NGATSʼIAA mená nga kʼoasʼin kataʼyaná nga nda chjotaa. Tonga sakʼoaa ñʼai maná nga nda chjota maa nichxin xi tiyoaa ndʼaibi, nga̱ nʼio nkjín chjota xi tsín bakó je kjoatsjoacha (2 Tim. 3:3). Tsakui nichxin tokui fini josʼin síkjaʼaitsjen nga tije kʼoatsoni jmeni xi ndatjín kʼoa jmeni xi chʼaotjín, kʼoa kʼoatso nga “chʼaotjín je xi ndatjín kʼoa nga ndatjín je xi chʼaotjín” (Is. 5:20). Kʼoa ngatsʼiaa kui bʼetʼaná jmeni xi kinʼia ngasʼa kʼoa nga chjotajée maa. Tsakui nichxin kʼoasʼe tokoán joni jngo tichjaa xi jekjoatse tísíxále je Jeobá, xi i̱ tso: “Nʼio ñʼai mana nga nda chjota sʼin ʼbekoan yaona”.

Ngatsʼiaa koaanná koakoá je kjoanda. Jebi yaa tíjnajin je kjoanda xi tjínle je nganʼiotsjele Niná, kʼoa ngisaa tse nganʼio tjínle tikʼoajinni tojme kjoa xi kitjatojiaan ngasʼa kʼoa jme xi chon sonʼnde. Kataʼyala jméni je xi kjoanda tsole je Biblia kʼoa jósʼin nga ngisa nda koakoá.

Je xi kjoanda ʼmi kui jmeni xi bakó je xi nda chjota, xi tsín chʼao kjoan, xi tsín bʼanacha kʼoa xi nda fikao yaole. Je chjota xi bakó kjoanda básjaile josʼin basenkao xi kjaʼaí kʼoa kui xi ndatjín kʼoasʼín.

Tsakui nichxin ʼyaxkoaan je chjota xi tjíonda nga bakóle kjoanda je xínkjín kao miyole. Tonga je xi nda chjota ngixko̱n Niná nkjínsa koya josʼin bakó kjoanda. Kjoaixi nga tsín ʼya xi koa̱nle nga ñaki kʼoakjoansʼin koako kjoanda josʼin tjínnele, nga̱ je Biblia kʼoatso nga “i̱ sonʼnde tsín jngo chjota xi kixi xi kui kʼoasʼínntsjai xi ndatjín xi tsínkʼia bajngijée” (Ecl. 7:20). Kʼoa je pastro Pablo i kitso: “ʼBenía an nga tsín jme xi nda tjín xi tíjnajinna” (Rom. 7:18). Tsa mená koakoá kjoanda, kui choa̱ xi bʼéjnaná je Jeobá koasenkaoná, nga̱ tʼatsʼe nroani je kjoanda.

Jé Jeobá xi kʼoatso jmeni xi ndatjín. Je xi kiski jngo salmo i kitsole je Jeobá: “Ndaní chjota kʼoa kui xi ndatjín kʼoanʼiai. Takoyanái je kjoatéxomali” (Sal. 119:68). Jaola koya chótʼayajiaan tʼatsʼe kjoanda xi bakó je Jeobá.

Nda chjota je Jeobá. Bakó kjoanda ngantsjai nichxin. Kataʼyala jokoan kʼianga kʼoakitsole je Moisés nga koakole je kjoajeyale. Je Moisés itso én xi kinrʼoé: “Jeobá, Jeobá, jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín, kʼoa jmi mani xi bakóle je kjoatsjoacha, síchatʼa jñani saténgiaa jñani bitjatone kjoatéxoma kʼoa kao jée, tonga alikui faʼáxinle kjoañʼai ʼyani xi josʼín” (Éx. 33:19; 34:6, 7). Tojo tso texto jebi, majinná nga bakó kjoanda je Jeobá ngantsjai nichxin. Kʼianga tsakʼejna i̱ Sonʼnde je Jesús, nʼio tsakakó je kjoanda. Ninga kʼoalani, i kitso: “Niʼyajin xi nda, tojngo je Niná” (Luc. 18:19).

Kui xi ndatjín kʼoasʼín je Jeobá. Ngayeje jmeni xi sʼín je Jeobá yaa bakóni nga nʼio nda chjota. Je Biblia itso: “Je Jeobá bakóle kjoanda ngatsʼi, kʼoa kao jmeni xi kisinda bakóni je kjoamatokonle” (Sal. 145:9). Je Jeobá bakó  kjoanda kʼianga tsín ʼya xi faʼájin kʼoa nga tsjoáná ngatsʼiaa je kjoabijnachon kao ngayeje jmeni xi machjénná (Hech. 14:17). Kʼoati bakóná kjoanda kʼianga síchatʼa je jéená. Jngo xi kiski je salmo i kitso: “Nga̱ ji, Jeobá, nda chjotai kʼoa tijnandaní nga nichatʼai” (Sal. 86:5). Alikui jao kʼoé tokoán nga “je Jeobá alikui kjoaʼaxinle xi ndatjín je xi ñaki kixi tjíofitʼale” (Sal. 84:11).

