KJOAʼMIYA XI CHOTʼAYA 11
A jetijnandai nga kʼuínsʼenngindái
“Nga mangínsʼenngindá, je xi kʼoati tíbʼasjentjaino” (1 PED. 3:21, TNM).
KJOAJNDA 28 Jósʼiaan nga miyole koaan je Jeobá
XI TÍNCHJA̱NI *
1. Jmé xi tjínnele sʼin jngo chjota xi mele ndʼia kʼoenda.
TIKJAʼAITSJENLAI tsa jngo chjota xi ndʼia mele kʼoenda. A tokjoan koaikatse tsojmi xi koa̱nchjénle kʼoa a tokjoan kʼoenda ndʼia. Mai. Nga kjesa kʼoasʼínjin, títjonkjoanla kui kuenta sʼín jokji sʼe̱ngile nga ndʼia kʼoenda. Nga̱ kuikjoanla kosonnile tsa koa̱nnile je tao̱n xi tíjnale. Tsa títjonkjoanla kʼoasʼin, koa̱njin kʼoenda je ndʼia.
2. Tojo tso Lucas 14:28-30, jmé xi tjínnele si̱kjaʼaitsjain nga kjesa ʼmisʼenngindájin.
2 A kuinga nʼio tsjoachai je Jeobá kʼoa nga bʼailai kjoanda nga menili kʼuínsʼenngindái. Tsa jaon, yaa mangósuin je chjota xi ndʼia mele kʼoenda. Ánni. Je Jesús kui kisingósonkao nga chjotatjenngile maa kao nga ndʼia bʼendaa, tojo tso ya Lucas 14:28-30 * (tʼexkiai). Kui kinchja̱ni jme xi tjínnele sʼiaan tsa mená nga chjotatjenngile koaan. Kʼoakitso nga tsín choa ñʼai tíjna kʼoa nga tjínnele si̱katioá tsa jmeni (Luc. 9:23-26; 12:51-53). Kuinga machjénsíni nga títjonkjoanla si̱kjaʼaitsjain jme xi tsoyanile nga chjotatjenngile Cristo maa nga kjesa ʼmisʼenngindájin. Tsa kʼoasʼiain, kʼianga jekʼuínsʼenngindái tosi tonda kixi kʼuíntʼalai Niná.
3. Jmé xi chótʼayajiaan i̱ kjoaʼmiya jebi.
3 Nga tsín choa ñʼai tíjna nga mangínsʼenngindá, a tjínle kjoandosin nga kʼoasʼiaan. Jaon. Kʼianga kʼuínsʼenngindái tsee kjoanichikontʼain so̱koli ndʼaibi kao nichxin xi nroaján. I̱ kjoaʼmiya jebi kui chótʼayajin kʼaa jmeni xi nʼio tjínle kjoandosin tʼatsʼe nga mangínsʼenngindá. Koasenkaoli nga jchai tsa jetijnandai nga kʼuínsʼenngindái.
NGA BʼAITʼALEE YAONÁ NINÁ KʼOA NGA MANGÍNSʼENNGINDÁ
4. 1) Jmé xi tsoyanile nga bʼaitʼalee yaoná Niná. 2) Jmé xi tsoyanile nga njiotokoán yaoná tojo tso Mateo 16:24.
4 Nga bʼaitʼalee yaoná Niná. Títjonkjoanla bʼaitʼalee yaoná Niná nga kjesa mangínsʼenngindájián. Kui xi tsonile nga ñaki ni̱ma̱ná nroajinni nga bʼetsʼoalee kʼianga kʼoaʼmilee nga toje si̱xálee ngantsjai nichxin. Kʼianga ʼya xi tsjoátʼale yaole Jeobá kui xi tsonile nga tsjionkon yaole (tʼexkiai Mateo 16:24). * Nichxin nga bʼaitʼalee yaoná Niná kʼiaa tjen bʼetsʼiakaoñá nga ñaki toje Jeobá nixálee (Rom. 14:8). Kʼoaʼmilee nga tsín to yaoná koanngínñá, nga kui títjon si̱kʼéjnaa xále. Nga bʼaitʼalee yaoná Niná bʼailee je énná nga kʼoaʼmilee nga je si̱xálee. Je Jeobá alikui kjoanʼio sʼínná nga énná kʼoailee. Tonga kʼianga jebʼailee énná, koya nga si̱tjosoán jme xi ʼmilee (Sal. 116:12, 14).
