1, 2. 1) Jméni xi síchjén je Jeobá kʼianga fákaoná. 2) Jméni xi chótʼayajiaan i̱ kjoaʼmiya jebi.

TSJOA sʼe kon je Jeobá kʼianga fákaoná. Kuinga fákaoniná kʼianga kataʼyaa josʼin síkjaʼaitsjen kʼoa jmeni xi sʼín. Kʼianga tsakjákao naxinandále Jeobá nichxin kjoatse jé kisichjén profeta, ánkje kʼoa kao Jesús, je ʼNdíle (Amós 3:7; Gál. 3:19; Apoc. 1:1). Ndʼaibi, kui Biblia síchjén je Jeobá kʼianga fákaoná.

² Kʼianga tsakʼejna je Jesús i̱ Sonʼnde jan kʼa kinoʼyale je jta̱le Niná ya tjen ngʼajmi. Kataʼyala jméni xi kitso, jméni xi bakóyaná kʼoa jósʼin basenkaoná.

3. Tojo tso Marcos 1:10, 11, jmé xi kitso je Jeobá kʼianga kisʼenngindá je Jesús, kʼoa jósʼin tsoyanile én jebi.

³ (Tʼexkiai Marcos 1:10, 11). * Kʼianga títjon kinoʼyale je jta̱le Niná ya tjen ngʼajmi, i kitso: “Ji ní xi ʼndína xinle. Ji ní xi tsjoakele, jo nda sʼekoan xi tʼatsi”. Nʼiojin tsjoa kisʼe kon je Jesús kʼianga kinrʼoéle je Nʼaile nga kʼoakitso nga tsjoake kʼoa nga nʼiotʼa. Janla koya kataʼyaa xi nʼio tjínle kjoandosin xi kitso Jeobá: nga ʼNdíle mani je Jesús, nga tsjoake, kʼoa nga nda sʼe kon xi tʼatsʼe.

4. Kʼianga kisʼenngindá je Jesús, jmé kjoanda xi kisʼele.

⁴ “Ji ní xi ʼndína xinle”. Jósʼin tsoyanile én jebi. Kʼianga kjesa faʼaijin i̱ Sonʼnde je Jesús tokʼoa je ʼNdíle Jeobá  ma. Tonga kʼianga kisʼenngindá, tsʼantjaiyaa josʼin tsakʼejna xi kao Jeobá, nga̱ kao nganʼiotsjele kiskoejinni. Kʼoa saʼnda nga kʼia, je Jesús kui kjoachoya kisʼele nga koai ijngokʼani ya ngʼajmi nga Rey kʼoa Naʼmitítjon sikao je Niná (Luc. 1:31-33; Heb. 1:8, 9; 2:17). Kuinga “ji ní xi ʼndína xinle” kitsoni je Jeobá kʼianga kisʼenngindá Jesús (Luc. 3:22).

5. Joni je Jeobá, jméni xi machjén nga sʼiaan.

⁵ “Ji ní xi tsjoakele”. Joni je Jeobá, nga kisinʼio kon je Jesús kʼoa nga kʼoakitsole nga tsjoake, ñá kʼoati koa̱n kʼoasʼin kʼoainganʼiolee je xíngiaa (Juan 5:20). Kʼianga ʼyani xi bakóná kjoatsjoacha kʼoa kʼoatsoná nga nda tinʼia, nda sʼe tokoán. Machjén nga koakolee kjoatsjoacha kʼoa nga si̱nʼiojiaan je ndsʼee xi tjío ya jinjtín kʼoa kao familianá. Tsa kʼoasʼiaan, kuinyakaoñá nga nʼio sʼe̱jna je kjoamakjainle kʼoa nga kixi koaitʼale je Jeobá. Machjén nga je xi xijchá ma sinʼio kon je ʼndíxtile, nga kʼoakuitsole nga nda tjíosʼín kʼoa nga koakole kjoatsjoacha. Tsa kʼoasʼin, kuinyakao je ʼndíxtile nga nda sixále Niná.

6. Ánni nga machjénni nga si̱nʼiotʼaa je Jesús.

⁶ “Jo nda sʼekoan xi tʼatsi”. Kʼianga kʼoakitso je Jeobá ñaki tjínjngoo kon nga kʼoasʼin je Jesús jmeni xi kuitsole. Tsa kisinʼiotʼa Jeobá je ʼNdíle, machjén nga kʼoati kʼoéjngoaa tokoán tsanda ñá nga sitjoson je Jesús jmeni xi tjínndajinle je Jeobá (2 Cor. 1:20). Kʼianga nikjaʼaitsjenjiaan choa̱le je Jesús nga kixi koan ñaki sʼejngo tokoán nga mená jchasaa xi tʼatsʼe kʼoa nga chjénngilee. Je Jeobá kʼoati be kʼianga je choʼndale tosi tonda koa̱nsale xi tʼatsʼe je Jesús (1 Ped. 2:21).

