1. Jméni xi mele skoe̱ je xijchá xi chjotale Cristo ma tongini nga kjesa fisʼenngindájin je ʼndíxtile.

JNGO tichjaa xi Blossom Brandt tsakʼin, i kitso: “Nkjín sá nga kʼoakixinle je xijcháná nga jemena kjuísʼe̱nngindá, kʼoa je xijchána kʼoati nkjín kʼa tsakjákaonajmína xi tʼatsʼe jebi. Kui xi koanmele tsabe tsa ñaki kʼoatjín tokoan nga mena kjuísʼe̱nngindá. To chaan kicho nichxin nga kisʼenngindá: nga 31 sá diciembre nó 1934”. Nichxin xi tiyoaa ndʼaibi, je xijchá xi chjotale Cristo ma, kʼoati mele nga kuinyakao je ʼndíxtile nga nda skoéjin jmeni xi sʼin. Tsínjin ndasʼin kuichomani tsa kʼoechjoale je ʼndíxtile nga koaisʼenngindá (Sant. 4:17). Tonga nga kjesa fisʼenngindájin je ʼndíxtile toxá makjáojinnile je xi xijchá ma nga skoe̱ tsa jetjíonda je ʼndíxtile nga sitjoson je xá xi tjenkao nga chjotale Cristo maa.

2. 1) Jmé kjoani xi be kʼa je superintendente xi tsʼe circuito. 2) Jméni xi chótʼayajiaan i̱ kjoaʼmiya jebi.

² Tjínkʼa je superintendente xi sʼe circuito xi makjáojinle nga tjín je xti xi kje fisʼenngindájin ninga jekan nóle kʼoa xi testigole  Jeobá ma je xijchále. Me ngatsʼi nga fi je kjoajtín, tsoyason, kʼoa kʼoatso nga testigole Jeobá ma. Tonga jméni xi bʼéchjoale nga tsín tsjoátʼanile yaole je Jeobá kʼoa nga tsín fisʼenngindáni. Sakʼoaa je xijchále xotsole nga tongisa nda nga skóyala. Jméni xosíkao kʼa je xijchá xi chjotale Cristo ma nga bʼéchjoale je ʼndíxtile nga tsín ndi̱to̱n koaisʼenngindá. I̱ kjoaʼmiya jebi, ño koya jchaa jmeni xi makjáojin kʼale je xi xijchá ma.

3. Jméni xi koankjáojinle je xijchále Blossom.

³ Kui xi koankjáojinle je xijchále Blossom tsa jetjínle nó nga koa̱njinle jme xi tsoyanile nga mangínsʼenngindá kʼoa nga nʼio tjínle kjoandosin. Jósʼin skoe̱ni je xi xijchá ma tsa jetjíonda je ʼndíxtile nga tsjoátʼale yaole je Jeobá.

4. Jósʼin binyakao je xi xijchá ma jmeni xi kitso je Jesús tojosʼin faʼaitʼa ya Mateo 28:19, 20, TNM.

⁴ (Tʼexkiai Mateo 28:19, 20, TNM). * Tojosʼin tsaʼyaa ya kjoaʼmiya xi jejaʼato, je Biblia alikui kʼoatso jotjín nóná nga koa̱n kjuinsʼenngindá. Ninga kʼoalani, je xi xijchá ma machjén nga sikjaʼaitsjenjin nga “chjotana tikao je chjota” kitso je Jesús, tojosʼin faʼaitʼa ya Mateo 28:19. Je én jebi kui xi tsonile nga sa̱kóyale je chjota ánni nga chjotatjenngile Cristo koa̱nsíni. Jé nchja̱ni jngo chjota xi majinle kʼoa xi machoyale jmeni xi kitsoya je Jesús kʼoa xi ñaki kʼoatjín kon nga sitjoson. Kuinga tjínnenile kuitsoyale je ʼndíxtile saʼnda nga sʼa ʼndílee je xijchá xi testigole Jeobá ma, ánni nga koa̱n kuinyakaoni nga koaisʼenngindá kʼoa nga chjotale Cristo koa̱n. Jngo xi sʼa ʼndílee alikui koa̱n kuitjosonle josʼin tsoyanile nga mangínsʼenngindá. Tonga je Biblia kʼoatso nga koaan koa̱njinle jmeni xi tso je Énle Niná ninga sʼa xtiʼndí.

