1. Jméni xi tso Biblia xi tʼatsʼe kjoabichakjáya.

JMÉNI xi fiya jkui kʼianga noʼyai je én xi kjoabichakjáya tso. Tsakui nichxin kui nikjaʼaitsjain nga kjoañʼai tínchja̱ni, tonga nʼiosa tse jmeni xi tsoyanile. Kʼianga kui nchja̱ni Biblia xi tʼatsʼe kjoabichakjáya, ndasʼin síkʼaxki̱ kʼoa kʼoatso nga ya tjenjin je kjoankjíntokon, kjoachjine, kjoatsjoacha kʼoa kao kjoabijnachon (Prov. 1:2-7; 4:11-13). Kuinga batekjáyaniná Jeobá nga̱ tsjoakená kʼoa mele nga kuiyoaa ngantsjai nichxin (Heb. 12:6). Sakʼoaa kjoañʼai bichómani nga batekjáyaná tonga tsín toxkia síkaoná. Je kjoabichakjáya xi tsjoáná Niná yaa mangóson josʼín jngo nʼai xi tsjoake je ʼndíxtile nga batekjáyale.

2, 3. Jmé xi tsoyanile kʼianga tikjáyaná (chótsenlai sén xi faʼaitʼa ibi).

² Jngola choa̱ kataʼyaa. Jngo tiʼndí xi Carlos ʼmi, yaa yaniʼya tísískákao je pelotale kʼoa je male itsole: “Carlitos, jeyʼai nga tsín koa̱n i̱ yaniʼya si̱skákoai je pelotali, tsa me tjín xi koa̱nxkoa̱”. Tiʼndí jebi tsín sítjoson kʼoa tosi tonda ya síská. Kʼoa toʼima ya bichókʼakaole pelotale jngo tii kʼoa bakján. Kʼianga batekjáyale male tiʼndí jebi, tsoyale nga tsín ndatjín jmeni xi kasʼín. Kui xi mele je male nga katamajinle nga ndatjín nga nikitjosoán kʼoa nga tjen ndiaale jme xi tso je xi xijchá ma. Kʼianga  koa̱nkjainle tiʼndí jebi, kʼoaʼmile nga tsín titjóʼnde choatsenile nga pelota siskákao. Ninga tsín sasénle jmeni xi matʼain je Carlos, kui bakóyale nga tsín ndasʼin bichómani nga tsín nikitjosoán.

³ Ñá xi chjotale Cristo maa, yaa “niʼyale Niná” tiyoʼyá (1 Tim. 3:15). Kuinga tojeni Jeobá xi bakinle nga tsjoáná kjoatéxoma kʼoa nga koatekjáyaná kʼianga tsín nitjosonlee. Xi ijngosani, nga tsín ndasʼin bichómani nga kui kʼoanʼia xi chʼaotjín kʼoa nga bichakjáyaná, kui tsoyaná jokji chjíle nga si̱tjosonlee je Nʼainá (Gál. 6:7). Je Niná nʼio tsjoakená kʼoa tsín mele nga kjoañʼai chja̱ʼá (1 Ped. 5:6, 7).

4. 1) Jméni xi sʼiaan nga sichikontʼainná je Jeobá. 2) Jméni xi chótʼayajiaan i̱ kjoaʼmiya jebi.

⁴ Kao kjoafaʼaitsjen xi tsjoá je Biblia xi tʼatsʼe kjoabichakjáya kuinyakoaa je ʼndíxtiná, kʼoa tsa jeje̱ chjota xi Biblia tiʼmiyalee nga chjotale Cristo katama. Kʼianga bakoyaa kui je Énle Niná nichjén nga̱ basenkaoná “nga sikinyáyandiaaná xi kjoakixi”. Koaan kui si̱chjén nga kʼuínyalee je ʼndíxtiná kʼoa kao xi sʼa tjíokotʼaya je Biblia nga katamajinle kʼoa nga katasítjoson jmeni xi kitso je Jesús (2 Tim. 3:16; Mat. 28:19, 20, TNM). Je Jeobá síchikontʼainná nga kʼoasʼin ʼmiyalee je chjota, nga̱ binyakao nga kʼoatisʼin kuitsoyale xi kjaʼaí nga kʼoati chjotale Cristo katama (tʼexkiai Tito 2:11, 12). * I̱ kjoaʼmiya jebi, jan kjoachjonangi chótʼayajiaan: Xi títjon, ánni nga kʼoasʼin bakóniná Niná nga tsjoakená kʼianga batekjáyaná. Xi majaoni, jméni xi bakóyaná je choa̱le chjota xi Niná tsakatekjáyale nichxin kjoatse. Kʼoa xi majanni, jósʼin koa̱n chjénngiaa je choa̱le Jeobá kao Jesús nga kuichákjáyaa.

