1. Jósʼin tíbichómani jmeni xi kisʼin je Adán kao Eva.

JÓSI ʼyáni xi tjínnele kʼoakuitso jméni xi ndatjín kʼoa jméni xi chʼaotjín. Kʼianga kui tole yá xi tsʼe kjoankjíntokon xi ndatjín kao xi chʼaotjín kiskine je Adán kao Eva, kʼoasʼin tsakakóni nga tsín je Jeobá kao kjoatéxomale kisinʼiotʼa. Totsʼee kjoafaʼaitsjen kisichjén nga kʼoakitso jmeni xi ndatjín kʼoa jmeni xi chʼaotjín (Gén. 3:22). Tonga jósʼin kichomani nga kʼoakisʼin. Kisichaa je kjoamiyo xi kisʼele kao Jeobá kʼoa nga koa̱n koatio tsakai ngantsjai nichxin. Xi ijngosani, kui jée kao kjoabiya kisikakinle je ntje̱le (Rom. 5:12). Kjoañʼai tíbichómani nga kʼoakisʼin.

2, 3. 1) Jméni xi kisʼin je chjota etíope kʼianga tsakʼinyale je Énle Niná. 2) Jmé kjoanichikontʼain sokóná kʼianga mangínsʼenngindá. 3) Jmé kjoachjonangi xi chótʼayajiaan.

² Alikui mangóson jmeni xi kisʼin je Adán kao Eva kʼoa jmeni xi kisʼin je chjota etíope kʼianga kitsoyale Felipe je Énle Niná. Je chjota jebi tokjoan kisʼenngindá nga̱ nʼio kitsjoale kjoanda je Jeobá kao Jesús jmeni xi kisʼin xi totʼatsʼe (Hech. 8:34-38). Kʼoa ñá, kʼianga bʼaitʼalee yaoná je Jeobá kʼoa nga mangínsʼenngindá tojo kisʼin je chjota etíope, bakoñá nga bʼailee kjoanda je Jeobá kao Jesús jmeni xi kisʼin xi totʼatsaan. Xi ijngosani, bakoñá nga je Jeobá ninʼiotʼaa kʼoa ʼyañá nga toje xi bakinle kʼoakuitso jméni xi ndatjín kʼoa jméni xi chʼaotjín.

³ Tikjaʼaitsjain je kjoanichikontʼain xi sʼená nga je Jeobá nixálee. Tobʼelañá, kui kjoachoya tjínná nga koa̱n sʼe̱ná jmeni xi kisicha je Adán kao Eva, jolani nga koa̱n kuiyoaa  ngantsjai nichxin. Nga tjínná kjoamakjain xi tʼatsʼe Jesucristo, je Niná síchatʼaná je jéená kʼoa tsje sʼe tokoán (Mat. 20:28; Hech. 10:43). Xi ijngosani, yaa tiyojinlee je choʼndale Niná xi tojngo familia mani, xi ndatjío ngixko̱n kʼoa xi kui koyale nga nda koatio nichxin xi nroaján (Juan 10:14-16; Rom. 8:20, 21). Ningalani ʼyaa je kjoanda jebi, tjínkʼa xi jao tjío kon tsakui choa̱le chjota etíope koaitjenngi kʼoa tsa mai. Jmé xi bʼéchjoale nga tsín fisʼenngindáni, kʼoa jmé xi kuinyakao nga tsín jao sa̱tío kon.

4, 5. Jmé kjoa xi kisʼele je Avery kao Hannah.