5, 6. 1) Kʼianga ʼyaa jotso je Biblia tʼatsʼe Timoteo, jméni xi machoyaná tʼatsʼe kjoachanisʼenngindá. 2) Jósʼin nga ngisa nda kuinyakao je ʼndíxtile je xi xijchá ma.

⁵ Ninga sʼa xti je Timoteo jé Jeobá kisixále. Je pastro Pablo kʼoakitso nga je Timoteo nda tsabexkon je Énle Niná saʼnda “nga ʼndí” kji, xi tsonile, saʼnda nga sʼa ʼndílee. Je nʼaile Timoteo alikui je Jeobá kisixále, jé na̱le kao majchále kitsoyale je Énle Niná. Kʼoa nga kʼoasʼin tsakinyale, nʼio kisʼejna je kjoamakjainle (2 Tim. 1:5; 3:14, 15). Kʼianga kichole 20 nó je Timoteo, jenʼio ndasʼin tísíxále je Jeobá (Hech. 16:1-3).

⁶ Kjaʼaí kjaʼaí sʼín nga jngó jngó je xti. Alikui tongóson sʼin mataja je kjoamakjainle. Tjínkʼa xi ngotjo sʼenile kjoafaʼaitsjen ninga sʼa ʼndí kjoan, kʼoa kʼoatso nga jemele koaisʼenngindá. Kʼoa tjínkʼa xi kʼoasʼin síkjaʼaitsjen nga kjesa tjíondajin nga koaisʼenngindá. Kʼianga majinle jebi je xi xijchá ma, alikui bʼénele je ʼndíxtile nga koaisʼenngindá, tosaa binyakao nga tosi tonda koa̱ntaja je kjoamakjainle. Nʼio tsjoa satío kon je xi xijchá ma kʼianga fitjenngi je ʼndíxtile kjoafaʼaitsjen xi tsjoá Proverbios 27:11 * (tʼexkiai). Tonga alikui koa̱n sichajin nga machjén nga chjotale Cristo koa̱n je ʼndíxtile. Kuinga ndatjínsíni nga skónangile yaole jebi: “A jetjínle kjoankjíntokon je ʼndítina nga tsjoátʼale yaole je Jeobá kʼoa nga koaisʼenngindá”.

7. Tsa ʼyani xi mele koaisʼenngindá, a tjínnele ñaki skoe̱ ngayeje jmeni xi tsoya je Biblia. Tʼeyanajmí.

⁷ Je xi xijchá ma tsoyale Énle Niná je ʼndíxtile nga̱ kui xi mele nga nda katabexkon. Kui kjoankjíntokon jebi kuinyakao je ʼndíxtile nga koanmele tsjoátʼale yaole je Jeobá. Jebi alikui kui xi tsonile nga tjínnele ñaki skoe̱ ngayeje jmeni xi tsoya je Biblia nga kjesa tsjoátʼajinle yaole je Jeobá kʼoa nga kjesa fisʼenngindájin. Ngatsʼi chjotale Cristo, kʼianga jefisʼenngindá, machjén nga tosi tonda sʼe̱le kjoankjíntokon xi kixi (tʼexkiai Colosenses 1:9, 10). * Jókji kjoankjíntokon tjínnele sʼe̱ná nga kjesa mangínsʼenngindájián.

8, 9. Jméni xi tsoyaná jokoan je Pablo kʼoa kao chjota xi ndoyá síkuinda.

