JE Jordan jngo sacapunta yʼatonntsja xi jo barco kji tonga joxi tsín nʼio chjíle sʼin matsen. Tonga kuisa je tsojmi xi ngisasa nʼio chjí bekon. Je Jordan itso: “Jé Russell kitsjoakjoatjaona kʼianga sʼa ʼndí kjiʼe̱, jngo xi miyole koanni je familiana”. Kʼianga jekʼien Russell, je Jordan kʼiaa koanjinle nga nʼio miyo tsakjáo Russell kao je xijchále, kʼoa nga nʼio tsakinyakao nga kjoa jaʼatojin. Kʼoa itsosa: “Ndʼaibi nga ngisa nda ʼbe xi tʼatsʼe, ngisaa tichjí ʼbekonngáña je kjoatjao xi kitsjoana”.

Choa̱ jebi kui bakóyaná nga tjín chjota xi chjí bekon jngo kjoatjao kʼoa tjín xi mai, tonga je chjota xi tsjoá kjoanda nʼio chjí bekon nga jme xi bʼaikjoatjaole. Ya Biblia síkʼaxki̱ jngo kjoatjao xi nʼio chjíle, itso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16).

Je xi skoé kjoatjao jebi sʼeele kjoabijnachon xi tsínkʼia fetʼa. Tonga a tíjna jngo kjoatjao xi ngisa chjíle tikʼoajinni jebi. Tjínkʼa chjota xi tsín chjí be tonga “nʼio chjíle” xi kao chjotale Cristo (Salmo 49:8; 1 Pedro 1:18, 19). Ánni nga jo kjoatjao sʼin kitsjoasíni Niná je kjoabijnachonle ʼNdíle.

Je pastro Pablo i kitso: “Je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota” (Romanos 6:23). Je chjota xi títjon tsakʼejna, xi Adán tsakʼin, toxá tsakajngijéeni. Kʼoa nga tsín kisitjosonle Niná, kuinga kʼienni. Xi totʼatsʼe je jée xi tsakajngi Adán, kjoabiya kisikakinná xi ntje̱le maa.

“Nga̱ je chjíle jée kjoabiya ní, tonga je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23). Je Niná kisikasén ʼNdíle i̱ Sonʼnde nga koa̱n kʼoasjentjai je  chjota xi tʼatsʼe kjoabiya. Nga kʼoasʼin kitsjoa Niná je kjoabʼechjíntjai jebi, je xi koa̱nkjainle xi tʼatsʼe Jesús koaan sʼe̱le kjoabijnachon xi tsín kʼia fetʼa (Romanos 3:24).

Je pastro Pablo kui kinchja̱ni je kjoanichikontʼain xi tsjoále Niná je choʼndale xi totʼatsʼe Jesús kʼianga i kitso: “Kjoanda katabʼaile Niná xi tʼatsʼe je kjoatjaole xi tsín tsa ʼya xi majinle” (2 Corintios 9:15). Je kjoabʼechjíntjai nʼio chjíle kʼoa alikui koa̱nná nga toñá kʼuínyayeje josʼin tíjna. Tonga ánni nga ngisa chjínile je kjoabʼechjíntjai. Jméni xi tsín mangóson je kjoabʼechjíntjai kao kjoatjao xi kjaʼaísanile xi tsjoáná Niná. * Kʼoa jósʼin kʼoailee kjoanda. Je kjoachjonangi jebi yaa chótʼayá ya kjoaʼmiya xi fisani.