Nga kʼoasʼin kisindaná je Jeobá jokjoan je, koaanná nga nda chjota koaan kʼoa nga kui kʼoasʼiaan xi ndatjín (Gén. 1:27). Kʼoa je Biblia kʼoatsoná ngatsʼiaa xi choʼndale Niná maa nga katamaná nga kui xi ndatjín kʼoasʼiaan (Is. 1:17). Janla koya kataʼyaa xi koasenkaoná nga koakoá kjoanda.

Xi títjon, kʼoétsʼoalee Niná nga katatsjoáná je nganʼiotsjele, nga̱ kui xi koasenkaoná nga nda chjota koaan ngixko̱n (Gál. 5:22). Jé nganʼiotsjele Niná basenkaoná nga kui matsjoachaa xi ndatjín kʼoa nga jticha maa xi chʼaotjín (Rom. 12:9). Ya Biblia kʼoatso nga je Jeobá koasenkaoná nga nda sʼiaan kʼoa nga kui kuinókjoaa én xi nda tso (2 Tes. 2:16, 17).

Xi majaoni, machjén nga kʼoéxkiaa je Énle Niná. Kʼianga kʼoanʼia, je Jeobá bakóyaná “xi kʼoatjín kao xi kixi tíjna”, kʼoa síkatíondaná nga kʼoasʼiaan “ngayije xá xi nda” (Prov. 2:9; 2 Tim. 3:17). Kʼianga bʼexkiaa je Énle Niná kʼoa nga nikjaʼaitsjenjiaan jmeni xi tso, kui sʼejnajin je ni̱ma̱ná je xi nʼio chjíle tʼatsʼe Niná kʼoa kao jmeni xi mele. Kʼoa nʼio chjíle jebi, nga̱ kui xi koasenkaoná kʼianga koa̱nchjénná (Luc. 6:45; Efes. 5:9).

Xi majanni, machjén nga kʼoénelee yaoná nga kʼoasʼiaan “je xi nda tjín” (3 Juan 11). Ya Biblia, faʼaitʼa je choa̱le chjota xi tsakakó kjoanda je xi koa̱n chjénngiaa. Kʼoa je xi ngisasa nda choa̱ batíoná jé Jeobá kao Jesús. Tonga kʼoati nʼio nda choa̱ tsakatío je choʼndale Niná. Tsakui nichxin faʼaitsjenná tʼatsʼe Tabita kao Bernabé (Hech. 9:36; 11:22-24). Koaan chótʼayá jotso je Biblia xi tʼatsʼe chjota jebi kʼoa kuenta sʼiaan jmeni xi kisʼin nga tsakinyakao xi kjaʼaí. Si̱kjaʼaitsjeen josʼin koa̱n kuinyakoaa je xíngiaa kʼoa tsa je ndsʼee xi tjío ya jinjtín. Kuenta sʼiaan je kjoanichikontʼain xi kisʼele je Tabita kao Bernabé nga kui kʼoakisʼin xi ndatjín. Kʼoati tse kjoanichikontʼain so̱koná tsanda ñá.

Kʼoa nichxin xi tiyoaa ndʼaibi, koaan si̱kjaʼaitsjeen ʼyani xi bakó kjoanda. Tobʼelañá, je xi  chjotajchínga sʼin tjío ya jinjtín nʼio síxá kʼoa kui xi ndatjín tsjoake. Kʼoa alikui si̱chajiaan je tichjaa xi kui bakóya “xi nda tjín”, je xi nʼio nda choa̱ batío tʼatsʼe jmeni xi tso kʼoa jmeni xi sʼín (Tito 1:8; 2:3). Jngo tichjaa xi Roslyn ʼmi itso: “Jngo miyo tíjnana xi nʼio bʼénele yaole nga binyakao je ndsʼee ya jinjtín. Kui síkjaʼaitsjen josʼin tjío je ndsʼee, tsjoákjoatjaole tsa jmeni, kʼoa nkjínsa koya josʼin binyakao. Nʼio nda chjota”.

Je Jeobá kʼoatsole choʼndale nga kui katabásjai je xi ndatjín (Amós 5:14). Tsa kʼoasʼiaan, ali tokuijin kjoatéxomale Jeobá xi tsjoacha koaan, kʼoati ñaki kʼoasʼe̱ tokoán nga kui kʼoasʼiaan je xi ndatjín ngixko̱n.

