niná ndiso kitsjoatʼale, kʼoa saʼnda jngoo xkóson kichokaséjna ya yo̱ngo̱le Jeobá jñani ʼndetsje. Je Biblia itso xi tʼatsʼe: “Nʼio chʼao kisʼin ngixko̱n Jeobá nga kisijtile” (2 Crón. 33:2-7). Nga tsakakó Manasés nga kʼoakoan kjoaixinile jmeni xi kisʼin kisichatʼale Jeobá, kʼoa saʼnda kitsjoaʼndele nga rey koan ijngokʼa (2 Crón. 33:12, 13). Kʼoati tse jée tsakajngi je rey David, jolani nga kisichajngi kʼoa nga tsakʼéxá nga kinikʼien jngo chjota. Je Jeobá kisichatʼale David kʼianga koanjinle nga tsín nda kisʼin kʼoa nga kʼoakoan kjoaixinile je jée xi tsakajngi (2 Sam. 12:9, 10, 13, 14). Kuinga tsín jao kʼoéñá tokoán nga mele sichatʼaná je Jeobá. Kʼoa tojosʼin jchaa, alikui mangóson josʼin síchatʼaná Jeobá kao josʼin nichatʼalee xíngiaa.
ALIJME XI MANGÓSONKAO JOSʼIN SÍCHATʼANÁ JEOBÁ
8. Ánni nga jeni Jeobá xi ngisasa nʼio nda male bʼéndajin jngo kjoa, kʼoa jósʼin síchatʼaná.
8 Jé Jeobá “xi Juez tíjnale jngo tjíjtsa sonʼnde” (Gén. 18:25). Jngo juez xi nʼio nda male bʼéndajin kjoa tjínnele nʼio nda skoe̱ jotjínni je kjoatéxoma. Je Jeobá nʼio nda be jokjoantjínni kjoa nga̱ jé xi Juez sʼin tíjnaná kʼoa jé xi tsjoáná kjoatéxoma (Is. 33:22). Tojé Jeobá xi ngisasa nda majinle jméni xi ndatjín kʼoa jméni xi chʼaotjín. Jmésani xi tjínnele sʼin jngo juez xi nʼio nda male bʼendajin kjoa. Nga kjesa kʼoatsojin jokoa̱ntʼain jngo chjota xi kabajngijée kuenta sʼín ngayeje jokjoantjínni kjoa. Tojé Jeobá xi ngisasa nʼio nda male bʼéndajin jngo kjoa.
9. Jméni xi kuenta sʼín Jeobá tsa sichatʼale tsa ʼyani kʼoa tsa mai.
9 Je Jeobá alikui mangóson kao josʼín je chjota xi juez sʼin tjío. Nʼio nda be Jeobá ngantsjai jokjoantjínni kjoa kʼianga jngo chjota bajngijée (Gén. 18:20, 21; Sal. 90:8). Ali tokuijin kuenta sʼín jmeni xi be kʼoa jmeni xi nrʼoé xi tʼatsʼe chjota. Nʼio nda majinle nga ya nroani jomakjoan jngo chjota josʼín xijchále, josʼin majchínga, jochon ya ʼndele, jotjín kon, tsa nda tíjna kʼoa tsa chʼin bʼetʼale. Je Jeobá be jotjío je ni̱ma̱ná, xi tsonile, be ánni nga kʼoanʼiañá tsa jmeni kʼoa be jmeni xi nimetokoán. Alijme xi tjíʼma ngixko̱n (Heb. 4:13). Nga nʼio nda be Jeobá jokjoantjínni kjoa yaa nroani nga síchatʼaná.
Je Jeobá kixi kʼoa tsín ʼya xi faʼájin. Aliʼya xi kʼoanachale (Chótsenlai párrafo 10)
10. Ánni kʼoabixónsíñá nga kixi jmeni xi sʼín ngantsjai je Jeobá (Deuteronomio 32:4).
