KJOAʼMIYA XI CHOTʼAYA 23
KJOAJNDA 28 Jósʼiaan nga miyole koaan je Jeobá
Je Jeobá kʼoatsoná nga si̱miyoaa
“Je ndʼianajñona yaa kʼoéjnajinle; an koa̱n Ninále” (EZEQ. 37:27).
XI TÍNCHJA̱NI
I̱ kjoaʼmiya jebi kui jchaa jókji chjíle nga kʼoatsoná je Jeobá nga ya ndʼianajñole kuiyoʼyá, kʼoa kʼoati ngisa nda koa̱njinná jósʼin síkuindaná kʼianga ya ndʼianajñole tiyoʼyá.
1, 2. Jméni xi tsoná je Jeobá.
KʼIATSA ʼya xi skónanginá jósʼin ʼyatokoán je Jeobá, kʼoajin kʼuínlee nga Nʼainá mani, nga miyoná mani kʼoa nga Nináná mani, kʼoa nkjín koya jmesani xi bixoán. Tonga a kʼoabixoán nga ya mangóson je Jeobá josʼín jngo chjota nga nchja̱ná ya ndʼiale.
2 Kʼianga kui kinchja̱ni je David nga miyo tsole Jeobá je choʼndale xi kixi fitʼale yaa kisingósonkao tojo sʼín jngo chjota kʼianga ʼya xi nchja̱le ya niʼyale. I kitso: “Ji Jeobá, ʼyáni xi koa̱n ya kʼoéjna ya ndʼianajñoli. ʼYáni xi kʼoéjna ya nindo tsjeli” (Sal. 15:1). Tojo tso texto jebi, koaan ya ndʼianajñole Jeobá kuiyoʼyá, xi tsonile, koaan miyole koaan.
JE JEOBÁ KUI XI MELE NGA YA NDʼIANAJÑOLE KUIYOAA
3. Jókisatio kon je Jeobá kao Jesús nga ñatjen tsakatio.
3 Nga títjon tojé Jeobá tíjna, tonga kʼianga jekisinda je ʼNdíle alikui titoje tsakʼejnani. Kui xi tsonile nga je Jesús xi ya tsakʼejnaʼya títjon ya ndʼianajñole Jeobá. Je Jeobá nʼio tsjoa kisʼe kon nga ya tsakʼejna je ʼNdíle. Je Biblia kʼoatso nga nʼio tsjoa tsakʼé kon je Jeobá nga ñatjen tsakatio kao Jesús, kʼoa je Jesús kʼoati nʼio tsjoa kisʼe kon (Prov. 8:30).
4. ʼYáni xi ya tsakatioʼya ya ndʼianajñole Jeobá nga koanskanni.
4 Xijekoan, je Jeobá kʼoati kisinda je ánkje kʼoa miyole koanni. Kui xi tsonile nga ya tsakatioʼya ya ndʼianajñole Jeobá. Je Biblia kʼoatso nga “xtile Niná” mani kʼoa nga nʼio tsjoa tjío kon nga ya tjíokao Jeobá (Job 38:7; Dan. 7:10). Nʼio nkjín nó nga toje xi ya ngʼajmi tjío xi miyo kitsole Jeobá. Tonga nga koanskanni, kʼoati nkjín chjota xi miyole koanni. Jolani Enoc, Noé, Abrahán kao Job. Je Biblia kʼoatso nga miyole koanni chjota jebi nga̱ kisitjosonle (Gén. 5:24; 6:9; Job 29:4; Is. 41:8).
5. Jméni xi bakóyaná jotso Ezequiel 37:26, 27.
5 Jokji tífaʼato nó je Jeobá kʼoatítsole je chjota nga ya katabichókatio ya ndʼianajñole (tʼexkiai Ezequiel 37:26, 27). a Texto jebi kʼoatsoná nga kui xi mele je Jeobá nga miyole katamaa. Jngo kjoasʼendajin tsakʼénda Jeobá kao choʼndale nga nda koatio. Tíbitjoson én jebi nichxin xi tiyoaa ndʼaibi, nga̱ jtín tjío je choʼndale Niná xi ya tjínle kjoachoya ya ngʼajmi kao xi i̱ Sonʼnde koyale koatio (Juan 10:16).
