KJOAʼMIYA XI CHOTʼAYA 24
KJOAJNDA 24 Tangínmiaa ya nindole Jeobá
Ya kuiyoaa ngantsjai ya ndʼianajñole Jeobá
“Ji Jeobá, ʼyáni xi koa̱n ya kʼoéjna ya ndʼianajñoli” (SAL. 15:1).
XI TÍNCHJA̱NI
I̱ kjoaʼmiya jebi kui jchaa jméni xi mele Jeobá nga sʼiaan nga tosi tonda miyole koaan. Kʼoati jchaa jósʼin tjínnele jchatokoán je miyole.
1. Jméni xi bakóyaná ya Salmo 15:1-5.
TOJOSʼIN tsaʼyaa ya kjoaʼmiya xi jaʼato, tsa jetsakʼaitʼalee yaoná Jeobá kʼoa tsa tosi tonda tinimiyoaa koaan ya kuiyoʼyá ya ndʼianajñole. Ya Salmo 15 bakóyaná jósʼiaan nga tosi tonda si̱miyoaa Jeobá (tʼexkiai Salmo 15:1-5). a
2. Jmé xi kinchja̱ni David nga ndʼianajñole Jeobá kisikʼaxki̱.
2 Ya Salmo 15 itso: “Ji Jeobá, ʼyáni xi koa̱n ya kʼoéjna ya ndʼianajñoli. ʼYáni xi kʼoéjna ya nindo tsjeli” (Sal. 15:1). Nga kʼoakitso én jebi je David kuijin jaʼaitsjenle je ndʼianajñole Jeobá xi ya Gabaón tíjna nga kui nichxin. Kʼianga nindo tsjele Niná kisikʼaxki̱ David tsakui nichxin kui kinchja̱ni nindo xi Sion ʼmi xi séjna Jerusalén. Nga kjesa sʼendajin ndʼia jñani sʼe̱jna je kaxa̱ jña kixinya je kjoa xi kisʼendajin, je David jngo ndʼianajño tsakʼénda ya chrian Gabaón jñani tsakʼéjnaʼya kaxa̱ jebi (2 Sam. 6:17).
3. Ánni tjínnenile koa̱nndosinná jmeni xi tso Salmo 15 (kʼoati chótsenlai sén xi faʼaitʼa).
3 Koan kisimiyo Jeobá ngatsʼi chjota israelita ningalani tokʼa xi ya kisixá ya ndʼianajño kʼoa tokʼa xi koan jaʼasʼen ya ndʼianajño jña kisʼejna je kaxa̱ jña kixinya je kjoa xi kisʼendajin. Kui xi mená ngatsʼiaa nga tosi tonda miyoná koa̱nni je Jeobá. Kʼoa ya Salmo 15 yaa bakóyaná jméni xi machjén nga sʼiaan.
Kʼianga kʼoatsakʼinle chjota israelita nga ya ndʼianajñole Jeobá koatioʼya koanjinle nga̱ ndʼianajño tsakatioʼya (Chótsenlai párrafo 3)
NDA KJUINKOAA YAONÁ
4. Ánni tsín tokui xi machjénni nga kʼoaitʼalee yaoná Jeobá kʼoa nga kjuinsʼenngindá nga nda kuiyoaa ngixko̱n (Isaías 48:1).
4 Ya Salmo 15:2 kʼoatso nga je xi miyole Niná mani alikui jme jée bajngi kʼoa kui kʼoasʼín xi kixi tíjna. Ningalani chjotajée maa koaan kuitjosonná jotso salmo jebi nga tsín jme jée kuijnyá kʼoa machjén nga kui xi kixi tíjna kʼoasʼiaan ngantsjai. Tsa si̱tjosonlee Jeobá chjotakixi sʼin skoe̱konná. Kʼianga bʼaitʼalee yaoná Jeobá kʼoa nga mangínsʼenngindá tokʼia bʼetsʼiakoaa nga nimiyoaa. Kuenta sʼiaan jokoan je chjota israelita, ningalani naxinandále Niná koan alikui tongatsʼi nga ñaki kʼoatsakatío kon nga je Jeobá tsabexkón (tʼexkiai Isaías 48:1). b Je chjota israelita xi ñaki kʼoatjío kon nga je Jeobá tsabexkón kisitjoson je kjoatéxomale. Tikʼoasʼinni nichxin xi tiyoaa ndʼaibi, ali tsa tokuijin xi machjén nga kʼoaitʼalee yaoná je Jeobá kʼoa nga kjuinsʼenngindá, machjén nga ntsjaintsjai si̱tjosonlee.
