KJOAʼMIYA XI CHOTʼAYA 27
“Je Jeobá tinʼiotʼai”
“Je Jeobá tinʼiotʼai; nʼiojin katamai, kʼoa nʼiojin katama ni̱ma̱li” (SAL. 27:14).
KJOAJNDA 128 Katakaná saʼnda nga kjoetʼa
XI TÍNCHJA̱NI *
1. 1) Jmé kjoachoya xi tsjoáná Jeobá. 2) Jmé xi tsoyanile nga je Jeobá ninʼiotʼaa (chótsenlai nota).
NGATSʼIAA xi tsjoachaa Jeobá kʼoatsoná nga jeme kjoaʼaxin je chʼin, kjoaba kao kjoabiya (Apoc. 21:3, 4). Kʼianga je Jeobá ninʼiotʼaa koasenkaoná nga ʼndenaxó si̱koaa Sonʼnde (Sal. 37:9-11). Kuinyakaoná ngatsʼiaa nga ngisasa miyoná koa̱nni kʼoa ngisasa ndasʼin kuiyoaa ngixko̱n. Nʼio tse kjoanda sʼe̱ná nga kʼia. Alikui jao tjín tokoán nga kuitjoson jmeni xi tso Niná, nga̱ sítjoson ngantsjai jmeni xi tso, kuinga je ninʼiotʼañá (Sal. 27:14). * Kʼoasʼin bakoñá nga je ninʼiotʼaa kʼianga tsejta maa kʼoa nga kao kjoatsjoa choyalee nga sitjoson jmeni xi tso (Is. 55:10, 11).
2. Jméni xi jetísʼín Jeobá.
2 Jesa tsakakó Jeobá nga sítjoson jmeni xi tso. Jngola choa̱ kataʼyaa. Ya libro xi tsʼe Apocalipsis kʼoatso nga je Jeobá kʼoexkó je chjota xi xinxin naxinandále, xi xinxin tsʼe kʼoa xi kjaʼaí kjaʼaí én male nga kʼoasʼin skoe̱xkón josʼin mele. Jé xi chjotankjín ʼmile nichxin xi tiyoaa ndʼaibi (Apoc. 7:9, 10). Ngatsʼi xi xʼin, xi yánchjín, xi ʼndíxti, xi kjaʼaí kjaʼaísʼin tsen yaole, xi kjaʼaí kjaʼaí én male, xi xinxin tsʼe jtín tjío ngatsʼi jngo tjíjtsa Sonʼnde kʼoa nda fikao xínkjín (Sal. 133:1; Juan 10:16). Kao kjoatsjoa tsoyason kʼoa tjíondaa nga tsoyale je xi mele kjuinrʼoé tʼatsʼe jokoa̱nchon nichxin xi sʼa nroa (Mat. 28:19, 20; Apoc. 14:6, 7; 22:17). Tsa ya tijnajinlai chjotankjín jebi nʼiojin chjí ʼyatokuin je kjoachoya xi tsjoáná Niná.
3. Jméni xi mele je Na̱i.
3 Je Na̱i tsín mele nga sʼe̱ná kjoachoya. Kui xi mele nga kʼoasʼin si̱kjaʼaitsjeen nga tsín mandosinle Jeobá xi tʼatsaan kʼoa nga tsín sitjoson jmeni xi tso. Tsínjin tinʼiojin koa̱nñá tsa tsín tisʼe̱niná kjoachoya kʼoa tsakui nichxin tsín tije Jeobá si̱xánilee. Kui xi mele je Na̱i nga kʼoakatamaa. Tojosʼin jchaa, je Na̱i kui xi koanmele nga tsín tijme kjoachoya katasʼenile je Job ánni nga tsín tije Jeobá skoe̱xkónni.
4. Jmé xi chótʼayajiaan i̱ kjoaʼmiya jebi (Job 1:9-12).
4 I̱ kjoaʼmiya jebi kui chótʼayajiaan jmeni xi kisʼin je Na̱i kʼianga koanmele nga tsín tikixi katafitʼanile Niná je Job (tʼexkiai Job 1:9-12). * Kʼoati jchaa jmé xi bakóyaná choa̱le Job kʼoa ánni nga nʼio chjínile nga kuenta sʼiaan nga tsjoakená Jeobá kʼoa nga sitjoson jmeni xi tso.