7. Tojo tso Mateo 17:1-5, kʼiáni nga kʼoati kinoʼyale je jta̱le Niná ya tjen ngʼajmi, kʼoa jméni xi kitso.

⁷ (Tʼexkiai Mateo 17:1-5). * Kʼianga majaoni kʼa nga kinoʼyale je jta̱le Niná ya tjen ngʼajmi kʼiaa nga tsʼantjaiya jokisʼe je Jesús. Je Jesús kʼoakitsole je Pedro, Santiago kao Juan nga ya katafikao ya jña tíjna jngo nindo xi nʼio ngʼa kji. Tokʼoakoanle jmeni xi tsabe kʼianga jngo sén kisakole. Koanfate nkjaín je Jesús, kʼoa najñole koanchxoa joni tsa nyʼán. Kʼoa ngi jao chjota tsabe xi je tsoyanile Moisés kao Elías, xi kui tsakjákaoni je Jesús tʼatsʼe josʼin ni̱kʼien kʼoa nga kjoaʼáyanile. Ninga nʼio nijñále nga jan chjotatjenngile Cristo kʼiaa tsabe je sén xi kisakole kʼianga ñaki jenda jaʼále (Luc. 9:29-32). Xijekoan, jngo yojbi fate jaʼanele, kʼoa yaa jinyojbi kinoʼyále jta̱le Niná. Tojo kisʼin kʼianga kisʼenngindá je Jesús, kʼoasʼin tsakakó ijngokʼa je Jeobá nga tsjoake je ʼNdíle kʼoa nga nda sʼe kon xi tʼatsʼe, nga kitso: “Jebi ʼndína xi tsjoake̱. Jonda sʼekoan xi tʼatsʼe”. Tonga ndʼaibi i kitsosa: “Tinóʼyalao”.

8. Jósʼin tsakasenkao je Jesús kʼoa kao chjotatjenngile je sén xi tsabe.

⁸ Jmeni xi tsabe kui tsakakó je kjoajeya kʼoa kao nganʼio xi sʼe̱le Jesús kʼianga Rey sʼin jekʼoéjna nga koatexoma ya ngʼajmi. Kʼoa kui xi kitsjoanganʼiole tʼatsʼe kjoañʼai xi kjoaʼá kʼianga ni̱kʼien. Xi ijngosani, je chjotatjenngile Jesús kʼoati koantaja je kjoamakjainle, kʼoa kui xi tsakinyakao nga kixi koa̱n ngantsjai tʼatsʼe kjoa xi kjoaʼatojin nga koa̱nskanni kʼoa jokjitse nga kuitsoyason. Kantela nó jaʼato kʼianga je pastro Pedro kisikʼaxki̱ ijngokʼa je sén xi tsabe, jebi kui bakó nga tojo nʼio nda tjínjinle nga kʼia (2 Ped. 1:16-18).

9. Jmé kjoafaʼaitsjen xi kitsjoale Jesús je chjotatjenngile.

⁹ “Tinóʼyalao”. Je Jeobá kui xi mele nga kuinóʼyalee kʼoa si̱tjosoán jmeni xi tso je Jesús. Kʼianga tsakʼejna je Jesús i̱ Sonʼnde nkjín koya jmeni xi tsakakóya xi nʼio tjínle kjoandosin. Tobʼelañá, tsakakóyale je chjotatjenngile nga katatsoya xi tʼatsʼe Chjotaxále Niná, kʼoa kʼoakitsole nga tjenyatokon katabatio (Mat. 24:42; 28:19, 20). Kʼoa kjitʼaa kʼoakitsole nga katabʼénele yaole kʼoa kisinʼiojin nga tsín katasíkinroajen kon (Luc. 13:24). Xi ijngosani, kʼoakitsole nga nʼio tjínle kjoandosin nga tsjoake katama xínkjín, nga jtín sʼin katabatio kʼoa nga katasítjoson je kjoatéxomale (Juan 15:10, 12, 13). Je kjoafaʼaitsjen xi kitsjoale Jesús je chjotatjenngile nʼio nda tsakinyakao, kʼoa kʼoati nʼio nda machjénná nichxin xi tiyoaa ndʼaibi.

10, 11. Jósʼin bakoá nga noʼyalee je Jesús.

