1, 2. Tojo tso Salmo 25:14, jméni xi sʼiaan nga miyoná koa̱nni je Jeobá.

 JMÉ xi machjén nga nda miyo cho̱bá. Tsakui nichxin kʼoakuixoán nga je xi miyo fáo tsjoake xínkjín kʼoa binyakao xínkjín. Je xi nda miyo chobá alikuijin kuinókjonlee, tonga tojo tso je texto xi yʼangini kjoaʼmiya jebi machjén nga kuinókjonchá je Jeobá tsa mená nga miyoná koa̱nni (tʼexkiai Salmo 25:14). b

² Ni chriansʼa kʼoa ni jekjoatse nga tichotʼayá Énle Niná machjén nga kuinókjonchá Jeobá. Jósʼin tsoyanile nga nokjonchá. Jméni xi koasenkaoná nga kuinókjonchá. Jósʼin kuinókjonchá Niná. Kataʼyala jokisʼin Abdías, je naʼmitítjon Jehoiadá kao rey Jehoás.

3. Jósʼin basenkaoná nga nokjoaan.

³ Toxá nokjonnilee tsa jmeni xi ʼyaa nga sikiʼaonná. Basenkaoná nga kʼoasʼin nokjoaan nga̱ nda nikjaʼaitsjeen jmeni xi nʼia. Kataʼyala kʼa choa̱. Alikui ya bisenjentjoan jñani ngʼa chon nga̱ nokjonlee nga jtsoaa. Nga nokjoaan nga tjín xi koa̱nná alikui ya mangían jñani xkón chon. Alikuijin kui kʼoasʼiaan kʼoa kui kʼoakʼuínlee je xi sikiʼaon miyoná tsa mená nga tosi tonda miyo cho̱bá.

4. Jósʼin mele je Na̱i nga si̱kjaʼaitsjeen tʼatsʼe Jeobá.

⁴ Je Na̱i kui xi mele nga tsokjonle Niná je chjota. Kui xi mele nga koa̱nkjainná jmeni xi kitsole Elifaz je Job, kʼoakitso nga tsʼen Niná kʼoa nga tsín sasénle ninga nda sʼiaan (Job 4:18, 19). Kui xi mele nga kuinókjonlee je Jeobá kʼoa nga  tsín je si̱xálee. Kʼianga tsín kʼoakatamaa machjén nga jchaa josʼin tíjna nga nokjonchá je Niná.

5. Jósʼin tíjna nga nokjonchá je Niná.

⁵ Je chjota xi tsokjónke Jeobá tsjoake kʼoa kaile nga chʼaosʼin kʼoéjna ngixko̱n. Je xi nʼio nda choa̱ tsakʼéjna nga kitsokjonke Niná jé Jesús (Heb. 5:7). Ali tsa kʼoajinsʼin kitsokjonke Niná josʼin nokjonlee tsa ʼyani xi sikiʼaonná (Is. 11:2, 3). Je Jesús tsjoake koan Nʼaile, kuinga kisitjosonnile (Juan 14:21, 31). Ñá kʼoati bakolee kjoaxkóntokon Niná kʼoa jé nixálee nga̱ ʼyañá nga tsjoakená, nga nʼio chjine, tjínle nganʼio kao kjoatéxomakixi. Kʼoati ʼyaa nga nʼio tsjoakená kʼoa mandosinle jmeni xi nʼia. Ba sʼe kon tsa tsín si̱tjosonlee, tonga tsjoa sʼele tsa si̱tjosonlee (Sal. 78:41; Prov. 27:11).