5. Jósʼin bakó Jeobá nga tsjoakená tʼatsʼe josʼin batekjáyaná.

⁵ Je Jeobá tsjoakená kuinga batekjáyaniná kʼoa bakóyaniná. Kui xi mele nga miyole katamaa kʼoa nga koa̱n kuiyoaa ngantsjai nichxin (1 Juan 4:16). Alikuikʼia nga ai fákaoná kʼoa tsínkʼia nga chʼao bʼé tokoán (Prov. 12:18). Je Jeobá nʼio bechjíná, kui kuenta sʼín jñani nda nʼia kʼoa tsjoáʼndená nga ñá chjoejiaan jmeni xi nʼia. A kʼoasʼin ʼyatokoán je kjoabichakjáyale Jeobá nga kui je Biblia síchjén, xo̱n xi bʼasje je naxinandále, je xijcháná kʼoa kao xi chjotajchínga sʼin tjío. Tsakui nichxin tokjoataon xi koa̱n nga jée ska̱jiaan kʼoa je xi chjotajchínga sʼin tjío kao kjoatsjoacha kʼoa kao kjoatsejta koatekjáyaná. Tsa kʼoasʼin, kui tjíobakó je kjoatsjoachale Jeobá (Gál. 6:1).

6. Ningalani si̱chaa je xá xi tjínná ya jinjtín kʼianga bichakjáyaná, josʼin bakóná je kjoatsjoachale Niná.

⁶ Sakʼoaa nga tsín to kjoafaʼaitsjen machjénle jngo chjota nga tikjáyale. Kʼiatsa kui jée xi ai tíjna kabajngi, tsakui nichxin tjóxinle je xá xi tjínle ya jinjtín. Ninga kʼoalani koa̱ntʼain, je Jeobá tíbakóle kjoatsjoacha nga tíbatekjáyale. Nga sícha je kjoanda xi tjínle ya jinjtín je xi ai jée kabajngi, basenkao nga majinle nga nʼio tjínle kjoandosin nga sikʼaya nichxin nga skótʼaya je Biblia nga toje, nga sikjaʼaitsjenjin kʼoa nga kʼoetsʼoa. Tsa kʼoasʼin, koasenkao nga nʼio sʼe̱jna je kjoamakjainle (Sal. 19:7). Nga jekoai nichxin, tochajinle tjoé ijngokʼanile je xá xi tjínle tsakai ya jinjtín. Kʼoa saʼnda je xi bichonsjejin ya jinnaxinandále Niná, je Jeobá bakóle nga  tsjoake, nga̱ síkuinda je jtín tʼatsʼe xi chʼaotjín (1 Cor. 5:6, 7, 11, TNM). Xi ijngosani, kixi tíjna josʼin batekjáyaná je Jeobá, kʼoa nga bichonsjejin jngo chjota, basenkao nga majinle jokji ai tíjna je jée xi kabajngi kʼoa nga kʼoamanile jéele (Hech. 3:19).

7. 1) ʼYáni xi Sebná tsakʼin. 2) Jósʼin tsakakó nga ngʼakon koan je Sebná.

⁷ Kʼianga koa̱njinná jokji chjíle je kjoabichakjáya, jaola choa̱ kataʼyaa tʼatsʼe chjota xi je Jeobá tsakatekjáyale. Je Sebná xi kʼia tsakʼejna nga tsakatéxoma je Ezequías kʼoa kao tʼatsʼe ndsʼee xi Graham ʼmi. Tsakui nichxin je Sebná kisʼenele nga kisikuinda je niʼyale rey Ezequías kʼoa kuinga xángʼa kisʼenile (Is. 22:15). Tonga ngʼakon koan kʼoa to yaole tsakʼasjengʼa. Saʼnda síxkón kji tsjó xi kisindale yaole jñani sʼe̱ñe kʼoa síxkón kjoan karreta xi tsakʼejnaya (Is. 22:16-18).

