1. Tojo tso 1 Pedro 5:2, jmé kjoanda xi tjínle je xi chjotajchínga sʼin tjío.

 JÉ XI chjotajchínga sʼin tjío bánele Jeobá nga sikuinda je choʼndale. Ndsʼee jebi chjí be nga binyakao je ndsʼe̱ kʼoa nda síkuinda (Jer. 23:4; tʼexkiai 1 Pedro 5:2 b). Tsjoa sʼe tokoán nga tjín je ndsʼee xi kʼoasʼin tsjoánganʼio ya jinjtín.

2. Jméni xi ñʼai ma kʼale xi chjotajchínga sʼin tjío.

² Sakʼoa tjín jmeni xi ñʼai male xi chjotajchínga sʼin tjío. Tobʼelañá, tsee xá kjinele nga síkuinda je jtín. Kataʼyala jokoan je Tony, jngo ndsʼee xi chjotajchínga sʼin tíjna ya Estados Unidos. Koanjinle nga tsín toje kʼoakoa̱nyejele je xá xi sʼenele. Itso: “Tsee xá kisʼe kʼianga chʼin COVID-19 koan. Nga kisʼendajin josʼin sa̱kóyason kʼoa josʼin sa̱tío kjoajtín kʼoa kisitjosonña tojme xá xi kisʼenena, tonga koanjinna nga tsínkʼia kjoetʼa je xá ninga nʼio kʼoénelee yaoná nga si̱tjosoán. Nga jeki nichxin tsín titsakʼexkiaña je Biblia, tsín tikiskotʼayaña nga toʼan kʼoa tsín tinanda tsakʼetsʼoaña”. Je Ilir, jngo xi chjotajchínga sʼin tíjna ya Kosovo, yaa tsakʼejna jñani kjoajchán kisʼe kʼoa nʼio ñʼai koanle nga kitjenngi jotso naxinandále Niná. Itso: “Kʼianga kʼoakitsona je sucursal nga koasenkoa je ndsʼee xi tjío jña xkón chon kitsokjonña, kʼoa kʼoasʼin kisikjaʼaitsjen nga tsínkui xi machjén jmeni xi tsakʼinna josʼian”. Kʼoa jngo misionero xi tíjna ya Asia xi Tim ʼmi, nʼio ñʼai koanle nga kisitjoson je xá xi kjinele. Itso: “Sakʼoa kichobejinna je xá”. Jmé xi koa̱n sʼin xi chjotajchínga sʼin tjío tsa kʼoama.

3. Ánni nga kuenta sʼianñá ngatsʼiaa je choa̱ xi tsakʼéjna Gedeón.

 ³ Nda choa̱ bʼéjnale xi chjotajchínga sʼin tjío jokisʼin Gedeón (Heb. 6:12; 11:32). Kisikuindaa je naxinandále Niná (Juec. 2:16; 1 Crón. 17:6). Ñʼai kjimachon nichxin xi tiyoaa ndʼaibi, kʼoa tojo kisʼin je Gedeón, kʼoati kui kjinele xi chjotajchínga sʼin tjío nga sikuinda je naxinandále Niná (Hech. 20:28; 2 Tim. 3:1). Nda choa̱ tsakʼéjnale Gedeón nga nangitokon koan, nga kisitjoson kʼoa nga kichokjoajinle kjoa xi jaʼatojin. Jmeni xi kisʼin Gedeón kʼoati kuinyakaoná ngatsʼiaa nga kʼoainganʼiolee xi chjotajchínga sʼin tjío kʼoa nga chjí jchaa je xá xi sʼín (Heb. 13:17).

4. Jósʼin tsakakó Gedeón nga nangitokon koan.

⁴ Nangitokon koan je Gedeón. c Kʼianga kʼoakitsole jngo ánkje nga je kiskoéjin Jeobá nga kʼoasjentjai naxinandále nga je chjota madianita kjinentsja, je Gedeón i kitso: “Je ntje̱na kui xi ngisasa ʼndí kji xi tsʼe Manasés kʼoa anña xi maʼndía ya niʼyale nʼaina” (Juec. 6:15). Kʼoasʼin kisikjaʼaitsjen Gedeón nga tsín kuitjosonle je xá xi kisʼenele. Tonga je Jeobá be nga kuitjosonle kʼoa jé tsakasenkao.