6. Jñánile xi jngo koya xi koasenkaoná nga kuinókjonchá je Niná (Salmo 34:11).

⁶ Alikui to jekʼoasʼin kichʼañá nga nokjonchá Niná (tʼexkiai Salmo 34:11). c Jngo koya xi koasenkaoná nga kuinókjonchá Niná kʼiaa nga chótsenlee jme xi kisinda. Ngisaa ʼyaxkoán je Jeobá kʼoa ngisaa tsjoacha maa nga chotsenlee jmeni xi kisinda kʼianga ʼyaa nga nʼio chjine, nga tse nganʼio tjínle kʼoa nga tsjoakená (Rom. 1:20). Jngo tichjaa xi Adrienne ʼmi, i kitso: “Tokʼoamana kʼianga kotsenle jmeni xi kisinda Jeobá, ʼbeña nga nʼio chjine kʼoa sʼejngo tokoan nga ngisa nda be jméni xi koasenkaona”. Kʼianga jekisikjaʼaitsjenjin xi tʼatsʼe jebi, i kitso: “Alikui mena nga kui kʼoasʼian jmeni xi sikjinnina Jeobá nga̱ jé kitsjoana kjoabijnachon”. A koaan chʼa̱sjeʼa ngotjui nichxin xomana jebi nga si̱kjaʼaitsjenjin jmeni xi kisinda Jeobá. Tsa kʼoasʼiain, ngisaa jchaxkuín kʼoa ngisaa tsjoacha koai̱n (Sal. 111:2, 3).

7. Kʼianga bʼetsʼoaa, jósʼin basenkaoná nga ngisa nokjonchá Jeobá.

⁷ Kʼianga kjitʼa kʼoétsʼoalee je Jeobá kʼoati koasenkaoná nga jchaxkoán. Kʼianga kjitʼa chjakaonajmiá, sa nda sa nda ʼyaxkoaan. Kʼianga nganʼio nijélee nga katabasenkaoná kʼianga kjoa bitjatojiaan, kui nikjaʼaitsjeen jokji nganʼio tjínle. Nga bʼailee kjoanda kʼianga kisikasén ʼNdíle nga kʼienntjainá, kui nikjaʼaitsjenjiaan nga nʼio tsjoakená. Kʼoa kʼianga kʼoaʼmilee nga katabasenkaoná nga koa̱nná josʼin kʼoéndajiaan jngo kjoa, kui nikjaʼaitsjeen nga nʼio chjine. Nga kʼoasʼin bʼetsʼoalee Jeobá ngisaa ʼyaxkoán, kʼoati kui xi basenkaoná nga tsínkui kʼoanʼia jmeni xi sikjinniná je Niná.

8. Jméni xi sʼiaan nga tosi tonda kuinókjonchá Jeobá.

⁸ Jméni xi sʼiaan nga tosi tonda kuinókjonchá Jeobá. Kʼianga chótʼayá je Biblia si̱kjaʼaitsjenjiaan tʼatsʼe chjota xi síkʼaxki̱ ʼyáni xi nda kisʼin kʼoa ʼyáni xi chʼao kisʼin. Janla choa̱ kataʼyaa. Xi títjon, jao choʼndale Niná xi kixi kitʼale si̱kʼaxkiaa: xi tʼatsʼe Abdías, xi kisʼenele nga je kisikuinda ndʼiale rey Acab, kao tʼatsʼe naʼmitítjon Jehoiadá. Xijekoa̱n, kui chótʼayajiaan tʼatsʼe rey Jehoás xi tsakatéxoma ya Judá, nda kisʼin tsakai nga títjon tonga xijekoanni kisikjinle Jeobá.

9. Jósʼin tsakasenkao Abdías nga kitsokjonke Jeobá (1 Reyes 18:3, 12).

⁹ Kʼianga síkʼaxki̱ títjon Abdías d ya Biblia, itso: “Je Abdías nʼio kitsokjonke  je Jeobá” (tʼexkiai 1 Reyes 18:3, 12). e Jósʼin tsakasenkao Abdías nga kitsokjonke Jeobá. Kixi jmeni xi kisʼin kʼoa kisinʼiotʼa xi kjaʼaí. Nga kʼoakisʼin, jé kisʼenele nga kisikuinda ndʼiale rey (tingósonkoai Nehemías 7:2). Nga kitsokjonke Niná kʼoati nʼiojin koan. Tjínnele nga nʼiojin koan nga̱ kʼiaa tsakʼejna nga tsakatéxoma je rey Acab, nga̱ rey jebi “nʼio chʼao kisʼin ngixko̱n Jeobá tikʼoajinni jokisʼin je rey xi títjon tsakatéxoma” (1 Rey. 16:30). Xi ijngosani, je Acab jé chixankao Jezabel, je chjoón jebi jé Baal tsakʼétsʼoale kʼoa nʼio jtike koan Jeobá, kui xi koanmele nga tsín tijé Jeobá katasʼetsʼoanile ya naxinandá Israel, kʼoa nʼio nkjín profetale Jeobá kisikʼien (1 Rey. 18:4). Nʼiojin ñʼai koanle chjota xi je Jeobá kisixále nga kui nichxin.