⁴ Nga to jao sʼe tokoán. Je xijchále jngo ti xi Avery ʼmi testigole Jeobá ma. Je nʼaile nʼio ndasʼin bʼaxki̱ nga nda bándiaale je familiale kʼoa nga chjotajchínga sʼin tíjna. Ninga kʼoalani, je Avery ñʼai koanle nga kisʼenngindá. Itso: “Kʼoasʼin kisikjaʼaitsjen nga tsín kuichotjenngia nga kʼoatisʼin kʼoaxkia josʼin ʼyale je nʼaina”. Xi ijngosani, je Avery kʼoati sʼin kisikjaʼaitsjen nga tsín kuitjosonle je xá xi kʼoaile nga jekoa̱nni. Itsosa: “Kui kisikjáojian tsakui kʼoakʼuínna nga ya jinle jtín kʼoetsʼoa, nga tsjoa kjoanokjoaya, kʼoa tsakuije̱ nga an kʼoasje je grupo nga ʼmiyasoán”.

⁵ Je Hannah, jngo tsoti xi 18 nóle, to jao kisʼe kon. Ningalani testigole Jeobá ma je xijchále, kʼoasʼin kisikjaʼaitsjen nga tsín kʼoakoa̱nle kʼoasʼin koaikao yaole jotso je kjoatéxomale Niná. Kʼoa kʼianga tsín nda sʼe kon, sakʼoaa tije kisikiʼaonni yaole. Itso: “Alikui ʼya xi tsakʼeyanajmíle jmeni xi kisʼian, ni jejin xijchána. Kʼoasʼin kisikjaʼaitsjen nga tsínkʼia ndasʼin skoe̱konna je Jeobá nga yaona sikiʼoan”.

6. Ánni nga ñʼai koannile je Vanessa nga kisʼenngindá.

⁶ Je miyo xi sʼená. Jngo tsoti xi Vanessa ʼmi, xi 22 nóle, itso: “Nʼio miyona koanni jngo tsoti xi jela te nó ʼbexkoan”. Tonga je miyo xi kisʼele alikui koanndosinle nga Niná kisixále je Vanessa kʼoa alikui tsakasenkao nga koa̱n koaisʼenngindá, kʼoa kui xi aon tsakʼé kon je Vanessa. Itsosa: “Alikui choa ñʼai koanna nga tsín tije kisimiyoña, kʼoasʼin kisikjaʼaitsjen nga tsín tikʼia soko ijngonina jngo miyo joni je”.

7. Jmé xi kitsokjonle je Makayla, kʼoa ánni.

⁷ Nga kui nokjonlee tsa so̱kojéená. Aon nóle je Makayla kʼianga tsakichonsjejin naxinandále Niná je tindsʼe̱. Nga jeki nichxin, tsabee jokji aon koanle je xijchále nga kʼoakisʼin je tindsʼe̱. Itso: “Ali kitso tokoan nga kjuísʼe̱nngindá, kui kitsokjonle tsa so̱kojéena, kʼoa tsa  kuichonsjejinna naxinandále Niná ngisajin tisikjáojinngáni je xijchána”.

8. Jmé xi kitsokjonle je Miles.

⁸ Nga kui nokjonlee tsa ʼya xi koatiochjoaná. Kataʼyala choa̱le jngo ti xi Miles ʼmi. Je nʼaile kao na̱jonle testigole Jeobá ma, tonga je xi ñaki na̱le alikui kui. Je Miles itso: “Xjaʼaonjan nó nga ya tsakatejnakoa je mana. Alikui kitso tokoan nga kʼoakixinle nga mena kjuísʼe̱nngindá. Faʼaitsjenna nga tsín kisasenle kʼianga testigole Jeobá koan je pana. Kui kitsokjonle tsa totaon skoe̱na”.

