JNGO tichjaa xi Lisa ʼmi * kʼoatso nga kui kjoanda xi tsakakó je ndsʼee xi nʼio tsakasenkao nga tosʼa kiskotʼaya je Énle Niná. Kʼoati tso je Anne, itso: “Kʼianga tsakjákaonajmína je testigole Jeobá, ngisaa kui koanndosinna nga nda chjota tikʼoajinni jmeni xi bakóya”. Ningalani tsjoa tjío kon je tichjaa nga bʼéxkia je Biblia kʼoa nga síkjaʼaitsjenjin jmeni xi tso, je xi kʼoati tsakinyakao kuinga tsakakóle kjoanda je ndsʼee.

Jósʼin koakoá kjoanda nga nda sa̱tío kon xi kjaʼaí. Jaola koya si̱kʼaxkiaa: kao jmeni xi bixoán kʼoa kao jmeni xi nʼia. Xijekoa̱n, kui chótʼayajiaan ʼyáni xi koakolee kjoanda kʼoa xi nda si̱koaa.

Ya capítulo 31 xi tsʼe Proverbios yaa síkʼaxki̱ jngo chjoón xi nʼio nda síxá kʼoa kʼoatso nga ya “ni̱je̱n kjoatéxoma xi tsʼe kjoatsjoacha tíjnason” (Prov. 31:26). Bakó kjoanda josʼin nchja̱ kʼoa kao jmeni xi tso. Machjén nga kʼoati sʼin je xi xijchá ma nga koako kjoanda nga kuinchja̱. Be nga sikiʼaon je ʼndíxtile kʼoa nga tsín kjuinrʼoé tsa toxkia kjoakao kʼoa tsa tokuinchja̱tikao. Tsa ngasin nganda kjoakao kʼoa koakole kjoatsjoacha kjuinrʼoéjin je ʼndíxtile kʼoa sitjosonjin jmeni xi kuitsole.

Ni xijchá maa kʼoa ni mai, jméni xi sʼiaan nga koakoá kjoanda nga nokjoaa. Itso nga fitsʼiani Proverbios 31:26: “Nga nchja̱ kjoachjine bitjoni tsʼoa”. Jebi kui bakóyaná nga nda si̱kjaʼaitsjeen jmeni xi kuixoán kʼoa josʼin kuinókjoaa. Kʼianga jtiná ndatjín nga si̱kjaʼaitsjenjiaan jebi: “Jmeni xi xián, a ngisaa sijtile xi kjuinrʼoéna axo nda sʼe̱ kon” (Prov. 15:1). Machjén nga títjonkjoanla si̱kjaʼaitsjeen nga kjesa nokjoajián.

Ijngosa Proverbio xi i̱ tso: “Je énle chjota xi tsín síkjaʼaitsjen yaa mangóson joni tsa ki̱cha̱ tíbʼésʼenjin yaoná” (Prov. 12:18). Ngisajin chósonnilee jotso én xi kuinókjoaa tsa kuenta sʼiaan nga sikiʼaon xi ngikʼa jmeni xi kuixoán. Kʼianga bakoá kjoanda alikui toxkia nokjoaa kʼoa alikui én xi síkiʼaon xi ngikʼa kʼoabixoán (Efes. 4:31, 32). ʼNdele nga tsín nda tso xi si̱kjaʼaitsjeen kʼoa tsakui én kuinókjoaa xi tsín kuinyakao xi ngikʼa, tosaa kui nikjaʼaitsjeen xi ndatjín kʼoa kui én xi nda tso nokjoaa. Je Jeobá nʼio nda choa̱ bʼéjnaná. Kʼianga nʼio títsokjón je Elías, jngoo ánkje kisikasén Jeobá xi kitsjoanganʼiole kʼoa ngasin nganda tsakjákaonajmí (1 Rey. 19:12). Tonga ali tsa tokʼiajin koakoá kjoanda nga kuinókjoaa. Kʼoati machjén nga koakoá kjoanda kao jmeni xi sʼiaan. Kataʼyala.

Kʼianga chjénngilee Jeobá machjén nga ngasin nganda kuinókjoaa kʼoa nga nda chjota katamaa (Efes. 4:32; 5:1, 2). Je Lisa xi jekabʼaxki̱ ya párrafo 1 kʼoatso josʼin kisakole kjoanda. Itso: “Kʼianga tokjitʼanangi xin tsangínkiyuijin, jao ndsʼee kao yánchjínle kisijékjoaa jñani síxá nga tsakinyakaonajin nga tsakʼexkuíjin je tsojminajin. Nga kui nichxin kjesa kotʼayajian je Énle Niná”. Nga kʼoasʼin tsakinyakao je  ndsʼee, je Lisa koanndosinle xi tʼatsʼe Niná.

Kʼoa je Anne xi kʼoati jekabʼaxki̱ ya párrafo 1, kʼoati kuenta kisʼin josʼin kisakole kjoanda, itso: “Nga sa chʼao sa chʼao kjimachon alikui timakjainnina jmeni xi tso je chjota”. Itsosa: “Kʼianga tsaʼbexkoan je testigole Jeobá to jao kisʼena ánni nga nʼio mandosinnile xi tʼatsʼan. Tonga koankjainna jmeni xi kitsona je xi kitsoyana Biblia, nga̱ tsaʼbeña nga tsín toxokʼoatso”. Kʼoa jósʼin tsakasenkao jebi je Anne. Itso: “Nga jekoanni, ngisaa kui kuenta kisʼian xi tísakóyana”.

