Tjínkʼa xi kjonangi
Kʼianga “ji si̱kuindai” tso ya Salmo 12:7, a kui tínchja̱ni je chjota xi “kjoañʼai tjíonikjaʼá” (versículo 5) axo kui tínchja̱ni je “énle Jeobá” (versículo 6).
Je én xi tongini faʼaitʼa kʼoatso nga tʼatsʼe chjota tínchja̱ni.
Ya Salmo 12:1-4, je David kʼoatso nga tsín tiʼya chjota xi kixi fitʼanile Niná. Kuila kataʼyaa jmeni xi tso ya Salmo 12:5-7.
“Nga kjoañʼai tjíonikjaʼá je chjota,
nga aon kjimale jme xi tjíonikao xi ma̱ tjíosíjchá yaole,
an koasenkoa, kui xi tso je Jeobá.
Kʼoasjentjaiña tʼatsʼe chjota xi totaon be.
Je énle Jeobá ñaki tsjení;
yaa mangóson tao̱nchxoa xi jekamatsje ya nga̱já, xi ñato kʼa kamatsje.
Ji si̱kuindai Jeobá,
ji si̱kuindai nga jngó jngó ndʼaibi kʼoa ngantsjai nichxin”.
Ya versículo 5 kʼoatso nga je Niná koasenkao je chjota xi kjoañʼai tjíonikjaʼá.
Ya versículo 6 kʼoatso nga “je énle Jeobá ñaki tsjení; yaa mangóson tao̱nchxoa xi jekamatsje”. Ñá xi chjotale Cristo maa ʼyañá nga ñaki kʼoatjín jotso én jebi (Sal. 18:30; 119:140).
Ya Salmo 12:7 itso: “Ji si̱kuindai Jeobá, ji si̱kuindai nga jngó jngó ndʼaibi kʼoa ngantsjai nichxin”. ʼYá xi tínchja̱ni én jebi.
Tjínkʼa xi “si̱kuindaní je énle Niná” sʼin síkʼatoya versículo jebi, nga̱ je én xi koanchjén nga jaʼatoya kʼa xo̱n xi Énle Niná faʼaitʼa nga én hebreo kui nchja̱ni je Énle Niná kao chjota. Kʼoa ʼyañá nga tsín tsjoáʼnde Niná nga jchangi je Énle (Is. 40:8; 1 Ped. 1:25).
Kʼoati ʼyaa nga kʼoatjín jmeni xi tso ya versículo 5, je Jeobá basenkao je chjota xi kjoañʼai tjíofaʼá kʼoa tosi tonda je sikuinda (Job 36:15; Sal. 6:4; 31:1, 2; 54:7; 145:20).
Tonga jmé xi tínchja̱ni ya versículo 7.
Jé chjota tínchja̱ni.
Ya Salmo 12:1, 2, kui nchja̱ni tʼatsʼe chjota xi tsakʼanachale je chjota xi kixi fitʼale Niná. Kʼoati tso nga je Jeobá kjoaʼaxin je chjota xi énndiso nchja̱. Kuitjosonní jmeni xi tso texto jebi nga̱ je Jeobá sítjoson ngantsjai jmeni tso.
Kuinga kʼoabixónñá nga ya versículo 7 kui tínchja̱ni nga sikuinda Jeobá kʼoa kʼoasjentjai je chjota xi kjoañʼai tjíofaʼá nga totaon ʼya.
Kʼianga én hebreo chjota nchja̱ni ya versículo 7 kʼoa kʼianga én griego jé nchja̱ni chjota xi kixi fitʼale Niná xi totaon ʼya (Salmo 12:7; 11:8, Septuaginta). Ya versículo 7 kao 8 kui nchja̱sani nga je Jeobá sikuinda nga jngó jngó chjota xi kjoañʼai faʼá xi totʼatsʼe chjotatsʼen (Sal. 12:7, 8). Kʼoa kʼianga én arameo isʼin jaʼatoya je texto jebi: “Ji Señor, ji si̱kuindai chjota xi kixi, ji si̱kuindai ngantsjai nichxin nga tsín josikao chjotatsʼen”.
Je texto jebi kui tsoyaná nga je Niná koasenkao je choʼndale xi kjoañʼai faʼá.