⁸ Je xi koasenkaoná nga jchaa jókji kjoankjíntokon tjínnele sʼe̱ná nga kjesa mangínsʼenngindájián, kui je choa̱le choʼndale Niná xi tsakatio kʼianga siglo 1 (Hech. 16:25-33). Kʼianga nó 50, je Pablo yaa kisíxatʼa naxinandá Filipos, je xi majaoni kʼa kʼianga kjin kikakóyason. Je Pablo kao Silas kindoaa kʼoa ndoyá kinikatíoʼya xi totʼatsʼe nga énndiso kisʼene. Nga kui nitje̱n, jngo cháonnʼio jaʼa kʼoa ñaki kitjoʼai je xo̱ntjoale ndoyá. Je chjota xi tísíkuinda ndoyá tome kisikʼien je yaole nga̱ kʼoasʼin kisikjaʼaitsjen nga jekitjo xi tjíoʼya ndoyá. Tonga je Pablo alikui kitsjoaʼndele nga kʼoakisʼin. Je Pablo kao Silas kitsoyale je Énle Niná chjota jebi kʼoa kao familiale. Kʼoa nʼio chjí tsabe jmeni xi tsakʼinyale tʼatsʼe Jesús kʼoa kjitʼanangi kisʼenngindá. Jméni xi tsoyaná jebi.

⁹ Tsakui nichxin je chjota xi síkuinda ndoyá sondado koan ngasʼa, kʼoa tsínjin bexkon je Énle Niná. Kuinga koanchjénsíni nga títjonkjoanla tsakʼinyale jotso je Énle Niná, nga tjínnele koanjinle jmeni xi tsoyanile nga choʼndale Jeobá maa kʼoa nga sitjoson jmeni xi kitsoya je Jesús. Tochoa tsee jaʼato nga kisʼele kjoankjíntokon xi tʼatsʼe Niná, nʼio chjí tsabe jmeni xi koanjinle kʼoa kui xokisikao nga kisʼenngindá. Jméni xi koa̱n sʼin je xi xijchá ma tsa tile kʼoa tsa tsotile xi kʼoakuitsole nga jemele koaisʼenngindá, tsakui kʼoasʼinni nga tsjoake je Jeobá kʼoa nga mele sitjosonle. Koaan kʼoakuitsole nga katabʼéyanajmíle je xi chjotajchínga sʼin tjío ya jinjtín. Kʼoa je xi chjotajchínga sʼin tjío kui kuenta sʼin jotso je kjoatéxomale Niná tsa jekoa̱n koaisʼenngindá. * Joni ngatsʼi je chjotale Cristo, tosi tonda koa̱njinsale xi tʼatsʼe Jeobá kʼoa tosi tonda kʼoasʼin ngantsjai nichxin (Rom. 11:33, 34).

10, 11. 1) Jósʼin síkjaʼaitsjen kʼa je xi xijchá ma. 2) Jmé xi tjínnele ngisa tsjoále kjoandosin je xi xijchá ma.

¹⁰ Tjínkʼa je xijchá xi kʼoasʼin síkjaʼaitsjen nga ngisa nda nga títjonkjoanla jngo carrera skótʼaya kʼoa nga jngo xá xi nʼio nda katasʼele je xtile kʼianga kjesa fisʼenngindájin. Tsakui nichxin likui chʼaotjín nga kʼoasʼin sikjaʼaitsjen. Tonga a binyakao je ʼndíxtile nga tsjoa satío kjoaixi kon. Kʼoa  xi ijngosani, a kui xi tsoya je Énle Niná. Jósʼin mele je Jeobá nga si̱chjén je kjoabijnachonná (tʼexkiai Eclesiastés 12:1). *

¹¹ Nʼio tjínle kjoandosin nga si̱kjaʼaitsjeen nga tsín sasénle Jeobá je sonʼnde jebi kʼoa kao jmeni xi chon (Sant. 4:7, 8; 1 Juan 2:15-17; 5:19). Kʼianga miyole Niná koa̱n je ʼndíxti kui xi kuinyakao nga tsín je Na̱i kʼoanachale, nga tsín ya tsjónjin yaole jmeni xi chon sonʼnde kʼoa nga tsín kʼoasʼin sikjaʼaitsjen josʼin síkjaʼaitsjen xi tsín Niná síxále. Tsa je xi xijchá ma kui títjon sikʼéjna jmeni xi tjín sonʼnde, tsakui nichxin kʼoasʼin sikjaʼaitsjen je ʼndíxtile nga ngisa tjínle kjoandosin jmeni xi tjín sonʼnde tikʼoajinni je kjoamiyo xi tjínle kao Jeobá. Je xijchá xi chjotale Cristo ma alikuijin mele nga kui jmeni xi chon sonʼnde skoéjin je ʼndíxtile. Je xi ñaki tsjoa kʼoee kjoaixi tokoán kuinga je Jeobá títjon si̱kʼéjnaa (tʼexkiai Salmo 1:2, 3). *

