1, 2. 1) Ánni nga tsín tokjoaská tjenkaosíni nga mangínsʼenngindá. 2) Jméni xi tjínnele sʼiain nga kjesa ʼmisʼenngindájin.

A SʼAA xti kʼoa a jemeli kʼuínsʼenngindái. Jngo kjoanda xi nʼio tse kʼianga mangínsʼenngindá. Tojosʼin tsaʼyaa ya kjoaʼmiya xi jejaʼato, ali tsa tokjoaskájin tjenkao. Kʼianga kʼuínsʼenngindái, koakolai xi kjaʼaí nga jetsakʼaitʼalai yaoli je Jeobá. Kui koakui nga kʼoatsakʼinlai Niná nga toje si̱xálai ngantsjai kʼoa nga kui xi ngisa kʼoailai kjoandosin. Nga tsín tokjoaská tjenkao jebi machjén nga koakui nga jetjínli kjoafaʼaitsjen, nga ni̱ma̱li nroajinni nga meli kʼuínsʼenngindái kʼoa nga majinli jme xi tsoyanile nga bʼaitʼalee yaoná je Niná.

² A jetijnandai nga kʼuínsʼenngindái. Tsakui nichxin kʼoasʼin nikjaʼaitsjain nga mai. Kʼoa tsakui nichxin kʼoasʼin nikjaʼaitsjain nga jetijnandai tonga tsa je xijcháli kʼoatsoli nga chóyakaolai, nga katamajchíngalai kʼoa nga katasʼesali kjoafaʼaitsjen. Tonga ali nikʼajenjin tokuin. Tʼenelai yaoli nga tosi tonda tindayai yaoli ánni nga koa̱n kʼuínsʼenngindásíni. I̱ kjoaʼmiya jebi jan koya jchaa xi koasenkaoli nga kuichotjenngi jebi. Xi títjon, jmeni xi  makjainli. Xi majaoni, jmeni xi nʼiai. Xi majanni, jotjín tokuin xi kao Jeobá.

3, 4. Jmé choa̱ tsakʼéjnale Timoteo je xi sʼa xti.

³ Chjónangilai yaoli jebi: “Ánni makjainnina nga tíjna Niná. Ánni nga tsín jao tjínnina nga tʼatsʼe Niná kinroani je Biblia. Ánni nga kjoatéxomale Niná sitjosonña tikʼoajinni tsakui kʼoasʼian jmeni xi sʼín je chjota”. Nga kui chjónangilai yaoli kʼoasʼiain jmeni xi kitso je pastro Pablo, i kitso: “Jméni nga jchasínio jmeni xi Niná mele, jñale xi nda, xi sasénle, xi ñaki tjíjngo” (Romanos 12:2). Kui xi tsonile nga jisoa kataʼyai ánni nga kjoanda tsini nga kui kʼoasʼiain jotso Niná.

⁴ Tikjaʼaitsjain choa̱le Timoteo kʼianga sʼa xti. Je Timoteo nʼio nda tsabe jmeni xi tso je Énle Niná nga̱ jé na̱le kao majchále kitsoyale. Tonga je Pablo i kitsole: “Tonga ji nda tʼinkoai xi kichotʼayai, xi nda koankjainli” (2 Timoteo 3:14, 15). Nga “nda koankjainli” kitso Pablo, kʼoati kui xi kitsonile nga je Timoteo ñaki kisʼejngo kon nga ñaki kʼoatjín jmeni xi faʼaitʼa je Énle Niná. Ánni nga tsín jao kisʼenile. A tokui nga je na̱le kao majchále xi kʼoakitsole. Mai. Kuinga kisichjén kjoafaʼaitsjenle, jesoa kisijinle yaole jmeni xi tsakʼinyale (tʼexkiai Hebreos 5:14). Je Timoteo nʼio nda choa̱ tsakʼéjnale je xi sʼa xti.

5, 6. Ánni nga nʼio chjínile nga koa̱nli si̱chjain kjoafaʼaitsjenli.

⁵ Jméni xi bakóyali choa̱le Timoteo. Tsakui nichxin jekjoatse tsaʼyai jmeni xi tsoya je Biblia. Tsa kʼoalani, kʼoatʼiain jokisʼin Timoteo kʼoa tikjaʼaitsjain ánni nga kui makjainnili. Tsa kʼoasʼiain ngisa koa̱ntaja kjoamakjainli. Xi ijngosani, alikui koa̱nkjainli jmeni xi kuitsoli xti xíngi kao chjota kʼoa alikui tokui kʼuínni josʼin nikjaʼaitsjain xi toji.

