KJOAʼMIYA XI CHOTʼAYA 26
Nga tsjoakená Jeobá basenkaoná nga tsín nokjoaan
“Je Jeobá yaa tíjnakaona, alikui tsokjoan” (SAL. 118:6).
KJOAJNDA 105 “Jé Niná xi kjoatjaocha”
XI TÍNCHJA̱NI *
1. Jméni xi sakʼoa kuinókjonlee.
KATAʼYALA kʼa choa̱. Je Néstor kao María, xi chjoónle ma yaa koanmele kitsjoánganʼio jñani ngisa machjén xi tsoyason kʼoa tjínnele nga ngisa choa tao̱n sikjeya. * Tonga koankjáojinle, kʼoasʼin kisikjaʼaitsjen nga tsín tsjoa sa̱tío kon tsa tochoa tsojmi sʼe̱le kʼoa tsa tochoa tao̱n sʼe̱le. Kataʼyala xi tʼatsʼe ndsʼee Biniam, xi ya tsʼe jñani tsín sasénle chjota nga Énle Niná sakóyason. Nga testigole Jeobá koan koanjinle nga chjota koaitjenngike. Ningalani kitsokjon, ngisaa kui kisikjáojin jókuitso xínkjín nga kjaʼaí religión tíjnajin. Kʼoa jngo tichjaa xi Valeria ʼmi, cáncer kisʼele kʼoa táo koan. Kisitjoson jotso Énle Niná xi tʼatsʼe njín kʼoa nʼio ñʼai koanle nga koansjaile jngo chjinexki xi kʼoasʼin kisixkile josʼin mele kʼoa kui kitsokjonle tsa kuiyá.
2. Ánni nga tsín koa̱n nʼio kuinókjonsíñá.
2 Kʼoati satío sakʼoa tokoán jokisatio kon je ndsʼee xi sa jekanikʼaxkiaa. Tonga tsín nda kuichomani tsa nʼio kuinókjoaan. Tsa nʼio kuinókjoaan tsakui nichxin kui chjoéjiaan jmeni xi tsín tindasʼin sikʼéjnaniná ngixko̱n Jeobá. Je Na̱i kui xi mele nga kuinókjoaan ánni nga tsín tisi̱tjosonsíñá je kjoatéxomale Jeobá, jolani nga tsín tikʼuínyasonñá (Apoc. 12:17). Ningalani nʼio tsʼen kʼoa tse nganʼio tjínle je Na̱i koaan si̱kinjelee. Jméni xi koasenkaoná.
3. Jméni xi koasenkaoná nga tsín kuinókjoaan.
3 Alikui koa̱nle kuinyaxkónná je Na̱i tsa ñaki tjínjngo tokoán nga tsjoakená Jeobá kʼoa nga je koasenkaoná (Sal. 118:6). Tobʼelañá, je xi kiski Salmo 118 tsee kjoa jaʼatojin. Nkjín kontra kisʼele, jolani chjota xi nʼio tsaʼyale (versículo 9 kao 10). Sakʼoa nʼio kisʼenele nga tjín xi sʼin (versículo 13). Kʼoa nga tsakatekjáyale Jeobá nʼio tsakjákao (versículo 18). Ninga kʼoalani, i kitso: “Alikui tsokjoan”. Ánni nga tsín kitsokjonni. Kuinga be nga tsjoake Jeobá ningalani nʼio tsakjákao nga tsakatekjáyale. Ñaki tsakʼéjngo kon xi kiski salmo jebi nga tsjoake Jeobá kʼoa nga je koasenkao tojme kjoa xi kjoaʼatojin (Sal. 118:29).
4. Jméni xi tsín tikuinókjonnilee tsa tjínjngo tokoán nga tsjoakená Jeobá.
4 Kʼoéjngoaa tokoán nga tsjoakená Jeobá nga jngó jngoá. Tsa kʼoakʼoé tokoán, janla koya si̱kʼaxkiaa xi tsín tikuinókjonnilee. Xi títjon, tsakui nikjáojiaan nga tsín so̱koʼaná je familianá. Xi majaoni, nga chjota nokjonlee. Kʼoa xi majanni, nga nokjonlee kjoabiya. Ndsʼee xi kanikʼaxkiaa ya párrafo 1 alikui tikitsokjonni nga̱ ñaki tsakʼéjngo kon nga tsjoake Jeobá.