JE NA̱I KUI XI KOANMELE NGA TSÍN TIJME KJOACHOYA KATASʼENILE JE JOB
5, 6. Jmé kjoa xi tosasa jaʼaineni je Job.
5 Je Job nda tsakʼejna kʼoa miyole Jeobá koan. Nkjínya koanni ya yaniʼyale, ndasʼin tsakatio kʼoa nyiná koan (Job 1:1-5). Tonga tojngo nichxin kisichani jmeni xi kisʼele. Kui títjon kisicha je tsojmi xi kisʼele (Job 1:13-17). Xijekoan, kʼieen ngatsʼi xtile. Si̱kjaʼaitsjenjinla tsa ñálani xokjimatʼeen. Nʼio aon satío kon je xi xijchá ma kʼianga jngo ʼndíle biya. Si̱kjaʼaitsjenjinla jokji aon koanle kʼoa jokji ba kisatio kon je Job kao chjoónle kʼianga kisʼejinle nga kʼien nga te xtile. Kuinga tsakasénjndani najñole je Job kʼoa tsakasenxkónyʼin. Kʼoasʼin tsakakóni nga nʼio ba tjín kon (Job 1:18-20).
6 Jé Na̱i xokisʼin nga chʼin kiskatʼale je Job, nga jtsé tsakajon kʼoa nga tsín tiʼya xi kuenta kisʼinni (Job 2:6-8; 7:5). Nʼio tsabexkón tsakai chjota je Job, saʼnda jé bichósíjéle kjoafaʼaitsjen tsakai (Job 31:18). Tonga nga chʼin kiskatʼale, kisikjin je chjota kʼoa tsín tiʼya xi kuenta kisʼinni. Tsín tikuenta kisʼinni je ndsʼe̱, miyole kao choʼndale (Job 19:13, 14, 16).
Nichxin xi tiyoaa ndʼaibi, nkjín ndsʼee xi majinle jokji kjoañʼai tsakjaʼá je Job (Chótsenlai párrafo 7) *
7. 1) Jósʼin kisikjaʼaitsjen je Job tʼatsʼe kjoañʼai xi tsakjaʼá, kʼoa jméni xi tsín kʼoakisʼin. 2) Jmé kjoa xi faʼatojin chjotale Cristo xi kʼoati mangóson jokoan je Job (chótsenlai sén xi tínchja̱ni ya párrafo 7).
7 Je Na̱i kui xi koanmele nga kʼoasʼin katasíkjaʼaitsjen je Job nga kuinga kjoañʼai tífaʼáni nga tsín tindasʼin tíjnani ngixko̱n Jeobá. Kuinga jngo ntjao̱nʼio kisikjaʼani je Na̱i nga chixojenne ndʼia je xi te xtile Job kʼianga tjíokjen (Job 1:18, 19). Kʼoati je xokisʼin nga lʼí kinroajenni ngʼajmi nga kisikjeson cho̱ntjele Job kao choʼndale (Job 1:16). Nga ya ngʼajmi kinroani je lʼí kʼoa nga ntjao̱ jaʼa, je Job kʼoasʼin kisikjaʼaitsjen nga je Jeobá xokisʼin, kʼoa kuinga kʼoasʼin kisikjaʼaitsjenni nga tsín tísasénle Jeobá jme xi tísʼín. Ninga kʼoalani, alikui Niná kinchja̱ʼaonle je Job. Tosaa kui kisikjaʼaitsjen nga tse kjoanda kitsjoale Jeobá jokjitse jetísíjchá yaole. Kʼoakitso nga kiskoé xi ndatjín xi tʼatsʼe Niná kʼoa nga kʼoati skoé xi chʼaotjín. Kuinga i̱ kitsoni: “Tosi tonda katabitjongʼa jaʼaínle Jeobá” (Job 1:20, 21; 2:10). Kixi kitʼale Jeobá je Job ninga tsín tijme xi kisʼenile, ninga chʼin kiskatʼale kʼoa ninga tsín tinda kisʼeni kon. Tonga alikui totsakʼéjngo kon je Na̱i.