12. Ánni kʼoatso kʼasínile je ʼndíxtile xi xijchá ma nga katakoyala nga koaisʼenngindá.

¹² Jngo tichjaa xi bʼéyanajmí ánni nga tsín koanmenile nga kisʼenngindá je tsotile, itso: “Soa mana nga kʼoaxian nga kui kitsokjonle tsa skanni koa̱njngijée je tsotina kʼoa kuichonsjejinjin naxinandále Niná”. Joni je tichjaa jebi, tjínkʼa je xijchá xi kʼoasʼin síkjaʼaitsjen nga ngisa nda nga katamajchíngala je xtile ánni nga jekoa̱nnile kui skoéjin xi ndatjín (Gén. 8:21; Prov. 22:15). Tsakui nichxin kʼoasʼin síkjaʼaitsjen nga tsín koa̱n kuichonsjejin naxinandále Niná tsa kje fisʼenngindájin. Tonga to yaole bʼanachale tsa kʼoasʼin sikjaʼaitsjen (Sant. 1:22).

13. Tsa ʼyani xi kje fisʼenngindájin, a kui xi tsonile nga tsín jme kuenta tsjoále je Jeobá. Tʼeyanajmí.

¹³ Je xi xijchá ma kui xi mele nga kʼia tsjoátʼale yaole je Jeobá kʼoa kʼia koaisʼenngindá je ʼndíxtile kʼianga jesʼe̱le kjoafaʼaitsjen. Tonga alikui kixi tíjna tsa kʼoasʼin sikjaʼaitsjen nga tsín kuenta sijéle Jeobá je ʼndíxtile tsa kje fisʼenngindájin. Kʼianga jebe je ʼndíxti jmeni xi ndatjín kʼoa jmeni xi chʼaotjín kuenta tsjoále je Jeobá (tʼexkiai Santiago 4:17). * Je xijchá xi nda bándiaale je ʼndíxtile bʼénele yaole nga nda choa̱ batío, ʼndele nga kʼoakuitsole je ʼndíxtile nga kje koa̱n koaisʼenngindájin. Tsoyale saʼnda nga sʼa ʼndí kjoan nga chjí katabe je kjoatéxomale Jeobá (Luc. 6:40). Kui xi ngisa nda koasenkao, nga̱ kui xosikao nga sitjoson je kjoatéxomale Niná (Is. 35:8).

14. Je xi chjotajchínga sʼin tjío ya jinjtín, jósʼin koa̱n kuinyakao je xi xijchá ma.

¹⁴ Je xi chjotajchínga sʼin tjío ya jinjtín koaan kuinyakao je xi xijchá ma nga kui kjoakaonajmíni je ʼndíxti tʼatsʼe xále Niná. Jngo tichjaa xi kʼoatso nga xjaʼaonla minuto tsakjákaonajmí je ndsʼee Russell kʼianga sʼa jaon nóle, nga kui tsakjákaonajmíni jósʼin sixále Niná. Je tichjaa jebi, tsʼato 70 nó nga precursora sʼin kisixá. Jebi kui bakóná nga nʼio ndasʼin bichómani tsakui chja̱kaonajmíñá tsa ʼyani nga nda katasíxále je Jeobá (Prov. 25:11). Xi kʼoati koa̱n sʼin je xi chjotajchínga sʼin tjío, kuiní nga kʼoakuitsole je xi xijchá ma kʼoa kao ʼndíxtile nga katatsjoánganʼio ya Ndʼia jña chotʼayá. Koaan kui xá kʼoaile je ʼndíxti jmeni xi koa̱nle kʼoasʼin.