TSAKUI NIKJÁOJIAAN NGA TSÍN SO̱KOʼANÁ JE FAMILIANÁ
Jngo ndsʼee xi tjenkao tiʼndíle nga jti̱ tíbʼasjengindá, kʼoasʼin bajngiʼani familiale (Chótsenlai párrafo 5)
5. Jméni xi síkjáojin xi jko̱ tjíole yaniʼya (chótsenlai sén xi faʼaitʼa ya portada).
5 Jngo chjotale Cristo xi jko̱ tíjnale yaniʼya nda sítjoson je xá xi kjinele nga bajngiʼa familiale (1 Tim. 5:8). Tsa jko̱ tijnalai yaniʼya, tsakui nichxin kui koankjáojinli nga si̱chai xáli xi totʼatsʼe chʼin COVID-19. Tsakui nichxin kui koankjáojinli tsa tsín tiso̱koʼanili familiali, tsa tsín tikʼoakoa̱nnili nga kʼoéchjíntjai jñani tiyoño kʼoa tsakui kinikjaʼaitsjainje̱ nga tsín tiso̱koxánili tsa si̱chai xáli. Tsakui nichxin kʼoatisʼin nikjaʼaitsjain jokitso je Néstor kao María, nga tsín koa̱nsonnili tsa tochoa tao̱n kuinjeli. Nga kui nʼio nikjáojiaan xi tʼatsʼe jebi yaa kjoénile je Na̱i nga síkinroajen tokoán, kʼoa nʼio nkjín xi tsín tije Jeobá tjíosíxánile nga kui nʼio síkjáojin.
6. Jósʼin mele Na̱i nga si̱kjaʼaitsjeen.
6 Je Na̱i kui xi mele nga kʼoasʼin si̱kjaʼaitsjeen nga tsín mandosinle Jeobá xi tʼatsaan kʼoa nga tsín koasenkaoná nga kuijnyíʼaa familianá. Tsakui che̱n jebi ska̱yaa kʼoajinsʼin si̱kjaʼaitsjeen nga kui xáná xi ngisa chjíle tikʼoajinni tojmeni, ninga kuitjátoné jotso kjoatéxomale Niná.
7. Jméni xi tsoná je Jesús.
7 Jé Jesús xi ngisasa nda be je Nʼaile, kuinga i̱ tsoniná: “Je Nʼaino be ngayije xi machjénno, tongini nga nijáo” (Mat. 6:8). Je Jesús kʼoati be nga tíjnanda je Jeobá nga tsjoáná jmeni xi machjénná. Ngatsʼiaa xi chjotale Cristo maa yaa tiyojinlee familiale Niná. Nga je xi jko̱ tíjnaná Jeobá alikui jao tjínná nga kʼoasʼin tojo tsole je xi jko̱ tjíole ya yaniʼya, tojo tso ya 1 Timoteo 5:8.
Jé Jeobá tsjoáná jmeni xi machjénná. Tsakui nichxin je ndsʼee sichjén nga koasenkaoná (Chótsenlai párrafo 8) *
8. 1) Jméni xi koasenkaoná tsa kʼoasʼin nikjaʼaitsjeen nga tsín so̱koʼaná je familianá (Mateo 6:31-33). 2) Jósʼin kjuintjenngiaa je choa̱le ndsʼee kao chjoónle xi faʼaitʼa ya fotografía.
8 Tsa tjínjngo tokoán nga tsjoakená je Jeobá kʼoa nga tsjoake familianá, alikui jao sʼe tokoán nga je tsjoáná jmeni xi machjénná (tʼexkiai Mateo 6:31-33). * Je Jeobá kao kjoatsjoa tsjoáná jmeni xi machjénná kʼoa tsʼato kʼoakji tsjoáná jokji machjénná. Kʼianga kisinda je Sonʼnde ali tsa totjíchoa̱jin kisinda jmeni xi koa̱n kuiyochonñá. Nga tsjoakená nkjín koya tsojmi kisinda ánni nga tsjoa sa̱tíoni tokoán (Gén. 2:9). Ninga sakʼoa tochoa̱ sokóná nga nyaon nyaon jmeni xi biyochonñá, kʼoailee kjoanda Niná kʼianga tísokóná. Jé Jeobá basenkaoná kʼoa tsjoáná nga nyaon nyaon jme xi chinee (Mat. 6:11). Ningalani tsín sokóná ndʼaibi ngayeje jmeni xi machjénná, ngisaa nʼio chjíle jmeni xi tsjoáná je Jeobá ndʼaibi kao nichxin xi nroa. Kui jebi xi koanjinle je Néstor kao María (Is. 65:21, 22).
