1, 2. 1) Jósʼin síkjaʼaitsjen kʼa je xi xijchá ma kʼianga kʼoatsole je ʼndíxtile nga jemele koaisʼenngindá. 2) Ánni nga kui chjonangisínile je xi koaisʼenngindá tsa jekitsjoatʼale yaole je Jeobá (chótsenlai sén xi faʼaitʼa ibi).

JE XIJCHÁLE María nʼio kuenta tjíosʼín nga jekoaisʼenngindá. Je xi tínchja̱ya jao kjoachjonangi síkatíole. Je María nʼio nchja̱ kʼianga tsjoá je énle. Kʼoa xijema, fisʼenngindá.

² Je xijchále María nʼio tsjoa tjío kon nga jekitsjoatʼale yaole Jeobá je tsotile kʼoa nga fisʼenngindá. Tonga nga kjesa kʼoasʼínjin je María, je na̱le nʼio kisikjáojin. Itso xi kiskonangile yaole: “A tsí sʼa nʼio xti kʼianga jemele koaisʼenngindá. A majin kjoaixile nga nʼio tjínle kjoandosin jmeni xi sʼin. A tsí ngisa nda tsa skóyala choatse”. Nkjín je xijchá xi kui kjonangile yaole jebi kʼianga kʼoatso je ʼndíxtile nga jemele koaisʼenngindá (Ecl. 5:5). Toxá kʼoajinsʼin síkjaʼaitsjenni nga̱ nʼio tjínle kjoandosin nga bʼaitʼalee yaoná je Niná kʼoa nga mangínsʼenngindá (chótsenlai je rekuadro “ A jetsakʼaitʼalai yaoli je Jeobá”).

3, 4. 1) Jmé xi kisingósonkao je Pedro nga nʼio tjínle kjoandosin nga mangínsʼenngindá. 2) Ánni nga kui mangósonkaoni nga kisʼenda je arca kao nga mangínsʼenngindá.

 ³ Je pastro Pedro kui kisingósonkao nga mangínsʼenngindá kao nga tsakʼénda arca je Noé, kʼoa i kitso: “Kui tsoyanile nga mangínsʼenngindá, je xi bʼasjentjainá ndʼaibi” (tʼexkiai 1 Pedro 3:20, 21, TNM). * Kʼianga tsakʼénda arca je Noé kʼoasʼin tsabeni je chjota nga tíjnanda nga kʼoakisʼin josʼin mele Niná. Kisʼele kjoamakjain kʼoa kʼoakisʼin jmeni xi kitsole Jeobá. Nga kʼoakisʼin, kitjontjaile yaole kao xi tjío ya yaniʼyale kʼianga jaʼai je Jtsínʼio. Jméni xi kitsoya je Pedro nga kui jebi kisikʼaxki̱ni.

⁴ Kʼianga tsakʼénda Noé je arca kʼoasʼin tsakakóni nga kisʼele kjoamakjain. Tikʼoasʼinni, kʼianga ʼyani xi fisʼenngindá, ʼyañá nga jechjotale Cristo ma kʼoa nga jekitsjoatʼale yaole Jeobá nga̱ tjínle kjoamakjain tʼatsʼe Cristo. Joni je Noé, je chjotale Cristo xi jekitsjoatʼale yaole Niná sítjosonle kʼoa sítjoson je xá xi bánele. Je Jeobá tsakʼasjentjai Noé kʼianga jaʼai je Jtsínʼio. Tikʼoasʼinni, kʼoasjentjai je choʼndale xi jekisʼenngindá xi kixi tjíofitʼale kʼianga nikjeson jme xi chon sonʼnde (Mar. 13:10; Apoc. 7:9, 10). Kuinga nʼio tjínnile kjoandosin nga bʼaitʼalee yaoná je Jeobá kʼoa nga mangínsʼenngindá. Je xi síkʼachxin nga koaisʼenngindá, tísíchajin je kjoanda xi tjínle nga koa̱n kʼoéjna ngantsjai nichxin.

5. Jméni xi chótʼayajiaan i̱ kjoaʼmiya jebi.

⁵ Nga nʼio tjínle kjoandosin nga mangínsʼenngindá, jan koya tjínni xi machjén nga kataʼyaa. Xi títjon, jmé xi tsoya je Biblia tʼatsʼe  nga mangínsʼenngindá. Xi majaoni, jmé xi tjínnele sʼiaan nga kjesa mangínsʼenngindájián. Kʼoa xi majanni, tsa Biblia tiʼmiyalee je ʼndíxtiná kʼoa tsa xi kjaʼaí chjota, ánni nga kuenta sʼiansíñá nga nʼio tjínle kjoandosin nga mangínsʼenngindá.