9. Jósʼin kuichomani kʼianga jchai nga tsejta kʼoa nga tsjoakená je Jeobá.

⁹ Je Adán kao Eva alikui nʼio tsjoake koan je Niná, kuinga tsín je kisixánile. Ninga kʼoalani, je Niná kitsjoaʼndele nga tsakatiokon kʼoa nga kisʼele xti, kʼoa kitsjoaʼndele nga je kiskoejin josʼin sijchá. Tochoatsee jaʼato nga tsaʼyale nga tsín ndasʼin kichomani nga toje tsakʼa yaole je Adán kao Eva. Nʼio chini koan nga kʼoakisʼin. Je tile xi majchínga tijé kisikʼienni je tindsʼe̱, kʼoa nga jeki nichxin je chjota nʼio tsʼen koan kʼoa to yaole kini (Gén. 4:8; 6:11-13). Tonga je Jeobá tsakʼéndajin josʼin koa̱n kʼoasjentjai je ntje̱le Adán kao Eva xi mele nga je sixále (Juan 6:38-40, 57, 58). A tsí kui jebi xi bakóná nga tsejta kʼoa nga tsjoakená je Jeobá. Kʼianga jchasai xi tʼatsʼe Jeobá, sa tsjoacha sa tsjoachaa koai̱n. Alikuijin kʼoasʼiain jokisʼin je Adán kao Eva, tosajin ñaki kʼoakʼoaí tokuin nga je Niná si̱xálai.

10. Jósʼin koasenkaoli jmeni xi tso Salmo 19:7 nga si̱xálai je Jeobá.

¹⁰ Tosi tonda katamasali xi tʼatsʼe Jeobá. Nga ngisasa nda jchai xi tʼatsʼe Jeobá, ngisaa koa̱nmeli je si̱xálai. Je Avery kʼoatso nga nʼio kitsjoanganʼiole nga tsakʼéxkia kʼoa nga kisikjaʼaitsjenjin jmeni xi tso Salmo 19:7 * (tʼexkiai). Kʼianga tsabe josʼin bitjoson én  jebi, ngisaa nʼio kisʼele kjoatsjoacha xi kao Jeobá. Je kjoatsjoacha jebi ali tokuijin nga basenkaoná kʼianga nʼiojin maa, kʼoati basenkaoná nga je Jeobá títjon nikʼéjnaa kʼoa kuenta nʼia jmeni xi mele. Je Hannah itso: “Kʼianga tsakʼexkia kʼoa nga kiskotʼaya je Biblia, koanjinna nga kʼianga sikiʼoan yaona kʼoati sikiʼoan je Jeobá” (1 Ped. 5:7). Je Hannah tsakʼénele yaole nga kʼoakisʼin jotso je Énle Niná (Sant. 1:22). Jósʼin kichomani nga kʼoakisʼin. Itsosa: “Kʼianga tsaʼbe nga ndasʼin bichómani nga nitjosonlee je Jeobá, ngisasa tsjoake̱ koan. Kʼoa ndʼaibi alikui jao tjínna nga je koasenkaona kʼianga sijéle nganʼio”. Je Hannah alikui tiyaole kisikiʼaonni, kitsjoatʼale yaole je Jeobá kʼoa kisʼenngindá.

11. 1) Jókoanni nga nʼio nda miyo kisʼele je Vanessa. 2) Jmé xi bakóyaná choa̱ jebi.

¹¹ Nda chjoéjin je miyoli. Kʼianga jeki nichxin, je Vanessa koanjinle nga je miyole tíbʼéchjoale nga je Jeobá sixále. Kuinga tsín tije kisimiyoni. Tosaa je kisimiyo ndsʼee ya jinjtín. Je xi tsakasenkao kui je choa̱le Noé kao familiale. Itso: “Yaa tsakatiojinle je chjota xi tsín je Jeobá tsjoake, kʼoa nʼiojin nda tsakjáo xi tijeni”. Kʼianga jekisʼenngindá je Vanessa, precursora sʼin kisixá. Kʼoa ndʼaibi itso: “Nga kʼoasʼin tisixále je Niná, kui xi tíbasenkaona nga nʼio nda sʼín je miyo xi tísʼena, ali toyajin jtín jñani fia, kʼoati tísʼena miyo jñani kjaʼaí jtín”. Kʼoa ji, kʼoati sʼe̱li miyo xi koasenkaoli kʼiatsa kʼoénelai yaoli nga si̱tjosuin je xá xi tíbánená je Jeobá (Mat. 24:14).

