1. Jmé xi koasenkaoná nga tosi tonda je Jeobá si̱xálee ninga kjoa kuitjátojiaan.

 JE Biblia kʼoatso nga toxá ñʼai koa̱nchonni nichxin xi tiyoaa ndʼaibi (2 Tim. 3:1). Ngatsʼiñá nga kjoa bitjatojiaan, kʼoa xi choʼndale Jeobá maa majtikená je chjota kʼoa fitjenngikená. Nga si̱kjaʼaitsjenjiaan nga tíjna je Jeobá kui xi koasenkaoná nga tosi tonda je jchaxkoán ninga kjoa kuitjátojiaan (Jer. 10:10; 2 Tim. 1:12).

2. Jósʼin bakó Jeobá nga ñaki tíjna kjoaixi.

² Je Jeobá be jme kjoa xi bitjatojiaan kʼoa basenkaoná ngantsjai (2 Crón. 16:9; Sal. 23:4). Nga ʼyaa nga tíjna je Jeobá chókjoajinná tojme kjoa xi kuitjátojiaan. Kataʼyala josʼin tsakasenkao jebi je rey David.

3. Ánni nga i̱ kitsoni je David: “Tíjnaa je Jeobá”.

³ Je David nda tsabexkon je Jeobá kʼoa jé kisinʼiotʼa. Kʼoa nga títokachjingale je rey Saúl kao xi kjaʼaísa chjota jé Jeobá kisijéle nganʼio (Sal. 18:6). Nga tsabe David kʼianga tsakasenkao Jeobá, i kitso: “Tíjnaa je Jeobá” (Sal. 18:46). Ali tsa tokuijin xi kitso je David nga tíjna Niná. Jngo xo̱n xi kʼoatso nga ñaki kisʼejngo kon je David “nga tíjna je Niná, nga basenkao naxinandále kʼoa jé kisinʼiotʼa”. Je David ngisaa tikisʼejngongáni kon nga tíjna je Jeobá nga̱ tsabe josʼin tsakasenkao, kʼoa tosi tonda je Jeobá kisixále (Sal. 18:​28, 29, 49).

4. Jósʼin basenkaoná nga nikjaʼaitsjenjiaan nga tíjna kjoaixi je Jeobá.

 ⁴ Kao kjoatsjoa si̱xálee Niná tsa tjínjngo tokoán nga tíjna kjoaixi. Chókjoajinná tojme kjoa xi kuitjátojiaan, tosi tonda je si̱xálee kʼoa alikui si̱kjinlee.

JÉ NINÁ TSJOÁNGANʼIONÁ

5. Ánni tjínjngoni tokoán nga chókjoajinná tojme kjoa xi kuitjátojiaan (Filipenses 2:13).

⁵ Chókjoajinná tojme kjoa xi kjoaʼaínená tsa si̱kjaʼaitsjenjiaan nga tíjna je Jeobá kʼoa tsa ñaki tjínjngo tokoán nga je koasenkaoná. ʼYañá nga nʼio tse nganʼio tjínle kʼoa koaanle koasenkaoná tojme kjoa xi kuitjátojiaan (tʼexkiai Filipenses 2:13). a Nga ʼyaa nga basenkaoná je Jeobá kʼianga kjoa bitjatojiaan, tjínjngo tokoán nga je koasenkaoná ninga tse kjoa kjoaʼaínená.

6. Jmé kjoa xi jaʼatojin David xi tsakasenkao nga ngisa kisinʼiotʼa je Jeobá.

⁶ Jaola koya kataʼyaa xi tsakasenkao David nga ngisa kisinʼiotʼa je Jeobá. Kʼianga tikoʼnda David je barréle nʼaile, ñandia nga jngo xa kichonrʼoe je barré kʼoa ñandia nga jngo oso kicho. Kʼianga kʼoakoan, nʼiojin koan je David kʼoa kisitoánntjai je barré. Alikui je tsakʼasjengʼa yaole David nga̱ koanjinle nga je Jeobá tsakasenkao (1 Sam. 17:​34-37). Alikui kichajinle David josʼin tsakasenkao Jeobá kʼoa nga kui kisikjaʼaitsjenjin ngisaa tikisʼejngongáni kon nga je Jeobá koasenkao tojme kjoa xi kjoaʼatojin.