6, 7. 1) Jmé xá kiskanisʼenngindáni chjota je Juan. 2) Jñánile je kjoachanisʼenngindá xi tsín koanngóson kao josʼin kiskanisʼenngindá je Juan, kʼoa ánni.

⁶ Kʼianga síkʼaxki̱ títjon je Biblia tʼatsʼe kjoachanisʼenngindá, kui nchja̱ni nga kiskanisʼenngindá chjota je Juan Bautista (Mat. 3:1-6). Je chjota xi kichokonle je Juan nga kiskanisʼenngindá kui tsakakó nga kʼoakoannile nga tsín kisitjoson je Kjoatéxomale Moisés. Tonga je xi ngisa tjínle kjoandosin xi kisʼin je Juan kuinga je kiskanisʼenngindá Jesús, je ʼNdíle Niná (Mat. 3:13-17). Tonga je Jesús alikui koanchjénle nga kʼoakoannile je jéele, nga̱ chjotatsje koan (1 Ped. 2:22). Kuinga kisʼenngindáni nga tsakakó nga jetíjnanda nga ñaki to xále Niná sʼin (Heb. 10:7).

⁷ Kʼianga kitsoyason je Jesús, je chjotatjenngile kʼoati kiskanisʼenngindá chjota (Juan 3:22; 4:1, 2). Kʼoati kuinga kisʼenngindáni je chjota nga̱ kʼoakoannile nga tsín kisitjoson je Kjoatéxomale Moisés. Tonga xi koanskanni, kʼianga jekʼien je Jesús kʼoa nga jejaʼáyanile, alikui tikoanngósonni josʼin kisʼenngindá je chjota.

8. 1) Kʼianga jejaʼáyanile je Jesús, jméni xi tsakʼénele je chjotatjenngile. 2) Ánni tjínnenile koaisʼenngindá je chjotale Cristo.

⁸ Kʼianga nó 33, nga jejaʼáyanile je Jesús, tsʼato 500 chjota xi xʼin kao xi yánchjín tsʼatsenle, tochale kʼoati tsʼatsenle xtiʼndí. Tsakui nichxin kʼia i̱ kitso: “Kuinga tangínsíño, kʼoa chjotana tikao je chjota xi tjín ngakjijnda naxinandá, cha̱nisʼenngindáo kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje, takoyalao nga katasítjoson ngayeje jme xi an tsakʼeneno” (Mat. 28:19, 20, TNM; 1 Cor. 15:6). Tojosʼin tiʼyaa, nʼiojin nkjín mani je chjotatjenngile xi kinrʼoé nga kʼoakitso je Jesús nga chjotatjenngile katasíkao je chjota. Kʼoati kitso nga je chjota xi mele nga chjotale koa̱n tjínnele koaisʼenngindá (Mat. 11:29, 30). ʼYani xi mele nga ndasʼin koatio ngixko̱n Niná, machjén nga koa̱njinle nga nʼio tjínle kjoandosin jmeni xi kisʼin je Jesús nga kuitjoson jmeni xi tjínndajinle Niná. Kui jebi xi machjén nga koa̱n koaisʼenngindá je chjota kʼoa tokui je kjoachanisʼenngindá jebi xi sasénle je Niná. Je Biblia tsoya nga je xi chjotatjenngile Jesús koanni nga siglo 1, koanjinle josʼin tsoyanile nga mangínsʼenngindá kʼoa alikui kisikʼachxin nga kʼoakisʼin (Hech. 2:41; 9:18; 16:14, 15, 32, 33).

9, 10. Jméni xi tsoyaná josʼin kisʼenngindá je chjota etíope kao pastro Pablo.

⁹ (Tʼexkiai Hechos 8:35, 36, TNM). * Kataʼyala jokoan jngo chjota xi Etiopía tsʼe, xi kʼoati kui kjoamakjain kisʼele joni chjota judío. Je chjota jebi to jetífini ya niʼyale kʼianga jekikʼétsʼoale Niná ya Jerusalén. Je Jeobá jngoo ánkje kisikasén xi kʼoakitsole je Felipe nga katatsoyale “je énnda xi tʼatsʼe Jesús”. Jókisʼin je chjota jebi. Koanjinle nga nʼio chjíle nga jchaa nga je Jesús xi Nainá mani. Nga mele kʼoasʼin jmeni xi síjéle Jeobá je chjotale Cristo, je chjota jebi kjitʼanangi kisʼenngindá.

