1. 1) Ánni nga bakin kʼanile chjota nga jchaxkón. 2) Jméni xi chótʼayajiaan i̱ kjoaʼmiya jebi.

JÓSʼIN ʼyaxkoán jngo chjota. Kʼiaa nga kuenta nʼia kʼoa nga bakolee kjoaxkóntokon. Me tongantsjai nga ʼyaxkoán jngo chjota tsa tjínle kjoandosin jmeni xi kasʼín kʼoa tsa jeje̱ xi xá tjínle. I̱ kjoaʼmiya jebi kui kuitsoyaná ʼyáni xi tjínnele jchaxkoán kʼoa ánni.

2, 3. 1) Ánni nga je Jeobá xi ngisa bakinnile nga jchaxkoán (chótsenlai sén xi faʼaitʼa ibi). 2) ʼYáni xi “Barré” tsole ya Apocalipsis 5:13, kʼoa ánni nga tjínnenile nga jchaxkoán.

² Ya Apocalipsis 5:13 kʼoatso nga je xi “tíjnane je yáxile” kao “je Barré” bakinle nga jchaxkoán. Je xi “tíjnane je yáxile” jéní Jeobá. Ya kapítulo 4 xi tsʼe Apocalipsis, je xi ya tjío ngʼajmi jngo koya síkʼaxki̱ ánni nga bakinnile nga jchaxkoán je Jeobá, “je xi tíjnakon ngantsjai nichxin”. Itso: “Señor [Jeobá], bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan” (Apocalipsis 4:9, 11).

³ Je xi “Barré” tsole ya Apocalipsis 5:13, jé Jesucristo. Jósʼin ʼyañá. Kʼianga tsakʼejna je Jesús i̱ Sonʼnde i tsakʼinle: “ʼNdí  barréle Niná, xi faʼáxin jéele chjotasonʼnde” (Juan 1:29). Je Jesús bakinle nga jchaxkoán, nga̱ tojé xi kitsjoantjai yaole tʼatsʼe chjota xi batéxomale. Ijngosa koya anni nga bakinnile nga jchaxkoán, kuinga je xi “Naitítjonle xi nai ma, kʼoa ngʼajko̱le je xi chjotatítjon” (Apocalipsis 17:14). Kʼoajinti satío tokoán jotjío kon je xi ya tjío ngʼajmi, kʼianga i̱ tso nga se: “Je Barré xi kinikʼen bakinle nga je skoé kjoatéxoma kao kjoanyiná kao kjoaʼisentakon kao nganʼio kao kjoangʼa, kao kjoajeya, kao kjoanichikontʼain” (Apocalipsis 5:12).

4. Ánni nga nʼio chjínile nga jchaxkoán je Jeobá kao Jesús.

⁴ Juan 5:22, 23 kʼoatso nga Jeobá jé kitsjoale xá je Jesús nga jues sʼin kʼoéjnale ngatsʼi chjota. Kuinga tjínnenile jchaxkoán. Kʼianga ʼyaxkoán je Jesús, joxi kʼoaniti tiʼyaxkoán je Jeobá. Tsa ʼyaxkoán je Jesús kao Nʼaile, koaan kuiyoaa ngantsjai nichxin (tʼexkiai Salmo 2:11, 12). *

5. Ánni nga bakinniná ngatsʼiaa nga katasakóná kjoaxkóntokon kʼoa nga kataʼyaxkónná jokji tjen choa̱le.

⁵ Kʼoasʼin kisindaná je Jeobá jokji je (Génesis 1:27). Kui xi tsonile nga koa̱n chjénngilee jokjoan. Tobʼelañá, koaan koakoá kjoatsjoacha, kjoanda kao kjoamatokon. Kʼoati kʼoasʼin kisindaná je Niná nga tjín tokoán, xi kʼoatsoná jmeni xi ndatjín kʼoa jmeni xi chʼaotjín (Romanos 2:14, 15). Tsjoachañá je tsojmi xi tsje kʼoa kao je xi naskákjoan kʼoa kui xi mená nga nyʼán sʼin kuiyokoaa xíngiaa. Alikui tomaxkónná jebi, nga̱ je Jeobá tjío chʼin chʼin je xále kʼoa tsjoakee je kjoanyʼán. Kui xi bakóná jebi nga kʼoasʼin kisindaná je Niná nga koa̱n chjénngilee jokjoan. Kuinga kʼoati bakinniná nga katasakóná kjoaxkóntokon kʼoa nga kataʼyaxkónná jokji tjen choa̱le (Salmo 8:5).