7. Jmé xi kuenta kisʼin je David, kʼoa jmé xi tsakasenkao nga kisikinjele je Goliat.

⁷ Kʼianga sʼa xti je David, ñandia nga ya kicho jñani tjío je chjota israelita nga skaan kao chjota filisteo. Nʼio tjíotsokjón je chjota israelita nga kʼia kʼoa kinrʼoé nga i̱ kitso je Goliat, je chjota filisteo xi nʼio ngʼa kji: “Tibʼetʼano ndʼaibi chjotakjoajchánle Israel” (1 Sam. 17:​10, 11). Kuinga nʼio kitsokjonni chjota israelita nga̱ tokui kini jmeni xi títso je Goliat kʼoa nga nʼio ngʼa kji (1 Sam. 17:​24, 25). Tonga je David alikui kʼoakisʼin. Koanjinle nga tsín toje chjota israelita xotítsole je Goliat, nga jekjoánni Niná xotítsole (1 Sam. 17:26). Ñaki kʼoatsakʼé kon je David nga je Jeobá koasenkao tojosʼin tsakasenkao kʼianga kisikuinda je barréle nʼaile. Jé Jeobá tsakasenkao nga kisikʼien je Goliat (1 Sam. 17:​45-51).

8. Jmé xi koa̱n sʼiaan nga sʼe̱jngo tokoán nga basenkaoná je Jeobá kʼianga kjoa bitjatojiaan (kʼoati chótsenlai sén xi faʼaitʼa).

⁸ Joni je David chókjoajinná tojme kjoa xi kuitjátojiaan tsa si̱kjaʼaitsjenjiaan nga je Niná koasenkaoná (Sal. 118:6). Ngisaa sʼe̱jngo tokoán nga je Jeobá koasenkaoná tsa si̱kjaʼaitsjenjiaan jmeni xi kisʼin nichxin kjoatse. Tobʼelañá, koaan kui kʼoéxkiaa jñani kʼoatso Biblia josʼin tsakasenkao je choʼndale nichxin kjoatse (Is. 37:​17, 33-37). Koaan kʼoéxkiaa jmeni xi faʼaitʼa ya jw.org jñani kʼoatso josʼin tíbasenkao Jeobá je choʼndale nichxin xi tiyoaa ndʼaibi. Basenkaoná nga jngó jngoá tojosʼin tsakasenkao je David. Ninga tsínkjoan kʼoakoaan jokoan je David nga jngo xa kʼoa jngo oso kisikʼien, je xi ngisa chjíle kuinga si̱kjaʼaitsjenjiaan jósʼin tíbasenkaoná Jeobá, jolani nga miyole kjimaa (Juan 6:44).  Kuinga ya naxinandále tiyojinñá nga̱ jé tíbasenkaoná. Koaan kʼoatʼinlai Jeobá nga katafaʼaitsjenli josʼin basenkaoli kʼianga bʼetsʼoalai. Tikjaʼaitsjenjin josʼin tsakasenkaoli kʼianga nganʼio koanchjénli kʼoa kʼianga kjoa kitjatojin. Nga kui si̱kjaʼaitsjenjin jebi, ngisaa sʼe̱jngo tokuin nga tosi tonda je Jeobá koasenkaoli.

9. Jméni xi kuenta sʼiaan kʼianga kjoa bitjatojiaan (Proverbios 27:11).

⁹ Kʼianga kjoa bitjatojiaan, machjén nga si̱kjaʼaitsjenjiaan jméni xi ngisa chjíle. Nga̱ je Na̱i kʼoatso nga si̱kjinlee je Jeobá kʼiatsa kjoa kuitjátojiaan. Jmeni xi sʼiaan yaa koakoñá ʼyáni xi mená nga tsjoa kʼoé kon (Job 1:​10, 11; tʼexkiai Proverbios 27:11 b). Tsa kixi kjuintʼalee je Jeobá kʼoasʼin koakoñá nga tsjoachaa kʼoa chʼa̱sjendisoñá je Na̱i. Koaan tsjoa kʼoái kon je Jeobá kʼianga kjoa kuitjátojin, jolani tsa chjotaxá fitjenngikeli, tsa ñʼai chonli tao̱n, tsa tsín nrʼoéli chjota kʼianga ʼmiyasuin kʼoa tsa jmesa kjoa tibitjatojin. Kʼoati kuenta tʼiain nga je Jeobá koasenkaoli nga chókjoajinli tojme kjoa xi kuitjátojin (1 Cor. 10:13).