¹⁰ Kataʼyala ijngoaa choa̱ tʼatsʼe jngo chjota xi kitjenngike chjotale Cristo.  Chjota judío kitjenni. Tonga je chjota judío alikui tindasʼin tsakationi ngixko̱n Jeobá nga̱ tsín kisitjoson. Kʼoa je chjota jebi nʼio koanndosinle jmeni xi kisʼin je chjota judío nga tsabexkón je Niná. Je Jesús yaa tjen ngʼajmi kinchja̱nile. Kʼoa nga kʼoakoan, je chjota jebi kitsjoaʼnde nga tsakasenkao je Ananías, kʼoa xijekoan kisʼenngindá (Hech. 9:17, 18, TNM; Gál. 1:14). Je chjota jebi, jé xi pastro Pablo tsakʼin nga jekoanni. Tojosʼin tiʼyaa, je Pablo tokjoan kisʼenngindá kʼianga jekoanjinle nga nʼio chjíle jmeni xi kisʼin je Jesús nga kuitjoson jmeni xi tjínndajinle Niná (tʼexkiai Hechos 22:15, 16, TNM). *

11. 1) Jméni xosíkao nga fisʼenngindáni je xi Biblia kotʼaya. 2) Jósatío tokoán kʼianga ʼya xi fisʼenngindá.

¹¹ Kʼoati sʼín ndʼaibi je xi Biblia kotʼaya, ni sʼa xti kʼoa ni jechjotajchínga. Je xi ñaki ni̱ma̱le nroajinni nga sʼele kjoamakjain kʼoa xi bechjí jmeni xi tso je Biblia, tsjoátʼale yaole je Jeobá kʼoa fisʼenngindá. Kʼianga satío je kjoajtíntse, jngo kjoanokjoaya sʼejna xi bʼaile je xi fisʼenngindá. Xi testigole Jeobá maa nʼio tsjoa satío tokoán kʼianga fisʼenngindá jngo chjota xi Biblia ʼmiyale. Kʼoa je chjotale Cristo xi xijchá ma, nʼio tsjoa satío kon kʼianga fisʼenngindá je ʼndíxtile. Kʼianga nó 2017, tsʼato 284,000 chjota kisʼenngindá, kʼoa kʼoasʼin tsakakóni nga jekitsjoatʼale yaole je Niná (Hech. 13:48). Alikui jao tjínná nga koanjinle chjota jebi nga tjínnele koaisʼenngindá je xi chjotale Cristo mele koa̱n. Tonga jméni xi títjon kisʼin nga koan kisʼenngindá.

12. Jméni xi títjonkjoanla sʼin jngo chjota xi Biblia tíkotʼaya nga koa̱n koaisʼenngindá.

¹² Kʼianga kjesa fisʼenngindájin jngo chjota xi Biblia tíkotʼaya, tjínnele koa̱njinle jokjoantjínni xi tʼatsʼe Niná, jmeni xi tjínndajinle kʼoa jmeni xi kisʼin nga koa̱n kuitjo̱ntje (1 Tim. 2:3-6). Je kjoankjíntokon jebi kui xi koasenkao nga sʼe̱le kjoamakjain kʼoa nga tsín tikui kʼoasʼinni jmeni xi tsín sasénle Niná kʼoa nga sitjoson je kjoafaʼaitsjen xi tsjoá je Biblia (Hech. 3:19). Je xi tosi tonda kui xi chʼaotjín kʼoasʼín, alikui sa̱sénle Niná kʼianga tsjoátʼale yaole (1 Cor. 6:9, 10). Je xi Biblia tíkotʼaya alikui tokui xi machjén nga sitjoson je kjoatéxomale Niná. Kʼoati machjén nga koai kjoajtín, nga kjitʼa kuitsoyason kʼoa kuitsoyale Biblia je chjota. Je Jesús kʼoakitso nga kui xá jebi kʼoasʼin je chjotatjenngile (Hech. 1:8). Nga jekʼoatísʼín ngayeje jebi je xi Biblia tíkotʼaya, koaan kʼoetsʼoale je Jeobá nga toje kʼianga tsjoátʼale yaole, kʼoa xijekoa̱n, koaan koaisʼenngindá.

13. Kʼianga kʼuínyaa je Biblia, ánni machjénsíni nga kuenta sʼiaan nga tjínnele koaisʼenngindá je xi mele nga chjotale Cristo koa̱n.

¹³ Kʼianga kuinyakoaa je ʼndíxtiná kʼoa kao je chjota xi ʼmiyalee Biblia, xi kuenta sʼiaan kuinga tjínnele koaisʼenngindá nga chjotale Cristo koa̱n. Kuinga machjénsíni nga kʼuínyalee nga nʼio tjínle kjoandosin nga yaoná bʼaitʼalee Niná kʼoa nga mangínsʼenngindá. Kui xi mená nga koa̱ntaja je kjoamakjainle kʼoa koaisʼenngindá.

14. Ánni nga tsín ndatjínsíni kʼiatsa ʼya xi kʼoénelee nga katafisʼenngindá.

