1, 2. Jméni xi mangóson jochon ndʼaibi kao jokoanchon kʼianga tsakʼejna je Lot.

 KʼIANGA ʼyaa josʼin fikao yaole ndʼaibi chjota kʼoasʼe tokoán jokisʼe kon je Lot, jngo chjota xi kixi kitʼale Niná. Aon koanle nga nʼio chʼao kisʼin je chjotatsʼen nga̱ bení nga tsín sasénle Niná nga kʼoasʼín (2 Ped. 2:7, 8). Nga tsjoake koan Jeobá kʼoa nga tsabexkón, alikui kisasenle nga kisichajngi je chjota. Kʼoati chon nichxin xi tiyoaa ndʼaibi, je chjota alikui bexkón kjoatéxomale Niná. Tonga tsa ʼyaxkoán je Niná kʼoa tsa nokjonchá tsje kjuinkoaa yaoná (Prov. 14:2).

² Nga mele Jeobá nga tsje kjuinkoaa yaoná, basenkaoná kʼoa kui xá tsakʼétʼaxo̱nni jmeni xi tso libro xi tsʼe Proverbios. Ngatsʼiaa xi chjotale Cristo maa basenkaoná jmeni xi tso libro jebi, basenkao xi xʼin, xi yánchjín, xti kao xi jejchínga.

3. Tojo tso Proverbios 17:3, ánni nga si̱kuindañá ni̱ma̱ná (kʼoati chótsenlai sén xi faʼaitʼa).

³ Xi nʼio tjínle kjoandosin kuinga si̱kuindaa je ni̱ma̱ná, nga̱ je Jeobá male kotʼajin. Be jmeni xi tsín be je chjota, be ngayeje jotjín tokoán (tʼexkiai Proverbios 17:3). b Tsjoake maná Jeobá kʼianga nitjosoán je kjoatéxomale. Kʼianga kui tíjnajin ni̱ma̱ná je kjoachjine xi tsʼe Niná alikui faʼasʼenjin je énndiso, jmeni xi tsoya je Na̱i kʼoa jmeni xi chon sonʼnde (Juan 4:14; 1 Juan 5:18, 19). Kʼianga si̱chriantʼalee Niná sa tsjoacha sa tsjoachaa koaan kʼoa koakolee kjoaxkóntokon. Alikui kui kʼoasʼiaan jmeni xi sikiʼaon kʼoa alikuikʼia kui si̱kjaʼaitsjeen nga  kuijnyíjée ngixko̱n. Kʼianga kui xi chʼaotjín sʼe̱jnabasenná i̱jin tso xi si̱kjaʼaitsjeen: “Alikui toxá sʼinña nga chʼao kʼoe kon je Jeobá, nga̱ nʼio tsjoakena kʼoa basenkaona” (1 Juan 4:9, 10).

4. Jósʼin tsakasenkao jngo tichjaa nga tsokjónke je Niná.

⁴ Jngo tichjaa xi Marta ʼmi c xi Croacia tsʼe kui kisʼejnabasenle nga sichajngi. I kitso: “Alikui nda kisikjaʼaitsjen, kui koanmena nga kui kʼoasʼian xi chʼaotjín kʼoa ñʼai koanna nga tsínkui tikisikjaʼaitsjenña. Tonga kui xi tsakasenkaona nga tsokjonke je Jeobá”. Kui kisikjaʼaitsjen Marta jósʼin kuichomani tsakui kʼoasʼin xi jée tjenkao. Tsakui sʼe̱jnabasenná xi chʼaotjín kʼoati koa̱n kʼoasʼiaan tsanda ñá, si̱kjaʼaitsjeen nga ba sʼe̱ kon je Jeobá kʼoa nga tsín koa̱n jchaxkoán ngantsjai nichxin tsakui kʼoasʼiaan xi chʼaotjín (Gén. 6:5, 6).