TSEE KJOANDA TSJOÁLI JE NINÁ

10. Jmé kjoanda xi tsjoále Niná je chjota xi je bexkón.

¹⁰ Tsee kjoanda tsjoále Jeobá ʼyani xi bexkón (Heb. 11:6). Ndʼaibi basenkaoná nga nda biyoaa kʼoa nga tsjoa satío tokoán, kʼoa nichxin xi nroaján koaan kuiyoaa ngantsjai nichxin. Tjínjngo tokoán nga tse kjoanda tsjoáná Jeobá kʼoa ʼyañá nga koa̱nle kʼoasʼin. Nga bʼejngoaa tokoán xi tʼatsʼe jebi basenkaoná nga nda nixálee Niná tojo kisʼin je choʼndale xi tsakatio nichxin kjoatse. Kataʼyala choa̱le Timoteo (Heb. 6:​10-12).

11. Ánni nga nʼio nda kisixáni Timoteo ya jinjtín (1 Timoteo 4:10).

 ¹¹ (Tʼexkiai 1 Timoteo 4:10). c Jé Niná kisinʼiotʼa Timoteo kʼoa ñaki kʼoatsakʼé kon nga tse kjoanda tsjoále. Kuinga nʼio nda kisixánile Niná kʼoa tsakasenkao xi kjaʼaí. Je Pablo kʼoakitsole nga nda katatsoyason je Énle Niná, nga nda katatsoya ya jinjtín kʼoa nga nda choa̱ katabʼéjnale xi jejchínga kao xi sʼa xti. Alikui choa ñʼai tíjna je xá xi kisʼenele Timoteo. Tobʼelañá, kʼoatsakʼinle nga katatsjoále kjoafaʼaitsjen je xi nganʼio machjénle, nga kʼoakuitso kixile jñani machjén nga sindaya yaole kʼoa nga ngasin nganda katafákaonajmí (1 Tim. 4:​11-16; 2 Tim. 4:​1-5). Je Timoteo koanjinle nga tse kjoanda tsjoále je Jeobá ningalani tsín ʼya xi tsabe josʼin kisixá kʼoa ninga tsín ʼya xi chjí tsabe jmeni xi kisʼin (Rom. 2:​6, 7).

12. Ánni nga nʼio nda síxáni xi chjotajchínga sʼin tjío ya jinjtín (kʼoati chótsenlai sén xi faʼaitʼa).

¹² Joni je Timoteo, je xi chjotajchínga sʼin tjío koaan kʼoejngo kon nga chjí be Jeobá je xá xi sʼín. Je xi chjotajchínga sʼin tjío síkuinda je jtín, tsoya ya jinjtín kʼoa bitjotsoyason. Nkjín mani xi ya tsjoánganʼio kʼianga sʼenda ndʼia xi kʼoasʼin machjén nga ʼyaxkón je Niná kʼoa xi ya tsjoánganʼio jñani kjoaxkón sʼe. Tjínkʼa xi kui xá tjíoni nga fisíxatʼa je ndsʼee xi hospital kjio kʼoa tsa ya tjíojinleje̱ je Comités de Enlace. Je xi chjotajchínga sʼin tjío ñaki kao kjoatsjoa síxá nga̱ majinle nga tsʼe Jeobá je jtín, kʼoa tjíojngo kon nga tse kjoanda tsjoále Jeobá (Col. 3:​23, 24).

13. Jósʼe kon Jeobá kʼianga be josʼin nixálee.

 ¹³ Ningalani tsín tongatsʼiaa nga chjotajchínga sʼin tiyoaa ya jinjtín tonga koaan kʼoakji si̱xálee Jeobá jokji tjen kʼoakoa̱nná. Jolani nga batioá je tao̱n xi machjén ya jinnaxinandále, nga bʼé comentarioná ninga ñʼai maná, nga nichatʼalee xíngiaa kʼiatsa jokatsoná kʼoa tsa jokasíkaoná. Kʼianga kʼoanʼia, tsjoa sʼe kon je Jeobá kʼoa nʼio tse kjoanichikontʼain tsjoáná nichxin xi nroaján (Luc. 21:​1-4).