5. Jmé xi tsín mangóson nga bʼaitʼalee yaoná Niná kʼoa nga mangínsʼenngindá.
5 Jméni xi tsín mangóson nga bʼaitʼalee yaoná Niná kʼoa nga mangínsʼenngindá. Kʼianga bʼaitʼalee yaoná Niná toñá tojngoo chjakoaa je Jeobá. Tonga kʼianga mangínsʼenngindá nkjín chjota bená kʼoa kʼiaa mangínsʼenngindá nga sʼejna je kjoajtíntse. Nga kʼoanʼia, kʼoasʼin bakonilee je xi ngikʼa nga jetsakʼaitʼalee yaoná je Jeobá. * Kʼoa kui xi bakoá nga ni̱ma̱ná tínroajinni nga tsjoacha kjimaa, kao kjoafaʼaitsjenná, kao nganʼioná kʼoa nga jekʼoatjín tokoán nga toje si̱xálee ngantsjai (Mar. 12:30).
6, 7. Tojo tso 1 Pedro 3:21, jñánile xi jao koya anni nga nʼio machjénni nga kjuinsʼenngindá.
6 A kjoanʼio machjén nga kʼuínsʼenngindái. Tojo kisʼin je Noé nga tsakakó je kjoamakjainle kʼianga tsakʼénda je arca, nga kʼuínsʼenngindái kʼoatisʼin koakoni nga jetsakʼaitʼalai yaoli Jeobá (1 Pedro 3:18-20). Tonga a kjoanʼio machjén nga kʼuínsʼenngindái. Jaon. Yaa bakóyaná tʼatsʼe jebi jmeni xi kitso Pedro (tʼexkiai 1 Pedro 3:21). * Xi títjon, kʼoakitso nga bʼasjentjainá. Kʼianga mangínsʼenngindá koaan kʼoasjentjainá tsa bakoá nga tjínná kjoamakjain tʼatsʼe Jesús kʼoa tsa makjainná nga ñá kʼienntjainá, nga jaʼáyanile kʼoa nga ya ngʼajmi ki nga jekoanni kʼoa nga ya ngakixile Niná tíjna ndʼaibi.
7 Xi majaoni, nga mangínsʼenngindá kʼoati basenkaoná nga “tsje katasʼe kjoafaʼaitsjenná”. Kʼianga bʼaitʼalee yaoná Niná kʼoa nga mangínsʼenngindá, ndasʼin biyoaa ngixko̱n Niná. Nga kʼoamaniná je jéená kʼoa nga makjainná tʼatsʼe kjoabʼechjíntjaile Jesús, je Niná síchatʼaná. Kʼoa kʼoasʼin nga nda satíoni tokoán.
8. Jméni xosikaoli nga kʼuínsʼenngindáni.
8 Jméni xosikaoli nga kʼuínsʼenngindáni. Nga nda tichotʼayai Biblia, nkjín koya jmeni xi kjimajinli xi tʼatsʼe Jeobá, josʼín kʼoa jokjoan. Ngayeje jebi tíbichókajin ni̱ma̱li kʼoa kui xi tíbasenkaoli nga tsjoacha kjimai je Jeobá. Kʼoa nga tsjoachai je Jeobá kui xosikaoli nga kʼuínsʼenngindáni.
9. Tojo tso Mateo 28:19, 20, jmé xi tsoyanile nga kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje fisʼenngindáni jngo chjota.