5. Jmé xi bakóyali jokoan je Leo.

⁵ Je chjota xi tsokjónke Jeobá, alikui totjín totjenni kjoa xi bʼangini yaole nga kui kʼoasʼín xi chʼaotjín kʼoa alikui tokjoa male nga kʼoatsoná je Jeobá nga tsín je si̱miyoaa chjota xi chʼao sʼín. Kʼoakoan je Leo, jngo ndsʼee xi ya República Democrática del Congo tsʼe, nga jeño nó kisʼenngindá jé kisimiyo chjota xi tsín nda sʼín, kʼoasʼin kisikjaʼaitsjen nga tsín tíbajngijée ngixko̱n Jeobá kʼiatsa tsín je xi chʼao tísʼín. Tonga kʼoati kisʼin jmeni xi sʼín je chjota xi kisimiyo, sa tse sa tsee tsakʼi kʼoa kisichajngi. Je Leo kisikjaʼaitsjenjin jmeni xi kitsoyale xijchále, xi testigole Jeobá ma. Kui kisikjaʼaitsjen nga nʼio tsjoa tjín kon tsakai. Kisikjaʼaitsjenjin jme xi tísʼín kʼoa jé xi chjotajchínga sʼin tjío tsakasenkao nga kisichriantʼa ijngokʼanile je Jeobá. Kʼoa ndʼaibi je Leo nʼio tsjoa tjín kon, chjotajchínga sʼin tíjna kʼoa precursor especial ma.

6. ʼYáni xi tsoyanile nga jao yánchjín xi si̱kʼaxkiaa i̱ kjoaʼmiya jebi.

 ⁶ Kuila chótʼayajiaan capítulo 9 xi tsʼe Proverbios, ngatsʼiñá nga binyakaoná je kjoafaʼaitsjen xi tsjoá, ni xi xʼin kʼoa ni xi yánchjín. Capítulo jebi jao yánchjín bʼaxki̱, jngo xi kjoachjine tsoyanile kʼoa xi ijngo kjoachini tsoyanile. d Kʼianga chótʼayajiaan párrafo xi fisani, kuenta sʼiaan nga ñaki tokui kijnajtsa sonʼnde ndʼaibi je kjoachajngi kao pornografía (Efes. 4:19). Kuinga nʼio machjénni nga tosi tonda nʼio kuinókjonchá je Jeobá kʼoa nga kuisenxinlee xi chʼaotjín (Prov. 16:6). Nga jao yánchjín xi si̱kʼaxkiaa jé nchja̱le chjotachini xi tsínle kjoafaʼaitsjen. Yaa mangóson joni tsa ya ndʼiale kuinchja̱le nga sikjen (Prov. 9:1, 5, 6, 13, 16, 17). Nga jngó jngó koya kjaʼaí kjaʼaísʼin bichómani. Kataʼyala.

7. Tojo tso Proverbios 9:13-18, jméni xi male je xi ya bichósʼen ndʼiale je chjoónchini (kʼoati chótsenlai sén xi faʼaitʼa).

⁷ Kuila títjon kuinókjoañá xi tʼatsʼe chjoónchini (tʼexkiai Proverbios 9:13-18). e I títso nga tínchja̱: “Ngatsʼi xi chjotachini katanroa i̱bi”. Jé nchja̱le je xi chini nga síkjen. Tonga jméni xi male xi ya fichókonle. Yaa tjío xi jekʼien. Je libro xi tsʼe Proverbios nkjín kʼa síkʼaxki̱ chjoón jebi. Je capítulo xi tjío nga tongini kui nchja̱ni tʼatsʼe je chjoónskáya kao chjoónchajngi, kʼoatso nga kjoabiya koyale je xi ya bichósʼen ndʼiale (Prov. 2:11-19). Proverbios 5:3-10 ijngo chjoón síkʼaxki̱ xi kʼoati si̱kuindalee yaoná. Kʼoatso nga kjoabiya bichókaoná je ndiaa xi fiya.