⁶ Nʼio chjíle nga koa̱nli si̱chjain kjoafaʼaitsjenli. Nga̱ kui xi koasenkaoli nga koa̱nli jokʼuínlai je xti xíngi nga tjín xi skónangili,  jolani: “Ánni nga tjínjngoni tokuin nga tíjna Niná. Tsa tsjoakená Niná, anni tsjoáʼndeni nga kui kʼoama xi chʼaotjín. Tsa Niná kisinda ngayeje, ʼyáni xi kisinda je”. Tsa koa̱nli si̱chjain kjoafaʼaitsjenli alikui jao sʼe̱li tʼatsʼe jmeni xi makjainli, tosa koasenkaoli nga koa̱nmeli nga ngisasa nda chótʼayai je Biblia.

7-9. Jméni xi sʼiain nga ñaki sʼe̱jngo tokuin tʼatsʼe xi makjainli.

⁷ Tsa nda chótʼayai Biblia, koaanli josí kʼianga jme xi chjónangili, tsín jao sʼe̱li kʼoa sʼe̱jngo tokuin tʼatsʼe jmeni xi makjainli (Hechos 17:11). Nʼio nkjín koya xo̱n xi Énle Niná yʼangini kjioná xi koasenkaoli. Tobʼelañá, nʼio nkjín xti tjíobinyakao je foyeto El origen de la vida kʼoa kao je libro ¿Existe un Creador que se interese por nosotros?.

⁸ Nga jechotʼayai je Biblia, tsakui nichxin jeʼya kʼai jmeni xi tsoya je Biblia. Tonga a ñaki tjínjngo tokuin nga kʼoatjín. Kʼianga chótʼayai toji, chótʼajin je xo̱n xi kjioná xi Énle Niná yʼangini, kui xi koasenkaoli nga ñaki sʼe̱jngo tokuin tʼatsʼe jmeni xi makjainli. Kʼoati koasenkaoli nga jchai jósʼin kʼuínyalai xi kjaʼaí jmeni xi makjainli.

⁹ Nʼio chjíle nga ñaki sʼe̱jngo tokuin nga ñaki kʼoatjín jmeni xi tso je Biblia. Kui xi koasenkaoli nga kuijnandai nga kʼuínsʼenngindái. Jngo testigole Jeobá xi sʼa tsoti i kitso: “Nga kjesa fisʼenngindájian, títjon kjoanla nda kiskotʼaya je Biblia saʼnda nga ñaki kisʼejngo tokoan nga kui jebi relijión xi kixi. Kʼoa nga nyaon nyaon ngisasa sʼejngo tokoan”.

10. Jngo chjotale Cristo xi jekisʼenngindá, ánni nga kao xále koakoni nga tjínle kjoamakjain.

¹⁰ Je Biblia itso: “Kʼoatisʼin xi makjainná tokʼoasʼin cha̱jin, tsa toxkia makjainná, kʼoa tsa tsín nda tjín xáná” (Santiago 2:17). Tsa tjínli kjoamakjain kʼoa tsa ñaki tjínjngo tokuin tʼatsʼe jmeni xi makjainli yajin koakoni jmeni xi nʼiai. Kuijin kʼoasʼiain je “kjoa xi tsje, kʼoa jósʼin ʼyaxkón Niná” (tʼexkiai 2 Pedro 3:11).

11. Jmé xi tsonile nga kui kʼoasʼiaan “kjoa xi tsje”.

¹¹ Jmé xi tsonile nga kui kʼoasʼiaan “kjoa xi tsje”. Kui xi tsonile nga tsje kjuinkoaa yaoná. Tobʼelañá, tikjaʼaitsjain jméni xi kinʼiai xi jaon sá jejaʼato. Kʼianga tjín xi kisʼejnabasenli, a tsaʼyaní tsa ndatjín kʼoa tsa chʼaotjín (Hebreos 5:14). A kichokjoajinli tsa jme xi kisʼejnabasenli kʼoa tsa jmeni xi kitsoli xti xíngi. A nda choa̱ bʼejnai ya ndʼiaskuelali. A kui kʼoanʼiai jmeni xi tso Jeobá axo kui kʼoanʼiai jmeni xi tso xti xíngi tojoni nga tsín skoe̱sinli (1 Pedro 4:3, 4). Chjotajéeñá ngatsʼiaa. Saʼnda je xi jenkjín nó tjíosíxále Jeobá soa ma sakʼoale nga kʼoatso nga testigole Jeobá ma. Tonga xi jekitsjoatʼale yaole Niná tjínnele tsjoa sʼe̱le nga testigole Jeobá ma kʼoa kʼoasʼin koakoni nga tsje koaikao yaole.

