NICHXIN kjoatse, ñandia kʼianga nʼio nyʼán chon nga tanjio yaa tiyuijin ya Brookings (Dakota del Sur, Estados Unidos). Jemachrian je cha̱nnyʼán nga kʼia. Yaa tiyuijin ya jña tíjna jngo nyʼoácho̱ kʼoa ngatsʼijin ñaki kjibʼatséníjin nyʼán. Yaa tiyotʼaijin ya jngo xjáonandá xi tjín nyʼán nyʼán nandá xi nya. Xínyala choano xi tʼatsʼan kʼoa ánni nga ya tiyonijin.

Kʼiaa kitsian nga 7 sá marzo nó 1936. Jan mani xtindsʼe kʼoa an maʼndía. Yaa tsakiyuijin ya jñani kisʼejnanajin jngo granja ya jngo ʼnde xi tíjna Dakota del Sur. Nʼio tsakasenkao je familiana nga ya kinixáijin ya granja, tonga likui kui xi nʼio kitsʼailaijin kjoandosin. Je xijchána testigole Jeobá koan. Kʼoa kʼiaa kisʼenngindá nga nó 1934. Nga je Jeobá kitsjoatʼale yaole kui xi ngisa nʼio koanndosinle nga kʼoasʼin josʼin mele Niná. Je nʼaina Clarence tsakʼin. Ya jtín xi kisʼejna ya Conde (Dakota del Sur), jé títjon pana xi siervo de compañía koan kʼoa xi koanskanni jé tsinina xi Alfred tsakʼin xi kʼoati kui koan. Je xi siervo de compañía tsakʼin nga kʼia, jé xi coordinador ʼmile ndʼaibi.

Je familiana ki je kjoajtín xi batío je testigole Jeobá kʼoa xki̱ niʼya tsakakóyason nga kitsoyale chjota tʼatsʼe kjoachoya xi tsjoá je Biblia. Je choa̱le xijchána kʼoa jmeni xi tsakakóyanajin kui xi tsakinyakaonajin nga tsjoacha koainjin je Jeobá. An kʼoa kao je tichja, Dorothy, publicador koainjin kʼianga tosʼa jaon nónajin. Kʼianga nó 1943, kʼiaa jaʼa̱ títjoan je Skuela xi síchjine choʼndale Niná, xi tochriankʼia kisʼejna.

Nʼio chjí tsaʼyatokuinjin je kjoajtíntse xi kisatio. Jngo kjoajtíntse kisʼejna nga nó 1949 ya Sioux Falls (Dakota del Sur). Ya kjoajtíntse jebi, jé ndsʼee Grant Suiter kitsjoa je  kjoanokjoaya xi “¡Es más tarde de lo que usted piensa!” tsakʼin. Kʼoakitso nga ngatsʼi je xi chjotale Cristo ma xi jekitsjoatʼale yaole Niná, nga tjínnele kʼoasʼin sichjén kjoabijnachonle nga kuitsoyason je énnda chjotse xi tsʼe Chjotaxále Niná. Kʼiaa kitsjoatʼale yaona je Jeobá kʼianga kisʼejna je kjoajtíntse xi jao nichxin ya Brookings nga 12 sá noviembre nó 1949. Kuinga ya tiyonijin ya jña tíjna jngo nyʼoácho̱, jonása sʼin kasikʼaxkia nga títjon, nʼio nyʼán chon nga kʼia kʼoa ño manijin xi ya tiyuijin. Je xjáonandá xi ya tíjna kui koanchjén nga tsangínsʼenngindáijin.

Nga jekoanskanni, kʼoasʼin tsakʼendajian nga precursor sʼin sixá. Kʼiaa nga 1 sá enero nó 1952 tsakʼetsʼiakoa nga precursor koan kʼoa kʼiaa 15 nóna. Je Biblia itso: “Je xi chjotachjine bʼamjekao chjinee koa̱n”. Kʼoa je familiana nʼio chjine koan nga̱ tsakasenkaona nga precursor koan (Proverbios 13:20). Nʼio nkjín kʼa nga ñatjen kixinyasoan kao je tsinina xi Julius tsakʼin, xi 60 nóle nga kʼia. Ningalani jengisa jchínga tikʼoajinni an, nʼio tsjoa koanna nga ñatjen kixinyasoan. Nʼio tse xi tsakakóyana nga̱ jengisa tjínle kjoafaʼaitsjen. Kʼoa je Dorothy me tiʼakʼiani nga precursora koan tsanda je.