8. Jméni xi tjínnele sikjaʼaitsjenjin je xi kjuinrʼoé nga tínchja̱ je chjoónchini.

⁸ Ngatsʼi xi nrʼoéle nga tínchja̱ je chjoónchini tjínnele nga sikjaʼaitsjenjin tsa koaikonle kʼoa tsa mai. Kʼiáni nga nchja̱ je chjoónchini. Tobʼelañá, kʼiaa nga kui sʼejnabasenná nga si̱chajngiaa kʼoa tsa toxijña pornografía kjoaʼa nga tjín xi tichotsenlee. Jméni xi sʼiaan.

9, 10. Ánni nga tsín koa̱n si̱chajngiñá.

⁹ Ánni nga tsín koa̱n si̱chajngiñá. Tojo tso libro xi tsʼe Proverbios, je chjoónchini itso: “Je nandá xi to maché nʼio xi”. Jmé xi tsoyanile én jebi. Ya Biblia kui síngósonkao je nandá xi nda bʼé tokoán kʼianga fayokao  xínkjín chjota xi jechixan (Prov. 5:15-18). Jngo chjoón kao jngo xʼin xi jechixan koaan kjoáyokao xínkjín. Tonga je nandá xi to maché kuijin tsoyanile nga síchajngi je chjota. Nga fayokao xínkjín je chjota xi tsín xʼinle kʼoa xi tsín chjoónle mani faʼatone kjoatéxomale Niná. Je chjota xi síchajngi toʼma kʼoasʼín, tojo sʼín jngo chjota nga síché. Nga tsín ʼya xi be jme xi tjíosʼín, jngoyanile nga xi male je nandá xi tjíosíché. Tonga tobʼanachale yaole. Nga̱ je Jeobá tíbe ngayeje kʼoa alikui koa̱n chʼa̱nachalee. Nʼio chʼao sʼe̱ tokoán tsa tsín tinda kuiyoñá ngixko̱n Jeobá (1 Cor. 6:9, 10). Kataʼyalasa josʼin bichómani.

¹⁰ Je xi síchajngi tsakui nichxin soa koa̱nle, tsa tsín tichjí skoe̱konni yaole, tsa ʼndí sʼe̱le ninga tsínkui tjíokoyale kʼoa tsa tsín tinda koationi ya yaniʼyale. Kuinga ngisa ndani nga tsín chʼa̱ʼénlee jmeni xi tso je chjoónchini. Je xi síchajngi alikui tinda bationi ngixko̱n Niná kʼoa kui chʼin xi kjoabiya tjenkao tsaotʼale (Prov. 7:23, 26). Ya Proverbios 9:18 itso én xi síkjetʼani: “Ya tsjó kjioya je xi bichókonle”. Tonga ánni nʼio nkjín mani xi ya fikonle je chjoónchini (Prov. 9:13-18).

11. Ánni nga nʼio chʼaotjínni nga pornografía chotsenlee.

¹¹ Je pornografía tjín tojñani. Tjínkʼa xi kʼoatso nga tsín chʼaotjín kʼianga kui chotsenlee. Tonga je xi kui kotsenle sa tsjoake sa tsjoake ma, síkiʼaon kʼoa alikui tichjí beni yaole. Alikui ngotjo chajinniná kʼianga kui ʼyaa je sén xi kjoachajngi tjenkao, nʼio ñʼai maná kʼianga chajinná. Kʼoa je pornografía alikui basenkaoná nga kui nikjaʼaitsjeen je xi chʼaotjín tosaa tosi tonda kui símekonná (Col. 3:5; Sant. 1:14, 15). Je xi pornografía kotsenle nʼio nkjín xi kui jée tsaojin nga síchajngi.