5. Jósʼin koako je xi chjotajchínga sʼin tjío tsa nangitokon ma.

⁵ Je xi chjotajchínga sʼin tjío bʼénele yaole nga nangitokon ma (Miq. 6:8; Hech. 20:18, 19). Alikui kui ngʼa bʼasjeni yaole jmeni xi male sʼín. Alikui yaole síjtile kʼianga sakʼoa tsín nda sʼín kʼoa tsa tsín sakʼoa nda bichómani jmeni xi bʼéndajin. Tonga jmeni xi ma sakʼoa yaa ʼyanile tsa nangitokon. Tobʼelañá, tsa jngo xi chjotajchínga sʼin tíjna kʼoakuitso nga sitjoson tojme xá xi kʼoaile tonga tsa skanni skoe̱ nga tsínni kʼoakoa̱nle. Tsakui nichxin kʼoakʼuínle nga nʼio nda kasʼín kʼoa tsa tsín nda kʼoaxki̱je̱ nga tsín nda tsakʼéndajin tsa jmeni. Tsa kʼoakjima jngo xi chjotajchínga sʼin tíjna, jósʼin skénngi choa̱le Gedeón.

6. Jméni xi sʼin xi chjotajchínga sʼin tjío nga nangitokon koa̱n joni Gedeón (kʼoati chótsenlai sén xi faʼaitʼa).

⁶ Tijáo nganʼio. Je xi nangitokon majinle nga tsín toje kʼoakoa̱nyejele. Nga nangitokon koan je Gedeón kisijé nganʼio (Juec. 6:27, 35; 7:24). Kʼoati sʼín xi  chjotajchínga sʼin tjío xi sínkjínle kon. Je Tony, xi sa kabʼaxki̱ ya párrafo 2, itso: “Nga kʼoasʼin ngana kiskoesa je xá xi tsakʼaina ninga tsínni kuitjosonyejena. Kuinga kui kichobayanijin tʼatsʼe kjoanangitokon kʼianga kichotʼayajtínjin ya yaniʼya. Kʼoakixinle je chjoónna nga kʼoakatatsona josʼin síkjaʼaitsjen. Kʼoati kiskotsen ijngokʼale video xi faʼaitʼa ya jw.org je xi Koakoyalee kʼoa kʼoaixálee je xi kjaʼaí tojo kisʼin Jesús ʼmi”. Kʼoakitsole ndsʼee xi kjaʼaí nga katabinyakao kʼoa kʼoatso josʼin kichomani nga kʼoakisʼin. Itso: “Nda kjimaxá ya jinjtín, kʼoa ngisaa maʼana ndʼai nga ngisa simiyoa je Jeobá”.

7. Jósʼin koa̱n skénngi je choa̱le Gedeón je xi chjotajchínga sʼin tjío kʼiatsa ʼya xi chʼaosʼin sikʼaxki̱ (Santiago 3:13).

⁷ Ali yaonojin nijtilao tsa ʼya xi chʼaosʼin sikʼaxki̱no. Kʼiatsa ʼya xi chʼaosʼin sikʼaxki̱ je xi chjotajchínga sʼin tjío, tsakui nichxin chʼao sa̱tío kon. Xi kuinyakao nga tsín kʼoakatama kui choa̱le Gedeón. Alikui yaole kisijtile kʼianga chʼaosʼin kisikʼaxki̱ je chjota xi Efraín tsʼe (Juec. 8:1-3). Nangitokon koan, kinrʼoéle kʼoa ngasin nganda tsakjákaonajmí. Kʼoati sʼín je xi chjotajchínga sʼin tjío. Nda binyáño kʼoa ngasin nganda fákaonajmí je xi chʼaosʼin síkʼaxki̱ (tʼexkiai Santiago 3:13). d Kʼianga kʼoasʼín xi chjotajchínga sʼin tjío, ndasʼin biyoaa ya jinjtín.