Alikui koa̱n kʼoasʼin si̱kjaʼaitsjeen nga nʼio tse xi machjén kʼianga koakoá kjoanda. Tobʼelañá, kʼianga koa̱nngʼa jngo naxó, ali tojngokʼajin machjén nga nʼio tse nandá sʼe̱jtenngile, xi machjénle kuinga tochoa choa nandá sʼe̱jtenngile. Kʼoatisʼinni tsanda ñá, koaan tochoa jmeni xi sʼiaan nga koakolee kjoanda xi ngikʼa.

Je Biblia kʼoatso nga tjínnele kuiyondaa nga kui xi ndatjín kʼoasʼiaan (2 Tim. 2:21; Tito 3:1). Tsa kuenta sʼiaan jmeni xi machjénle je xíngiaa, koa̱njinná josʼin kuinyakoaa nga tosi tonda koa̱ntaja je kjoamakjainle (Rom. 15:2). Tsakui nichxin saʼnda kʼoailee jmeni xi tjínná (Prov. 3:27). Tobʼelañá, koa̱njin si̱kʼayalee je nichxinná je xíngiaa kʼoa tsa ñatjen kuichaa. Tsa ʼyaa nga jngo xi chʼin tíbʼetʼale, koaan jngo tarjeta kʼoa tsa jngo mensaje si̱kasénlee, kʼoa tsa maije̱ koaan kjuinni̱xatʼaa kʼoa tsa teléfono kuinókjoalee. Tojosʼin tiʼyaa, nkjín koya jmeni xi koa̱n sʼiaan “xi nda tjín xi kuinyakao” je xíngiaa, “xi machjénle, jméni nga kʼoasʼin tsjoásínile kjoanda je xi nrʼoé” (Efes. 4:29).

Joni je Jeobá, bakolee kjoanda ngatsʼi chjota. Kuinga tsín ʼya xi chjaʼajinsíñá. Jngo koya jmeni koa̱n sʼiaan kuinga koakoyalee je Énle Niná. Tojo kitso je Jesús, bakolee kjoanda ninga je xi jtikená (Luc. 6:27). Ndasʼin kuichomani tsakui kʼoasʼiaan xi ndatjín, tsa ndʼé koaan kʼoa nda si̱koaa je xi ngikʼa, nga̱ “tsín kjoatéxomajin xi kontra file je kjoabi” (Gál. 5:22, 23). Jé Niná chʼa̱sjengʼaa kʼiatsa kui xi ndatjín kʼoasʼiaan ninga ʼya xi koatiochjoaná kʼoa ninga kjoa kuitjátojiaan, kʼoa tsakui nichxin tjínkʼa chjota xi koa̱nndosinle je Énle Niná (1 Ped. 3:16, 17).

Je Biblia kʼoatso nga je xi nda chjota tsee kjoanichikontʼain sokóle nga kui kʼoasʼín xi ndatjín (Prov. 14:14). Jósʼin bichómani. Tsakui nichxin ngisa nda sikaoná je chjota (Prov. 14:22). Ningalani tsín kʼoasʼin, tsa tosi tonda koakoá kjoanda tochajinle ndasʼin skoe̱konná kʼoa kʼoantjaiya josʼin síkjaʼaitsjen (Rom. 12:20).

Nkjín xi kʼoatso nga nʼio tjíobinyakao nga kui kʼoatjíosʼín je xi ndatjín kʼoa nga tjíosíkatío je xi chʼaotjín. Kataʼyala xi tʼatsʼe Nancy. Itso: “Ngasʼa tokjoa koanna tojmeni, kisichajngiña kʼoa alikui kisʼena kjoaxkóntokon. Tonga nʼio tsjoa kisʼe tokoan kʼianga jetsaʼbe jotso je kjoatéxomale Niná kʼoa nga kisitjosoan. Kʼoa ndʼaibi ʼbexkónña kʼoa tsjoake̱ña yaona”.

Je xi ngisasa chjíle nga bakoá kjoanda kuinga tsjoa sʼe kon je Jeobá. Ningalani tsín ʼya xi skoe̱ná jmeni xi sʼiaan, je Jeobá bení. Kuenta sʼín jmeni xi nikjaʼaitsjeen kʼoa jmeni xi nʼia (Efes. 6:7, 8). Jósʼin bichómani nga bakoá kjoanda. Je Biblia itso: “Je xi nda chjota nda bʼejna ngixko̱n Jeobá” (Prov. 12:2). Kuinga machjénsíni nga tosi tonda koakoá kjoanda. Je Jeobá kʼoatso nga tsjoále “kjoajeya kao kjoaxkóntakon kao kjoanyʼántakon” ngatsʼi xi nda sʼín (Rom. 2:10).