12. Jméni xi sʼiaan tsakui jchaa sén xi kjoachajngi simekonná.

¹² Jméni xi koa̱n sʼin jngo chjotale Cristo tsa toxijña pornografía koa̱ntsen kʼianga tísíchjén teléfonole kʼoa tsa computadorale. Machjén nga tokjoan kʼoechjoale. Je xi koasenkaoná nga kʼoasʼiaan kuiní kʼianga kui si̱kjaʼaitsjeen nga kui xi ngisa chjíle nga miyoná mani je Jeobá. Tjín sén xi tsín ñaki pornografía ʼmile, tonga xi kjoachajngi kaníya jkoaa. Ánni nga tsín koa̱nni nga kui chótsenlee. Kuinga tsín mená nga si̱chajngiaa ya jinni̱ma̱ná (Mat. 5:28, 29). Jngo ndsʼee xi chjotajchínga sʼin tíjna xi David ʼmi, xi Tailandia tsʼe itso: “Kui sikjaʼaitsjenjian, a sa̱sénle Jeobá nga kui skotsenle sén jebi ninga tsínlani pornografía. Kʼoa kui xi basenkaona nga tsínkui kotsenle”.

13. Jméni xi koasenkaoná nga kui chjoéjiaan xi ndatjín.

¹³ Kui xi ndatjín kʼoasʼiaan tsa nokjonchá je Jeobá, nga̱ tsín mená nga chʼao katasʼe kon. Kuinga i̱ tsoni Proverbios 9:10: “Nga nokjonchá Jeobá yaa nroani nga sʼená kjoachjine”. Yaa tsoyaná xi tʼatsʼe jebi ya jña fitsʼiani Proverbios 9. Yaa tsoya tʼatsʼe jngo chjoón xi kjoachjine tsoyanile.

14. Jméni xi tso Proverbios 9:1-6.

¹⁴ (Tʼexkiai Proverbios 9:1-6). f I masjaitʼaná jmeni xi tsoná je Jeobá, je xi kisindaná kʼoa tʼatsʼe nroani je kjoachjine (Prov. 2:6; Rom. 16:27). Je Proverbios kui nchja̱ni jngo ndʼia xi nʼioje kji, xi ñato yásjai nyangi. Jebi kui bakóyaná nga nʼio nda chjota je Jeobá kʼoa kao kjoatsjoa kjoéya toʼyani xi mele koaitjenngi je kjoafaʼaitsjen xi tsjoá.

15. Jméni xi tsoná Niná nga sʼiaan.

 ¹⁵ Je Jeobá nʼio nda chjota kʼoa nʼio nkjín koya jmeni xi tsjoáná. Kui jebi xi bakóyaná capítulo 9 xi tsʼe Proverbios. Je chjoón xi nchja̱ni, xi ñaki kjoachjine tsoyanile jetjínndale ngayeje, je yao kao vino xi sʼio, kʼoa jesénjnandale yámixa̱ (Prov. 9:2). Tojo tso versículo 4 kao 5, je xi ñaki kjoachjine itsole xi tsínle kjoafaʼaitsjen: “Nroao, ticho nioxtilana”. Ánni machjénni nga kuinóʼyalee chjoón jebi. Je Jeobá mele sikuindaná kʼoa tsjoáná kjoachjine. Alikui mele nga kʼia koa̱nchoyaná kʼianga jekjoa kakajiaan kʼoa tsín mele nga chʼao sa̱tío tokoán ngantsjai. Kuinga tsjoánile kjoachjine je xi kixi fitʼale (Prov. 2:7). Tsa nokjonchá je Jeobá mejinná nga tsjoa sʼe̱ kon kʼoa kjuintjenngijián je kjoafaʼaitsjen xi tsjoáná. Tsa kʼoasʼiaan tsjoa sʼe̱ tokoán (Sant. 1:25).