8. Jmésani xi kisʼin je Na̱i kʼianga tsakʼetʼale je Job.
8 Ijngosa koya josʼin tsakʼetʼale Na̱i je Job. Jan chjota kisichjén xi kichokjákaonajmí je Job. Kui xi koanmele nga kʼoasʼin katasíkjaʼaitsjen nga tsín jme chjíle. Chjota jebi kʼoakitsole nga kuinga kjoañʼai tífaʼáni nga chʼao kisʼin (Job 22:5-9). Kʼoakitsole nga tsínkʼia sa̱sénle Niná ninga chʼao sʼin kʼoa ninga nʼio nda chjota koa̱n (Job 4:18; 22:2, 3; 25:4). Kui xi koanmele nga to jao sʼe̱ kon je Job tsa tsjoake Niná, tsa sikuinda kʼoa tsa toxitsjoani nga je tísíxále. Nga kʼoakitsole chjota jebi, tsakui nichxin kʼoasʼin kisikjaʼaitsjen je Job nga tsín tinda kʼoéjnani.
9. Ánni nga nʼiojin koanni je Job kʼoa tsín kisikinroajenni kon.
9 Si̱kjaʼaitsjenjinla jokoan je Job, nga chaolʼí tsakʼejnajin kʼoa nga nichxin kao nitje̱n jaʼá kjoañʼai (Job 2:8). Kʼoa je miyole tosi tonda chʼao kitsole nga̱ kui xi koanmele nga chʼaosʼin kʼoaxki̱ je Job. Nʼio ba kisʼe kon nga kui kjoa jaʼatojin kʼoa nʼio aon koanle nga kisicha je xtile. Nga títjon tojyó tsakʼejna ninga jotsakʼinle (Job 2:13-3:1). Tsakui nichxin kʼoasʼin kisikjaʼaitsjen je miyole nga kuinga jyó tíjnani je Job nga yátsʼi̱n koasenle Niná, tonga je Job alikui kʼoakisʼin. Tsakui nichxin kiskotsenʼa je miyole kʼianga i̱ kitsole: “Saʼnda nga an xi kuiyá, kixi koa̱n” (Job 27:5). Ánni nga nʼiojin koanni je Job kʼoa nga tsín kisikinroajenni kon ninga kui kjoa jaʼatojin. Ningalani kui kjoa jaʼatojin tsínkʼia kisichajin nga koasenkao Niná nga̱ be nga tsjoake. Kʼoa be nga sikjaʼáyanile Jeobá ningalani kuiyá (Job 14:13-15).
JÓSʼIN KJUINTJENNGIAA JE CHOA̱LE JOB
10. Jmé xi bakóyaná jokoan je Job.
10 Jokoan je Job kui bakóyaná nga tsín koa̱nle kʼoenená je Na̱i nga yándsʼiaan koasenlee Jeobá kʼoa nga kuenta sʼín Jeobá ngayeje kjoa xi bitjatojiaan. Jokoan je Job tsesa xi bakóyaná. Kataʼyala.
11. Jméni xi tsín jao kʼoé tokoán tsa je Jeobá si̱nʼiotʼaa ngantsjai (Santiago 4:7).
11 Je Job tsakakó nga chókjoajinná tojme kjoa xi kuitjátojiaan tsa je Jeobá si̱nʼiotʼaa ngantsjai kʼoa kʼoasʼin kuiyotajanilee je Na̱i. Jósʼin kuichomani tsa kʼoasʼian. Je Biblia kʼoatso nga koase̱nxin je Na̱i (tʼexkiai Santiago 4:7). *
