JNGO tjíjtsa Sonʼnde tjín je relijión xi celibato fitjenngi, jolani je Iglesia Católica Romana, iglesia ortodoxa kao budismo kʼoa kao xi kjaʼaísanile. Kʼoasʼin bʼénele je chjota xi nyatítjonle kʼoa kao je naʼmi nga tsín katabixan. Tonga kʼoati nʼio nkjín chjota xi kui bánele je celibato nga kʼoasʼin nʼio bʼaxki̱ je chjota xi nyatítjonle relijión nga kjoachajngi sʼín.

Kuinga ndatjínsíni nga chjónangilee yaoná tsa ya Biblia faʼaitʼa tʼatsʼe celibato. Kʼianga jchaa jotso je Biblia, kuila títjon kataʼyaa jñá jaʼaini kʼoa jósʼin síkjaʼaitsjen Niná xi tʼatsʼe jebi.

Tojo tso je Encyclopædia Britannica, je xi celibato ʼmi “kui nga tsín bixan jngo chjota, kʼoa nga kui fitjenngi jngokʼa bʼéchjoale yaole nga tsín ʼya xi bajnakao, kʼoa je xi kʼoasʼín jéní je chjota xi nyatítjonle relijión kʼoa tsa jeje̱ xi Niná síxále”. Kʼianga nó 2006, nga tsakatiojtín chjota ya Roma, je papa Benedicto XVI kʼoakitso nga ya mangóson je celibato “jngo kostumbre xi me tiʼakʼia tsʼatsenni nga jejaʼato nichxin nga tsakatio je pastro”.

Je chjotale Cristo xi títjon tsakatio alikui celibato kitjenngi. Je pastro Pablo, xi kʼia tsakʼejna nga siglo 1, kʼoakitsole je chjotale Cristo nga sʼe̱ chjota xi “kjuinrʼoéle espíritu xi bʼanachale”, kʼoa tokjaʼaíngá kuitsole chjota kʼoa xi “likui tsjoáʼnde nga kuixan chjota” (1 Timoteo 4:1-3).

Kʼiaa saʼnda nga siglo 2 tsakʼétsʼiakao nga celibato kitjenngi je xi chjotale Cristo kitsole yaole, je xi Iglesia Católica Romana sʼin tsaʼyale nga koanskanni. Je libro Celibacy and Religious Traditions kʼoakitso nga ñatjen tsʼatsen je xi celibato kitjenngi kao nga kʼoakitso chjota ya naxinandá Roma nga tsín koa̱n kjoáyokao xínkjín chjota.

 Siento nó nga koanskanni, nga tsakatiojtín je chjota xi nyatítjonle relijión kʼoa kao je xi Padre de la Iglesia ʼmi, kʼoasʼin tsakʼéne nga je naʼmi kui katafitjenngi je celibato. Kʼoasʼin koankjainle kʼianga síjndí yaole jngo chjota kʼianga tjín xi bajnakao kʼoa nga tsín koa̱n kʼoasʼin jngo chjota xi xánaʼmi tjínle. Ninga kʼoalani, je Encyclopædia Britannica kʼoatso nga tojo nʼio nkjín naʼmi kao obispo xi yánchjín kisʼele kʼianga siglo 10.

Kʼianga nó 1123 kao 1139 nga kisʼejna ya Roma je xi Concilio de Letrán tsakʼin, je relijión katóliko kui tsakʼénele je naʼmi nga kui katafitjenngi je celibato. Nichxin xi tiyoaa ndʼaibi tojo kui fitjenngi. Kui kʼoakisʼinni nga̱ je naʼmi xi jechixan jé tsjoále xtile nga jemaskanni je tsojmi xi tsʼe yo̱ngo̱. Kʼoa nga celibato kitjenngi tsakasenkao je yo̱ngo̱ nga kisʼele nganʼio kʼoa nga tsín katasícha je tao̱n xi ya faʼasʼen.

