Nichxin xi tiyoaa ndʼaibi alikui ʼya xi be jókjoán kisʼe je Pablo, nga̱ tsín jme xi kjimasjai xi bakó jokisʼe. To dibujo xi faʼaitʼa je xo̱n xi bʼasje testigole Jeobá.

Tonga, kjiokʼa xo̱n xi basenkaoná nga majinná jokisʼe je Pablo. Tobʼelañá, xi tikuini rebista jebi xi tsʼe 1 de marzo de 1902, kʼoakitso nga je libro xi Hechos de Pablo y Tecla ʼmi xi kʼia kichji nga nó 150, tsakui nichxin tokuisa libro jebi xi ngisa nda ʼyale kʼoa xi ngisa nda bʼéyanajmí jokisʼe je Pablo, itso: “Jngoo chjota xi to jtoá kisʼe, xi kayajko kisʼe, ndsitin kʼoakjoan ndso̱ko, taja koan kʼoa kisatiokjao ntsja̱xko̱n, kʼoa ndo kisʼe ni̱tjo̱n”.

Jngo diccionario xi kʼoatso nga tsakui nichxin ñaki kʼoakisʼe je Pablo jotso je libro xi Hechos de Pablo y Tecla ʼmi (The Oxford Dictionary of the Christian Church [xi kʼia kitjo nga nó 1997]). Nga siglo 1 nʼio nda tsaʼyale libro jebi, nga̱ 80 xo̱n jaʼatoya nga én griego kʼoa jaʼatoyasa xi kjaʼaí én. Kuinga je dibujo xi faʼaitʼa je xo̱n xi bʼasje testigole Jeobá mangóson jotso je xo̱n xi jekjoatse kichji tʼatsʼe jokisʼe je Pablo.

Tonga tjín xi ngisa nʼio tjínle kjoandosin tikʼoajinni nga kui jchaa jokjoán kisʼe je Pablo. Kʼianga kitsoyason tjínkʼa xi chʼaosʼin kisikʼaxki̱ kʼoa i kitsole: “Kʼia nga tíjnasoa je, tsínnile nganʼiojin, kʼoa énle alijmeni chjíle” (2 Cor. 10:10). Xi kuenta sʼiaan kuinga kʼia chjotatjenngile Cristo koan kʼianga tsakakóle yaole Jesús. Kʼoati koa̱n si̱kjaʼaitsjenjiaan josʼin kichomani nga kitsoyasonle “chjota xi li judíojin” xi tʼatsʼe Jesús (Hech. 9:3-5, 15; 22:6-8). Kʼoati machjén nga si̱kjaʼaitsjenjiaan nga nʼio binyakaoná je libro xi kiski josʼin nga kitsole Niná.

Je Pablo alikui kʼoakuitso jokisʼe kʼoa tsín yaole tsakʼasjengʼa tʼatsʼe jmeni xi kisʼin nga kjesa chjotale Cristole majin (Hech. 26:4, 5; Filip. 3:4-6). I kitso: “An nía pastro xi ngisa nangi tíjnasale xikʼa pastro, nga tsín tsa bakinna nga kʼoaʼmina pastro” (1 Cor. 15:9). Kʼoa xi koanskanni itso xi kiski: “Je xi ngisasa nangi tjío xi chjotale Cristo, an xi ngisasa nʼio nangi tijnale. An tsakʼaina kjoandabi nga kʼoasʼin kuinchjayajinle chjota xi li judíojin je énnda tʼatsʼe je kjoanda xi tjínle Cristo xi likui koa̱n jcha̱yije” (Efes. 3:8). Je én jebi ngisaa nʼio chjíle tikʼoajinni nga kui jchaa jokisʼe je Pablo.