16. Nga tsokjónke Jeobá je Alain, jméni xi kisʼin kʼoa jósʼin kichomani.

¹⁶ Jngola choa̱ kataʼyaa xi bakóná nga nda chjoejiaan jmeni xi nʼia kʼianga nokjonchá je Jeobá. Jngo ndsʼee xi Alain ʼmi xi chjotajchínga sʼin tíjna, maestro ma ya ndʼiaskuela. Itso: “Nkjín xi ñatjen sixá xi kʼoatso nga je película xi pornografía bakó kui tsoya nga koa̱nle sikuinda yaole chjota nga kjoáyokao xínkjín”. Tonga je Alain be nga tsín kʼoatjín. Itso: “Nga tsokjonke je Jeobá alikui kui película jebi kiskotsenle. Kʼoa kixinyale maestro xi ngikʼa ánni nga kʼoasʼin sikjaʼaitsjenña”. Kitjenngi kjoafaʼaitsjen xi tsjoá je kjoachjine jñani i̱ tso: “Ya ndiaa xi tsʼe kjoankjíntokon tangínyao” (Prov. 9:6). Nga kʼoakisʼin, nkjín xi ñatjen síxá xi kiskotʼaya Biblia kʼoa ki kjoajtín.

17, 18. Jmé kjoanda xi sokóle je xi nrʼoéle xi “ñaki kjoachjine”, kʼoa jmé kjoanda xi koyale nichxin xi sʼa nroa (kʼoati chótsenlai sén xi faʼaitʼa).

¹⁷ Nga jao yánchjín xi síkʼaxki̱ libro xi tsʼe Proverbios, kui bakóná jméni xi machjén nga sʼiaan tsa mená nga tsjoa sa̱tío tokoán nichxin xi sʼa nroa. Je xi bʼaʼénle jotso je chjoónchini kui mele bʼétsaojinkao je kjoachajngi. Tokui síkjaʼaitsjen jmeni xi mele, alikui kuenta sʼín jmeni xi koa̱nle nichxin xi sʼa nroa. Tonga to kjoabiya kuichomani nga kʼoasʼín (Prov. 9:13, 17, 18).

¹⁸ Tonga je xi nrʼoéle xi “ñaki kjoachjine” nda bichómani jmeni xi sʼín. Nʼio nkjín koya tsojmi tjínle xi binyakao nga tosi tonda sichriantʼale Niná (Is. 65:13). Je Jeobá itso: “Nda tinóʼyanáo kʼoa kui chi̱nao xi ñaki nda, kʼoa ñaki kui xi nda chine chi̱nao” (Is. 55:1, 2). Nga títsoyaná Jeobá tsjoacha kjimaa jmeni xi tsjoake kʼoa jtichaa kjima jmeni xi jtike (Sal. 97:10). Kʼoati tsjoa satío tokoán nga ʼmiyalee xi kjaʼaí je xi “ñaki kjoachjine”. Yaa mangósoán joni je yánchjín choʼnda  xi síkʼaxki̱ ya capítulo 9 xi tsʼe Proverbios, xi ya tjíonchja̱ ya jñani ngʼa chon ya naxinandá. Kʼoati bixoán jotjíotso: “Toʼyani xi tsínle kjoankjíntokon, katanroa i̱bi”. Ñá kʼoa kao ʼyani xi nrʼoé jmeni xi tsoná je Jeobá tsee kjoanda tjínná ndʼaibi. Tonga kʼoati tse kjoanda sʼe̱ná nichxin xi sʼa nroa. Tsa tosi tonda ya kuitsomayaa ndiaa xi tsʼe kjoankjíntokon, koaan kuiyoaa ngantsjai nichxin (Prov. 9:3, 4, 6).

19. Tojo tso Eclesiastés 12:13, 14, jméni xi sʼiaan (kʼoati chótsenlai je recuadro “ Jósʼin basenkaoná nga nokjonchá Niná”).

¹⁹ (Tʼexkiai Eclesiastés 12:13, 14). g Ningalani nʼio chʼao kjimachon nga nichxin fikjetʼa tiyoaa, tonga tosi tonda kuinókjonchá je Jeobá. Tsa kʼoasʼiaan, si̱kuindañá je ni̱ma̱ná, tsje kjuinkoaa yaoná kʼoa tosi tonda koa̱nchriantʼalee je Jeobá. Nga tsjoachaa je Jeobá kʼoa nga ʼyaxkoán, tosi tonda kʼoakʼuínlee toʼya chjotani nga katabásjai xi ñaki kjoachjine.