Je Biblia kʼoatsokixi josʼin síkjaʼaitsjen Niná tʼatsʼe celibato. Kʼoati ya faʼaitʼa jmeni xi kitso je Jesús tʼatsʼe je chjota xi toje batio, xi totʼatsʼe “kjoatéxomale ngʼajmi” (Mateo 19:12). Kʼoati kitso je pastro Pablo tʼatsʼe je chjotale Cristo xi tojé tjío. Nga kuinga kʼoasʼin tjíoni xi totʼatsʼe je énnda chjotse (1 Corintios 7:8; 9:23).

Tonga je Jesús kao je Pablo ali tsakuijin tsakʼénele je chjota xi Niná síxále nga kui katafitjenngi je celibato. Je Jesús kʼoakitsokixi nga tsín to ngatsʼi je chjotale xi “kʼoasʼin kitsʼaile” nga tojé koatio. Kʼoa je Pablo i kitso tʼatsʼe xi kje bixanjin: “Tʼatsʼe yánchjínxo̱ngó, tsínna kjoatéxoma xi tsʼe Nainá. Tonga kʼoasʼin kosonle an” (Mateo 19:11; 1 Corintios 7:25).

Xi ijngosani, ya Biblia kʼoatso nga nʼio nkjín chjotale Cristo xi títjon tsakatio xi chixan, jolani je pastro Pedro (Mateo 8:14; Marcos 1:29-31; 1 Corintios 9:5). Nga siglo 1, ya naxinandá Roma nʼio kisʼe kjoachajngi. Je Pablo kʼoakitso kʼiatsa jngo xi chjotajchínga sʼin tíjna ya jinjtín xi jechixan nga “tojngo chjoón katasʼele” kʼoa nga je “xtile nga ñaki nda katabexkón” (1 Timoteo 3:2, 4).

Tonga ali tsa jejin kinchja̱ni je chjota xi tsín fayokao xínkjín, nga̱ je Biblia kʼoatsokixi nga xi jechixan nga “kʼoasʼin nda katasíkao chjoónle”. Kʼoa tʼatsʼe nga fayokao xínkjín, je Biblia itso: “Ali maijin bixónlao xíngio” (1 Corintios 7:3-5). Jebi kui xi bakó nga je Niná likui kʼoatsole je choʼndale nga kui katafitjenngi je celibato kʼoa tsa kjoanʼio tjínnele nga kui koaitjenngi jngo xi Niná sixále.

Kʼiatsa tsín tjínnele nga celibato kjuintjenngiaa. Ánni nga kʼoakitsosíni je Jesús kao Pablo nga ndatjín nga toñá biyoaa. Kuinga ngisa tiʼndele jngo chjota xi toje tíjna nga tsoyason je Énle Niná. Ngisaa tse síxále Niná nga̱ tsínkui makjáojinle jme xi síkjáojin xi jechixan (1 Corintios 7:32-35).

Kataʼyala je choa̱le David. Ya México kitjoo ya jñani kisixá ninga nʼio nda koanchjíle, kui kʼoakisʼinni nga koan ki ya Costa Rica nga kitsoyason je Énle Niná. Kʼoatso nga tsakasenkao nga sʼa tojé tíjna, itso: “Ñʼai koanngana nga̱ kjaʼaí kostumbre tjín kʼoa kjaʼaí sʼin tjíosíjchá yaole je chjota xi ya tsʼe. Tonga nga toʼan ngisaa choa ñʼai koanna kʼoa ngisaa ndi̱to̱n koanngana”.

Je Claudia, xi kʼoati sʼa toje tíjna, kʼoati ya ki jngo ʼnde jñani ngisa machjén xi jetsoyason, itso: “Nʼio tsjoa tjínna jmeni xi tisʼian. Kʼianga ʼbe josʼin síkuindana je Niná, ngisaa mataja kjoamakjainna kʼoa ngisaa mamiyosa”.

Nga toñá biyoaa alikui tjínnele nga ai koa̱nná. Je Claudia itso: “Tsa toñá tiyoaa kʼoa ninga jechixán, kʼiatsa kui títjon si̱kʼéjnaa je xále Jeobá Niná, nʼio tsjoa sʼe̱ tokoán” (Salmo 119:1, 2).