8. Jósʼin tsakatekjáyale Jeobá je Sebná kʼoa jósʼin kichomani.

⁸ Je Jeobá tsakjaʼáxinle je xá xi kisʼele Sebná kʼianga to yaole kini kʼoa jé Eliaquim kitsjoale (Is. 22:19-21). Kʼiaa kʼoakoan jebi kʼianga je rey Senaquerib kʼoasʼin tsakʼéndajin nga kuichokʼetʼale Jerusalén. Xi koanskanni, je Senaquerib kisikasén je chjotale xi xángʼa tjínle kʼoa kao chjotakjoajchánle nga kichokinyáxkónle je chjota judío kʼoa nga tokatasíjyo jmeni xi koa̱ntʼain je rey Ezequías (2 Rey. 18:17-25). Je Ezequías, jé Eliaquim kisikasén kao Sebná, xi secretariole koanni kʼoa kao ijngosa chjota nga kikjákaonajmí je chjotakjoajchán asirio. Nga kisijyo je Sebná ninga nangi tíjna je xá xi tsakʼaile kui bakó nga nangitokon koan kʼoa nga tsín tsakʼéngijti kon. Janla koya kataʼyaa jmeni xi bakóyaná choa̱ jebi.

9-11. 1) Jméni xi bakóyaná jmeni xi koantʼain je Sebná. 2) Jósʼe tokuin kʼianga kui nikjaʼaitsjain jokisikao Jeobá je Sebná.

⁹ Xi títjon, nga kʼoasʼin kisicha je xá xi kisʼele Sebná kui bakóná nga “je kjoangʼatokon síkʼatjenjennginá; kʼoa ʼyani xi ngʼakon saténgi” (Prov. 16:18). Tsakui nichxin tse xá tjínli ya jinjtín kʼoa je xi ngikʼa kʼoasʼin síkjaʼaitsjen nga nʼio chjíle je xá xi tjínli. Tsa kʼoalani, a nangitokon kjimai. A jé Jeobá chʼa̱sjengʼai tʼatsʼe kjoanda xi tísʼeli (1 Cor. 4:7). Je pastro Pablo i kitso: “Kʼoaxinno nga jngójngó xi tiyobi, xi totʼatsʼe kjoanda xi tsakʼaina, nga tsín ʼya xi ngisa nʼio ngʼa sikjaʼaitsjenle yaole kaoni tsa xi josʼin nga bakinle, tonga kʼoasʼin katasíkjaʼaitsjenjin nga ningʼajin kʼoa ninangijin sikjaʼaitsjen xi tʼatsʼe yaole” (Rom. 12:3).

¹⁰ Xi majaoni, tsakui nichxin kʼoasʼin kisikjaʼaitsjen Jeobá nga sikʼantjaiyani yaole  Sebná nga kuichákjáyale (Prov. 3:11, 12). Choa̱ jebi nʼio tse jmeni xi bakóyale je xi sícha xále ya jinjtín. ʼNdele nga sijtile yaole kʼoa nga kʼoengijti kon, machjén nga ngisa ndasʼin sixále je Niná kʼoa kuenta sʼin nga kui tsakatekjáyanile Jeobá nga tsjoake. Si̱kjaʼaitsjeen nga je Nʼainá tsjoále chjíle je xi nangitokon (tʼexkiai 1 Pedro 5:6, 7). * Mená nga kʼoakoa̱nkjoaan jokjoan je niʼnde xi inda ya yantsja Jeobá kʼoa kʼoaiʼndee nga je katabatekjáyaná.

¹¹ Xi majanni, jokisikao Jeobá je Sebná, tse jmeni xi bakóyale je xi tjínle ʼnde nga batekjáya, jolani je xi xijchá ma kʼoa kao xi chjotajchínga sʼin tjío ya jinjtín. Kʼianga batekjáyaná Jeobá bakó nga jtike je jée tonga tojo tsjoake je xi tsakajngijée. Xi ijngosani, je Jeobá kui kotsenle jmeni xi ndatjín sʼín je chjota. Kʼiatsa ʼya xi kuichákjáyalai, a kʼoasʼiain josʼín je Jeobá (Jud. 22, 23).

12-14. 1) Jósʼin síkjaʼaitsjen kʼa chjota kʼianga je Jeobá batekjáyale. 2) Jósʼin tsakasenkao je Biblia jngo ndsʼee nga kisikʼantjaiya jokjoan, kʼoa jósʼin kichomani.