12. Jósʼin tsakasenkao Job nga koankjainle nga kjoaʼáyanile.
12 Kʼoéjngoaa tokoán nga kjoaʼáyaniná kʼiatsa kuiyá. Tojosʼin tsaʼyaa ya kjoaʼmiya xi jaʼato, je Na̱i kui xi mele nga kuinókjonlee je kjoabiya ánni nga tsín tikixi kjuintʼanilee Jeobá. Je Na̱i kʼoakitso nga kʼoasʼin je Job tojmeni tojoni nga tsín kuiyá, ninga tsín tije Jeobá sixánile. Tonga alikui kʼoakisʼin je Job, ninga nʼio tse kjoa jaʼatojin kʼoa ninga kʼia nga kʼoasʼin kisikjaʼaitsjen nga to jekuiyá alikui yátsʼi̱n tsakasénle Jeobá. Je Job kichokjoajinle ngayeje kjoa xi jaʼatojin nga̱ be nga nʼio nda chjota je Jeobá kʼoa koankjainle nga kuichoka nichxin nga kʼoendajin kjoa. Ningalani tsín kʼia koasenkao Niná nga sʼasa tíjnakon koankjainle nga kjoaʼaí jngo nichxin nga sikjaʼáyanile Jeobá. Je Job ñaki kʼoatsakʼé kon nga kjoaʼáyanile kʼiatsa kuiyá. Tsa kʼoati tjínjngo tokoán tsanda ñá nga kjoaʼáyaniná, kixi kjuintʼalee je Niná ningalani kʼoakuitsoná je chjota nga sikʼienná.
13. Ánni machjénni nga kuenta sʼiaan josʼin tsakʼetʼale Na̱i je Job.
13 Machjén nga kuenta sʼiaan jokisʼin je Na̱i nga tsakʼetʼale je Job, nga̱ kʼoati sʼín ndʼaibi nga bʼetʼaná. Kataʼyala jmeni xi kitsoná ngatsʼiaa je Na̱i, ali tsa tojejin Job xi kʼoakitsole. I kitso: “Je chjota tsjoántjai tojmeni xi tjínle xi totʼatsʼe kjoabijnachonle” (Job 2:4, 5). Je Na̱i kʼoakitso nga tsín ñaki kʼoatjín tokoán nga tsjoachaa je Jeobá, kʼoa nga yándsʼiaan koasenlee tsa jexkón tiyoaa. Kʼoati tso nga tsín tsjoakená je Jeobá kʼoa nga tsínkʼia chjí be tojmeni xi nʼia nga nixálee. Tonga nga je Jeobá ninʼiotʼaa alikui je Na̱i kʼoanachaná nga̱ jeʼyaa kjoamañale.
14. Jósʼin basenkaoná kʼianga kjoa bitjatojiaan.
14 Kʼianga kjoa bitjatojiaan yaa ʼyañá jñasani machjén nga si̱ndayaa yaoná. Kʼianga kjoa jaʼatojin je Job kʼiaa tsabe jñasani machjén nga sindaya yaole. Tobʼelañá, nga ngisa nangitokon koa̱n (Job 42:3). Kʼianga kjoa bitjatojiaan kʼoati ʼyaa yaoná jokjoaan. Kʼoakoan je Nikolái, * ndoyá kichaní ningalani nʼio tímʼe. Itso: “Kʼianga ndoyá tsakatejnaʼya tsakasenkaona nga tsaʼbe jñasani machjén nga sindaya yaona”. Kʼianga ʼyaa jebi jenikjaʼaitsjenjiaan jósʼiaan nga si̱ndayaa yaoná.
15. ʼYáni xi kuinóʼyalee kʼoa ánni.