9 Xi ijngo koya anni nga kʼuínsʼenngindáni kuinga jekjimajinli jmeni xi tsoya je Biblia kʼoa kjimakjainli jmeni xi tso. Je Jesús kʼoakitso nga tjínnele chjotatjenngile si̱koaa je chjota (tʼexkiai Mateo 28:19, 20). * Tojo kitso je Jesús, “kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje” fisʼenngindáni jngo chjota. Kui xi tsonile nga ñaki ni̱ma̱le nroajinni nga makjainle jmeni xi bakóya je Biblia tʼatsʼe Jeobá, tʼatsʼe Jesús kao tʼatsʼe nganʼiotsje. Je Énle Niná nʼio tjínle nganʼio kʼoa bichókajin ni̱ma̱ná (Heb. 4:12).
10, 11. Jmé xi jekjimajinli tʼatsʼe Nʼainá Jeobá.
10 Jókisʼe tokuin nga koanjinli jotjínni xi tʼatsʼe Nʼainá xi tíjna ngʼajmi. Nga Jeobá ʼmi, nga toje xi nʼio ngʼa tíjna jngo tjíjtsa Sonʼnde kʼoa nga toje “xi ñaki Niná” (Sal. 83:18; Is. 37:16). Jé kisindaná kʼoa “je kjoabitjontjai yaa nroani tʼatsʼe Jeobá” (Sal. 3:8; 36:9). Xi ijngosani, kui kjoanda tsjoáná nga koa̱n ndái kuiyolee je jée kao kjoabiya, kʼoa kui kjoachoya títsjoáná nga koa̱n kuiyoaa ngantsjai nichxin (Juan 17:3). Nga kʼoaitʼalai yaoli je Jeobá kʼoa nga kʼuínsʼenngindái kʼoasʼin koakoni nga testigole Jeobá mai (Is. 43:10-12). Kʼoa yaa tojngo koai̱n kao chjota xi je Jeobá bexkón xi tjío jngo tjíjtsa Sonʼnde, xi jaʼaínle yʼa kʼoa xi tsoya tʼatsʼe Jeobá (Sal. 86:12).
11 Tsee kjoanda tjínná nga majinná jme xi bakóya je Biblia tʼatsʼe Nʼainá Jeobá. Kʼianga koa̱nkjainli jotjínni xi tʼatsʼe kui xosikaoli nga kʼoaitʼalai yaoli Jeobá kʼoa kʼuínsʼenngindái.
12, 13. Jmé xi jekjimajinli tʼatsʼe ʼNdíle Niná.
12 Jókisʼe tokuin nga koanjinli jotjínni xi tʼatsʼe ʼNdíle Niná. Jé Jesús xi majaoni xi ngisasa ngʼa tíjna jngo tjíjtsa Sonʼnde kao ngʼajmi. Jé tsakʼéchjíntjainá nga kitsjoa kjoabijnachonle xi totʼatsaan. Kao jmeni xi nʼia bakoñá nga tjínná kjoamakjain nga tsakʼéchjíntjainá, kʼoa nga kʼoanʼia koaan jchatʼa je jéená, koaan si̱miyoaa je Niná kʼoa koaan kuiyoaa ngantsjai nichxin (Juan 3:16). Je Jesús kʼoati Naʼmitítjon sʼin tíjna, nga̱ mele nga tjoéná je kjoanda xi tjenkao nga tsakʼéchjíntjainá kʼoa mele koasenkaoná nga ndasʼin kuiyoaa ngixko̱n Jeobá (Heb. 4:15; 7:24, 25). Nga Rey sʼin tíjnale je Chjotaxále Niná, je Jeobá jé Jesús tsjoále xá nga kuitjotsje je jaʼaínle, jé sichjén nga kjoaʼaxin kjoatsʼen kʼoa nga sichikontʼainná nga jeʼndenaxó koa̱n i̱ Sonʼnde (Mat. 6:9, 10; Apoc. 11:15). Xi ijngosani, je Jesús nʼio nda choa̱ tsakʼéjnaná (1 Ped. 2:21). Ñaki to xále Niná kisʼin nga tsakʼejna i̱ Sonʼnde kʼoa kui choa̱ tsakʼéjnaná nga kʼoati sʼiaan tsanda ñá (Juan 4:34).