TOSI TONDA SI̱CHRIANTʼALEE JE JEOBÁ

14. Kʼianga nda ʼyaxkoaan je Jeobá, jósʼin basenkaoná nga kixi mangíntʼalee (kʼoati chótsenlai sén xi faʼaitʼa).

¹⁴ Kixi mangíntʼalee Jeobá kʼianga nda ʼyaxkoaan. Kʼoakisʼin je José, kixi kitʼale Jeobá kʼoa tsínkui kʼoakisʼin xi chʼaotjín nga̱ koanjinle nga be je Jeobá jmeni xi nʼia (Gén. 39:9). Ngisaa koa̱nchriantʼalee je Jeobá tsa ntsjaintsjai kʼoétsʼoalee kʼoa tsa kjitʼa kʼoéxkiaa je Biblia. Kʼianga nda ʼyaxkoaan je Jeobá kui kʼoanʼia jmeni xi sasénle tojo kisʼin je José (Sant. 4:8).

15. Jmé xi bakóyaná jokisʼin chjota israelita nga tsakʼetsoma ya ʼndekixí (Hebreos 3:12).

¹⁵ Kʼianga tsín tije Jeobá ninʼiotʼañá alikui tikixi mangíntʼanilee. Kʼoakisʼin je chjota israelita nga tsakʼetsoma ya ʼndekixí. Ningalani koanjinle nga tíjna je Jeobá, to jaosa kisatio kon kʼoa tsín tije kisinʼiotʼani. Saʼnda i kitso: “A tíjnaa je Jeobá axo tsínní” (Éx. 17:​2, 7). Nga kʼoakisʼin alikui tikisitjosonnile Jeobá, kʼoa tsín mená nga kʼoati sʼiaan tsanda ñá (tʼexkiai Hebreos 3:12). d

16. Jósʼin kuichomani tsakui nʼio kuenta sʼiaan nga nda batio xi tsín Niná bexkón.

¹⁶ Tjínkʼa chjota xi tsín makjainle tʼatsʼe  Niná kʼoa tjínkʼa xi nda batio xi tsín Niná bexkón. Kʼiatsa kui nʼio kuenta sʼiaan, tsakui nichxin tsín tikoa̱nkjainniná nga koasenkaoná je Jeobá kʼoa tsa tsín tije si̱nʼiotʼañá. Kʼoakoan je xi kiski Salmo 73. Nga kui kuenta kisʼin nga ngisa ndatjío je chjota xi tsín sítjoson kjoatéxomale Niná kui kisikjaʼaitsjen tsa ndatjín nga tosi tonda Jeobá sixále kʼoa tsa mai (Sal. 73:​11-13).

17. Jmé xi koasenkaoná nga tosi tonda kixi koanngíntʼalee je Jeobá.

¹⁷ Alikui tijao kisʼeni kon je xi kiski salmo kʼianga kui kisikjaʼaitsjenjin josʼin koatio nichxin xi nroaján je chjota xi tsín je Jeobá sínʼiotʼa (Sal. 73:​18, 19, 27). Je xi kʼoati tsakasenkao nga kisʼejngo kon kuinga kui kisikjaʼaitsjenjin je kjoanda xi tjínle nga je Jeobá tísíxále (Sal. 73:24). Kʼoati koa̱n si̱kjaʼaitsjenjiaan tsanda ñá je kjoanda xi títsjoáná je Jeobá kʼoa jósʼin tiyoaa tsa tsínlani je tinixálee. Kʼiatsa kʼoasʼiaan, tosi tonda kixi koanngíntʼalee kʼoa kʼoati kuixoán jokitso je xi kiski salmo, nga i̱ kitso: “Tonga xi an, kʼianga sichriantʼale je Niná nʼio nda basenkaona” (Sal. 73:28).

18. Ánni nga tsínkui nʼio si̱kjáojinñá jme xi koa̱n nichxin xi sʼa nroa.

¹⁸ Chókjoajinná ningalani tse kjoa kuitjátojiaan ndʼaibi nga̱ tíjna kjoaixi je Niná xi tinixálee (1 Tes. 1:9). Je Jeobá basenkaoná ngantsjai nga̱ mandosinle xi tʼatsaan. Tsakasenkao je choʼndale nichxin kjoatse kʼoa tojo kʼoatísʼín ndʼaibi. Kʼoa alikui tsjiónkonná kʼianga kjoaʼaí je kjoañʼai xi nʼio tse (Is. 41:10). Alikui jme xi kuinókjonlee nga̱ je Jeobá koasenkaoná (Heb. 13:​5, 6).