12. Jmé xi tínchja̱ni je én xi “jósʼin ʼyaxkón Niná” tso kʼoa jósʼin tjínnele jchatokuin.

¹² Jmé xi tínchja̱ni je én xi “jósʼin ʼyaxkón Niná” tso. Kui tínchja̱ni jmeni xi nʼiai ya jtín. Jolani nga ʼmi kjoajtín kʼoa nga ʼmiyasuin. Kʼoati kui tínchja̱ni jmeni xi toji kʼoanʼiai. Jolani nga bʼetsʼoalai Jeobá kʼoa nga chotʼayai je Biblia. ʼYani xi jekitsjoatʼale yaole Jeobá kao kjoatsjoa kʼoasʼínni jebi, ali tsa tobʼénejinle yaole. Kʼoati tso jokitso je rey David: “Kʼianga kʼoasʼian josʼin nga meli, ji Ninána, kui xi simetokoan, kʼoa je kjoatéxomali yaa tíjnajin jinyaona” (Salmo 40:8).

13, 14. 1) Jméni xi koasenkaoli nga kʼoasʼiain josʼin “ʼyaxkón Niná”. 2) Jósʼin tjíobinyakao kʼa je ndsʼee xi sʼa xti tabla xi faʼaitʼa je libro Los jóvenes preguntan.

 ¹³ Je xi koasenkaoli kui tabla xi faʼaitʼa je libro Los jóvenes preguntan, volumen 2, pájina 308 kao 309. Yaa tsoya jebi: “A ñaki kʼoaʼmilai Niná jotjín tokuin kʼianga bʼetsʼoalai. Jmeni xi si, a bakó nga tsjoachai Jeobá”. “Jméni xi chotʼayai nga toji”. “A ʼmikʼinyasonní ninga tsín koai xijcháli”. Ya libro jebi kʼoati koa̱n ya kʼoétʼai jmeni xi koa̱n sʼiain nga ngisasa nda kʼoétsʼoalai Niná, nga ngisasa nda chótʼayai Biblia kʼoa nga ngisasa nda kʼuínyasuin.

¹⁴ Nʼio nkjín xti xi mele koaisʼenngindá xi kʼoatso nga nʼio nda tjíobinyakao libro jebi. Jngo tichjaa xi sʼa xti xi Tilda ʼmi kʼoatso nga kui kjoachjonangi xi faʼaitʼa libro tsakasenkao. Itso: “Tobijbi kichotjenngia jmeni xi tsakʼendajian kʼoa nga kicho jngo nó toje tijnanda nga kisʼenngindá”. Ijngo ndsʼee xi sʼa xti xi Patrick ʼmi kʼoati itso: “Ninga jeʼbe jmeni xi mena sʼian, ngisa tsakʼenele yaona nga kichotjenngia kʼianga tsakʼetʼaxoan”.

15. Ánni kʼoabixónsíñá nga tsín ʼya xi bʼénená nga bʼaitʼalee yaoná je Niná.

¹⁵ Ijngosa koya xi faʼaitʼa ya libro Los jóvenes preguntan kui kjoachjonangi jebi: “A tojo si̱xálai Jeobá tsa tsín tikʼoasʼinni je xijcháli kao miyoli”. Tikjaʼaitsjain kʼianga tsín ʼya xi bʼénená kʼianga bʼaitʼalee yaoná je Niná. Kʼianga jekʼoaitʼalai yaoli je Jeobá kʼoa jekʼuínsʼenngindái, miyoli koa̱n kʼoa jé kʼoailai kuenta jmeni xi sʼiain. Jmeni xi sʼiain ali tsakuijin xi kuitsoni josʼin je xijcháli kʼoa tsa kjaʼaí chjota. Tsakui kʼoatinʼiai je xá xi tsje kʼoa tiʼyaxkuín Niná, kʼoasʼin tibakoni nga ñaki kʼoatjín tokuin nga kui relijión xi kixi tijnajin kʼoa nga meli kʼoasʼiain jotso kjoatéxomale Niná. Tsa kʼoatinʼiai, jejin me koa̱n kʼuínsʼenngindái.

16, 17. 1) Ánni nga menili kʼuínsʼenngindáni kʼoa nga menili chjotale Cristo koai̱n. 2) Jméni xi koasenkaoli nga nʼiosa jchachjí je kjoabʼechjíntjaile Jesús. Jngola choa̱ tʼejnai.