13 Tsjoacha koai̱n je ʼNdíle Niná kʼianga koa̱nkjainli jmeni xi tsoya Biblia xi tʼatsʼe. Kui je kjoatsjoacha xosikaoli nga ñaki to xále Niná sʼiain tojo kisʼin je Jesús. Kʼoa kui xosikaoli nga kʼoaitʼalai yaoli je Jeobá kʼoa nga kʼuínsʼenngindái.
14, 15. Jmé xi jekjimajinli tʼatsʼe nganʼiotsje.
14 Jókisʼe tokuin nga koanjinli jotjínni xi tʼatsʼe nganʼiotsje. Je nganʼiotsje ali tsa chjotajin, kui je nganʼio xi síchjén Niná. Kui nganʼiotsjele Jeobá kisichjén nga tsakándiaale je chjota xi kiski Biblia. Kʼoati kui je nganʼiotsje basenkaoná nga majinná kʼoa nga nitjosoán jmeni xi tso je Biblia (Juan 14:26; 2 Ped. 1:21). Kui nganʼiotsjele Jeobá síchjén nga tsjoáná “je nganʼio xi nʼio tse” (2 Cor. 4:7). Jé nganʼiotsjele Niná basenkaoná nga ʼmiyasoán, nga tsínkui síkinjená jme xi satíobasenná, nga kjoa bitjatojiaan kʼoa basenkaoná nga nroajen tokoán. Kʼoati basenkaoná nga bakoá xi ndatjín xi tʼatsʼe nganʼiotsjele Niná nroani (Gál. 5:22). Je Niná tsjoále nganʼiotsjele xi je sínʼiotʼa kʼoa xi ñaki kʼoatjío kon nga síjéle (Luc. 11:13).
15 Sínʼio tokoán nga ʼyaa nga je nganʼiotsje koasenkaoná nga si̱xálee Niná. Kʼianga koa̱nkjainli jotjínni xi tʼatsʼe nganʼiotsje kui xosikaoli nga kʼoaitʼalai yaoli Jeobá kʼoa kʼuínsʼenngindái.
16. Jméni xi jekachotʼayajiaan.
16 Nʼio tjínle kjoandosin nga bʼaitʼalee yaoná Niná kʼoa nga mangínsʼenngindá. Tojosʼin tiʼyaa, alikui choa ñʼai tíjna nga kʼoanʼia. Tonga ngisaa tse kjoanda sʼe̱ná tikʼoajinni jokji kjoa kuitjátojiaan. Nga kʼuínsʼenngindái kui xi koasenkaoli nga kuitjo̱ntjai kʼoa nga nda sʼe̱ tokuin ngixko̱n Niná. Kʼianga tsjoachai je Jeobá kui xosikaoli nga kʼuínsʼenngindái. Kʼoati machjén nga koa̱nkjainli jotjínni xi tʼatsʼe Jeobá, tʼatsʼe Jesús kao tʼatsʼe nganʼiotsje. Nga jekachotʼayajiaan xi tʼatsʼe jebi, jósʼin nikjaʼaitsjain, a jetijnandai nga kʼuínsʼenngindái.
JMÉ XI TJÍNNELI SʼIAIN NGA KJESA ʼMISʼENNGINDÁJIN
17. Jméni xi machjén nga sʼiaan nga koa̱n kjuinsʼenngindá.
17 Tsa kʼoasʼin nikjaʼaitsjain nga jetijnandai nga kʼuínsʼenngindái, kuijin nga jekʼoatinʼiai jmeni xi tíbasenkaoli nga kjimamiyui je Jeobá. * Nga kjitʼa tichotʼayai Biblia, nkjín koya jmeni xi kjimajinli tʼatsʼe Jeobá kao Jesús, kʼoa tísʼeli kjoamakjain (Heb. 11:6). Makjainli jmeni xi tongini tso je Jeobá tojosʼin faʼaitʼa ya Biblia, kʼoa alikui jao tjín tokuin nga kui kjoabʼechjíntjaile Jesús koasenkaoli nga koa̱n ndái kuijnalai je jée kao kjoabiya. Kʼoakjimanili jme jée xi tsakijnyi kʼoa jekinijélai kjoanichatʼa je Jeobá. Jekinikʼéjnai jmeni xi kinʼiai ngasʼa kʼoa kui kʼoatinʼiai jmeni xi sasénle Niná (Hech. 3:19). Kao kjoatsjoa nokjoakaoni je chjota tʼatsʼe Niná. Nga jetinitjosuin jmeni xi tso Biblia, ninga kje ʼmisʼenngindájin jeʼmiyasuin kao je jtín (Mat. 24:14). Je Jeobá nʼio tsjoa tjín kon nga kʼoatinʼiai ngayeje jebi (Prov. 27:11).