¹⁴ Alikui ʼya xi kʼoenele nga koaisʼenngindá jngo chjota xi Biblia tíkotʼaya, ni jejin xijchále, ni jejin xi tsoyale Biblia, kʼoa ni jejinla ndsʼee xi tjío ya jinjtín tjínnele kʼoakuitsole nga koaisʼenngindá. Saʼnda je Jeobá alikui ʼya xi bʼénele (1 Juan 4:8). ʼNdele nga kʼoakʼuínlee, tosa kui kʼuínyalee nga nʼio tjínle kjoandosin nga miyole Niná katama.  Nga koa̱nmele koaisʼenngindá jngo chjota kui xosikao nga tsjoake kjoaixi je Énle Niná kʼoa nga mele sitjoson jmeni xi tjínnele sʼin jngo chjotale Cristo (2 Cor. 5:14, 15).

15, 16. 1) Kʼiáni tjínnele koaisʼenngindá jngo chjota xi Biblia ʼmiyale. Tʼeyanajmí. 2) Ningalani jekisʼenngindá jngo chjota kʼianga kjaʼaí relijión tsakʼejnajin, ánni machjénsíni nga koaisʼenngindá kʼianga testigole Jeobá koa̱n.

¹⁵ Tsínkjoan tíjnachoa̱ jokjitse koa̱n koaisʼenngindáni jngo chjota xi Biblia tíʼmiyale, nga̱ tsín tongóson sʼín nga jngó jngó. Tjínkʼa xi ngotjo matajani kjoamakjainle kʼoa tjínkʼa xi ngisa ñʼai male. Nkjín xi kʼia fisʼenngindá nga sʼa xti, kʼoa kixi fitʼale Jeobá ngantsjai. Tjínkʼa xi kʼia be je Énle Niná kʼianga jejchínga, xi saʼnda jetsʼato 100 nóle, kʼoa kʼiaa majinle nga nʼio tjínle kjoandosin nga mangínsʼenngindá.

¹⁶ Je xi Biblia ʼmiyale machjén nga koaisʼenngindá ninga jekisʼenngindá kʼianga kjaʼaí relijión tsakʼejnajin. Tokʼiaa sa̱sénle je Jeobá kʼianga yaole tsjoátʼale jngo chjota kʼiatsa jetjínle kjoankjíntokon xi kixi. Kʼoakoan jngo chjoón xi jeme 80 nóle. Nga jenkjín kʼa kisʼenngindá nga kjaʼaí kjaʼaí relijión tsakʼejnajin, kiskonangile je xi títsoyale Biblia tsa tojo machjén nga koaisʼenngindá ngindia. Je tichjaa kitsoya kʼale jotso je testole Biblia. Je chjoón jebi koanjinle jmeni xi tsoya je Biblia tʼatsʼe nga mangínsʼenngindá kʼoa me tiʼakʼia kisʼenngindáni (tʼexkiai Hechos 19:3-5, TNM). *

17. Jméni xi ndatjín nga si̱kjaʼaitsjenjiaan nichxin nga mangínsʼenngindá.

¹⁷ Nichxin kʼianga fisʼenngindá jngo chjota nʼio tsjoa sʼe kon. Tonga kʼoati machjén nga sikjaʼaitsjenjin jmeni xi tjínnele sʼin nga kuitjosonle kʼianga jekitsjoatʼale yaole je Niná. Je chjotatjenngile Jesús alikui “titʼatsʼeni” nga tjíokon, jetʼatsʼe tjíoni “je xi kʼoasʼin kʼen, kʼoa xi kinikjaʼáyanile” (2 Cor. 5:15; Mat. 16:24).

18. Jméni xi chótʼayajiaan ya kjoaʼmiya xi ijngo.

¹⁸ I̱ kjoaʼmiya jebi, kui kaʼyaa nga tsín tokjoaská tjenkao nga chjotale Cristo maa. Kuinga kui kisikjaʼaitsjenjinni je na̱le María je kjoachjonangi xi kanikʼaxki̱ná nga títjon. Tsa tjínli je ʼndíxti, tsakui nichxin kui jebi chjonangilai yaoli: “A jetíjnanda je ʼndítina kʼoa tsa ʼndítsotina nga koaisʼenngindá. A jetjínle kjoankjíntokon nga sa̱sénle je Jeobá kʼianga yaole tsjoátʼale. A tjínnele nga jngo carrera skótʼaya kʼoa nga nda xá so̱kole nga kjesa fisʼenngindájin. Kʼoa tsa kʼiani koa̱njngijée nga jekafisʼenngindá”. Yaa kjoaʼmiya xi ijngo chótʼayajiaan xi tʼatsʼe jebi. Kʼoati jchaa jósʼin tjínnele skoe̱kon je xi xijchá ma je kjoachanisʼenngindá.