¹⁰ Je Jesús i kitso: “Ngatsʼi xi tsʼe kjoakixi nrʼoé jta̱na” (Juan 18:37). Kʼoasʼin bakoñá nga noʼyalee je Jesús kʼianga mangíntjenngiaa kjoafaʼaitsjen jebi: “Tikjaínlao xíngio, tichatʼa ngaʼi̱ngajánlao xíngio” (Col. 3:13; Luc. 17:3, 4). Kʼoati noʼyalee je Jesús kʼianga kao kjoatsjoa ʼmiyasoán ninga kjoa tjínná kʼoa ninga nda tiyoaa (2 Tim. 4:2).

¹¹ Je Jesús kʼoakitso kʼianga je barréle  nrʼoé jta̱le (Juan 10:27). Kʼianga noʼyalee je Jesús ali tokuijin nga kuenta nʼia jmeni xi tso, kui xi tsonile nga kʼoati nitjosonlee. Kʼoa alikui kui nʼio nikjáojiaan je kjoa xi bitjatojiaan (Luc. 21:34). Kui títjon nikʼéjnaa nga nikitjosoán je kjoatéxomale Jesús, ninga tse kjoa bitjatojiaan. Nkjín ndsʼee xi kjoañʼai tjíofaʼá, jolani nga tjín xi batiochjoale, nga ma̱ tjíosíjchá yaole kʼoa nga kjoaxkón bichóne. Kixi tjíofitʼale Jeobá ninga tojme kjoa tjíofaʼatojin. Tonga je Jesús itso: “Je xi tjínle kjoatéxomana, xi síkitjoson kui kjoatéxomabi, jébi xi tsjoakena. Je xi tsjoakena nga an, kʼoasʼin Nʼaina tsjoake nga je” (Juan 14:21).

12. Jósasʼin bakoá kʼianga noʼyalee je Jesús.

¹² Ijngo koya josʼin bakoá kʼianga noʼyalee je Jesús kʼiaa nga tojngo nixá kao je ndsʼee xi bándiaale naxinandále Niná (Heb. 13:7, 17). Nichxin xi tiyoaa ndʼaibi, nkjín koya xi tíbʼantjaiya josʼin tísíxá je naxinandále Niná. Tobʼelañá, tíbʼantjaiyaa josʼin tiʼmiyasoán kʼoa jmeni xi nichjén nga ʼmiyasoán. Kʼoati tíbʼantjaiya josʼin satío je kjoajtín xi sʼená nga jinle xomana, josʼin tísʼenda Ndʼia jña chotʼayá, josʼin sʼendaya, kʼoa josʼin kjimakuinda. Tsjoa sʼe tokoán kʼianga ndasʼin tíbándiaaná je naxinandále Niná. Síchikontʼainná je Jeobá kʼianga bʼenelee yaoná nga nitjosoán jmeni xi tsoná.

13. Jósʼin basenkaoná nga noʼyalee je Jesús.

¹³ Nʼio binyakaoná kʼianga noʼya ngayeje jmeni xi tsakakóya je Jesús. Tobʼelañá, kʼoakitsole chjotatjenngile nga sinʼio kon jmeni xi kitsoyale. I kitsole: “Kʼoa sa̱kono kjoanikjáya xi tʼatsʼe ni̱ma̱no. Nga̱ yugona ali ñʼaijin, kʼoa tja̱ní chʼána” (Mat. 11:28-30). Je Énle Niná, xi faʼaitʼa xi ño Evangelio xi kui nchja̱ni josʼin tsakakóya kʼoa jmeni xi kisʼin je Jesús, tsjoánganʼioná, basenkaoná nga tosi tonda nixálee Niná kʼoa síchjinená (Sal. 19:7; 23:3). Je Jesús i kitso: “Ngisa toxkón ndani je xi nrʼoé énle Niná, kʼoa xi sítjoson” (Luc. 11:28).

14, 15. 1) Tojo tso ya Juan 12:27, 28, kʼiáni kinoʼyale xi majanni kʼa je jta̱le Jeobá ya tjen ngʼajmi. 2) Jósʼin tsakasenkao je Jesús jmeni xi kitso je Jeobá.

¹⁴ (Tʼexkiai Juan 12:27, 28). * Yaa Evangelio xi kiski je Juan bʼéyanajmí xi  koanjanni kʼa nga kinoʼyale je jta̱le Jeobá ya tjen ngʼajmi. Kʼianga tojeme ni̱kʼien je Jesús yaa Jerusalén tíjna kʼoa yaa tsakʼéjna je sʼuí Paxko xi tokʼoatjínsa tsakjenkao je chjotatjenngile. Kʼianga nʼio kjimakjáojinle je Jesús, i kitsole je Niná nga tsakʼétsʼoale: “Nʼaina, chʼa̱sjejeyai jaʼaínli”, kʼoa je Jeobá i kitsole: “Jetsʼasjejeya jaʼaínna, kʼoa kʼoasʼin kʼoasjejeyangánia”.