10 Ñaki kixi jmeni xi sʼín ngantsjai je Jeobá. Alikui ʼya xi faʼájin. Nga síchatʼa alikui kui fini josʼin matsen jngo chjota, tsa tjínle tao̱n kʼoa tsa mai, josʼin tíjna, kʼoa tsa jmeni xi male sʼín jngo chjota (1 Sam. 16:7; Sant. 2:1-4). Je Jeobá alikui ʼya xi kʼoakuitsole josʼin kʼoa tsín ʼya xi kʼoanachale (2 Crón. 19:7). Kʼoa alikui tokui fini josʼe kon (Éx. 34:7). Alikui jao tjínná nga je Jeobá xi ngisasa nda male bʼéndajin jngo kjoa. Nʼio nda be xi tʼatsaan kʼoa josʼin tiyoaa (tʼexkiai Deuteronomio 32:4). *
11. Ánni nga tsín jme xi mangósonkaoni josʼin síchatʼaná Jeobá.
11 Je xi kiski Escrituras Hebreas koanjinle nga tsín jme xi mangósonkao josʼin síchatʼaná Jeobá. Tojo tso jngo xo̱n, sakʼoa kui kisichjén jngo én hebreo xi ñaki toje Niná nchja̱ni nga síchatʼale jngo chjota xi bajngijée. Xo̱n jebi itsosa: “Alikuikʼia nga kui nchja̱ni josʼin síchatʼale xínkjín jngo chjota” (Sinónimos del Antiguo Testamento, xi kisikʼatoya Santiago Escuain). Tojé Jeobá xi koa̱nle sichatʼale jngo chjota xi kʼoakjima kjoaixinile je jéele. Kʼoa jósatío tokoán nga síchatʼaná Jeobá.
12, 13. 1) Jósʼe kon jngo chjota xi síchatʼale Jeobá. 2) A totjíchoaa nichxin nga síchatʼaná je Jeobá.
12 Ñaki matja̱ná kʼianga makjainná nga jekisichatʼaná Jeobá. Nda satío tokoán kʼoa nda nikjaʼaitsjeen, tonga tokʼiakjoán kʼoasʼe̱ tokoán nga je Jeobá sichatʼaná (Hech. 3:19). Kʼianga síchatʼaná Niná koaan miyo sʼin cho̱bá ijngokʼá xi kao je. Kui xi tsonile nga tondiaa síchajin kʼianga bijnyijée.
13 Nga jesíchatʼale Jeobá jngo chjota likui tijme kjoañʼai tsjoánile kʼoa alikui tijo tsonile (Is. 43:25; Jer. 31:34). Je Jeobá kʼoakji kjin síkʼéjna je jée xi bijnyaa “jokji kjin tíjnale jña bitjoni tsʼuí kao jña kantjaini” (Sal. 103:12). * Bʼailee kjoanda je Jeobá kʼoa ʼyaxkónñá kʼianga síchatʼaná (Sal. 130:4). ʼYáni xi síchatʼale Jeobá.
ʼYÁNI XI SÍCHATʼALE JEOBÁ
14. Jméni xi kjimajinná tʼatsʼe josʼin síchatʼa Jeobá.
14 Tojosʼin tiʼyaa, kʼianga síchatʼaná je Jeobá alikui kui fini jokji ai jée bijnyaa. Xi ijngosani, jé Jeobá xi ngisasa nda be tsa sichatʼale jngo chjota kʼoa tsa mai, nga̱ jé kisindaná, jé xi Juez sʼin tíjnaná kʼoa jé tsjoáná kjoatéxoma. Jméni xi kuenta sʼín je Jeobá kʼianga síchatʼa.
15. Tojo tso Lucas 12:47, 48, jméni xi kuenta sʼín je Jeobá tsa sichatʼaná kʼoa tsa mai.
15 Je xi kuenta sʼín Jeobá kui tsa be xi tíbajngijée nga chʼao tísʼín. Kʼoakitso je Jesús tojosʼin faʼaitʼa ya Lucas 12:47, 48 * (tʼexkiai). Kʼianga toxá sʼínni jngo chjota nga kui kʼoasʼín xi chʼaotjín xi tsín sasénle Niná, ai jée bajngi. Tsakui nichxin tsín sichatʼale Jeobá (Mar. 3:29; Juan 9:41). Kʼoa sakʼoa skanni ʼyaa nga chʼao kanʼia. Tsa kʼoalani, je Jeobá tíjnandaa nga sichatʼaná. Kataʼyalasa jmeni xi kʼoati kuenta sʼín je Jeobá.