Kʼianga sʼa ʼndí kjiʼe̱, je xijchána kʼoasʼin ngale nga nchja̱le superintendente xi tsʼe circuito ya niʼyanajin nga ya bationi. Je xi tsakinyakaona jé Jesse kao Lynn Cantwell, nʼio koankjájonle xi tʼatsʼan kʼoa kisinʼiojinna. Kʼianga ya kisíxatʼa je jtín xi ya chrian tjío je ndsʼee Cantwell, kʼoakitso sakʼoana nga kjuíkoa nga tsoyason. Nʼio kisasenna nga ya ñatjen tsakiyuijin. Kui xi mena nga ñaki toje Jeobá sixále joni je ndsʼee kʼoa nga precursor koa̱n.

Je superintendente xi kichosíxatʼanajin nga koanskanni, jé ndsʼee Bud Miller. Kʼoa je chjoónle Joan tsakʼin. Kʼiaa 18 nóna nga kichosíxatʼanajin. Nga kui nichxin yaa tjínnele kia ya oficina jñani maxkó je sondado. Ya jñani kʼoatso ʼyani xi sondado koa̱n. Je xi ya tjío koanmele nga kui kʼoasʼian jmeni xi kontra tíjnale je kjoatéxoma xi kitsjoa Jesús xi tʼatsʼe kjoa polítika (Juan 15:19). Tonga an kui xi mena nga xínyasoan je énnda chjotse xi tsʼe Chjotaxále Niná. Kuinga kʼoakixinnile nga ñaki to xále Niná sʼian.

Nʼio tsjoa koanna nga kʼoakitsona je ndsʼee Miller nga koaikaona ya oficina jñani maxkó je  sondado. Je ndsʼee nʼiojin koan kʼoa likui ʼya xi kitsokjonle kʼoa nʼio nda tsabe jmeni xi tso je Énle Niná. Nʼio kitsjoanganʼiona nga je kikaona. Nga koanskanni, nga tífikjetʼa nó 1954, je chjota xi tjío jñani maxkó je sondado koanjyole nga kʼoakixian nga ñaki to xále Niná sʼian. Kʼoa kitjoʼndena nga ngisa nda kisixále Niná.

Tochoatsee jaʼato nga kinokjoana nga ya kjuísixá ya Betel, ya Hacienda Watchtower xi tíjna ya Staten Island (Nueva York). Jan nó nga ya kisixá. Nʼio tse xi koanna nga ya kisixákoa je ndsʼee xi ya tjío nga̱ nʼio “chjotachjine”.

Jñani kisʼe tsojmintje kʼoati ya kisʼejna je estación xi tsʼe radio xi WBBR tsakʼin. Kui estación jebi kisichjén je testigole Jeobá tjen nó 1924 saʼnda nó 1957. To 15 kʼoa tsa 20 koannijin xi ya kinixáijin jñani kisʼentje tsojmintje. Me ngatsʼijin nga sʼa xtijin kʼoa kje nanda tjínjinnajin kjoafaʼaitsjen, tonga yaa kisixákaonajin jngo ndsʼee xi jejchínga xi ya tjínle kjoachoya ya ngʼajmi xi Eldon Woodworth tsakʼin. Jo nʼainajin sʼin tsaʼyatokuinjin kʼoa nʼio nkjín koya jmeni xi kitsoyanajin. Kʼianga jme kjoa sʼenajin, je ndsʼee Woodworth i kitsonajin: “Tokʼoamaná jme xá xi tísʼín Niná ninga chjotajée xi tísíchjén”.

Je ndsʼee Frederick Franz kʼoati ya kisixákaonajin kʼoa nʼio tsakasenkaonajin. Ndsʼee jebi nʼio chjine kʼoa nda be jotso je Biblia. Koanndosinle xi tʼatsainjin nga jngó jnguíjin. Jé ndsʼee Harry Peterson tsakʼéndanajin je tsojmi xi kichinaijin. Je xi ñaki apellidole Papargyropoulos ʼmi, tonga nga Peterson tsakʼinlaijin ngisaa choa ñʼai koannajin. Kʼoati ya tjínle kjoachoya ya ngʼajmi, kʼoa nʼio tsjoake koan nga kitsoyason. Ndsʼee jebi nʼio nda kisixá ya Betel tonga likui kʼia tsakájñale nga kitsoyason. Nga xki̱ sá, siento rebista tsakáyole chjota. Kʼoati nʼio nda tsabe jotso je Biblia kʼoa kitsoyanajin jmeni xi kichjonangilaijin.