5. Jósʼin tíjna nga chjotakixi sʼin bekonná Jeobá.
5 Kʼianga chjotakixi sʼin skoe̱konná je Jeobá, ali tokuijin xi machjén nga ntsjaintsjai kjuian je kjoajtín xi satíoná (1 Sam. 15:22). Tjínnená si̱tjosoán jmeni xi tso je kjoatéxomale ninga kʼianga toñá tiyoaa (Prov. 3:6; Ecl. 12:13, 14). Machjén nga si̱tjosonlee ngantsjai tojmeni xi tinʼia kʼoasʼin koakonilee nga tsjoachaa kʼoa tsjoake koa̱nná tsanda je (Juan 14:23; 1 Juan 5:3).
6. Tojo tso Hebreos 6:10-12, ánni machjénni nga tosi tonda kixi kjuintʼalee Jeobá.
6 Je Jeobá chjí be jmeni xi tinʼia nga je tinixálee. Kʼoa machjén nga tosi tonda kixi kjuintʼalee ánni nga ya kuiyoʼyasíñá ya ndʼianajñole, tojo tso ya Hebreos 6:10-12 c (tʼexkiai). Ningalani tsín síchajin Jeobá josʼin tinixálee kui xi mele nga tosi tonda je si̱xálee ngantsjai. Kʼiatsa tsín si̱xa̱nlee miyoná koa̱n ngantsjai (Gál. 6:9).
ÉN KIXI KUINÓKJOAA
7. Jósʼin tíjna nga énkixi kuinókjoaa ya jinni̱ma̱ná.
7 Tsa mená nga kuinchja̱ná Jeobá ya ndʼianajñole machjén nga énkixi kuinókjoaa ya jinni̱ma̱ná tojo tso Salmo 15:2. Je Jeobá kui xi mele nga kixi koaan tojmeni xi sʼiaan kʼoa nga ñaki énkixi kuinókjoaa (Heb. 13:18). Nʼio chjíle nga kʼoasʼiaan nga̱ je Jeobá jtikee “je chjota xi chʼao kjoan, tonga nʼio miyole mani je chjota xi kixi” (Prov. 3:32).
8. Jméni xi tsín tjínnele kʼoasʼiaan.
8 Jngo chjota xi énkixi nchja̱ ya jinni̱ma̱le alikui tokʼia sítjoson kjoatéxomale Jeobá kʼianga nkjín mani tjío kʼoati sítjoson nga toje tíjna (Is. 29:13). Je chjota xi tosakʼoa sítjoson je kjoatéxomale Niná kui kʼoasʼínni nga to jao sʼe kon jmeni xi tsoná Jeobá (Sant. 1:5-8). Tsakui nichxin tosʼa choa kjoa male jmeni xi sʼín kʼoa tsín sítjoson je kjoatéxomale Jeobá kʼoa nga tsín kjoa bichómani jmeni xi sʼín tosi tonda kui xi chʼaotjín kʼoasʼín kʼoa je xi kʼoasʼín to chjotajaonkjaín (Ecl. 8:11). Ñá kui xi mená nga énkixi kuinókjoaa kʼoa nga kui xi ndatjín kʼoasʼiaan.
9. Jméni xi bakóyaná jokoan kʼianga tsabexkon Jesús je Natanael (kʼoati chótsenlai sén xi faʼaitʼa).
9 Jmeni xi koan nga tsabexkon Jesús je Natanael yaa bakóná nga nʼio chjíle nga kixi maa. Kʼianga kichokao Felipe je Natanael jñani tíjna Jesús, je Jesús i kitsole ninga tokʼia tsabexkon títjon: “Jngo xi kjoakixi chjota israelita, xi tsínle kjoachʼanachajin” (Juan 1:47). Je Jesús tsabe nga ñaki énkixi jmeni xi tso je chjotatjenngile tonga kʼoati tsabe nga ñaki kixi ni̱ma̱le je Natanael. Alikui jaonkjaín koan je Natanael ningalani kʼoati chjotajée koan joni tsa ñá. Je Jesús kʼoakitsole nga nʼio nda kisʼin nga kʼoakitso jotjín kon, kʼoati kui xi mená nga kʼoati kuitsoná je Jesús nga nda tinʼia.