JÉ JEOBÁ SÍKUINDANÁ TOJÑANI TIYOAA
6. Jñáni tíjna ndʼianajñole Jeobá, kʼoa kʼiáni nga ya bitjasʼeen.
6 Nga ndʼianajño tsakatioʼya chjota nichxin kjoatse, yaa kisikjáyani kʼoa yaa tsakationgʼiánngi kʼiatsa jtsí tsakʼa. Kʼoa tsa ʼya chjotani xi ya kicho kʼoati nda koansinle. Kʼoatisʼinni ñá, jngoyanile ya bitjasʼeen ya “ndʼianajñole” Jeobá kʼianga bʼaitʼalee yaoná (Sal. 61:4). Nkjín koya xi tsjoáná je Jeobá nga tosi tonda miyole koaan, kʼoa tsjoa satío tokoán nga ya ñatjen biyoaa kao je miyole. Je ndʼianajñole Jeobá yaa tíjna jñani tjío ngatsʼi choʼndale xi sítjosonle. Je ndsʼee xi xin naxinandá fi kjoajtíntse be nga kʼoatjín jebi, nga̱ nkjín ndsʼee bexkon xi xinxin ʼndele (Apoc. 21:3).
7. Ánni kʼoabixónsíñá nga tojo ya ndʼianajñole Jeobá tjíoʼya je choʼndale xi jekʼien xi kixi kitʼale (kʼoati chótsenlai sén xi faʼaitʼa).
7 Je choʼndale Jeobá xi jekʼien joxi tsoyanile nga tojo ya ndʼianajñole Jeobá tjíoʼya nga̱ faʼaitsjenle Jeobá xi tʼatsʼe. Je Jesús i kitso: “Je xi kʼen kjoaʼáyanile. Nda tsa Moisés kʼoasʼin tsakakósontsen, ya jña tjítʼa xi tʼatsʼe ʼndíyánaʼyá, jña nga kitsole Nainá Ninále Abraham, kʼoa Ninále Isaac, kʼoati Ninále Jacob. Niná ali Ninále xi kʼenjin, tonga tsʼe xi tjíokon, nga̱ ngatsʼi tʼatsʼe Niná tjíokon” (Luc. 20:37, 38).
Je choʼndale Jeobá xi jekʼien tojo yaa ndʼianajñole Jeobá tjíoʼya nga̱ tojo faʼaitsjenle xi tʼatsʼe (Chótsenlai párrafo 7)
KJOANDA XI TJÍNNÁ KAO XÁ XI KJINENÁ
8. Jmé kjoanda xi tjínná nga ya ndʼianajñole Jeobá tiyoʼyá.
8 Tojo koan nichxin kjoatse nga ya kisikjáyani jngo chjota ya ndʼianajño kʼoa nga koanngʼiánle nga ya kichokʼejnaʼya tsa jtsílani tsakʼa, kʼoatisʼinni nichxin xi tiyoaa ndʼai, nga ya ndʼianajñole Jeobá tiyoʼyá jé basenkaoná nga tosi tonda nda kuiyoaa ngixko̱n kʼoa tsjoáná kjoachoya. Tsa tsín si̱kjinlee Jeobá alikui koa̱nle je Na̱i tondiaa sikiʼaonná (Sal. 31:23; 1 Juan 3:8). Kʼianga jeʼndenaxó koa̱n sonʼnde, je Jeobá kuinyakao je choʼndale xi kixi koaitʼale nga tosi tonda nda koatio ngixko̱n kʼoa tsín tikuiyáni (Apoc. 21:4).
9. Jméni xi tjínnele sʼin xi ya tjíoʼya ndʼianajñole Jeobá.
9 Tsee kjoanda tjínná nga ya ndʼianajñole Jeobá tiyoʼyá kʼoa nga koa̱n miyole koaan ngantsjai nichxin. Tonga jméni xi machjén nga sʼiaan nga tosi tonda ya kuiyoaa ya ndʼianajñole. Jngola choa̱ si̱kʼéjnaa, kʼiatsa ʼya xi ya ndʼiale kuinchja̱ná kʼoajin sʼiaan jmeni xi kuitsoná, jolani tsa kʼoakuitsoná nga kʼoétsaojne je jténá tsa ndási kjoan nga kjesa bitjasʼenjián je ndʼia. Tikʼoasʼinni, machjén nga jchaa jméni xi mele Jeobá nga sʼiaan nga tosi tonda ya ndʼianajñole kuiyoʼyá. Nga nʼio tsjoachaa nitjosonñá jmeni xi tsoná (Col. 1:10). Ningalani miyoná mani je Jeobá machjén nga koakolee kjoaxkóntokon, nga̱ Nʼainá mani kʼoa Nináná mani (Sal. 25:14). Kuinga machjénni nga koakolee kjoaxkóntokon ngantsjai. Nga nokjonchá je Jeobá alikui kui kʼoanʼia jmeni xi tsín sasénle kʼoa nangitokon maa (Miq. 6:8).