Ya jña kisʼe tsojmintje, tsakationdaníjin je tsojmixi kʼoa kao tsojmintje kʼoa lata tsakinyaijin kʼoa mela 45,000 lata tsakinyaijin xi me jngo litro tjínle. Jebi yaa koanchjénle je xi ya tjíosíxá Betel. Yaa ñatjen kisixá kao je tichjaa xi Etta Huth tsakʼin, tichjaa jebi nʼio kisʼele  kjoafaʼaitsjen. Jé kʼoakitsonajin josʼin ni̱koaijin nga kʼoéndaijin je tsojmixi kʼoa kao tsojmintje. Nkjín tichjaa xi ya chrian tsʼe kisixákaonajin. Kʼoa jé tichjaa Etta tsakʼéndajin josʼin koanxá. Ningalani nʼio nda be je tichjaa josʼin sʼenda tsojmi nga lata xinyá, ngantsjai nichxin nga tsabexkón je ndsʼee xi kjinele jñani kjintje je tsojmintje. Nʼio nda choa̱ tsakʼéjnanajin ngatsʼijin.

Je tichjaa Angela (Angie) Romano jé xi kichokasenkaonajin. Jé tichjaa Etta kitsoyale xi tʼatsʼe Jeobá. Je Angie kao an kʼiaa chixainjin nga sá abril nó 1958. Kʼoa 58 nó jetjínle nga ñatjen tinixálaijin Jeobá. Je Angie ñaki kixi fitʼale Jeobá kʼoa kui xi ngisa nʼio tíbasenkaonajin. Je Angie nʼio chjine kʼoa nʼiotʼaña ngantsjai.

Kʼianga kisatena jñani tíjna je WBBR ya Staten Island kʼianga nó 1957, yaa kisixá choatse ya Betel xi tíjna Brooklyn. Kʼianga jechixainjin kʼiaa kitjoa ya Betel. Jan nó nga precursor sʼin kinixáijin ya Staten Island. Saʼnda yaa kisixákao choatse je chjota xi tsakatse jñani tíjna je radio kʼoa WPOW sʼin kitsjoajaʼaínle.

Tokoanjngoni tokuijin josʼin tsakiyuijin, nga̱ kui xi koanmenajin nga koa̱n koanngínjin tojñani ni̱kasénnajin. Kʼianga nó 1961, kʼoatsakʼinnajin nga precursor especial sʼin ni̱xáijin ya Falls City (Nebraska). Kʼianga jeya tiyuijin, jngo sá kinokjoanajin ya South Lansing (Nueva York) nga koanngínjin je Skuela jña nichjine je ndsʼee xi xá kjinele. Nʼio tsjoa kisatio tokuijin tʼatsʼe jme xi tsakʼinyanajin ya skuela jebi kʼoa kʼoasʼin kinikjaʼaitsjainjin nga ya ni̱kasén ijngokʼanajin ya Nebraska. Tokʼoakoannajin nga kʼoatsakʼinnajin nga jo misionero sʼin koanngínjin ya Camboya. Naxinandá jebi yaa Asia tíjna. Ya naxinandá jebi nkjín koya jmeni xi tokʼia tsaʼyaijin, xi kinoʼyaijin kʼoa xi kichinaijin. Ñaki kao kjoatsjoa tsakʼinyaijin je énnda chjotse ya naxinandá jebi.

Kʼianga tsʼantjaiya je kjoatéxoma xi tjínle je chjotaxá ya Camboya, yaa tsangínjin ya Vietnam del Sur. Kʼianga jejao nó ya tiyuijin nʼio kitjochʼinna, kʼoa kinroa ijngokʼanijin ya Estados Unidos. Alikui tokjoán koanndaya. Tonga kʼianga jekoanndayaña, ijngokʼá precursor sʼin kinixáijin.