Kʼianga kichokao Felipe je Natanael, je Jesús kʼoakitso nga chjotakixi je Natanael, a kʼoati chjotakixi sʼin bekonná tsanda ñá (Chótsenlai párrafo 9)
10. Ánni nga tsín koa̱n énndiso kjoáneñá xíngiaa (Santiago 1:26).
10 Ya Salmo 15 kʼoatso josʼin tjínnele jchatokoán xíngiaa. Tobʼelañá, ya Salmo 15:3 kʼoatso nga je chjota xi ya bichókatioʼya ya ndʼianajñole Jeobá alikui tjínnele nga totaon skoe̱ xi kjaʼaí, nga chʼaosʼin sikʼaxki̱ xínkjín kʼoa nga énndiso koane xínkjín. Tsa tsín nda mangínkoaa xíngiaa tsín koa̱n ya kuiyoʼyá ya ndʼianajñole Jeobá (tʼexkiai Santiago 1:26). d
11. Jmé xi nchja̱ni kʼianga énndiso síkʼaxki̱ salmo, kʼoa jónikao jngo chjota xi tsín síndaya yaole.
11 Kʼianga énndiso síkʼaxki̱ salmo kui nchja̱ni nga tsín nda nikʼaxkiaa jngo chjota. Kʼiatsa tsín sindaya yaole je chjota xi énndiso báne xi kjaʼaí bichonsjejin ya jinnaxinandále Niná (Jer. 17:10).
12, 13. Ánni nga sakʼoa chʼaosʼin nikʼaxki̱ñá je xíngiaa ningalani tsín kʼoatjín tokoán nga kʼoasʼiaan (kʼoati chótsenlai sén xi faʼaitʼa).
12 Ya Salmo 15:3 kʼoatso nga je chjota xi ya bichókatioʼya ya ndʼianajñole Jeobá alikui kui xi chʼaotjín kʼoasíkao xínkjín kʼoa alikui chʼaosʼin síkʼaxki̱ xínkjín. Kataʼyala kʼa choa̱ jósʼin tíjna nga chʼaosʼin nikʼaxkiaa xi kjaʼaí.
13 Ningalani tsín kʼoatjín tokoán nga chʼaosʼin si̱kʼaxkiaa jngo ndsʼee tonga tsa je cho̱bayañá jejinni chʼaosʼin tinikʼaxkiaa. Jolani tsa jngo tichjaa xi tsínti precursor sʼin sixáni, tsa jngo ndsʼee kao chjoónle xi tsín tiya Betel sixáni kʼoa tsa jngoje̱ ndsʼee xi tsínti chjotajchínga sʼin kʼoéjnani kʼoa tsa tsínti siervo ministerial sʼin kʼoéjnani alikui koa̱n nga kui cho̱bayañá tʼatsʼe ndsʼee jebi nga̱ tsín ñá ʼyaa ánni nga tsín tikʼoasʼin tjíosíxáni. Kuenta sʼiaan nga je xi ya tíjna ya ndʼianajñole Jeobá alikui énndiso báne xínkjín kʼoa alikui chʼaosʼin síkʼaxki̱ je miyole.
Kʼiatsa xíngiaa cho̱bayañá tsakuini nichxin jeni chʼaosʼin tinikʼaxkiaa (Chótsenlai párrafo 12, 13)
CHʼA̱SJENGʼAA JE XI TSOKJÓNKE JEOBÁ
14. Jósʼin tíjna nga tsín ya fajtaa je xi chʼao kjoan.
14 Ya Salmo 15:4 kʼoatso nga je miyole Jeobá alikui ya bájta xi chʼao kjoan. Ñá xi chjota sakʼoa sasénná josʼín je chjota kʼoa sakʼoa mai. Tonga tsínkjoan ʼyaa ʼyáni xi chʼaotjío kon, tojékjoán xi tsín koa̱n kjoájtaa je xi kui kʼoasʼín jmeni xi tsín sasénle Jeobá (1 Cor. 5:11). Jolani je xi tsín kʼoamanile je jée xi bajngi, xi tsín bexkón josʼin makjainná kʼoa xi síkinroajen kjoamakjainná (Prov. 13:20).