8. Jósʼin tjínnele sikjaʼaitsjen xi chjotajchínga sʼin tjío kʼiatsa ʼya xi kʼoasjengʼa. Jngo choa̱ tʼejnai.

⁸ Je Jeobá chʼa̱sjengʼao. Nda tsʼaxki̱ je Gedeón kʼianga kinjele kjoajchán nga kikján kao chjota madianita, tonga kʼoakitso nga je Jeobá katabitjongʼa (Juec. 8:22, 23). Kʼoati koa̱n kʼoasʼin je xi chjotajchínga sʼin tjío jokisʼin je Gedeón nga je Jeobá kʼoasjengʼa kʼiatsa jme xi sʼin (1 Cor. 4:6, 7). Tobʼelañá, kʼiatsa kʼoakʼuínle je xi chjotajchínga sʼin tíjna nga nʼio nda tsoya, koaan kʼoakuitso nga tʼatsʼe Niná tínroani jmeni xi tíbakóya kʼoa nga je naxinandále Jeobá xi kʼoasʼin bakóyaná ngatsʼiaa. Koaan kui sikjaʼaitsjenjin xi chjotajchínga sʼin tjío ʼyáni xi bitjongʼa josʼin tsoya, a jé Jeobá axo jé bitjongʼa. Kataʼyala jokoan jngo ndsʼee xi Timothy ʼmi. Kʼianga tosʼa tsakʼaile xá nga chjotajchínga sʼin kʼoéjna nʼio tsjoake koan nga kitsjoa kjoanokjoaya. Itso: “Síxkón xian nga tosʼa bʼetsʼiakoa kʼoa je choa̱ xi kisichjén síxkón tsakatioa. Je ndsʼee tokui kini jokixian, toʼan tsakʼasjengʼana ʼndele nga je Jeobá kʼoasjengʼa”. Je Timothy koanjinle nga tjínnele sikʼantjaiyajin josʼin nga tsjoá je kjoanokjoayale ánni nga tsín toje kuenta koa̱nni (Prov. 27:21). Jósʼin kichomani. Itso: “Tjínkʼa ndsʼee xi kʼoatsona nga binyakao je kjoanokjoaya xi tsjoa nga chókjoajinle je kjoa xi faʼatojin kʼoa nga ngisa machriantʼale Jeobá. Ngisaa nda sʼe tokoan nga kʼoatsona je ndsʼee tikʼoajinni nga toʼan tsakʼasjengʼana ngasʼa”.

9. Jósʼin tsaʼyanile je Gedeón tsa nʼiojin kjoaixi kʼoa tsa sítjoson (chótsenlai sén xi faʼaitʼa ya portada).

⁹ Kʼianga juez jekoan je Gedeón kʼiaa tsaʼyale tsa nʼiojin kʼoa tsa sítjoson kjoaixi. Je Jeobá kʼoakitsole nga katasíxkoa̱ je sonxta xi tsʼe Baal xi tsakʼénda je nʼaile (Juec. 6:25, 26). Xijekoan, je Gedeón kiskoéjin chjotakjoajchánle kʼoa jao kʼa kʼoakitsole Jeobá nga tjínnele sichoaya (Juec. 7:2-7). Kʼoakitsole nga kʼia nga nitje̱n katafisíkjeson chjotakontrale (Juec. 7:9-11).

10. Jósʼin koakoni xi chjotajchínga sʼin tjío tsa sítjoson kjoaixi.

¹⁰ Je xi chjotajchínga sʼin tjío tjínnele sitjoson (Sant. 3:17). Kʼianga kʼoasʼin fitjenngi jotso Biblia kʼoa jotso je naxinandále  Niná nda choa̱ batíole xi ngikʼa. Tonga sakʼoa ñʼai male nga fitjenngi jmeni xi tso je naxinandále Niná. Tsakui nichxin kʼoasʼin sikjaʼaitsjen tsa kjoanʼio machjén nga koaitjenngi jmeni xi tíʼmile. Tsakui kʼoakʼuínle nga kui kʼoasʼin jmeni xi ñʼai koa̱nle nga  sitjoson, jósʼin skénngi je choa̱le Gedeón.

11. Jmé xi kuinyakao je xi chjotajchínga sʼin tjío nga sitjoson.

¹¹ Nda titjoson jmeni xi ʼmino. Je Jeobá kʼoakitsole je Gedeón josʼin tjínnele sixkoa̱ je sonxta xi tsakʼénda je nʼaile. Kʼoati tsakʼinle jñani kʼoendale je sonxta je Jeobá kʼoa jokjoan cho̱ xi tjínnele tsjoátʼa. Je Gedeón nda kisitjoson jmeni xi kitsole Niná. Nichxin xi tiyoaa ndʼaibi, je xi chjotajchínga sʼin tjío jé naxinandále Niná síkasénle carta kʼoa tsjoále kjoafaʼaitsjen josʼin sikuinda je jtín kʼoa josʼin tjínnele kuitsoyale Énle Niná. Nda sʼín je xi chjotajchínga sʼin tjío nga fitjenngi je kjoafaʼaitsjen xi bʼaile. Kʼoa nga kʼoasʼin sítjoson nʼio nda binyakao je jtín (Sal. 119:112).