18. Jmé xi tjínneli sʼiain nga kjesa ʼmisʼenngindájin.
18 Nga kjesa ʼmisʼenngindájin tjínsa jmeni xi machjén nga sʼiain. Tojosʼin kaʼyaa tjínnele kʼoaitʼalai yaoli Niná, xi tsonile, nga toji kʼoétsʼoalai kʼoa nga ñaki ni̱ma̱li kjuinroajinni nga kʼoakʼuínlai nga toje si̱xálai ngantsjai (1 Ped. 4:2). Xijekoa̱n, kʼoatʼinlai je xi coordinador sʼin tíjnale je xi chjotajchínga sʼin tjío nga meli kʼuínsʼenngindái. Kʼoa jé kʼoakuitso kʼale je xi chjotajchínga sʼin tjío nga kjoakaonajmíli. Kʼoa ali nokjonjin, nga̱ jebexkonli kʼoa tjao beli. Je ndsʼee jebi kui kjoakaonajmínili jmeni xi jekjimajinli tʼatsʼe Biblia ánni nga skoe̱ni tsa jenda majinli josʼin tíjna kʼoa jokji kjoandosin tjínle nga bʼaitʼalee yaoná Niná kʼoa nga mangínsʼenngindá. Tsa bele kon nga jetijnandai, kʼoakuitsoli nga koa̱n kʼuínsʼenngindái nga sʼe̱jna je kjoajtíntse.
JMÉ XI MACHJÉN NGA SʼIAIN NGA JEKʼUÍNSʼENNGINDÁI
19, 20. Jmé xi machjén nga sʼiain kʼianga jekʼuínsʼenngindái, kʼoa jmé xi koasenkaoli.
19 Jmé xi machjén nga sʼiain kʼianga jekʼuínsʼenngindái. * Énná bʼailee Jeobá kʼianga bʼaitʼalee yaoná, kʼoa koyale nga si̱tjosoán. Kuinga tjínnenile tosi tonda kʼoasʼin kʼuínkoai yaoli jotso kjoatéxomale Niná kʼianga jekʼuínsʼenngindái. Jmé xi koasenkaoli.
20 Ali nikjinjinlai je jtín. Kʼianga jekʼuínsʼenngindái yaa koa̱njngokoai ngatsʼi ndsʼee (1 Ped. 2:17). Je ndsʼee xi tjío jinjtín familiali koa̱nni. Tsa ntsjaintsjai kʼuín je kjoajtín ngisaa koa̱nmiyui je ndsʼee. Nyaon nyaon tʼexkiai Biblia kʼoa tikjaʼaitsjenjin jmeni xi tso (Sal. 1:1, 2). Nga kuichokajin ni̱ma̱li jmeni xi kʼoéxkiai, machjén nga si̱kjaʼaitsjenjin jmeni xi tsoya je textole Biblia xi tibʼexkiai. Kʼoati machjén nga kjitʼa kʼoétsʼoai tojo kitso je Jesús (Mat. 26:41). Nga ni̱ma̱li kjuinroajinni nga kʼoétsʼoai ngisaa koa̱nchriantʼalai je Jeobá. Kʼoa tosi tonda kui títjon tikʼéjnai je Chjotaxále Niná (Mat. 6:33). Kui ngisa tʼailai kjoandosin nga kʼuínyasuin. Tsa kʼoasʼiain, nʼio sʼe̱jna kjoamakjainli kʼoa kuisenkaoní xi kjaʼaí nga kʼoati koa̱n koatio ngantsjai nichxin (1 Tim. 4:16).