15 Jé Jeobá xi tjínnele kuinóʼyalee, alikui je kontraná kuinóʼyalee. Je Job nda tsakasénño kʼianga tsakjákaonajmí je Jeobá. Kʼianga katamajinle Job, je Jeobá i̱jin kitsole: “ʼYaní jokji nganʼio tjínna nga kisinda ngayeje jmeni xi tjín, kuenta tisʼian ngayeje jmeni xi kjimali, a tsí koa̱nna nga sikuindale”. Nangitokon koan je Job kʼoa kitsjoale kjoanda Jeobá. I kitso: “Tokinrʼoeña xi tʼatsi, tonga ndʼaibi ñaki tiʼbenile kao xkoan” (Job 42:5). Kʼianga kʼoakitso je Job tsakui nichxin tojo ya tíjnajin chaolʼí, tojo jtsé yajon kʼoa tíkjiʼndá nga kʼien xtile. Kʼianga kui kjoa tíjnajin, je Jeobá kʼoakitsole nga tsjoake kʼoa nga sasénle jmeni xi tísʼín je Job (Job 42:7, 8).
16. Tojo tso Isaías 49:15, 16, jméni xi kuenta sʼiaan kʼianga kjoa bitjatojiaan.
16 Tsakui nichxin tokuitso tomaniná chjota nichxin xi tiyoaa ndʼaibi kʼoa tsín chjí skoe̱ná. Tsakui nichxin kui xi mele nga chʼaosʼin sikatíoná, tsa chʼaosʼin sikʼaxki̱ naxinandále Niná kʼoa tsa énndiso koanená (Mat. 5:11). Jmeni xi bʼéyanajmíná Biblia xi tʼatsʼe Job kui bakóyaná nga be je Jeobá nga koa̱n kixi kjuintʼalee kʼianga kjoa bitjatojiaan. Je Jeobá tsjoakená kʼoa tsínkʼia sichajin xi je sínʼiotʼa (tʼexkiai Isaías 49:15, 16). * Alikui kui si̱sʼiaan je énndiso xi kaníbason je kontrale Niná. Kataʼyala jotso je James, jngo ndsʼee xi Turquía tsʼe xi nʼio tse kjoa tjíofaʼatojin je kao familiale. Itso: “Koanjinnajin nga kjuinroajen tokuinjin tsakui kuenta sʼiainjin je énndiso xi kaníbason chjota xi tʼatsʼe naxinandále Niná. Tosaa kui kuenta kinʼiaijin je kjoanichikontʼain xi kjoaʼaíkao Chjotaxále Niná kʼoa tosi tonda je Jeobá kinixálaijin kʼoa tsjoa kisatio tokuinjin”. Kjuintjenngiaa choa̱le Job kʼoa kuinóʼyalee Jeobá. Je kontrale Niná kui xi mele nga tsín tijme kjoachoya katasʼeniná, tonga alikui kʼoaiʼndee nga kʼoakatama.
JE KJOACHOYA XI TJÍNNÁ KOASENKAONÁ NGA SKA̱NÁ
Tsee kjoanda kisokole je Job nga kixi kitʼale Niná. Jé Jeobá xokisʼin nga nda tsakʼejna je Job kao chjoónle kʼoa nga tsjoa kisatio kon (Chótsenlai párrafo 17) *
17. Jmé xi bakóyaná je choʼndale Niná xi kixi kitʼale xi bʼaxki̱ ya Hebreos capítulo 11.
17 Joni je Job kʼoati nkjínsa choʼndale Niná xi kichokjoajinle kʼianga kjoa jaʼatojin. Kʼianga kiskile Pablo je chjota hebreo xi chjotale Cristo ma nkjín choʼndale Niná kisikʼaxki̱, kʼoa i kitso: “Ali tokʼoa kji nkjín chjota testigo xi tjíondai jngotjondainá” (Heb. 12:1). Ningalani nʼio tse kjoa jaʼatojin ngatsʼi kixi kitʼale je Jeobá (Heb. 11:36-40). Alikui toxitsjoa nga nʼio tsakʼénele yaole kʼoa nga kichokjoajinle kjoa xi jaʼatojin. Koankjainle jmeni xi tongini kitso Niná ningalani tsín tsabe josʼin kitjoson. Kʼoa nga tsín jao kisatio kon nga nda tsakatio ngixko̱n Niná, kʼoati tsín jao kisatio kon nga skoe̱ josʼin kuitjoson jmeni xi kitso Niná (Heb. 11:4, 5). Kʼianga nikjaʼaitsjenjiaan je choa̱le choʼndale Niná xi tsakatio nichxin kjoatse basenkaoná nga kʼoati je Jeobá ninʼiotʼaa.