ALIKUI ʼYA XI TSAKJAʼÁJIN YA ʼNDEKIXÍ
10, 11. Ánni kʼoabixónsíñá nga tongóson síkao Jeobá je choʼndale. Jngo choa̱ tʼejnai.
10 Je Jeobá tongóson síkao je miyole (Rom. 2:11). Yaa ʼyañá jokisikao je chjota israelita kʼianga tsakatio ya ʼndekixí jña Sinaí tsakʼin.
11 Kʼianga jekisikatíondái Jeobá je chjota israelita nga kitjoni ya Egipto, je Jeobá naʼmi tsakinyánda xi ya kisixá ya ndʼianajñole. Kʼoati nkjín xá kitsjoale Jeobá je chjota levita xi ya kisixá ya ndʼianajñole. Tjín chjota israelita xi ya kisixá ya ndʼianajñole Jeobá kʼoa tjín xi ya chrian tsakatio. Ninga kʼoalani, tongóson sʼin kisikuinda ngatsʼi chjota israelita.
12. Jósʼin ʼyañá nga tongóson kisikao Jeobá ngatsʼi chjota israelita ya ʼndekixí (Éxodo 40:38; kʼoati chótsenlai sén xi faʼaitʼa).
12 Koan kisimiyo ngatsʼi je chjota israelita je Jeobá ninga tsínkjoan ya chrian tsakatio jñani tíjna ndʼianajño kʼoa ninga tsín ya kisixá. Tsabe ngatsʼi chjota israelita je lʼí kao yojbi xi tsakándiaale, xi ya kixinyason ya ndʼianajño (tʼexkiai Éxodo 40:38). b Kʼoa nga síkjan yojbi nga jexin ndiaa fi, tsabe ngatsʼi chjota israelita ninga je xi tsín ya tjíochrian jñani tíjna je ndʼianajño. Tsakʼéxkó tsojmile, kisikixoya ndʼianajñole kʼoa kʼoasʼin ndiaa ki ngatsʼi josʼin ndiaa ki je yojbi (Núm. 9:15-23). Jao xjao xi plata koanndani kinikjanele kʼianga kisʼejinkon nga xin ʼnde koaikatio, kʼoa kinrʼoé ngatsʼi je chjota israelita kʼianga jane je xjao (Núm. 10:2). Ali tsa tojejin nʼio kisimiyo Jeobá je xi ya tsakatio chrian jñani kisʼejna je ndʼianajño, kisikuinda ngatsʼi chjota israelita kʼoa tsakándiaale. Jngoyanile nga ya tsakatioʼya ngatsʼi chjota israelita ya ndʼianajñole Jeobá. Kʼoatisʼinni nichxin xi tiyoaa ndʼaibi, tsjoakená je Jeobá kʼoa síkuindaná tojñani tiyoaa.
Kʼianga ya kisʼejna ndʼianajño ya ngabasenle jñani tsakatio chjota israelita kʼoasʼin tsakakóni Jeobá nga tsín ʼya xi tsakjaʼájin (Chótsenlai párrafo 12)
KʼOATI TONGÓSON SÍKAONÁ JEOBÁ NICHXIN XI TIYOAA NDʼAI
13. Jósʼin ʼyañá nga tongóson síkaoná Jeobá nichxin xi tiyoaa ndʼai.
13 Tjínkʼa ndsʼee xi ya tjíochrian ya Betel kʼoa tsa yaje̱ jña tjen tísʼendiaanile xále Niná jngo tjíjtsa Sonʼnde, kʼoa tjínkʼa xi ya síxá ya ʼnde jebi. Nkjín koya xá xi sʼín je ndsʼee kʼoa yaa síxákao je ndsʼee xi bándiaale xále Niná. Tjín ndsʼee xi superintendente xi tsʼe circuito sʼin tjíosíxá. Kʼoati tjín je ndsʼee kao tichjaa xi kʼoati ñaki to xále Niná tjíosʼín. Ningalani tsín tongatsʼiaa nga kʼoasʼin tinixá, ʼyañá nga tsjoakená Jeobá kʼoa síkuindaná nga jngó jngoá nga ya ndʼianajñole tiyoʼyá (1 Ped. 5:7). Síkuindaná ngatsʼiaa je Jeobá, bándiaaná kʼoa tsoyaná je Énle.