6, 7. Kʼianga ʼyaxkoán xi kjaʼaí, jósʼin nga tsín mangósoán ñá xi testigole Jeobá maa kao xi kjaʼaí chjota.

⁶ ʼYañá nga tjínnele jchaxkoán je xíngiaa, tonga tsakui nichxin likui ʼyaa jósʼin tjínnele jchaxkoán. Kui kʼoamani nga̱ me tongatsʼi chjota nga kui fini jochon je sonʼnde xi kjinentsja je Na̱i. Tjínkʼa je chjota xi nʼio bitjongʼa, kʼoa ñaki jo Niná sʼin ʼyatokon. Je chjota síkʼatone choa̱le josʼin bexkón, ʼndele nga kʼoasʼin skoe̱xkón kʼoa koakole kjoaxkóntokon jotso je Jeobá. Tjínkʼa xi kʼoati kjoan najño bʼakjá kʼoa xi kʼoati sʼín josʼín je chjota xi nʼio ʼyale. Tsakui nichxin je kjenngile je chjota polítiko, je xi nyatítjonle relijión, je chjota xi faʼa ya cine kʼoa tsa jeje̱ xi síská.

⁷ Ñá xi chjotale Cristo maa, ʼyañá nga tsín ndatjín nga nʼio si̱kʼatoné choa̱le jokji jchaxkoán je chjota. Tojé je Jesús xi nʼio nda choa̱ tsakʼéjnaná xi koa̱n chjénngiaa (1 Pedro 2:21). Si̱kjaʼaitsjeen nga ngatsʼi chjota “tsajngi jée, [kʼoa] likui nda bitjo ngixko̱n Niná” (Romanos 3:23). Kuinga nijngojin chjotasonʼnde xi bakinnile nga kʼoétsʼoalee. Tsa si̱kʼatoné choa̱le josʼin jchaxkoán jngo chjota, likuijin sa̱sénle je Jeobá.

8, 9. 1) Ñá xi testigole Jeobá maa, jósʼin ʼyatokoán je chjota xi xá tjínle. 2) Kʼiáni nga tsín si̱tjosonlee je chjota xi xá tjínle.

⁸ Tjínkʼa chjota xi bakinle nga jchaxkoán kʼoa nga koakolee kjoaxkóntokon tʼatsʼe je xá xi sʼín. Tosi̱kjaʼaitsjenla jme xá xi sʼín je chjotale  gobierno. Kui xá sʼín nga síkuinda je naxinandá kʼoa nga tsjoále jmeni xi machjénle. Basenkaoná ngatsʼiaa je xá xi sʼín. Je pastro Pablo kʼoakitso nga tjínnele kʼoasʼin jchatokoán chjota jebi nga xángʼa tjínle kʼoa machjén nga si̱tjosoán je kjoatéxoma xi tsjoá. I kitso: “Tʼechjílao ngatsʼi [...], tsa tao̱nbasen ní, tʼechjílao tao̱nbasenno, tsa je xi bakinle kjoaxkóntakon, tʼailao kjoaxkóntakon” (Romanos 13:1, 7).

⁹ Ñá xi testigole Jeobá maa bʼenelee yaoná nga bakolee kjoaxkóntokon je chjota xi xá tjínle. Nga jngó jngó naxinandá tsen tjínle josʼín. Kuinga tsín mangósonni jmeni xi síjé nga jngó jngó chjota xi xá tjínle. Tojñani tsaan, nitjosonlee je chjota xi xá tjínle. Tonga tsakui kʼoakuitsoná nga kʼoasʼiaan jmeni xi kontra tíjnale kjoatéxomale Niná, alikui nitjosonlee. Tosaa je Jeobá nitjosonlee kʼoa jé ʼyaxkoán tikʼoajinni chjota (1 Pedro 2:13-17). *