12. ʼYáni xi tsín kitsokjonke je Adán kao Eva, kʼoa jósʼin kichomani nga kʼoakisʼin.

¹² Ali nokjonjin, tojekjoán Niná tinókjonchai. Ali tongantsjai nga chʼaotjín kʼianga nokjoaan. Tobʼelañá, ndatjín kʼianga nokjoaan nga tsínkui kʼoasʼiaan jmeni xi tsín sasénle je Jeobá (Sal. 111:10). Tsa kitsokjonkelani Niná je Adán kao Eva, alikuijin yátsʼi̱n tsakinyále. Tonga kʼianga jekʼoakisʼin, kitjoʼaingi xko̱n, xi tsonile, koanjinle nga tsakajngijée. Kʼoa kui je jée kao kjoabiya kisikakinle ntje̱le. Kʼianga koanjinle jme kjoa xi  tjíojin, koansoale kʼianga tsabe nga kjiojti kʼoa tsakʼéʼma yaole (Gén. 3:7, 21).

13, 14. 1) Tojo tso 1 Pedro 3:21, ánni nga tsín koa̱n nʼio kuinókjonnilee je kjoabiya. 2) Ánni nga bakonilee kjoatsjoacha je Jeobá.

¹³ Ndasʼin bichómani kʼianga nokjonchá je Jeobá. Tonga je xi tsín koa̱n nga nʼio kuinókjonlee jé kjoabiya. Ánni. Nga̱ je Niná jekitsjoa jmeni xi koasenkaoná nga koa̱n kuiyoaa ngantsjai nichxin. Tsa so̱kojéená, tonga tsa kʼoakoa̱nniná jéená, je Jeobá sichatʼaná nga̱ tjínná kjoamakjain kʼianga kʼienntjainá je ʼNdíle. Jngo koya josʼin koakoá nga tjínná kjoamakjain, kuinga kʼoaitʼalee yaoná je Jeobá kʼoa kjuinsʼenngindá (tʼexkiai 1 Pedro 3:21). *

¹⁴ Nkjín koya anni nga tsjoacha koa̱nñá je Jeobá. Ali tokuijin nga tsjoáná je tsojmi xi nʼio nda xi machjénná nga nyaon nyaon, kʼoati bakóyaná jokjoantjínni xi tʼatsʼe kʼoa jmeni xi tjínndajinle (Juan 8:31, 32). Kui xá tíjnanile je jtín nga koandiaaná kʼoa nga koasenkaoná. Basenkaoná nga chókjoajinná je kjoa xi bitjatojiaan ndʼaibi, kʼoa tsjoáná kjoachoya tʼatsʼe nichxin xi nroaján nga koa̱n kuiyoaa ngantsjai nichxin nga jesʼe̱jna sonʼndenaxó (Sal. 68:19; Apoc. 21:3, 4). Kʼianga nikjaʼaitsjenjiaan jmeni xi tísʼín nga tíbakóná nga tsjoakená Niná, sa tsjoacha sa tsjoachaa maa kʼoa alikui kui kʼoanʼia jmeni xi tsín sasénle, nga̱ tsín mená nga aon kʼoé kon. Machjén nga kʼoasʼin kuinókjonchá je Niná.

15. Jmé xi tsakasenkao je Makayla nga tsín tokui kitsokjonle tsa so̱kojéele.

¹⁵ Kʼianga koanjinle je Makayla nga síchatʼaná je Jeobá nga sokójéená kui xi tsakasenkao nga tsín tikitsokjonni. Itso: “Koanjinna nga chjotajée maa ngatsʼiaa kʼoa nga sokójéená. Tonga kʼoati koanjinna nga tsjoakená je Jeobá kʼoa nga síchatʼa je jée xi bijnyaa xi totʼatsʼe je kjoabʼechjíntjai”. Je Makayla tsakakó nga tsjoake je Jeobá, kitsjoatʼale yaole kʼoa kisʼenngindá.