10. Jósʼin tsakakó Abdías nga nʼiojin koan.

¹⁰ Jósʼin tsakakó Abdías nga nʼiojin koan. Kʼianga je Jezabel kitjenngike je profetale Jeobá nga koanmele kisikʼien, je Abdías 100 profetale Jeobá xi ni̱tja̱n kisikatíoʼya nga kisikatíoʼma kʼoa xki̱ ñachante kisikatíoni, kʼoa jé kikaole nandá kao nioxtila (1 Rey. 18:13, 14). Tsa kisʼejinle Jezabel nga kʼoakisʼin je Abdías kisikʼienjin. Je Abdías alikui kui xi koanmele nga ni̱kʼien. Tonga alikui to yaole kini, kuinga kʼoakisʼinni nga tsjoake koan je Jeobá kao choʼndale.

11. Jósʼin fitjenngi kʼa choʼndale Niná je choa̱le Abdías.

¹¹ Nichxin xi tiyoaa ndʼai nʼio nkjín choʼndale Jeobá xi ya tjío ya ʼnde jñani tíchjoale xále Niná. Ningalani bakóle kjoaxkóntokon je chjotaxá kʼoati sʼín jokisʼin je Abdías, jé Jeobá ngisa sítjosonle nga̱ tojé xi bakinle nga jchaxkón (Mat. 22:21). Kʼianga je Niná sítjosonle tikʼoajinni je chjota kʼoasʼin bakóni nga tsokjónke Niná (Hech. 5:29). Kuinga básjainile josʼín je ndsʼee nga tosi tonda tsoyason kʼoa nga tosi tonda batiojtín (Mat. 10:16, 28). Kʼoati básjaile josʼin binyakao je ndsʼee kao tichjaa nga tsín katasíkjinle Niná. Kataʼyala josʼín je Henri,  xi ya África tsʼe, jngo ʼnde jñani kisʼechjoale xále Niná. Nga kʼia, jé Henri kikaole ndsʼee je xo̱n xi Énle Niná yʼangini. I kitso: “Tsokjonña, tonga xi tsakasenkaona nga nʼiojin koan kuinga tsokjonke je Jeobá”. Joni je Henri kʼoati nʼiojin koaan tsanda ñá tsa kuinókjonchá je Niná.

12. Jósʼin tsakakó je Jehoiadá kao chjoónle nga kixi kitʼale Jeobá (kʼoati chótsenlai sén xi faʼaitʼa).

¹² Kitsokjonke Jeobá je naʼmitítjon Jehoiadá, kuinga kixi kitʼanile kʼoa tsakasenkao xi kjaʼaí nga kʼoati je Jeobá katabexkón. Kʼianga je tsotile Jezabel tsakatéxoma xi Atalía tsakʼin ya naxinandá Judá, je Jehoiadá tsakakó nga tsokjónke Niná. Nʼio kitsokjonle chjota je Atalía, nga̱ nʼio tsʼen koan kʼoa jé koanmele tsakatéxoma, kuinga kisikʼienni je xtile rey xi xtindaile mani (2 Crón. 22:10, 11). Tonga kinjengi jngo xti jebi, xi Jehoás tsakʼin, nga̱ jé tsakʼasjentjai Jehoseba, je chjoónle Jehoiadá. Jé Jehoseba kao Jehoiadá kisikʼéjnaʼma, kʼoasʼin kitsjoanganʼio nga tsín kichangi je xi rey koan xi ya ntje̱le David jaʼaini. Je Jehoiadá kixi kitʼale Jeobá kʼoa tsín je Atalía kitsokjonle (Prov. 29:25).