10. Jmé choa̱ xi nʼio nda tsakatío kʼaná je choʼndale Jeobá nichxin kjoatse.

¹⁰ Ya Biblia faʼaitʼa choa̱le je choʼndale Jeobá xi tsabexkón kʼoa xi kisitjosonle je chjota xi xá kisʼele nga kui nichxin. Kataʼyala je choa̱le José kao María. Kʼianga kʼoakitso je chjotaxá xi tíbatéxoma ya Roma nga katasʼeya xo̱n jotjín mani je chjota xi tíbatéxomale, je José kao María ki saʼnda Belén nga kikáya xo̱n yaole ninga jeme tsin ʼndíle je María (Lucas 2:1-5). Je pastro Pablo kʼoati nda choa̱ tsakʼéjna nga tsakakóle kjoaxkóntokon je chjota xi xá kisʼele. Kʼianga jngo kjoa kisʼene, kao kjoaxkóntokon kisitoánntjai yaole ya ngixko̱n Herodes Agripa kao ngixko̱n Festo, xi gobernador sʼin tsakʼejna ya Judea (Hechos 25:1-12; 26:1-3).

11, 12. 1) Ánni nga tsín síxkón nikaoñá je chjotatítjonle relijión. 2) Jósʼin kichomani nga jngo testigole Jeobá xi Austria tsʼe tsakakóle kjoaxkóntokon jngo chjotale gobierno.

¹¹ A tjínnele síxkón sʼin jchaxkoán je chjota xi nyatítjonle relijión. Mai. Tjínnele kʼoasʼin koakolee kjoaxkóntokon tojo nikoaa toʼya chjotani. Ningalani je xokuitsoná nga síxkón si̱koaa, alikuijin ndatjín tsa kʼoasʼiaan. Ánni. Kuinga tsínkui tsoya jokjoantjínni xi tʼatsʼe Niná kao jmeni xi tso je Biblia. Je Jesús kʼoakitsole je chjotatítjonle relijión nga to ndiso kʼoa nga tsín nda tjíobándiaale je chjota kʼoa kʼoakitsole nga chjotajaonkjaín (Mateo 23:23, 24). Tonga tsín chʼaotjín nga jchaxkoán kʼoa nga koakolee kjoaxkóntokon je chjotale gobierno. Nga kʼoanʼia, binyakao sakʼoaná.

¹² Jngo chjotale gobierno xi tsakasenkaoná jéní xi Heinrich Gleissner tsakʼin, xi abogado kʼoa xi chjota polítiko koan ya Austria. Kʼianga kisʼejna je Kjoajchántse xi majaoni, je chjota nazi kitsoaa kʼoa jngo tren kisikʼéjnaya nga kisikasén ya ʼnde jñani kjoañʼai kinikjaʼá. Kʼianga tíjnaya je tren yaa tsabexkon jngo testigole Jeobá xi Leopold Engleitner tsakʼin. Je ndsʼee Leopold Engleitner kao kjoaxkóntokon kitsoyale josʼin makjainná je Heinrich Gleissner kʼoa nda kinrʼoé jme xi kitsole. Kʼianga jejetʼa kjoajchán, je chjota jebi nkjín kʼa kisichjén je nganʼio xi tjínle nga tsakinyakao je testigole Jeobá ya Austria. Kʼoajinti ʼyaa tsanda ñá nga ndasʼin  bichómani kʼianga bakolee kjoaxkóntokon je chjotale gobierno.

13. ʼYáni xi ngisa bakinle nga jchaxkoán kʼoa nga koakolee kjoaxkóntokon, kʼoa ánni.

¹³ Ngatsʼi je ndsʼee kao tichjaa bakinle nga jchaxkoán kʼoa nga koakolee kjoaxkóntokon. Kʼoa ngisaa je ndsʼee xi bándiaale je jtín, jolani je xi chjotajchínga sʼin tjío, je superintendente xi tsʼe circuito, xi ya tjíojin Comité xi tsʼe Sucursal kao je Cuerpo Gobernante (tʼexkiai 1 Timoteo 5:17). * Ngatsʼi ndsʼee jebi jé síkuinda je naxinandále Niná. Je Biblia kʼoatso nga jngo kjoatjao xi kao je jtín (Efesios 4:8). Kuinga bakonilee kjoaxkóntokon kʼoa alikui mangínñá tojñani naxinandále, josʼin tjío, jokji kjoachjine tjínle, tsa tjínle kʼoa tsa tsínle tao̱n. Je chjotale Cristo xi tsakatio kʼianga siglo 1 nʼio nda choa̱ tsakatíoná. Tsabexkón je xi tsakándiaale kʼoa kʼoati nʼia tsanda ñá. Kʼianga ya tiyokoaa je ndsʼee jebi, alikui nikʼatoné choa̱le jonikoaa kʼoa alikui jo ánkje sʼin ʼyatokoán. ʼYaxkónñá kʼoa bakolee kjoaxkóntokon nga̱ nʼio síxá kʼoa nga tjínle kjoanangitokon (tʼexkiai 2 Corintios 1:24; * Apocalipsis 19:10 *).