12. Jósʼin koaitjenngi xi chjotajchínga sʼin tjío jmeni xi tso Hebreos 13:17 kʼianga jme xi síkʼantjaiyajin naxinandále Niná.

¹² Titjoson kʼianga jme xi bʼantjaiyajin naxinandále Niná. Je Jeobá kʼoakitsole Gedeón nga nʼio tochoa chjotakjoajchán katafikao (Juec. 7:8). Tsakui nichxin kui kisikjaʼaitsjen tsa nda kuichomani jme xi tsakʼinle. Ninga kʼoalani kisitjoson jotsakʼinle. Je xi chjotajchínga sʼin tjío kʼoati tjíosʼín jokisʼin je Gedeón nga fitjenngi jme xi bʼantjaiyajin naxinandále Niná (tʼexkiai Hebreos 13:17). e Tobʼelañá, kʼianga nó 2014, je Cuerpo Gobernante kʼoakitso nga kʼoantjaiyajin josʼin sʼenda je Ndʼia jña chotʼayá kao ndʼia xi machjén nga satío je kjoajtíntse (2 Cor. 8:12-14). Ngasʼa kʼoasʼin tjínndajin nga tonikinyale tao̱n je jtín nga bʼénda Ndʼia jña chotʼayá, kʼoa xijema tochoa choaa síjndani. Ndʼaibi tsen sʼejnatʼaxin je tao̱n xi machjén nga sʼenda Ndʼia jña chotʼayá kʼoa tsín tikui kuenta mani jotjín tao̱n tsjoá je jtín. Kʼianga kisʼejinle jngo ndsʼee xi José ʼmi tʼatsʼe jebi to jao kisʼe kon. I kitso: “Xi i̱bi alikuijin kʼoakoa̱n, nijngojinla Ndʼia jña chotʼayá sʼe̱nda”. Tonga kisitjoson josʼin tsakʼéndajin je naxinandále Niná. Itso: “Kui kisikjaʼaitsjen jotso Proverbios 3:5, 6 nga tjínnena je Jeobá sinʼiotʼa. Kʼoa nʼio nda tíbichótsjoá jme xi kisʼendajin, nga̱ nʼio nkjín Ndʼia jña chotʼayá tjíosʼenda kʼoa tibatioñá je tao̱n ninga tochoa ánni nga tosi tonda kʼoakatamani”.

13. 1) Jméni xi tsín jao tsakʼé kon je Gedeón. 2) Jméni xi tjínnele sʼin xi chjotajchínga sʼin tjío nga kʼoatisʼin jokisʼin je Gedeón (kʼoati chótsenlai sén xi faʼaitʼa).

¹³ Nʼiojin katamao nga kʼoatʼiaon josʼin  mele Jeobá. Je Gedeón kisitjosonle Jeobá ningalani xkón tsakʼejna kʼoa ningalani kitsokjon (Juec. 9:17). Nga kʼoakitsole Jeobá je Gedeón nga je koasenkao ñaki tsakʼéjngo kon nga je kʼoasjentjai naxinandále. Je ndsʼee xi chjotajchínga sʼin tjío, xi ya tjío jñani tíchjoale je xále Niná kʼoati sʼín jokisʼin je Gedeón. Bʼéndajin josʼin satío kjoajtín kʼoa josʼin sakóyason ningalani be nga kuindoa̱ kʼoa tsa ndoyá cha̱ni, tsa xále sicha kʼoa tsa totaon jcha. f Kʼianga kjoaʼaí kjoañʼai xi nʼio tse machjén nga nʼiojin koa̱n xi chjotajchínga sʼin tjío nga koaitjenngi josʼin koandiaale je naxinandále Niná. Tsakui nichxin kui kʼoakuitsoná jókʼuínlee je chjota nga kʼuínyasonlee nga tojeme ni̱kjeson je chjotatsʼen, kʼoa én jebi yaa koa̱nngóson joni jtsílao̱. Kʼoa tsakuije̱ nga kʼoakuitsoná jósʼiaan nga kuinje̱ngilee yaoná kʼianga kʼoetʼaná je Gog xi tsʼe Magog, xi tsonile, xi jngo jtín naxinandá (Ezeq. 38:18; Apoc. 16:21).