Koaan kʼoéjngoaa tokoán nga sichatʼaná je Jeobá tsa kʼoakoa̱n kjoaixininá je jéená (Chótsenlai párrafo 16, 17)
16. Jmé xi tsoyanile nga kʼoamaniná je jéená, kʼoa ánni nga nʼio tjínnile kjoandosin nga kʼoasʼiaan.
16 Je xi kʼoati kuenta sʼín je Jeobá kui tsa kʼoakjima kjoaixinile jngo chjota xi kabajngijée. Jmé xi tsoyanile nga kʼoamaniná jmeni xi nʼia. Kui tsoyanile nga nikʼantjaiyaa jonʼia kʼoa jokjoaan. Kʼianga kʼoamanile nga bajngijée jngo chjota alikui nda sʼe kon kʼoa ba sʼele xi totʼatsʼe nga chʼao kisʼin kʼoa tsakuije̱ nga tsínkui kʼoakisʼin xi ndatjín xi tjínnele sʼin tsakai. Ali tsa tokuijin nga tsín nda sʼeni kon nga chʼao kisʼin, kuinga majinle nga tobijbi kisikjinle Niná nga kʼoakisʼinni. Si̱kjaʼaitsjenjinla ijngokʼá tʼatsʼe rey Manasés kao tʼatsʼe rey David. Ningalani ai jée tsakajngi nga jao kisichatʼale Jeobá nga̱ kʼoakoan kjoaixinile je jéele (1 Rey. 14:8). Je Jeobá síchatʼale jngo chjota tsa tíbakó nga kʼoakjima kjoaixinile je jéele. Ali tsa tokuijin nga ba sʼe̱ kon jngo chjota nga kabajngijée. Machjén nga ñaki koako nga kʼoama kjoaixinile. * Kataʼyala jmeni xi kʼoati kuenta sʼín je Jeobá.
17. Jmé xi tsoyanile nga nikʼantjaiyaa yaoná, kʼoa jósʼin basenkaoná nga tsín tikui kʼoanʼiañá je jée xi tsakijnyaa (Isaías 55:7).
17 Kʼoati kuenta sʼín je Jeobá kʼianga nikʼantjaiyaa yaoná. Kʼianga nikʼantjaiyaa yaoná alikui tikui xi chʼaotjín kʼoanʼiañá kʼoa kʼoasʼin mangínkoaa yaoná josʼin mele je Jeobá (tʼexkiai Isaías 55:7). * Kʼianga sikʼantjaiya yaole jngo chjota tjínnele sikʼantjaiya josʼin síkjaʼaitsjen, ánni nga kui kjoafaʼaitsjenle Jeobá koandiaanile (Rom. 12:2; Efes. 4:23). Tjínnele ñaki kʼoakʼoe kon nga mele sindaya yaole, nga tsín tikui xi chʼaotjín sikjaʼaitsjenni kʼoa nga tsín tikui kʼoasʼinni (Col. 3:7-10). Nga makjainná nga je Jesús tsakʼéchjíntjainá síchatʼaná je Jeobá kʼoa sítsjee je jéená. Kʼianga be Jeobá nga kʼoatinʼia jokji tjen kʼoakjimaná nga nda timangínkoaa yaoná síchatʼaná nga̱ kui kuenta sʼín nga tsakʼéchjíntjainá je Jesús (1 Juan 1:7).
TʼEJNGUI TOKUIN NGA SICHATʼALI JEOBÁ
18. Jméni xi kamajinná tʼatsʼe josʼin síchatʼaná je Jeobá.
18 Si̱kjaʼaitsjenjinla ijngokʼá jmeni xi nʼio chjíle kaʼyaa i̱ kjoaʼmiya jebi. Niʼyajinla xi mangóson josʼin síchatʼaná je Jeobá. Xi títjon, tíjnandaa nga síchatʼaná. Xi majaoni, nʼio nda bexkonná kʼoa jé xi ngisa nda be tsa kʼoakjima kjoaixininá je jéená. Kʼoa xi majanni, tondiaa síchajin je jéená. Kʼianga kʼoasʼin síchatʼaná je Jeobá nda se tokoán kʼoa nda biyoaa ngixko̱n.