¹² Tjínkʼa chjota xi aon satío kon kʼianga bichakjáyale kʼoa síkjinle je Jeobá kao je jtín (Heb. 3:12, 13). A koaan kʼoainganʼiole chjota jebi. Kʼianga koa̱njinná, kataʼyala je choa̱le Graham. Tsakichonsjejin ya jinnaxinandále Niná kʼoa xijekoan tsakʼejnanda ijngokʼani kʼoa to chaan kisikʼéjna je xále Niná. Jngo jao nó koanskanni, kʼoakitsole jngo xi chjotajchínga sʼin tíjna, xi miyole mani, nga mele nga katatsoyale Biblia.

¹³ Je xi chjotajchínga sʼin tíjna xi kitsoyale Biblia, itso: “Je xi ñʼai koanle je Graham kuinga ngʼakon koan. Chʼaosʼin kisikʼaxki̱ je chjotajchínga xi tsakʼéndajin je kjoale nga tsakichonsjejin naxinandále Niná. Kui kichotʼayajinjin jmeni xi tso je Biblia xi tʼatsʼe kjoangʼakon kʼoa josíkaoná. Kʼianga koanjinle je Graham jmeni tso je Biblia xi tʼatsʼe kjoangʼakon, ñaki tokʼoakoanle. Tsabee nga kui kjoangʼakon tíbʼetʼale kʼoa nga chʼaosʼin kisikʼaxki̱ je ndsʼee, kisikʼantjaiyaa yaole. Ki ntsjaintsjai kjoajtín, nʼio kitsjoale kjoandosin nga kiskotʼaya je Biblia kʼoa nyaon nyaon tsakʼétsʼoa. Kʼoa kisitjoson ijngokʼa je xá xi kjinele ya yaniʼyale, nga jko̱ sʼin tíjnale je familiale kʼoa nʼio nda kisʼe kon je chjoónle kʼoa kao xtiyánchjínle” (Luc. 6:41, 42; Sant. 1:23-25).

¹⁴ Je xi chjotajchínga sʼin tíjna, itsosa: “Ñandia nga itso xi tsakʼéyanajmína je Graham: Jekjoan nkjín nó nga ʼbe je Énle Niná kʼoa saʼnda precursor sʼin kisixá. Tonga tosʼaa títjon ndʼaibi nga kʼoaxian nga nʼio tsjoake̱ je Jeobá. Tochoatsee jaʼato nga kʼoatsakʼinle nga je koationda micrófono xi machjén nga sʼejna kjoajtín kʼoa nʼio tsabechjí je xá jebi. Je choa̱le ndsʼee jebi kui tsakakóyana nga nʼio tse kjoanichikontʼain sokóle jngo chjota xi nangitokon ma kʼoa xi tsjoáʼnde nga je Jeobá batekjáyale”.

15. Kʼiatsa mená nga katasítjoson je xi ngikʼa nga bichakjáyalee, jméni xi tjínnele sʼiaan.

¹⁵ Kʼianga nda koakoyaa tjínnele nga títjonkjoanla nda chótʼayá (1 Tim. 4:15, 16). Tikʼoasʼinni, kʼiatsa je Jeobá sichjénli nga tjín xi kuichákjáyalai tjínnele nga nangitokon koai̱n kʼoa kʼoaiʼndai nga je Jeobá katabándiaali. Kʼianga skoe̱ xi ngikʼa nga nangitokon kjimai, koakoli kjoaxkóntokon kʼoa ngisaa choa ñʼai koa̱nle nga sitjoson je kjoafaʼaitsjen xi kʼoailai. Kataʼyala je choa̱ xi tsakʼéjnaná je Jesús.

16. Jméni xi bakóyaná josʼin kitsoya je Jesús kʼoa josʼin tsakatekjáya.

 ¹⁶ Je Jesús kisitjosonle ngantsjai je Nʼaile ninga kʼianga ñʼai koanle (Mat. 26:39). Kʼoakitso nga je kjoachjine xi kisʼele kʼoa kao jmeni xi tsakakóya nga tʼatsʼe Niná jaʼaini (Juan 5:19, 30). Nga nangitokon koan kʼoa nga kisitjoson, nʼio ndʼé koan kʼianga kitsoya, tsakakó kjoamatokon, kʼoa je chjota xi kinrʼoéle kisasenle jmeni xi kitsoyale (tʼexkiai Mateo 11:29). * Jmeni xi kitso je Jesús nʼio tsakinyakao je chjota xi jekinroajen kon, xi ya mangóson je nachjónle lámpara xi jetífitsʼao (Mat. 12:20). Je Jesús tsejtaa koan ninga ngʼakon koan sakʼoa je pastrole kʼoa ngasin nganda tsakatekjáyale (Mar. 9:33-37; Luc. 22:24-27).