15. Jósʼin chʼasjengʼaa je xi tsokjónke Jeobá.
15 Bakolee kjoanda kao kjoaxkóntokon je miyole Niná nga̱ ya Salmo 15:4 kʼoatso nga chʼa̱sjengʼaa je xi tsokjónke Jeobá (Rom. 12:10). Ya Salmo 15:4 kʼoati tso nga je xi ya tíjna ya ndʼianajñole Jeobá sítjoson jmeni xi tso ninga ñʼaini koa̱nle. Tsa tsín si̱tjosoán jmeni xi bixoán alikuijin nda sa̱tío kon xi ngikʼa (Mat. 5:37). Kui xi mele Jeobá nga katasítjoson je xʼin kao je chjoón jmeni xi kitsole xínkjín kʼianga chixan kʼoa nga kʼoati katasítjoson je xi xijchá ma jmeni xi tsole je ʼndíxtile. Nitjosonñá jmeni xi bixoán nga̱ tsjoachañá je Niná kao xíngiaa.
16. Jósasʼin ʼyaxkoán je miyole Jeobá.
16 Ijngo koya josʼin bakoá nga chjí ʼyaa je miyole Jeobá kuinga bakolee kjoanda kʼoa nga bʼailee jmeni xi tjínná (Rom. 12:13). Ngisaa mamiyoaa je ndsʼee nga nokjoalee jmeni xi nʼia kʼianga bʼetsaojiaan kʼoa kʼoati mamiyoaa je Jeobá. Nga kʼoanʼia jé Jeobá chjénngilee.
ALIKUI TAO̱N NʼIO SI̱METOKOÁN
17. Ánni nga tao̱n síkʼaxki̱ni ya Salmo 15.
17 Ya Salmo 15 kʼoatso nga je xi ya bʼejna ya ndʼianajñole Jeobá “alikui kui xá síkinyani je tao̱nle nga ʼndíle katamachjíle, kʼoa alikui tsjoáʼnde nga machjíʼmale nga taon kataʼya je xi tsín jme jée tjínle” (Sal. 15:5). Kuinga kʼoatsoni salmo nga tsín tinda biyokaoñá xíngiaa kʼianga tao̱n tsjentʼalee kʼoa tsínti nda biyoñá ngixko̱n Jeobá (1 Tim. 6:10). Kʼianga tao̱n kisikinyale xínkjín chjota nichxin kjoatse tjínkʼa xi kʼoakitso nga katamachjísonle je tao̱n xi kisikinya. Kʼoati tsakatio kʼa je juez xi koanchjíʼmale nga jée tsakáne je chjota xi tsín jme jée tjínle. Je Jeobá alikui sasénle nga kʼoasʼín je chjota (Ezeq. 22:12).
18. Jméni xi machjén nga si̱kjaʼaitsjenjiaan (Hebreos 13:5).
18 Jósʼin nikjaʼaitsjeen xi tʼatsʼe tao̱n. A ñaki tokui tinikjaʼaitsjen ʼndeʼndee tsa jme xi mená kuindá. Kʼoa nga tao̱n nijékinyaa, a tokjoan nijndañá axo kʼoasʼin nikjaʼaitsjeen nga tsín machjénle je xi tao̱n kasíkinyaná. A tokui ngʼa chʼasjeñá yaoná nga tao̱n tjínná. A tsí tjotʼaa jmeni xi tjínná. A kʼoasʼin nikjaʼaitsjeen nga to tao̱n nʼio tjentʼale je ndsʼee xi tjínle tao̱n. A toje nda nikoaa xi tjínle tao̱n kʼoa a tsí kuenta nʼia je xi ma̱ tjíosíjchá yaole. Kui kjoanda tjínná nga ya tiyoʼyá ya ndʼianajñole Jeobá, tosi tonda si̱tjosonlee kʼoa alikui tao̱n nʼio si̱metokoán nga̱ je Jeobá alikuikʼia tsjiónkonná (tʼexkiai Hebreos 13:5). e
JE JEOBÁ TSJOAKE MIYOLE
19. Ánni kʼoatsoniná Jeobá nga tjínnele kʼoasʼiaan jotso ya Salmo 15.