21. Jmé kjoanda xi sʼe̱li nga kʼuínsʼenngindái.
21 Xi ngisa nʼio tjínle kjoandosin xi sʼiain kuinga kʼoaitʼalai yaoli je Jeobá kʼoa nga kʼuínsʼenngindái. Ningalani tsín choa ñʼai tíjna, tsee kjoanda tjenkao. Je kjoa xi bitjatojiaan ndʼaibi tokjoaʼato (2 Cor. 4:17). Tonga kʼianga kʼuínsʼenngindái, ngisaa tsjoa sʼe̱ tokuin ndʼaibi kʼoa kui kjoanda choyalai nga koa̱n kuijnai ngantsjai nichxin (1 Tim. 6:19). Kuinga machjénsíni nga nda tikjaʼaitsjenjin, tʼetsʼoalai je Jeobá kʼoa tikjaʼaitsjain tsa jetijnandai nga kʼuínsʼenngindái.
KJOAJNDA 50 Bʼetsʼoale nga titsjoatʼale yaona
^ párr. 5 Tsakui tinikjaʼaitsjain nga meli kʼuínsʼenngindái, koasenkaoli kjoaʼmiya jebi. Kui chótʼayajin kʼaa jmeni xi sakʼoa chjonangilee yaoná tʼatsʼe nga mangínsʼenngindá. Koasenkaoli nga jchai tsa jetijnandai nga kʼuínsʼenngindái.
^ párr. 2 Lucas 14:28-30: “ʼYáni xi jonbi xi mele skómitjen jngo torre xi tsín títjon kʼoéjna skósonnile jotjín sʼe̱ngile, tsa tjínle xi machjénle nga sikjetʼa. 29 Tsa mai kʼia nga kafe kabʼéjna xjáoja̱ma̱, tsa tsín koa̱nle sikjetʼa, je ngatsʼi xi skoe̱ kʼoetsʼiakao nga kuijnoke. 30 Kuitso: Je xébi xá tsakʼétsʼiakao nga kiskomitjen, kʼoa likui koan jetʼale”.
^ párr. 4 Mateo 16:24, TNM: “Kʼiaa Jesús i̱ kitsole chjotale: Tsa ʼyani xi mele nga kjuinroatjenngina, katatsjionkon yaole kʼoa katakjoé je yá kjoañʼaile kʼoa katanroatjenngi kjitʼana”.
^ párr. 5 Chótsenlai je recuadro “ Xi chjónangili nichxin nga kʼuínsʼenngindái”.
^ párr. 6 1 Pedro 3:21, TNM: “Je nandá kui tsoyanile nga mangínsʼenngindá, je xi kʼoati tíbʼasjentjaino ndʼaibi (ali tsakuijin nga sitsje je yaoná, kuiní nga si̱jélee Niná nga tsje katasʼe kjoafaʼaitsjenná) xi totʼatsʼe nga jaʼáyanile Jesucristo”.
^ párr. 9 Mateo 28:19, 20, TNM: “Kuinga tangínsíño, kʼoa chjotana tikao je chjota xi tjín ngakjijnda naxinandá. Cha̱nisʼenngindáo kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje. 20 Takoyalao nga katasítjoson ngayeje jme xi tsakʼeneno. Kʼoa tikjaʼaitsjaon, i tijnakaono ngantsjai nichxin saʼnda nga kuichokjetʼa xi chon sonʼnde”.
^ párr. 19 Tsa kje fetʼajinli nga tichotʼayai je libro Jmé kjoanni xi bakóya je Biblia kao libro “Tosi tonda katasʼeno kjoatsjoachale Niná” machjén nga tosi tonda kataʼmiyali saʼnda nga kjoetʼali. Kui koa̱nchjén je libro Jmé xi bakóyaná je Biblia kʼoa kao Tosi tonda katasʼeli kjoatsjoachale Niná kʼianga jekuitjo.