14, 15. Jósʼin nga tsín mangóson je xi chjotajchínga sʼin tjío kao je chjotatítjonle relijión.

¹⁴ Je xi chjotajchínga sʼin tjío ya jinjtín,  tjínle kjoanangitokon. Alikui mele nga kʼoanikoaa jonikao jngo chjota xi telebisión faʼa. Alikui kʼoakjoan josʼín je chjotatítjonle relijión nichxin xi tiyoaa ndʼaibi. Kʼoati likui kʼoakjoan joni je chjotatítjonle relijión xi tsakatio kʼianga nichxinle Jesús. Xi tʼatsʼe chjota jebi, je Jesús i kitso: “Tsjoake ʼnde xi ngisa títjon kʼia nga kjen, kʼoa je yáxile xi ngisa títjon ya ndʼia sinagoga. Tsjoake kjoanitiʼnda ya ndi̱tsi̱n” (Mateo 23:6, 7).

¹⁵ Je xi chjotajchínga sʼin tjío sítjoson jmeni xi kitso je Jesús, nga kitso: “Likui kataʼmino Rabí, nga̱ tojngo je xi Maestrono, je Cristo, kʼoa ngatsʼio nga jon ndsʼe manio. Kʼoa niʼyajin xi kʼoaʼmilao nʼai i̱ sonʼndebi, nga̱ tojngo je xi Nʼaino, je xi kʼoasʼin tíjna ngʼajmi. Ningʼajko̱jin kataʼmino, nga̱ tojngo je xi ngʼajko̱no, je Cristo. Je xi títjon kʼoéyojinno nga jon, jebi xi sixáno. Je xi ngʼa bʼasje yaole, kjaínga nangi koa̱nni, kʼoa je xi nangi bʼasje yaole, ngʼa kuitjoni” (Mateo 23:8-12). Kʼianga nangitokon ma je xi chjotajchínga sʼin tjío kʼoa kui fitjenngi jmeni xi kitso je Jesús, tsjoake ma je ndsʼee kʼoa bakóle kjoaxkóntokon.

16. Ánni nga tosi tonda kʼoénenilee yaoná nga jchaxkoán xíngiaa.

¹⁶ Tsakui nichxin tse kuichomani nga kʼoasʼin jchaxkoán je xíngiaa josʼin tjen ndiaale. Kʼoakoan je chjotale Cristo xi tsakatio kʼianga siglo 1 (Hechos 10:22-26; 3 Juan 9, 10). Tonga nʼio chjíle nga kʼoénelee yaoná. Tsa kʼoasʼin jchaxkoán je xíngiaa josʼin mele Jeobá, tse kjoanda sʼe̱ná.

17. Jmé kjoanda xi sokó nga ʼyaxkoán je chjota xi xá tjínle.

¹⁷ Kʼianga ʼyaxkoán kʼoa bakolee kjoaxkóntokon je chjota xi xá tjínle ya jñani tsaan, tochale sitoánntjainá tsa ʼya xi koatechjoaná nga kʼuínyasoán. Tsakui nichxin saʼnda sa̱sénle je xá xi nʼia. Kʼoakoan ya Alemania nichxin kjoan nkjín nóján kʼianga jetʼale skuela je tsotiʼndíle jngo tichjaa. Je tichjaa jebi Birgit ʼmi kʼoa precursora sʼin tísíxá. Nkjín mani je maestra xi kʼoakitsole nga nʼio tsjoa kisatio kon nga je kitsoyale xti xi testigole Jeobá ma. Je maestra kʼoati kitso nga je xti xi testigole Jeobá ma nda kisʼin nga tsakʼetsoma je skuela. Je Birgit kʼoakitsole nga je xijchá xi testigole Jeobá ma nga kʼoasʼin tsoyale je ʼndíxtile josʼin mele Niná, jolani nga tjínnele skoe̱xkón je maestrole. Jngo maestra xi kʼoakitso nga ngisa choa ñʼai koa̱nle nga kuitsoyale je xti kʼiatsa kʼoalani sʼin ngatsʼi josʼín je testigole Jeobá. Ndasʼin kisikjaʼaitsjen je maestra tʼatsʼe xti xi testigole Jeobá ma, kʼoa jngo xi saʼnda ki kʼianga kisʼejna jngo kjoajtíntse nga koanskanni.