13. Jósasʼin tsakakó ijngokʼa je Jehoiadá nga kixi kitʼale Jeobá.

¹³ Kʼianga ñato nóle Jehoás tsakakó ijngokʼa je Jehoiadá nga kixi kitʼale Jeobá. Tsakʼéndajin jmeni xi kisʼin, tsa nda kuichomani jmeni xi tsakʼéndajin rey koa̱n je Jehoás xi ya jaʼaini ntje̱le David, tonga tsa tsín nda kuichomani jmeni xi sʼin si̱kʼienjin. Je Jeobá kisichikontʼain nga ndasʼin kichomani jmeni xi tsakʼéndajin. Tsakinyakao je xi tsakinyatítjonle yaniʼya kao chjota levita nga rey kisikao je Jehoás kʼoa kʼoakitso nga katanikʼien je Atalía (2 Crón. 23:1-5, 11, 12, 15; 24:1). Xijekoan, “jngo kjoasʼendajin tsakʼénda kao Jeobá kao je rey kʼoa kao naxinandá; kʼoakitso nga tosi tonda naxinandále Jeobá koa̱n” (2 Rey. 11:17). “Kʼoati kisikinyá je chjota xi kisikuinda jñani tjío je xo̱ntjoale yo̱ngo̱le Jeobá ánni nga tsín je jaʼasʼenni xi jndí sʼin tsaʼyakon” (2 Crón. 23:19).

14. Jmé kjoanda xi kisʼele Jehoiadá nga tsabexkón Jeobá.

¹⁴ Je Jeobá i kitso: “Skoe̱xkónña je xi skoe̱xkónna”, kʼoa je Jehoiadá tsabexkón Jeobá (1 Sam. 2:30). Tobʼelañá, jé Jeobá xi kʼoasʼin koanmele nga kisʼetʼaxo̱n ya Biblia jmeni xi kisʼin je naʼmitítjon Jehoiadá nga nda choa̱ tsakʼéjna (Rom. 15:4). Kʼoa kʼianga kʼien je Jehoiadá kui kjoanda kisʼele nga ya “kisʼeñe ya Naxinandále David jñani kisʼeñe xi rey koan, nga̱ nda kisixále Niná kʼoa nda kisikuinda je yo̱ngo̱le Niná ya naxinandá Israel” (2 Crón. 24:15, 16).

15. Jméni xi bakóyaná jokoan je Jehoiadá (kʼoati chótsenlai sén xi faʼaitʼa).

¹⁵ Jmeni xi bʼéyanajmí Biblia tʼatsʼe Jehoiadá basenkaoná tsanda ñá nga nokjonchá Niná. Koaan koaitjenngi je xi chjotajchínga sʼin tjío je choa̱le Jehoiadá nga kixi koaitʼale Niná kʼianga sikuinda je choʼndale (Hech. 20:28). Je ndsʼee xi jejchínga kui bakóyale nga je sichjén Jeobá nga kuitjoson josʼin mele tsa tsokjonke kʼoa tsa kixi koaitʼale. Je xi sʼa xti kʼoati koa̱n kuenta sʼin jokisikao Jeobá je Jehoiadá nga tjínnele koakole kjoaxkóntokon je ndsʼee xi jejchínga, ngisaa xi jekjoatsele nga je Jeobá tjíosíxále (Prov. 16:31). Ngatsʼiaa koaan chjénngilee jokisʼin je xi tsakinyatítjonle yaniʼya kao chjota levita, nga machjén nga kʼoainganʼiolee kʼoa nga si̱tjosonlee je xi bándiaaná (Heb. 13:17).