9. Jmé xi bakóyali je choa̱le Néstor kao María.
9 Je Néstor kao María nʼio ndasʼin tjío tsakai ya Colombia nga̱ nda kji ndʼiale kʼoa tjínle xá. Itso: “Kui xi koanmenajin nga tochoa tsojmi sʼe̱najin ánni nga ngisa kʼuínyasonnijin, tonga kʼoati kinikjáojinjin nga̱ kʼoasʼin kinikjaʼaitsjainjin nga tsín tsjoa sa̱tío tokuinjin tsa tochoa tsojmi sʼe̱najin”. Jméni xi tsakinyakao. Kui kisikjaʼaitsjen josʼin sa jetsakinyakao Jeobá. Ñaki kʼoatsakatío kon nga je Jeobá sikuinda ngantsjai, kuinga kisikatíoni je xále ninga nʼio nda machjíle tsakai. Tsakaténaa ndʼiale kʼoa yaa kikatio ya ʼnde jñani ngisa machjén xi tsoyason. Jótjío kon nga kʼoakisʼin. Je Néstor itso: “Tiʼyaníjin nga bitjoson kjoaixi jmeni xi tso Mateo 6:33. Alikuikʼia nga jme xi tíchanajin kʼoa ngisaa tsjoa tjío tokuinjin ndʼaibi”.
NGA CHJOTA NOKJONLEE
10. Ánni nga tsín tokʼoamaniná nga tsokjónle xínkjín je chjota.
10 Jokji tífaʼato nichxin totaon tjíobe xínkjín chjota (Ecl. 8:9). Tobʼelañá, je chjota xi batéxoma tjínkʼa xi totaon be xi kjaʼaí. Tjínkʼa chjota xi nʼio tsʼen, binyáxkónle kʼoa totaon be je xtiskuela xínkjín, kʼoa tjínkʼa xi totaon be familiale. Je chjota tijé tsokjónnile xínkjín nga kʼoasʼín. Jósʼín je Na̱i nga chjota nokjonlee.
11, 12. Jósʼín je Na̱i kʼianga chjota nokjonlee.
11 Je Na̱i kui xi mele nga chjota kuijkónlee ánni nga tsín tikʼuínyasonsíñá kʼoa tsín tisi̱tjosonñá kjoatéxomale Jeobá. Jé Na̱i xosʼín nga tjínkʼa chjotaxá xi bʼéchjoa je xále Niná kʼoa nga fitjenngikená (Luc. 21:12; Apoc. 2:10). Nga je Na̱i kjinentsja jme xi chon sonʼnde tjínkʼa chjota xi énndiso kaníbason xi tʼatsʼe testigole Jeobá. Je xi sísin énndiso jebi tsakui nichxin toskoe̱sinná kʼoa tsa totaon skoe̱ná (Mat. 10:36). Tonga tsín tokʼoamaná nga kʼoasʼín je Na̱i nga̱ jesa kʼoakisʼin nga siglo 1 (Hech. 5:27, 28, 40).
Ninga koatiochjoaná xíngiaa, je Jeobá tosi tonda tsjoake koa̱nná (Chótsenlai párrafo 12-14) *
12 Je Na̱i kui xi mele nga kuijkoán kʼianga chjotaxá fitjenngikená kʼoa nga kʼoati kuinókjonlee josʼin sikjaʼaitsjen xíngiaa tsa testigole Jeobá koaan. Tjínkʼa xi ngisa kui tsokjónle jebi tikʼoajinni tsa totaon jcha. Nga tsjoake xínkjín kʼoa nga kui xi mele nga katabe xi tʼatsʼe Jeobá, alikui nda satío kon nga chʼaosʼin síkʼaxki̱ Niná kao choʼndale. Tonga tjínkʼa chjota xi tsín sasénle Énle Niná tsakai xi skanni makjainle. Jósʼiaan tsa tjínkʼa xíngiaa xi tsín tikuinchja̱niná.
13. Ánni nʼio chjínile nga kʼoéjngoaa tokoán nga tsjoakená Jeobá kʼianga majtikená xíngiaa (Salmo 27:10).