16. Jmé xi tsakasenkao Miles nga tsín kitsokjon ninga tjín xi tsakatiochjoale.

¹⁶ Nga kui kitsokjonle je Miles tsa tsín sa̱sénle na̱le nga koaisʼenngindá, jé superintendente xi tsʼe circuito kisijéle nganʼio. Itso: “Kʼoakitsona je ndsʼee nga kʼoatisʼin koanjchínga tsanda je, nga kʼoati tsín testigole Jeobá ma je na̱le. Tsakasenkaona nga kʼoakixinle je mana nga kui xi mena nga kjuísʼe̱nngindá kʼoa nga tsín je pana tíbʼénena nga kʼoasʼian”. Je male Miles alikui kisasenle. Kʼoa kʼianga jeki nichxin, je Miles xin kikʼejna kʼoa kisʼenngindá. Itso: “Kʼianga koanjinna jmeni xi tísʼín je Jeobá xi tʼatsʼan nʼio  tsakasenkaona. Nga kisikjaʼaitsjenjian xi tʼatsʼe kjoabʼechjíntjaile Jesús koanjinna jokji tsjoakena je Jeobá, kʼoa kuinga kitsjoatʼanile yaona kʼoa kisʼe̱nngindáña”.

17. Jméni xi koa̱n koakoá ngatsʼiaa.

¹⁷ Kʼianga kiskine Eva je tole yá xi kisʼechjoale nga ski̱ne ya ʼndenaxóle Edén, alikui tsakʼaʼénle je Niná. Kʼoa nga kʼoati kisʼin je Adán, alikui jme kjoanda tsakakóle Jeobá tʼatsʼe jmeni xi kitsjoale. Ngatsʼiñá nga koa̱n koakoá nga tsín sasénná jmeni xi kisʼin je Adán kao Eva. Kʼianga mangínsʼenngindá kʼoasʼin bakonilee je Jeobá nga makjainná nga toje xi bakinle kʼoakuitso jmeni xi ndatjín kʼoa jmeni xi chʼaotjín. Kʼoati bakolee nga tsjoachaa kʼoa nga je ninʼiotʼaa.

18. Jméni xi sʼiain nga nda si̱xálai Jeobá.

¹⁸ Kʼianga jemangínsʼenngindá, tjínnená nga nyaon nyaon si̱tjosoán je kjoatéxomale Jeobá kʼoa nga tsín to yaoná kjuinñá. Jebi alikui choa ñʼai tíjna, tonga miyón mani chjota xi kʼoatjíosʼín nga xki̱ nó. Kʼoati koa̱n kʼoasʼiain tsanda ji. Nga kuitjosonli jebi, machjén nga tosi tonda katamajinli jotjínni xi tʼatsʼe Niná, timiyui je ndsʼee kʼoa kui chja̱kaonajmíni jmeni xi ngisa kjimajinli xi tʼatsʼe Nʼainá xi tíjna ngʼajmi (Heb. 10:24, 25). Kʼoa kʼianga jme xi chjoéjin, tʼintjenngi jotso je kjoafaʼaitsjen xi tsjoá je Biblia kʼoa kao naxinandále Jeobá (Is. 30:21). Tsa kʼoasʼiain, ndasʼin kuijnai (Prov. 16:3, 20).

19. Jméni xi ntsjaintsjai si̱kjaʼaitsjenjin, kʼoa ánni.

¹⁹ Kʼiatsa ntsjaintsjai si̱kjaʼaitsjenjin jósʼin basenkaoli nga je Jeobá bándiaali, ngisaa tsjoacha koai̱n je Jeobá kao kjoatéxomale. Kʼoa tojmeni xi kʼoejnabasenli je Na̱i alikui kui kʼoechjoali nga si̱xálai Niná. Kʼianga jekjoaʼato xi jngo jmi nó, nga si̱kjaʼaitsjenjin nga kʼinsʼenngindái, i̱jin sí: “Nʼio nda kisʼian nga kisʼe̱nngindá”.