16. Jósʼin tsakakó Jehoás nga tsín nʼio kisʼejna kjoamakjainle.

¹⁶ Kʼianga tsa ti je Jehoás nda kisixále je Jeobá nga̱ jé Jehoiadá tsakasenkao (2 Rey. 12:2). Tonga kʼianga jekʼien Jehoiadá jé tsakʼaʼénle chjota xi tsakinyatítjonle naxinandá xi yátsʼi̱n tsakinyále Jeobá. Nga kʼoakisʼin, je Jehoás kao naxinandá kui tsakʼétsʼoale je xkóson kao poste xi sʼetsʼoale (2 Crón. 24:4, 17, 18). Ningalani nʼio aon koanle je Jeobá nkjín kʼa kisikasén je profetale nga je katabʼétsʼoa ijngokʼale, tonga alikui kinrʼoé. Kʼoati tsín kinrʼoéle je tile Jehoiadá xi Zacarías tsakʼin, xi profeta kʼoa xi naʼmi koan, kʼoa xi primole koanni je Jehoás. Je Jehoás tosaa kʼoakitso nga katanikʼien je Zacarías. Nga kʼoakisʼin, alikui tsakakó kjoanda nga je Jehoiadá tsakʼasjentjai nga sʼa ʼndí kji (2 Crón. 22:11; 24:19-22).

17. Jósʼin kichomani nga tsín nda kisʼin je Jehoás.

¹⁷ Je Jehoás alikui tije Niná kitsokjonkeni, tonga tsín nda kichomani nga kʼoakisʼin, nga̱ je Jeobá kʼoakitso nga kʼoati tsín nda jchatokon je xi tsín nda bekon (1 Sam. 2:30). Nga jekoanni, je chjota sirio xi tochoa mani chjotakjoajchánle, kisikinjele je chjotakjoajchánle Jehoás xi ngisa nkjín mani, kʼoa je Jehoás nʼio kinikiʼaon. Kʼianga jekini chjota sirio, tijé choʼndale kisikʼienni xi totʼatsʼe nga je Zacarías kisikʼien. Kʼoa nga nʼio chʼao koankjoan alikui ya kisʼeñe jñani kisʼeñe je xi rey koan (2 Crón. 24:23-25; chótʼai nota xi tsʼe estudio “hijo de Baraquías”, xi faʼaitʼa ya Mateo 23:35).

18. Tojo tso Jeremías 17:7, 8, jméni xi machjén nga sʼiaan nga tsín kʼoati sʼiaan jokisʼin je Jehoás.

 ¹⁸ Jmé xi bakóyaná jokisʼin je Jehoás. Yaa mangóson joni jngo yá xi tsín nʼio na̱nga̱ kjio je ja̱ma̱le, kʼianga nʼio sasénjna ijngo yá tjínnele sʼenʼiotʼa. Kʼoasʼin koanngóson je Jehoás nga je tsakasenkao naʼmitítjon Jehoiadá, nga̱ tsín tikixi kitʼanile Jeobá kʼianga jekʼien Jehoiadá kʼoa nga je kinrʼoéle jmeni xi kitso je chjota xi yátsʼi̱n tsakinyále Jeobá. Kui bakóyaná nga tsín koa̱n tokui si̱tjosonnilee Jeobá tsa kʼoasʼín je xíngiaa kʼoa tsa je kuinyakaoná ndsʼee xi tjío ya jinjtín. Kʼianga nʼio sʼe̱jna kjoamakjainná machjén nga jchaxkoán je Jeobá kʼoa sa tsjoacha sa tsjoacha katamaa. Je xi koasenkaoná kuinga kjitʼa chótʼayá, si̱kjaʼaitsjenjiaan jmeni xi bʼexkiaa kʼoa kjitʼa kʼoétsʼoaa (tʼexkiai Jeremías 17:7, 8; f Col. 2:6, 7).

19. Jméni xi síjéna Jeobá nga kʼoasʼiaan.

¹⁹ Je Jeobá alikui kui síjéná jmeni xi tsín kʼoakoa̱nná. Kui síjéná jmeni xi tso ya Eclesiastés 12:13, jñani tso: “Tijkónchai je Niná xi kixi kʼoa titjosuin kjoatéxomale, nga̱ tokuiní xi tjínnele sʼin je chjota”. Tsa nokjonchá je Jeobá, chókjoajinná tojme kjoa xi kuitjátojiaan kʼoa kixi kjuintʼalee tojo kisʼin je Abdías kao Jehoiadá kʼoa tosi tonda miyo cho̱bá kao Jeobá.