13 Nʼio tsjoánganʼioná jmeni xi tso Salmo 27:10 * (tʼexkiai). Tsa kuenta sʼiaan nga nʼio tsjoakená je Jeobá alikui kui kuinókjonlee ninga nkjín koa̱nni xi kontra koationá. Kʼoa ʼyañá nga tse kjoanda tsjoáná je Jeobá tsa chókjoajinná tojmeni xi koa̱ntʼeen. Jé Jeobá tsjoáná jmeni xi machjénná, koasenkaoná nga nda sa̱tío tokoán kʼoa nga ngisa koa̱nchriantʼalee. Jé Jeobá xi ngisa nda be josʼin koasenkaoná. Tsabe je Biniam josʼin tsakasenkao Jeobá, xi sa jekanikʼaxkiaa ya párrafo 1.
14. Jmé xi bakóyali je choa̱le Biniam.
14 Testigole Jeobá koan je Biniam ninga koanjinle nga chjotaxá koaitjenngike. Itso: “Ngisani nʼio kitjenngikena je chjotaxá josʼin kisikjaʼaitsjen tsakai, tonga kui ngisa kitsokjonle nga tsakatiochjoana je xíngia. Kui nʼio kitsokjonle josʼin sikjaʼaitsjen je nʼaina nga Énle Niná tikotʼaya kʼoa josʼin sikʼaxki̱na je xíngia”. Kui xi tsakasenkao nga kisikjaʼaitsjenjin nga tsjoake je Jeobá kʼoa nga síkuinda ngantsjai Jeobá je xi tsjoake. Je Biniam itsosa: “Kui kisikjaʼaitsjenjian josʼin basenkao Jeobá je xi tjíokale ninga ñʼai male tao̱n, xi chʼasjengi kʼoa xi totaon ʼya nga chjota fitjenngike. Koanjinna nga sichikontʼainna Jeobá tsa je sinʼiotʼa. Nkjín kʼa nga ndoyá kinikʼéjnaʼyana kʼoa nga kjoañʼai kinikjaʼána. Kʼianga kui kjoa tijnajian ñaki tsaʼbeña josʼin basenkaoná Jeobá kʼianga kixi mangíntʼalee”. Je Biniam ñaki Nʼaile sʼin tsabekon Jeobá kʼoa jo familiale sʼin tsabekon je ndsʼee.
NGA NOKJONLEE JE KJOABIYA
15. Ánni nokjonnilee je kjoabiya.
15 Je Biblia kʼoatso nga kontraná mani je kjoabiya (1 Cor. 15:25, 26). Kʼianga kui si̱kjaʼaitsjeen tʼatsʼe kjoabiya nʼiojin si̱kjáojiaan, ngisaa tsa timʼee kʼoa tsa jngo xíngiaa xi chʼin tjínle. Kuinga nokjonnilee je kjoabiya nga̱ je Jeobá toxá kʼoasʼin kisindaniná nga mená kuiyoaa ngantsjai nichxin (Ecl. 3:11). Tsa kuenta sʼiaan nga kjoabiya choʼndá kʼoati basenkaoná nga nikuindaa yaoná. Jolani nga chosonnilee jokjoan xi chinee, nga machjén nga ejercicio sʼiaan, tsínkui kʼoanʼia jme xi xkón sikʼéjnaná, mangínñá tsʼe chjinexki kʼoa chineñá xki̱ kʼianga machjénná.
16. Jósʼín je Na̱i kʼianga nokjonlee je kjoabiya.
16 Je Na̱i be nga chjí ʼyatokoán je kjoabijnachonná. Kuinga kʼoatsoni nga kʼoasʼiaan tojmeni tojoni nga kuiyochoán, ninga tsín timiyoná koa̱nni je Jeobá (Job 2:4, 5). Tonga tsín kʼoatjín jmeni xi tso je Na̱i. Tjínle nganʼio je Na̱i nga sikʼienná, kʼoa nga nokjonlee je kjoabiya yaa bʼangini nga kotʼayakaoná nga̱ kui xi mele nga yándsʼiaan koasenlee je Jeobá (Heb. 2:14, 15). Je Na̱i sakʼoa chjota síchjén kʼianga binyáxkónná kʼoa nga kʼoatsoná nga sikʼienná tsa tosi tonda je Jeobá jchaxkoán. Kʼoa tsa kʼiaje̱ nga tsʼe chjinexki kjuian kui xi mele je Na̱i nga kui kʼoasʼiaan jmeni xi tsín sasénle Jeobá. Tsakui nichxin je chjinexki kʼoa tsa je xíngiaa xi tsín kotʼaya Énle Niná kʼoakuitsoná nga njín kataxinyáná. Tonga ʼyañá nga tsín tsjoáʼnde kjoatéxomale Niná nga njín xi̱nyáná. Kʼoa tsa ʼya xi kʼoakuitsonáje̱ nga koa̱n josasʼin si̱xkiaa, tonga tsa ʼyaa nga tsín sa̱sénle je Jeobá nga kʼoasʼiaan.