Kʼianga sá marzo nó 1965, superintendente viajante sʼin kinixáijin. Nkjín circuito kao distrito jñani kinixatʼaijin kʼoa 33 nó nga kʼoasʼin kinixáijin. Kui xá kisʼenena nga tsakʼendajian je kjoajtíntse xi kisatio. Nʼio tsjoake̱ koan je xá jebi, nga̱ nʼio chjí tsaʼbekoan je kjoajtíntse. Nkjín nó nga kinixatʼaijin je jtín xi tjío ya Nueva York kao jtín xi tjío ya ndaile kʼoa nkjín kʼa nga ya kisatio je kjoajtíntse ya Estadio xi tsʼe Yankees.

Nkjín koya xá tsakʼainajin ya jinnaxinandále Niná. Kʼianga nó 1995, kʼoatsakʼinna nga an xínyale je xi kuicho je Escuela de Entrenamiento Ministerial. Xi koanni jan nó, yaa Betel kinixá ijngokʼaijin. Nʼio tsjoa koanna nga ya Betel kinokjoa ijngokʼanajin, nga̱ jeñachan nó jaʼato nga ya tsakʼetsʼiakoa nga ñaki to xále Niná kisʼian. Yaa kisixá choatse  ya Departamento xi tsʼe Servicio kʼoa nʼio nkjín koya skuela xi batío naxinandále Niná xi an kixinya. Kʼiaa nga nó 2007 kisʼejna je Departamento de Escuelas Teocráticas xi je Cuerpo Gobernante tsakʼéndajin, kui xá kisʼejnani je departamento jebi nga kisʼendajin je skuela xi satío ya Betel. Nkjín nó nga superintendente sʼin tsakatejnale je departamento jebi.

Nʼio nkjín koya jmeni xi tíbʼantjaiyajin je skuela xi satío ya Betel. Kʼiaa nga nó 2008 kisʼejnatítjon je Skuela jña nichjine je xi chjotajchínga sʼin tjío. Nga jejao nó jaʼato tsʼato 12,000 koanni xi jeki skuela jebi ya Patterson kao ya Betel xi tíjna ya Brooklyn. Skuela jebi tosi tonda tjíosatío jñani xin ʼnde. Kʼianga nó 2010, kʼiaa tsʼantjaiya je jaʼaínle je Escuela de Entrenamiento Ministerial, kʼoa Skuela xi síchjine je ndsʼee xi sʼa tjíotoje sʼin tsakʼaijaʼaínle, kʼoati kʼia kisʼejnatítjon je Skuela xi síchjine xi jechixan.

Kʼianga sá septiembre nó 2015, kʼiaa koanjngole xínkjín skuela jebi kʼoa kui Skuela xi síchjine je xi bakóyason tʼatsʼe Chjotaxále Niná ʼmi ndʼaibi. Skuela jebi koaan koai xi jechixan, xi sʼa tjíotoje, xi xʼin kao xi yánchjín. Nʼio nkjín ndsʼee xi tjío jngo tjíjtsa Sonʼnde xi tsjoa satío kon kʼianga tjíosatío skuela jebi ya naxinandále. Nʼio tsjoa mana nga nʼiosa nkjín xi koa̱n koai skuela jebi. Nʼio tsjoa tjín tokoan kʼianga nʼio nkjín ndsʼee tsaʼbexkoan xi kʼoasʼin tsakʼéndajin nga ki skuela jebi.

Kʼianga sikjaʼaitsjen josʼin tisixále Niná josaʼnda nga kisʼe̱nngindá ya jña tíjna je nyʼoácho̱, nʼio tsjoale kjoanda je Jeobá nga nʼio nkjín chjota xi nʼio chjine tsaʼbexkoan. Tsakasenkaona nga ngisa nda tsaʼbe xi tʼatsʼe Niná kʼoa nga ngisa nda tisixále. Tjínkʼa xi jengisa jchínga kʼoa xi ngisa xti tikʼoajinni an, kʼoa nʼio nkjín xi xin naxinandá jaʼaini. Tonga josʼin tjíosíjchá yaole bakó nga ñaki tsjoake kjoaixi je Niná. Nʼio tsjoa tjín tokoan nga nkjín miyo xi nʼio chjine tjínna ya jinnaxinandále Jeobá, xi nʼio nda choa̱ batío.