14. Jókji kjoama̱ tsakʼéngi Gedeón nga kisikjeson je chjotakontrale.

¹⁴ Kʼianga juez koan je Gedeón tsee xá xi kisʼin. Kʼianga kisíkjeson je chjota madianita nga nitje̱n, nkjín xi kitokachjinga tonga kitokatjenngile ya tjen Jezreel saʼnda nga kichokao ya xo̱ngá Jordán. Tsakui nichxin chʼao chon ʼnde jebi kʼoa naʼyá tjín (Juec. 7:22). Ningalani jekijtale je Gedeón kao chjotakjoajchánle xi 300 mani, tosi tonda kitokatjenngile je chjota madianita josaʼnda nga kixontsja (Juec. 8:4-12).

15. Jméni xi sakʼoa ñʼai male xi chjotajchínga sʼin tjío.

¹⁵ Kʼianga síkuinda je xi chjotajchínga sʼin tjío je familiale kao je jtín kʼoati chan bijtale kʼoa tsín tinda satío sakʼoani kon. Jósʼin koaitjenngi je choa̱le Gedeón nga kʼoasatío kon.

16, 17. 1) Jméni xi tsakasenkao je Gedeón nga kichokjoajinle. 2) Jméni xi tsín jao kʼoe kon xi chjotajchínga sʼin tjío (Isaías 40:28-31; kʼoati chótsenlai sén xi faʼaitʼa).

¹⁶ Kʼoatʼao tokon nga je Jeobá koasenkaono.  Kʼoakisʼin je Gedeón kʼoa tsakasenkao Jeobá (Juec. 6:14, 34). Ñandia nga je Gedeón kao chjotale to ndso̱koo kitokatjennginile nga jao rey xi Madián tsʼe, xi camello tjíoson nga kitokachjinga (Juec. 8:12, 21). Je Jeobá tsakasenkao nga kichotjenngile kʼoa nga kisikʼien rey jebi. Je xi chjotajchínga sʼin tjío koaan kʼoati je Jeobá sinʼiotʼa nga̱ jé tsjoále nganʼio xi koa̱nchjénle. Nga̱ je Jeobá alikʼia bijtale kʼoa ni chóbejinlale (tʼexkiai Isaías 40:28-31). g

¹⁷ Kataʼyala jokoan je Matthew, xi ya tíjnajinle je Comité de Enlace con los Hospitales. Itso: “Ñaki tiʼbeña nga tíbasenkaona je Niná tojo tso ya Filipenses 4:13. Kʼianga kʼoasʼin sikjaʼaitsjen nga tsín tichókjoanina, jé Jeobá bʼetsʼoale nga sijéle nganʼio nga koa̱n koasenkoa je ndsʼee, kʼoa je Jeobá tsjoána nganʼio nga chókjoajinna”. Kʼoati sʼín xi chjotajchínga sʼin tjío jokisʼin je Gedeón nga síkuinda je jtín ninga sakʼoa ñʼai male. Tonga kʼoati nangitokon ma, nga̱ be nga tsín toje kuitjosonyejele. Tjíojngoo kon nga nrʼoéle Jeobá kʼoa nga je tsjoále nganʼio nga kuitjosonle je xá xi kjinele (Sal. 116:1; Filip. 2:13).

18. Tojosʼin kaʼyaa, jósʼin skénngile Gedeón je xi chjotajchínga sʼin tjío.

¹⁸ Tojosʼin kaʼyaa koaan skénngi choa̱le Gedeón je xi chjotajchínga sʼin tjío. Tjínnele koako nga nangitokon ma nga kʼoakuitso tsa kʼoakoa̱nle kʼoa tsa mai nga tsesa xá sʼe̱nele. Kʼoati tjínnele nangitokon koa̱n kʼiatsa ʼya xi kʼoasjengʼa kʼoa tsa chʼaosʼin sikʼaxki̱. Tjínnele nʼiojin koa̱n kʼoa sitjoson jme xi kʼuínle, ngisaa nga to jenichxin fetʼa tiyoaa ndʼai. Kʼoa tjínnele kʼoejngo kon nga je Jeobá koasenkao nga chókjoajinle je kjoa xi kjoaʼatojin. Nʼio chjí ʼyatokoán je xá xi sʼín ndsʼee jebi (Filip. 2:29).