17. Tojo tso Romanos 8:37-39, ánni nga tsín kuijkónñá ningalani kuiyá.
17 Alikui ʼya xi mele nga kuiyá, kʼoa ningalani kʼoakoaan ʼyañá nga tojo tsjoake koa̱nná je Jeobá (tʼexkiai Romanos 8:37-39). * Je Jeobá tjínjinkon jokjoan miyole xi jekʼien, nga̱ ngixko̱n joxi tjíokonni (Luc. 20:37, 38). Kʼoa mele sikjaʼáyanile je miyole (Job 14:15). Je Jeobá jé ʼNdíle kitsjoa nga tsakʼéchjíntjainá nga koa̱n sʼe̱ná kjoabijnachon xi tsínkʼia fetʼa (Juan 3:16). ʼYañá nga tsjoakená kʼoa nga síkuindaná je Jeobá. Kuinga tsín yándsʼiaan basennilee kʼianga tjochʼinná kʼoa tsa ʼya xi kʼoatsoná nga sikʼienná. Tosaa je Jeobá ninʼiotʼaa kʼianga koasenkaoná, nga tsjoáná kjoachjine josʼiaan kʼoa nga tsjoánganʼioná. Kʼoakisʼin je Valeria kao xʼinle (Sal. 41:3).
18. Jmé xi bakóyali je choa̱le Valeria.
18 Kʼianga 35 nóle Valeria, kʼoatsakʼinle nga kui cáncer xi nʼio táo tjínle. Nga be nga tsjoake Jeobá je Valeria, kataʼyala jósʼin tsakasenkao nga tsín kitsokjonle je kjoabiya. Itso: “Tokʼoakoannajin nga kʼoatsakʼinna nga cáncer tjínna. Kʼoatsakʼinna nga tokʼia tjín xkile tsa jtíya. Nkjín chjinexki kikonle, tonga kaile nga koateyana tsa tsín njín xi̱nyána. Kitsokjonña, tonga nga mena sitjosonle Niná alikui kitsjoaʼnde nga njín xi̱nyána. Jokjitse tisijchá yaona ʼbeña nga tsjoakena je Jeobá..., kʼoa kʼoati mena koakole nga tsjoake̱. Kʼianga kʼoatsakʼinna nga sa táo sa táo kjima, ngisaa kisinʼiotʼa je Jeobá ánni nga tsín je Na̱i tsjoanile kjoatsjoa. Kui xi koanmena nga tsjoa katasʼe kon Jeobá xi tʼatsʼan. Nga jeki nichxin kitiyaña kʼoa tsín njín kixinyana, kʼoa ndasʼin kichomani. Tojo ñʼai kjimana nga chʼin tjínna, tonga jé Jeobá tsjoánajin ngantsjai jme xi machjénnajin. Tobʼelañá, kʼianga kjesa kʼoaʼmijinna nga cáncer tjínna, kui kichotʼayaijin ya kjoajtín je artículo xi ʼmi: Afrontemos con valentía los golpes de la vida. * Kuikjoán xi tsakinyakaonajin nga kʼia, kʼoa nkjín kʼa tsakʼexkiaijin. Nga kui jebi kichotʼayaijin kʼoa nga nda kinixálaijin Niná kui xi tsakinyakaonajin je xʼinna kao an nga tsín yaonajin nʼio tsakinyaxkónlaijin kʼoa nda kichjoejinjin jmeni xi kinʼiaijin”.