15. Je ndsʼee xi tjío ya jinjtín, jósʼin koa̱n kuinyakao je xi sʼa xti.

 ¹⁵ Jósʼin koa̱n tsjoánganʼio je xi ngikʼa ndsʼee. Kʼiaa nga koakole kjoandosin je xi sʼa xti. Koaan kui kuenta sʼin jósʼin tjíosíxále Niná je xi sʼa xti. Tobʼelañá, tsa je xi sʼa xti nʼio nda tso én tsjoá nga tíjna je kjoajtín. Tsa tjín xi kabʼakaole nga kafaʼa ya kjoajtín. Tsa kichokjoajinle je kjoa xi jaʼatojin. Tsa kitsoyason ya ndʼiaskuelale. Machjén nga kʼoakʼuínlee nga nʼio nda tjíosʼín. Koaan kʼia chja̱kaonajmiá je ʼndíxti kʼianga sʼa koaitsʼia kʼoa tsa kʼiaje̱ nga jekjoetʼa je kjoajtín. Tsa kʼoasʼiaan, kui xosikao nga tsjoa sa̱tío kon (Sal. 35:18).

16, 17. 1) Ánni nga nʼio tjínnile kjoandosin nga koaisʼenngindá je ʼndíxti. 2) Jmé kjoatsjoa xi so̱kole je xijchá xi Niná síxále (chótsenlai sén xi fitsʼiani kjoaʼmiya jebi).

¹⁶ Je xi ngisasa chjíle jmeni xi koa̱n sʼin je xijchá xi Niná síxále kuinga kʼoasʼin sijchá je ʼndíxtile josʼin mele Jeobá (Efes. 6:4; Sal. 127:3). Kʼianga kitsin je xtiʼndí israelita tokʼoa jenaxinandále Niná kitjenni. Tonga alikui mangóson je xtiʼndí xi tsin ndʼaibi, ninga chjotale Cristo ma je xijchále. Xi ijngosani, alikui to jekichʼañá nga tsiaan kʼianga tsjoacha maa je Jeobá kʼoa kao kjoatéxomale. Saʼnda nga sʼa tsin je ʼndíxti, machjén nga kuinyakao je xijchále nga chjotale Cristo katama, nga tsjoátʼale yaole Niná kʼoa nga koaisʼenngindá. Kui jebi xi nʼio tjínle kjoandosin, nga̱ kui xi koasenkao nga kuitjontjaile yaole kʼianga kjoaʼaí je kjoañʼai xi nʼio tse (Mat. 24:13).

¹⁷ Tojosʼin kaʼyaa ya párrafo xi títjon xi tʼatsʼe tichjaa Blossom Brandt, kʼianga kʼoakitsole je xijchále nga jemele koaisʼenngindá, je xijchále kui xi koanmele tsabe tsa ñaki jetjínjngo kon je tsotile nga koaisʼenngindá. Kʼianga tsabe nga tsín jao tjínle, tsjoa kisatio kon. Je tichjaa Blossom kʼoatso jokisʼin je nʼaile jngo nitje̱n tongini nga kjesa fisʼenngindájin. Itso: “Kʼoakitsonajin nga kuinyaxkónyʼinjin ngatsʼijin kʼoa tsakʼétsʼoaa. Kʼoakitsole je Jeobá nga nʼio tsjoa tjín kon nga jekitsjoatʼale yaole je ʼndítsotile”. Kʼoa nga jetsʼato 60 nó jaʼato, je tichjaa jebi i kitso: “Jokjitse koatejnakoan alikuikʼia sichajian nga kʼoakisʼin je nʼaina nga kʼia”. Kui xi mená nga ngatsʼi xi xijchá ma kʼoati tsjoa katasatío kon nga je Jeobá sixále ʼndíxtile, nga je tsjoátʼale yaole kʼoa nga koaisʼenngindá.