17. Jméni xi tjínnele sʼin je xi chjotajchínga sʼin tjío nga nda sikuinda je jtín.

¹⁷ Je xi chjotajchínga sʼin tjío tjínnele nga kui choa̱le Jesús koaitjenngi kʼianga ya Biblia kʼoangini nga koatekjáya. Kʼiatsa kʼoasʼin, tjíobakó nga je Jeobá kao Jesús tjíobándiaale. Je pastro Pedro i kitso: “Tikuindao je chjotale Niná xi tjíojinno. Ali kao kjoanʼiojin nikuindao, tokao kjoandano kʼoasʼiaon. Ali tʼatsʼe xi kuinje̱no xi chʼao tjín, tokao kjoatsjoa kʼoasʼiaon. Ali tsa nʼiojin bʼenelao chjota xi bʼakaono, tonga tjandiaalao chjotale Niná” (1 Ped. 5:2-4). Kʼianga sítjosonle je Jeobá kao Jesús je xi chjotajchínga sʼin tjío jinjtín ndasʼin bichómani, nga̱ binyakao je kʼoa binyakaoná ngatsʼiaa (Is. 32:1, 2, 17, 18).

18. 1) Jmé xá xi bánele Jeobá je xi xijchá ma. 2) Jósʼin binyakao Jeobá je xi xijchá ma nga bitjosonle je xá xi kjinele.

¹⁸ Kjoafaʼaitsjen jebi nʼio machjénle je familia. Je Jeobá itsole je xi jko̱ tjíole ya yaniʼya: “Ali nijtijinlao xtino. Tokʼoasʼin tijcháo nga sin nga nda koakolao koakoyandalao kjoa xi tsoya Niná” (Efes. 6:4). Jebi alikui tokjoaská tjenkao. Ya Proverbios 19:18 nga kui xi kuitsoni josʼin jtíkjáyale je xti tsa so̱kole kjoabijnachon kʼoa tsa mai. Je Jeobá kuenta sijéle je xijchá xi tsín batekjáyale je xtile (1 Sam. 3:12-14). Je Jeobá tsjoále kjoachjine kao nganʼio je xi xijchá ma kʼiatsa sijéle nga katabinyakao kʼoa tsjoáʼnde nga kui Biblia katabándiaale kao nganʼiotsjele (tʼexkiai Santiago 1:5). *

19, 20. 1) Jmé kjoanichikontʼain so̱koná kʼiatsa chʼa̱ʼén nga batekjáyaná Jeobá. 2) Jméni xi chótʼayá ya kjoaʼmiya xi ijngo.

¹⁹ Kʼianga chʼaʼén nga bichakjáyaná kʼoa nga kʼoasʼin bichakjáyaa josʼín je Jeobá kao Jesús nʼio tse kjoanichikontʼain sʼená. Nyʼán sʼin biyoaa ya yaniʼyaná kʼoa kao ya jinjtín. Nda satío tokoán ngatsʼiaa, tsín jme xi nikjáojiaan kʼoa tsín jme xi nokjonlee, jebi kui xi bakóná nga kʼoasʼin kuiyoaa nichxin xi nroaján (Sal. 72:7). Kʼianga batekjáyaná je Jeobá tísíkatíondaná nga koa̱n nyʼán sʼin kuiyoaa ngantsjai nichxin kʼoa nga jtín sʼin kuiyoaa (tʼexkiai Isaías 11:9). * Tsa kuenta sʼiaan jebi, koa̱njinná nga kʼoasʼin bakóniná je Jeobá nga tsjoakená kʼianga batekjáyaná.

²⁰ Ya kjoaʼmiya xi ijngo kui jchaa tʼatsʼe kjoabichakjáya xi sʼe ya yaniʼya kʼoa kao ya jinjtín. Kʼoati jchaa jósʼin kuichákjáyalee yaoná kʼoa jméni xi ngisasa tse kjoaʼaon síkatíojinná tikʼoajinni je kjoabichakjáya.