JMÉ XI SʼIAAN NGA TSÍN TIKUINÓKJONÑÁ
19. Jméni xi jeme kʼoakoa̱n.
19 Jngo tjíjtsa Sonʼnde tjío je ndsʼee xi tjíochókjoajinle je kjoa xi nʼio ñʼai tjín tjíofaʼatojin nga je Jeobá tjíobinyakao kʼoa tsín kjoatsjoa tjíotsjoále je Na̱i (1 Ped. 5:8, 9). Kʼoati koa̱n nʼio kuiyolee tsanda ñá je Na̱i. Je Jeobá tojeme kʼoakuitsole je Jesús kao xi ya koatexomakao nga kjoaʼaxin ngayeje jmeni xi tísʼín je Na̱i (1 Juan 3:8). Kʼianga jekʼoakoa̱n, je choʼndale Niná skoee josʼin bitjoson én jebi: “Tsín jme xi kuinyaxkónli kʼoa alikui jme xi kuinókjonlai” (Is. 54:14; Miq. 4:4). Nga kjesa kʼoamajin kʼoénelee yaoná nga tsín kuinókjoaan.
20. Jmé xi koasenkaoná nga tsín kuinókjoaan.
20 Ñaki kʼoakʼoé tokoán nga tsjoakená Jeobá kʼoa nga síkuinda choʼndale. Jméni xi sʼiaan nga ngisa koa̱nnʼiotʼaa je Jeobá. Si̱kjaʼaitsjenjiaan jósʼin síkuinda je choʼndale kʼoa chja̱kaonajmiá xi kjaʼaí xi tʼatsʼe jebi. Kʼoati si̱kjaʼaitsjenjiaan jósʼin sa jetsakasenkaoná Jeobá kʼianga ñʼai tjín kjoa kitjatojiaan. Jé Jeobá koasenkaoná nga tsín kuinókjoaan (Sal. 34:4).
KJOAJNDA 129 Kao kjoaka si̱xálee Niná
^ Toxá nokjonñá kʼoa sakʼoa basenkaoná nga nokjoaan. Tonga tsa nʼio kuinókjoaan kʼoati sikiʼaonná. Kui xi mele je Na̱i nga kuinókjoaan ánni nga tsín nda chjoéjinsíñá jmeni xi sʼiaan. Kuinga machjénsíni nga jchaa jméni xi koasenkaoná nga tsín kuinókjoaan. Tojosʼin jchaa i̱ kjoaʼmiya jebi, xi koasenkaoná kuinga kʼoéjngoaa tokoán nga tsjoakená je Jeobá kʼoa nga je koasenkaoná.
^ Alikui tsa ñaki kʼoaʼmi kʼa chjota xi bʼaxki̱ i̱bi.
^ Mateo 6:31-33: “Ali bʼexkónjinlao yaono, tsokʼoa, nga kuixón: Jmé xi chi̱nee, kʼoa jmé xi sʼioaa, axo jmé xi chʼakjá. 32 Nga̱ jé chjota xi li judíojin xi básjai je kjoa xotjínbi. Je Nʼaino xi tíjna ngʼajmi be nga machjénno ngayije kjoa jebi. 33 Tonga títjon tijnyísjao je kjoatéxomale Niná, kao kjoakixile, kʼoa ngayije kjoa jebi kʼoasʼin kʼoaisonno”.
^ Salmo 27:10: “Ningalani tsjiónkonna je nʼaina kao na̱na, jé Jeobá sikuindana”.
^ Romanos 8:37-39: “Tonga ngayije je kjoa jebi ngisa nʼio kʼoasʼiansaa kaoni tsa je xi síkinje, xi totʼatsʼe je xi koantsjoakená. 38 Tokui jebi ñaki tjíjngole koan, nga nikjoabiyajin, nikjoabijnachonjin, niʼánkjejin, ni xi ngʼajko̱lejin, nijejin xi tjínle nganʼio, ni xi ndʼaibijin, nije xi sʼa nroajin, 39 ni xi ngʼajin, ni xi nangijin, nitojngojinsa xi xá kisʼendani xi koa̱n kjoaʼaxinná je kjoatjaochale Niná nga tiyokoaa Cristo Jesús Nainá”.
^ Chótʼai je revista La Atalaya xi tsʼe 15 de octubre de 2012, página 7 saʼnda 11.
^ XI TÍNCHJA̱NI SÉN XI FAʼAITʼA: Jngo ndsʼee kao chjoónle kui tsojmi xi ma chine fikaole jngo tichjaa xi nʼio nda tsjoánganʼio ya jinjtín, kʼoati tsjoále je xínkjín tichjaa jebi.
^ XI TÍNCHJA̱NI SÉN XI FAʼAITʼA: Je xijchále jngo ndsʼee xi sʼa ti tsín mele nga testigole Jeobá koa̱n je tile. Tonga ti jebi ñaki kʼoabʼé kon nga je Jeobá koasenkao.