14. Jósasʼin bakó je Jeobá nga tsín ʼya xi faʼájin.
14 Jósasʼin ʼyaa nga tsín ʼya xi faʼájin Jeobá. Kuinga kjiole Biblia chjota jngo tjíjtsa Sonʼnde. Kui je én hebreo, én arameo kao én griego kichji títjonni je Énle Niná, tonga ali tsakuijin xi tsonile nga ngisa miyole mani je chjota xi kui én nchja̱ (Mat. 11:25).
15. Ijngosa choa̱ tikʼaxki̱ jósʼin bakóná Jeobá nga tsín ʼya xi faʼájin (kʼoati chótsenlai sén xi faʼaitʼa).
15 Kʼianga nda kuiyoaa ngixko̱n Jeobá ali tsakuijin xi tsoni jokji kjoachjine tjínná kʼoa tsa maná bʼexkiaa je én xi kichji títjonni Biblia. Ali tsa tojejin bakóyale Jeobá chjota xi nʼio chjine, bakóyale je Énle toʼya chjotani. Tísakóyale Énle Niná chjota jngo tjíjtsa Sonʼnde nga koa̱n miyole Niná koa̱n, nga̱ jejmi én tífaʼatoya je Biblia (2 Tim. 3:16, 17).
Kʼoasʼin bakóni Jeobá nga tsín ʼya xi faʼájin kʼianga jenʼio nkjín én tífaʼatoya je Biblia (Chótsenlai párrafo 15)
TOSI TONDA KUI KʼOASʼIAAN XI SASÉNLE JEOBÁ
16. Jméni xi machjén nga sʼiaan tsa mená tosi tonda ya kuiyoʼyá ya ndʼianajñole Jeobá (Hechos 10:34, 35).
16 Nʼio tse kjoanda tjínná nga ya ndʼianajñole Jeobá tiyoʼyá, nga̱ nʼio nda chjota kʼoa nʼio tsjoakená. Je Jeobá tongóson síkao toʼyani, alikui kui fini jñáni tsʼe chjota, jósʼin ngale, jókji kjoachjine tjínle, jósʼin tsen yaole, jótjín nóle, a xʼin axo chjoón. Tokuikjoán xi síjéná Jeobá nga si̱tjosonlee tsa mená tosi tonda ya kuiyoʼyá ya ndʼianajñole (tʼexkiai Hechos 10:34, 35). c
17. Jmé xi chótʼayajiaan ya kjoaʼmiya xi ijngo.
17 Tojo tso ya Salmo 15:1, je David i kitso: “Ji Jeobá, ʼyáni xi koa̱n ya kʼoéjna ya ndʼianajñoli. ʼYáni xi kʼoéjna ya nindo tsjeli”. Jé Jeobá tsakándiaale David nga kitsoya tʼatsʼe jebi, kʼoa yaa kjoaʼmiya xi ijngo kuitsoyaná jméni xi tjínnele sʼiaan nga tosi tonda miyoná koa̱nni je Jeobá kʼoa nga tosi tonda nda kuiyoaa ngixko̱n.
KJOAJNDA 32 Je Niná tʼainganʼiolai
a Ezequiel 37:26, 27: “Kʼoa kʼoendajinña kao je nga nda koatio; kʼoasʼin kʼoendajian ngantsjai nichxin. Sinkjínyaña kʼoa yaa sikʼéjnajinle je yo̱ngo̱na ngantsjai nichxin. 27 Je ndʼianajñona yaa kʼoéjnajinle; an koa̱n Ninále kʼoa je naxinandána koa̱n”.
b Éxodo 40:38: “Jokjitse nga kʼoasʼin tsakʼetsoma, tsabe ngatsʼi chjota israelita nga ya ndʼianajñole Jeobá kisʼejnason yojbi kʼianga nichxin kʼoa lʼí kisʼejnason kʼianga nitje̱n”.
c Hechos 10:34, 35: “Kʼia Pedro tsakʼétsʼia nga kinchja̱: Kjoakixi ní, tiʼbenía nga Niná tongóson fikao ngatsʼi. 35 Tojñani sonʼnde, je xi tsokjónke Niná, xi sʼín xi kjoakixi, Niná tjaokení”.