Je xi tsakinyakao nga jao tichjaa jebi kuinga tsakakó kjoanda kʼoa nga nda chjota je ndsʼee xi kitsoyale kʼoa kuinga koanmenile nga tsabesa xi tʼatsʼe Niná. Je xi nʼio tsakinyakao kuinga tsakakó kjoanda kʼoa nga nda chjota je ndsʼee xi tjío ya jinjtín.

Tjínkʼa xi nʼio nda chjota kʼoa xi totjíobijno nga̱ toxá kʼoakjoanni kʼoa kʼoasʼin  ngale chjota ya jñani tsʼe. Ndatjín nga kʼoanʼia. Tonga tsa tokui nga jekʼoasʼin nganá nga kʼoanʼiañá alikuijin ñaki kui tibakoá je kjoanda josʼin mele Niná (tingósonkoai Hechos 28:2).

Nga ñaki kʼoatjín tokoán nga bakoá kjoanda kʼoa nga nda chjota maa yaa nroani je kjoanda xi tsjoájin ni̱ma̱ná je nganʼiotsjele Niná (Gál. 5:22, 23). Kʼianga koakoá kjoanda kʼoa nda chjota koaan tojo sʼín je Jeobá kao Jesús machjén nga kui nganʼiotsjele Niná koandiaale je kjoafaʼaitsjenná kao jonʼia. Xi ijngosani, xi chjotale Cristo maa mandosinná xíngiaa nga̱ tsjoachañá Niná kʼoa tsjoachañá xíngiaa. Tsa ya kjuinroani nga koakoá kjoanda kʼoa nda chjota koaan nda sʼe kon Niná.

Bakolee kjoanda je xi nda síkaoná kʼoa xi ʼyaxkoaan (2 Sam. 2:6). Kʼoa bʼailee kjoanda kʼianga kʼoasʼín (Col. 3:15). Tonga jósi̱koaa je chjota xi kʼoasʼin nikjaʼaitsjeen nga tsín bakinle nga kjoanda koakolee.

Si̱kjaʼaitsjeen josʼín je Jeobá nga bakóle kjoanda ninga je xi tsín bakinle, je Jeobá nʼio tse kjoanda bakó tojo tso je Biblia. Ya Escrituras Griegas Cristianas nkjín kʼa faʼaitʼa je én xi kjoanda xi tsín bakinná tso. Jósʼin bakóná kjoanda jebi je Jeobá.

Si̱kjaʼaitsjenjiaan jotjín millón mani chjota xi bakóle kjoanda je Jeobá kʼoa xi tsjoále jme xi batiokonni (Mat. 5:45). Tokʼoa jebakóná kjoanda je Jeobá kʼianga kjesa ʼyajián jotjínni xi tʼatsʼe (Efes. 2:4, 5, 8). Tobʼelañá, kisikasén je ʼNdíle nga kʼienntjainá ngatsʼiaa xi chjota. Je pastro Pablo kʼoakitso nga tse kjoanda sʼe̱ná xi totʼatsʼe nga kʼienntjainá je Jesús, nga̱ nʼio tse kjoanda tjínle je Niná (Efes. 1:7). Ninga sokójéená kʼoa ninga tsín nda bʼe sakʼoa kon Jeobá tojo bándiaaná. Kʼianga bakóyaná kʼoa jotso én xi fákaoná yaa mangóson “joma jtsíxa̱” nga bʼa (Deut. 32:2). Alikui ñá kʼoakoa̱nná nga si̱jndangajaonilee jokji kjoanda bakóná je Niná. Kʼoa koaan sʼe̱ná kjoanichikontʼain nichxin xi nroa xi totʼatsʼe kjoandale Jeobá (tingósonkoai 1 Pedro 1:13).

Machriantʼalee Jeobá nga bakóná kjoanda kʼoa kʼoati mená kʼoasʼiaan tsanda ñá. Alikui tokʼa xi nda si̱koaa kʼoa xi koakolee kjoanda. Kʼoénelee yaoná nga nyaon nyaon nga koakolee kjoanda xíngiaa tojo síkaoná Jeobá (1 Tes. 5:15). Tsa koakoá kjoanda ngantsjai, yaa koa̱nngósoán joma je lʼí nga sísoná kʼianga nyʼán chon. Nda sa̱tío kon je xíngiaa, je ndsʼee xi tjío ya jinjtín, xi ñatjen nixá, xi ñatjen mangián skuela kao chjotandaindʼianá.

Koaan si̱kjaʼaitsjeen je xíngiaa kao je ndsʼee xi tjío ya jinjtín xi machjénle nga koakolee kjoanda kʼoa nga nda tso én chja̱koaa. Tsakui nichxin jngo ndsʼee xi nganʼio machjénle nga si̱ndachoaan ya ndʼiale, nga si̱xándee ya ndʼiale, tsa tjín xi kjuinkindálee kʼoa tsa josasʼin kuisenkoaa. Kʼoati koa̱n kuisenkoaa je chjota kʼianga ʼmiyasoán.

Chjénngilee je Jeobá, kʼoa koakoá kjoanda jmeni x nʼia kʼoa jmeni xi bixoán.