18. Jméni xi sʼiaan ninga tojme kjoa xi kuitjátojiaan nichxin xi sʼa nroa (Hebreos 11:6).
18 Sa chʼao sa chao kjimachon nichxin xi tiyoaa ndʼaibi (2 Tim. 3:13). Kʼoa je Na̱i tosi tonda tíkotʼayakao je choʼndale Niná. Tojme kjoa xi kuitjátojiaan nichxin xi sʼa nroa tosi tonda je Jeobá si̱xálee, nga̱ jé tininʼiotʼaa je “Niná xi tíjnakon” (1 Tim. 4:10). Josʼin tsakʼejna je Job nga jekoanni kui bakóná nga nʼio nda chjota je Jeobá kʼoa nga tjínle kjoamatokon (Sant. 5:11). Tojo kisʼin je Job kʼoati kixi kjuintʼalee ngantsjai je Jeobá, kʼoa kʼoéjngoaa tokoán nga tsjoále “chjíle je chjota xi nʼio básjai nga je” (tʼexkiai Hebreos 11:6). *
KJOAJNDA 150 Jé Jeobá kʼoasjentjaili
^ Jé Job faʼaitsjenná kʼianga je nikjaʼaitsjeen jngo chjota xi nʼio tse kjoa jaʼatojin. Jmé xi bakóyaná jokji kjoa jaʼatojin choʼndale Niná jebi. Je Job kixi kitʼale Niná, kʼoa kui bakóyaná nga tsín koa̱nle Na̱i kjoanʼio kʼoenená nga yándsʼiaan koasenlee Jeobá. Kʼoati bakóyaná nga kuenta sʼín Jeobá ngayeje kjoa xi bitjatojiaan kʼoa nga kuicho nichxin nga kjoaʼaxin ngayeje kjoa jebi tojo kisikao je Job. Tsa koakoá nga makjainná jotso je Jeobá, kʼoasʼin koakoñá nga je tininʼiotʼaa.
^ JÓSʼIN TSOYANILE: Kʼianga én hebreo, je én xi “tinʼiotʼai” sʼin faʼatoya kui tsoyanile jmeni xi nʼio choyalee. Kʼoati kui nchja̱ni nga ʼya xi ninʼiotʼaa (Sal. 25:2, 3; 62:5).
^ Job 1:9-12: “Kʼoa je Satanás i kitsole Jeobá: A toxkia tíbexkón Niná je Job. 10 A tsí tsa ji tinikuindai jngotjondaile kʼoa jngotjondaile niʼyale kʼoa jngotjondaile ngayeje xi tjínle. Ngayeje jme xi sʼín nichikontʼainní, kʼoa kjimankjínya je cho̱ntjele ngakjijnda. 11 Tonga, chja̱ʼalalai ngayeje jme xi tjínle, a tsílaxó ñaki ngixkuin kuinchja̱ʼaonli. 12 Kʼoa je Jeobá i kitsole Satanás: Ngayeje xi tjínle, ji xi ʼyani jonikoai. Tonga je alijojin nikoai. Kʼoa je Satanás kitjoo ngixko̱n Jeobá”.
^ Santiago 4:7: “Titjosonlao Niná. Tiyotajalao je na̱i, kʼoasʼin koa̱nga tʼaxinnino”.
^ Alikui tsa ñaki kʼoaʼmi kʼa chjota xi bʼaxki̱ i̱bi.
^ Isaías 49:15, 16: “A sichajin jngo chjoón je ʼndíleele axo tsín koa̱nmake je ʼndí xi kʼoasʼin tsakʼa. Ninga kʼoasʼin yánchjín jebi, xi an nikʼiajinla sichajinle. 16 Yaa tjítʼa jaʼaínli ya yandsa̱. Kuenta sʼian ngantsjai je xjáoli”.
^ Hebreos 11:6: “Tsa tsín makjainná, likui nda sʼekon Niná xi tʼatsaan. Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je”.