19. Ánni nga tsjoa kʼoésíñá tokoán ningalani sakʼoa chʼao sʼiaan xi totʼatsʼe nga chjotajée maa.
19 Nga chjotajée maa sakʼoajin kuijnyíjée. Tonga tsjoánganʼioná jmeni xi tso je libro Perspicacia para comprender las Escrituras, volumen 1, página 209. Itso: “Je Jeobá tjínle kjoamatokon kʼoa be nga chjotajée ma je choʼndale. Kuinga tsín tjínnenile nga ñaki to ba sa̱tíoʼndeni kon xi totʼatsʼe nga chjotajée ma kʼoa nga sakʼoa sokójéele (Sl 103:8-14; 130:3). Tsa kʼoasʼin koaikao yaole jotso je Niná jokji tjen kʼoakoa̱nle tsjoa sa̱tío kon (Flp 4:4-6; 1Jn 3:19-22)”. Nʼio tsjoánganʼioná én jebi.
20. Jmé xi chótʼayajiaan ya kjoaʼmiya xi ijngo.
20 Bʼailee kjoanda Jeobá nga síchatʼaná kʼianga kʼoama kjoaixininá je jéená. Jósʼin koa̱n chjénngilee je Jeobá. Jméni xi mangóson kʼoa jméni xi tsín mangóson josʼin síchatʼaná je Jeobá kʼoa josʼin nichatʼalee xíngiaa. Ánni nga nʼio chjínile nga koa̱njinná jebi. Yaa kjoaʼmiya xi ijngo chótʼayajiaan xi tʼatsʼe jebi.
KJOAJNDA 45 “Jme xi síkjaʼaitsjenjin ni̱ma̱na”
^ Je Biblia kʼoatso nga síchatʼale Jeobá je xi kʼoama kjoaixinile je jéele. Ninga kʼoalani, tsakui nichxin kʼoasʼin si̱kjaʼaitsjeen nga tsín bakinná nga sichatʼaná. I̱ kjoaʼmiya jebi kui chótʼayajiaan ánni nga kʼoéjngosíñá tokoán nga sichatʼaná je Jeobá tsa kʼoakoa̱n kjoaixininá je jéená.
^ Salmo 103:13, 14: “Josʼín jngo nʼai nga bakóle kjoamatokon je xtile, je Jeobá kʼoasʼin bakóle kjoamatokon je xi tsokjónke. 14 Nga̱ nʼio nda be josʼin koanndaa, faʼaitsjenle nga to chaoñá”.
^ Deuteronomio 32:4: “Je Na̱xi̱, ñaki nda tíjna je xále, nga̱ ñaki kixi je ndiaale. Niná xi tsín bʼéndiso, xi tsínle kjoatsʼen. Ñaki kixiní je”.
^ Chótʼai je libro Acerquémonos a Jehová, capítulo 26, párrafo 9.
^ Lucas 12:47, 48: “Nʼio koaale je choʼnda xi tsabe josʼin koanmele naile, kʼoa likui tsakʼejnanda, nikʼoajin kisʼin josʼin nga mele. 48 Tonga je xi likui tsabe, kʼoa xi kʼoakisʼin kjoa xi bakinle nga koaale, koaachoale. Toʼyani xi tse kitsʼaile, tse si̱jé ngijngokʼale. Kʼoa je xi tse kitsʼaile nga sikuinda, ngisa tse si̱jésonle”.
^ JÓSʼIN TSOYANILE: Kʼianga kʼoamaniná je jéená nikʼantjaiyañá yaoná jokjoaan kʼoa chʼao sʼe tokoán tʼatsʼe jmeni xi kinʼia, majinná nga tsín nda kinʼia kʼoa tsakuije̱ nga tsín kui kʼoakinʼia xi ndatjín. Kʼianga kʼoamaniná je jéená nikʼantjaiyañá josʼin mangínkoaa yaoná.
^ Isaías 55:7: “Katasíkʼéjna je ndiaale chjotatsʼen kao je chjota xi chʼao tjío kjoafaʼaitsjenle, kʼoa katanroanrʼoeni Jeobá, nga̱ koakóle kjoamatokon, kʼoa katanroanrʼoeni Nináná nga̱ nʼio male síchatʼa”.
