NGA jngo kjoatjao xi nʼio chjíle bʼainá, tjínnejinle nga kʼoee kjoanda. Je Jesús kui kinchja̱ni tʼatsʼe nga nʼio chjíle nga bʼé kjoanda kʼianga te chjota kisindaya xi nʼio táo chʼin tjínle kʼoa xi tsínle xki je chʼin xi tjínle. Kʼianga jekoanndaya, jngo xi kikon ijngokʼanile Jesús kʼoa “tsʼasjejeya Niná”, kʼoa je Jesús i kitsole: “A tsí te mani xi koantsje. Xi ngi ñajan, jñá tjío” (Lucas 17:12-17). Jebi kui tsoyaná nga sakʼoa ngotjo chajinniná jmeni xi ndatjín síkaoná xi ngikʼa.

Je kjoabʼechjíntjai alikui jme xi mangóson. Kui xi ngisasa chjíle xi kitsʼainá. Jósʼin kʼoailee kjoanda Niná tʼatsʼe je kjoatjao xi kitsjoaná.

• Kataʼyai ʼya xi kitsjoa kjoatjao jebi. Nga tsakʼéchjíntjainá je Jesús alikui kui xi tsonile tsa toje tjoéná kjoabijnachon xi tsínkʼia fetʼa. Nga̱ je Jesús i kitso nga tsakʼétsʼoale je Nʼaile: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Tobʼelañá, tsa sʼe̱jinlanili nga jngo chjota tsakʼasjentjaili nga sʼa ʼndí tisui, a tsí koa̱nmeli jchaxkuin kʼoa chjónangilai ánni nga  kʼoakisʼinni. Jé Jeobá kitsjoaná kjoatjao nga tsakʼéchjíntjainá nga koa̱n sʼe̱ná kjoabijnachon, kʼoa kui xi mele nga jchaxkoaan kʼoa nga miyole koaan. Je Biblia itso: “Tichriantʼalao Niná, kʼia kʼoati je sichriantʼano nga jon” (Santiago 4:8).

• Katasʼeli kjoamakjain xi tʼatsʼe kjoabʼechjíntjai. “Je xi makjainle tʼatsʼe ʼndíle Niná, tjínle kjoabijnachon ngantsjai” (Juan 3:36). Jmé xi tsoyanile nga sʼená kjoamakjain. Kao xáná bakoñá nga tjínná kjoamakjain (Santiago 2:17). Kʼianga tsaan koa̱n jngo kjoatjao, tjínnele chjoé. Tikʼoasʼinni, tjínnele koakoá nga mená chjoé je kjoatjao xi kitsjoaná Niná. Kui xi tsonile nga tjínnele jchaa jósʼin mele Niná nga si̱jchá yaoná kʼoa si̱tjosoán jmeni xi tso. * Kʼoétsʼoalee je Niná kʼoa si̱jélee nga katasíchatʼaná je jéená kʼoa nga nda katasʼe kjoafaʼaitsjenná. Si̱chriantʼalee je Niná kʼoa ñaki kʼoakʼoé tokoán nga je kjoabʼechjíntjai tsjoáná je kjoachoya nga nyʼán kuiyoaa ngantsjai nichxin, nga tsín tixkón kuiyoñá kʼoa nga nda kuiyoaa kʼiatsa sʼe̱ná kjoamakjain (Hebreos 11:1).

• Tʼin nga kjoaʼaítsjenya je kjoabiyale Cristo. Nga tsín si̱chajiaan je kjoabʼechjíntjai, je Jesús kʼoakitso nga tjínnele xki̱ nó si̱kjaʼaitsjenya, kitso: “Kʼoatʼiaon kuibi jméni nga nda kʼoéjintakonsínináo” (Lucas 22:19). Jin xi testigole Jeobá maijin, je nó jebi kʼiaa si̱kjaʼaitsjenyaijin je kjoabiyale Jesús nga majte 11 sá abril kʼianga jeska̱ntjai je Tsʼuí. Me jngo ora sʼe̱jna je kjoanokjoaya. Kui sa̱kóya ánni nga nʼio chjínile je kjoabiyale Jesús kʼoa jósʼin basenkaoná nichxin xi tiyoaa ndʼaibi kao xi sʼa nroa. Je nó xi jaʼato 20 miyón koanni je chjota xi tsakatioxkón nga jaʼaitsjenya je kjoabiyale Cristo jngo tjíjtsa Sonʼnde. Menajin nga kʼuínkaonáijin. Kʼoasʼin kʼoainilee kjoanda je Niná tʼatsʼe je kjoatjao xi kitsjoaná.