¹⁶ Ñandia kʼianga jngo chjota xi nʼio nda be kjoatéxomale Moisés kui kiskonangile je Jesús jñánile kjoatéxoma xi ngisa títjon tíjna. Je Jesús kitsole: “Tsjoacha katamai Jeobá Nináli kao ngayeje ni̱ma̱li, kao ngayeje kjoabijnachonli kʼoa kao ngayeje kjoafaʼaitsjenli” (Mateo 22:35-37, TNM). Tojosʼin tiʼyaa, tsa ʼyani xi mele koaisʼenngindá nga chjotale Cristo koa̱n, kuijin kʼoasʼinni nga tsjoake Jeobá. Jngo koya xi nʼio koasenkaoli nga ngisasa koa̱ntsjoachai je Jeobá kuinga si̱kjaʼaitsjenjin je kjoabʼechjíntjaile Jesús (tʼexkiai 2 Corintios 5:14, 15; 1 Juan 4:9, 19). Tsa chʼa̱sjeʼai nichxin nga si̱kjaʼaitsjenjin kjoatjao jebi, ngisajin nʼio jchachjísai kʼoa kʼoaijinlai kjoanda je Niná.

¹⁷ Tikjaʼaitsjenlai choa̱ jebi. Tsa jelani tífijtali ya jinnandá tonga tsa ʼya xi koasenkaoli. Jósʼiain. A tsín kʼoailai kjoanda je chjota xi kabʼasjentjaili kʼoa a tokʼuínni ya ndʼiali nga kʼuínnikʼantjaiyai najñoli. Maijin. Nʼiojin tse kjoanda kʼoailai kʼoa alikuijin kʼia cha̱jinli. Tikʼoasʼinni tsanda ñá, tjínnele kʼoailee kjoanda je Jeobá kao Jesús nga tsakʼasjentjainá xi tʼatsʼe jée kao kjoabiya. Kui kʼoakisʼinni nga nʼio tsjoakená. Kʼoa nga kʼoakisʼin koaan kuiyoaa ngantsjai nichxin ya Sonʼndenaxó.

18, 19. 1) Ánni nga tsín tjínnesínile kuinókjuin nga kʼoaitʼalai yaoli je Jeobá. 2) Ánni kʼoabixónsíñá nga ngisa ndasʼin kuijnai kʼiatsa je Niná si̱xálai.

¹⁸ Tsa bʼailai kjoanda Jeobá jmeni xi kisʼin xi tʼatsi, xi ngisasa ndatjín nga kʼoasʼiain  kuinga kʼoaitʼalai yaoli kʼoa nga kʼuínsʼenngindái. Nga bʼaitʼalee yaoná Niná kui xi tsonile nga kʼoaʼmilee nga kui kʼoasʼiaan ngantsjai josʼin mele. Tonga ali nokjonjin nga kʼoakʼuínlai Jeobá, nga̱ je kui xi mele nga ndasʼin kuijnai kʼoa nʼio tsʼe kjoanda tsjoále je xi sítjosonle (Hebreos 11:6). Kʼianga kʼoaitʼalai yaoli je Jeobá kʼoa kʼuínsʼenngindái nʼio ndasʼin kuijnai. Jngo testigole Jeobá xi 24 nóle ndʼaibi kʼoa xi sʼa tiʼndí nga kisʼenngindá itso: “Tsa kiskoyalasa nga kisʼenngindá ngisajin nda koanjinna josʼin tsoyanile nga mangínsʼenngindá. Tonga nga kisʼenngindá tsakasenkaona nga tsínkui kiskajian jmeni xi chon sonʼnde”.

¹⁹ Je Jeobá kui xi mele nga ndasʼin kuijnai. Tonga je Na̱i alikui mandosinle nga ndasʼin kuijnai nga̱ to yaole fini. Tsakui kʼoasʼiain jmeni xi mele alijme xi tsjoáli. Nga̱ tsín jme xi tjínle. Tsín jme xi ndatjín tjínle kʼoa alijme kjoachoya tsjoá. Nga̱ tsín jme kjoachoya tjínle je kʼoa to jchajin (Apocalipsis 20:10).

20. Jmé xi koa̱n sʼiain nga kuijnandai kʼianga kʼoaitʼalai yaoli je Niná kʼoa nga kʼuínsʼenngindái (kʼoati chótsenlai je rekuadro “Xi koasenkaoli nga koa̱nmiyosai Niná”).

²⁰ Nga kʼoaitʼalai yaoli je Jeobá kui xi ngisasa ndatjín xi sʼiain. Tsa jetijnandai, ali nokjonjin nga kʼoaitʼalai yaoli je Jeobá. Tonga tsa kʼoasʼin nikjaʼaitsjain nga kjesa tijnandajin, tʼintjenngi kjoafaʼaitsjen xi katsoyaná i̱ kjoaʼmiya jebi nga si̱ndayasai yaoli. Je Pablo kʼoakitsole je ndsʼe̱ xi ya tsʼe Filipos nga tosi tonda katasíndaya yaole (Filipenses 3:16). Tsa kʼuíntjenngi kjoafaʼaitsjen jebi, kui xi koasenkaoli nga kʼoaitʼalai yaoli je Jeobá kʼoa nga kʼuínsʼenngindái.