18, 19. Jméni xi tjínnele si̱kjaʼaitsjeen kʼianga jchaxkoán je xi chjotajchínga sʼin tjío.

¹⁸ Je kjoafaʼaitsjen xi tsjoá je Énle Niná basenkaoná nga ʼyaa jósʼin tjínnele jchaxkoán je xi chjotajchínga sʼin tjío ya jinjtín  (tʼexkiai Hebreos 13:7, 17; * chótsenlai je rekuadro “Jósʼin tsoyanile”). Tjínnele kʼoakʼuínlee nga nda tjíosʼín nga kʼoasʼin tjíosíxá. Kʼoati tjínnele kʼoainganʼiolee nga kjuintjenngiaa josʼin bándiaaná. Tsa kʼoasʼiaan, ngisaa tsjoa satío kon nga sitjoson je xále. Xi ijngosani, je Biblia kʼoatso nga tjínnele chjénngiaa kjoamakjainle. Tonga alikui xi tsonile tsa jngo xi chjotajchínga sʼin tíjna chjénngilee josʼin nchja̱, josʼin tsoya kʼoa tsa kʼoati kjoan najño xi chʼa̱kjá jokjoan xi bʼakjá je. Tsa kʼoalani sʼiaan, joxi to chjotajin timangíntjenngilee ʼndele nga Cristo kjuintjenngilee. Si̱kjaʼaitsjeen nga je xi chjotajchínga sʼin tjío kʼoati chjotajée ma tsanda je joni ñá.

¹⁹ Tsa jchaxkoán je xi chjotajchínga sʼin tjío kʼoa tsa tsín síxkón si̱koaa, kuinyakaoñá nga tosi tonda nangitokon katama. Kʼoa tsínjin kʼoasʼin sikjaʼaitsjen nga ngisa ngʼa tjío tikʼoajinni xi ngikʼa kʼoa nga tsínkʼia saténgi.

20. Jósʼin basenkaoná kʼianga ʼyaxkoán xíngiaa.

²⁰ Nga ʼyaxkoán xíngiaa basenkaoná nga tsín ngʼatokon maa kʼoa nga nangitokon maa kʼiatsa ʼya xi síxkón síkaoná. Nga ʼyaxkoán xi ngikʼa kʼoati basenkaoná nga tsín nikʼéjnaa je Jeobá kʼiatsa jngo chjota xi ʼyaxkoán kui kʼoasʼin xi tsín kixi tíjna. Ijngosa koya josʼin basenkaoná nga ʼyaxkoán xíngiaa kuinga jtín biyoaa ya jinnaxinandále Jeobá. Naxinandá jebi alikui síkʼatone choa̱le jokji bexkón jngo chjota, ni testigole Jeobá ma kʼoa ninga mai.

21. Jméni xi ngisasa chjíle kʼianga ʼyaxkoán xíngiaa.

²¹ Je xi ngisasa chjíle kuinga sasénle Niná kʼianga ʼyaxkoán xíngiaa. Tsa ʼyaxkoán xíngiaa, tinitjosonlee je Niná kʼoa kixi timangíntʼalee. Tsa kʼoasʼiaan, je Jeobá koaan kʼoekjaoʼakao je Na̱i, nga kʼoakitso nga tsín ʼya xi kixi koaitʼale Niná (Proverbios 27:11). Me tongatsʼi chjota nga tsín be josʼin tjínnele skoe̱xkón xi ngikʼa. Nʼio bʼailee kjoanda je Jeobá nga tsoyaná nga kʼoasʼin jchaxkoán xíngiaa josʼin mele.