¹⁵ Je Jesús kui koankjáojinle jokji kjoandosin tjínle nga kixi koaitʼale je Jeobá. Be nga tse kjoañʼai ni̱kjaʼá kʼoa nga ni̱kʼien (Mat. 26:38). Tonga je xi ngisa koanndosinle kuinga kʼoasjejeya je jaʼaínle Nʼaile. Kʼoatsakʼinle nga Niná kinchja̱ʼaonle, kʼoa koankjáojinle tsa chʼaosʼin kʼoaxki̱ je Niná kʼianga jeni̱kʼien. Tonga je Jeobá kʼoakitsole nga kʼoasjejeya je jaʼaínle, kʼoa kuijin xi tsakasenkao je Jesús nga tsakʼéjngo kon. Kʼoajin titsakasenkao nga kichokjoajinle kjoañʼai xi tsakjaʼá. Ningalani toje Jesús xi koanchoyale jmeni xi kitso je Jeobá nga kui nichxin, je Jeobá koanmele nga kisʼetʼaxo̱n nga kʼoati katabasenkaoná tsanda ñá (Juan 12:29, 30).

16. Jméni xosíkaoná nga makjáojinniná tsa chʼaosʼin kʼoaxki̱ je jaʼaínle Jeobá.

¹⁶ Tojo koan Jesús tsakui nichxin kʼoati kui nʼio nikjáojiaan tsa chʼaosʼin kʼoaxki̱ je jaʼaínle Jeobá. Tsakui nichxin kui kʼoakoa̱ntʼeen xi tsín kixi tíjna tojo kinikao je. Kʼoa tsakui makjáojinnáje̱ je énndiso xi  fánená je chjota xi batiochjoaná. Tsakui nichxin kʼoasʼin nikjaʼaitsjeen nga chʼaosʼin tíbʼaxki̱ je Jeobá kao naxinandále. Tonga likui kʼoaiʼndee nga kui jebi sikinroajen tokoán. Tsa kʼoakjimaa, basenkaoná jmeni xi kitsole Jeobá je Jesús, nga kʼoakitso nga kʼoasjejeya je jaʼaínle. Jé Chjotaxále sichjén nga kjoaʼaxin ngayeje jmeni xi chʼao chon sonʼnde ndʼaibi kʼoa jmeni xi kjimatʼain je choʼndale (Sal. 94:22, 23; Is. 65:17). Ñaki tjínjngoo tokoán nga kuitjoson én jebi: “Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús” (Filip. 4:6, 7).

17. Tojo tso Isaías 30:21, jósʼin fákaoná je Jeobá ndʼaibi.

¹⁷ Ndʼaibi tojo fákaoná Je Jeobá (tʼexkiai Isaías 30:21). * Alikui ñaki jta̱le noʼyalee nga fákaoná, kui Biblia síchjén. Xi ijngosani, kui nganʼiotsjele Niná bándiaale je choʼnda xi nʼiotʼakon xi nda be xá, nga tosi tonda títsjoáná xi tʼatsʼe Niná tínroani, jolani je xo̱n xi nichjén xi Énle Niná yʼangini, xi faʼaitʼa Internet, je video kao grabación (Luc. 12:42). Nʼio tse xi tíbʼainá xi tʼatsʼe Niná nroani.

18. Ánni nga basenkaoniná jmeni xi tso je Biblia nga ngisa sʼená je kjoamakjain kao kjoanʼiojin.

¹⁸ Alikui si̱chajiaan jmeni xi kitso je Jeobá nga tsakʼejna je ʼNdíle i̱ Sonʼnde. Sínʼio tokoán kʼianga kʼoatso ya Biblia nga je Jeobá jetjínndajinle josʼin kjoaʼaxin jmeni xi tísʼín je Na̱i kʼoa jochon je sonʼnde. Ñaki kʼoakʼoé tokoán nga kuinóʼyalee je Jeobá. Tsa kʼoasʼiaan, chókjoajinná jme kjoa xi kuitjátojiaan ndʼaibi kʼoa kao nichxin xi nroaján. Je Biblia itsoná: “Machjénno nga chókjoajinno, kʼoa kʼianga jesi̱tjoson josʼin mele Niná, tjoéno jmeni xi tongini kitso” (Heb. 10:36, TNM).