19 Ya Salmo 15 itso én xi fetʼani: “ʼYani xi kʼoatísʼín alikui koaijen koaikjá” (Sal. 15:5). Kuinga kʼoatsoniná je Jeobá nga̱ kui xi mele nga tsjoa sa̱tío tokoán. Kʼianga kʼoanʼia jmeni xi tsoná Niná nda biyoaa kʼoa jé síkuindaná (Is. 48:17).
20. Jmé kjoanda xi sʼe̱le je xi ya tjíoʼya ya ndʼianajñole Jeobá.
20 Je xi ya tjíoʼya ya ndʼianajñole Jeobá nʼio tse kjoanda sʼe̱le nichxin xi sʼa nroa. Yaa ngʼajmi koaikatio je chjotale Cristo xi ya tjíokoyale nga ya koai (Juan 14:2). Kʼoa je chjotale Cristo xi i̱ Sonʼnde koyale koatio nʼio tse kjoanda sʼe̱le, tojo tso ya Apocalipsis 21:3. Nʼio tse kjoanda tjínná nga miyole Jeobá maa kʼoa koaan ya kuiyoʼyá ya ndʼianajñole ngantsjai nichxin.
KJOAJNDA 39 Nda katabʼaxkiaa ngixko̱n Niná
a Salmo 15:1-5: “Ji Jeobá, ʼyáni xi koa̱n ya kʼoéjna ya ndʼianajñoli. ʼYáni xi kʼoéjna ya nindo tsjeli. 2 Jéní xi tsín jme jée tíbajngi kʼoa xi kui kʼoatísʼín xi kixi tíjna kʼoa xi ñaki énkixi tínchja̱ ya jinni̱ma̱le. 3 Alikui énndiso báne xi kjaʼaí. Alikui chʼao síkao je xínkjín, kʼoa alikui chʼaosʼin bʼasje je miyole. 4 Alikui ya bájta je xi chʼao kjoan, kʼoa bʼasjengʼaa je xi tsokjónke Jeobá. Sítjoson jmeni xi tso ninga ñʼaini koa̱nle. 5 Kʼianga tao̱n síkinya alikui ʼndíle síjé kʼoa alikui síjyo nga machjíʼmale nga taon kataʼya je xi tsín jme jée tjínle. ʼYani xi kʼoasʼín alikui jme xi koa̱nle”.
b Isaías 48:1: “Tinóʼyao jebi xtile Jacob, jon xi Israel ʼmino xi ya ntje̱le Judá kitjenño, xi je Jeobá nikʼaxkio kʼianga jme xi bixón kʼoa xi tʼatsʼe Ninále Israel nokjoaño, ninga tsínni kʼoatjío tokon nga kʼoanʼiao”.
c Hebreos 6:10-12: “Niná tjínle kjoakixi, likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle. Koantsen kjoatjaochabe nga kinisinlao je chjotale Cristo, kʼoa nga tojo nisinlao. 11 Tonga menajin nga tikʼoasʼin si̱xítíyao nga jngójngó nga jon saʼnda nga kjoetʼa, jméni nga koa̱njngosíni je xi choyalee. 12 Kui kjoa xi menajin, jméni nga tsín tsʼe masínio, tonga chjénngilao je xi sʼe̱le kjoatjao xi kinisʼengile xi tʼatsʼe nga makjainle, kʼoa nga tsejta”.
d Santiago 1:26: “Tsa jngo xi jon xi síkjaʼaitsjen nga bexkón Niná, xi likui bʼéchjoale ni̱je̱n, totíbʼanachale ni̱ma̱le. Alikui jme chjíle josʼin bexkón Niná”.
e Hebreos 13:5: “Kʼoasʼin tiyo ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle”.
