KJOAʼMIYA XI CHOTʼAYA 10
Nga mangínsʼenngindá bakoñá nga tsjoachaa je Jeobá
“Jmé xi bʼéchjoana nga koa̱n kjuísʼe̱nngindá” (HECH. 8:36, TNM).
KJOAJNDA 37 Kao ni̱ma̱na sixále Jeobá
XI TÍNCHJA̱NI *
1, 2. Tojo tso Hechos 8:35-38, ánni nga kisʼenngindáni je chjota etíope.
A MELI kʼuínsʼenngindái kʼoa chjotale Cristo koai̱n. Xi tjíobinyakao je chjota nga fisʼenngindá, kuinga tsjoake kʼoa tsjoále kjoanda Niná. Tikjaʼaitsjenlai jokisʼin jngo chjota xi ya kisixákao je reina xi tsakatéxoma ya Etiopía.
2 Kisʼenngindá chjota jebi kʼianga koanjinle nga kʼoatso je xo̱n escritura nga tjínnele koaisʼenngindá (Hech. 8:27-31; tʼexkiai Hechos 8:35-38 *). Ánni nga kʼoakisʼinni. Kuinga tsabechjí je Énle Niná. Kʼoa kʼianga tíjnaya je carretale tíbʼéxkia je libro xi tsʼe Isaías. Kʼianga kitsoyale je Felipe jmeni xi kisʼin Jesús xi tʼatsʼe nʼio kitsjoa kjoanda chjota jebi. Xi ijngosani, tokʼoa jetsjoake Jeobá, nga̱ yaa jaʼaini Jerusalén nga kikʼétsʼoa. Kʼoati jekisikʼéjna je religión xi tsakʼejnajin kʼoa jeya tíjnajinle je naxinandá xi Jeobá síxále. Kui kjoatsjoacha xi tjínle xi kao Jeobá xokisikao nga kisʼenngindáni kʼoa nga chjotatjenngile Cristo koan (Mat. 28:19).
3. Jméni xi bʼéchjoa kʼale chjota nga tsín fisʼenngindáni (chótsenlai je recuadro “ Jmé xi mangósonkao je ni̱ma̱ná”).
3 Nga tsjoachai je Jeobá kui xosikaoli nga koa̱nmenili kʼuínsʼenngindái. Tonga kʼoajin titjín jmeni xi kʼoechjoali nga kʼoasʼiain. Tobʼelañá, tsakui nichxin nʼio tjaoli je familiali kʼoa tsa miyoli xi tsín testigole Jeobá ma kʼoa kʼoasʼin nikjaʼaitsjain nga tsín titjao skoe̱nili tsa kʼuínsʼenngindái (Mat. 10:37). Kʼoa tsakuije̱ nga nʼio tje̱ntʼalai jmeni xi jtike je Niná kʼoa ñʼai mali nga nikʼéjnai (Sal. 97:10). Kʼoa tsa kʼoasʼin koanchjíngaije̱ nga chʼasjai je sʼuí xi ya religión ndiso nroani kʼoa kuinga ñʼai manili nga nikʼéjnai je sʼuí xi tsín sasénle Jeobá (1 Cor. 10:20, 21). Je xi nʼio tjínle kjoandosin xi si̱kjaʼaitsjenjin kui jméni xi ngisa tsjoachai axo ʼyáni xi ngisa tsjoachai.
JE XI NGISA TJÍNNELE TSJOACHA KOAAN
4. Jméni xosikaoli nga koa̱nmenile kʼuínsʼenngindái.
4 Nkjín koya jmeni xi tsjoacha maa kʼoa xi ʼyachjiá. Tobʼelañá, tsakui nichxin tokʼoa jeʼyachjí je Biblia nga kjesa chotʼayajin kao je testigole Jeobá, kʼoa tsa tokʼoa jetsjoachai je Jesús. Kʼoa tsakui nichxin kʼoati jekjimamiyui je testigole Jeobá. Tonga jebi alikui xi tsonile nga jekoa̱nmeli kʼoaitʼalai yaoli je Jeobá kʼoa kʼuínsʼenngindái. Nga tsjoachai je Jeobá kui xosikaoli nga kʼuínsʼenngindáni. Kʼianga ngisasa nʼio koa̱ntsjoachai je Jeobá, alikui jme xi kʼoechjoali nga je si̱xálai. Nga mangínsʼenngindá kʼoasʼin bakoñá nga tsjoachaa je Jeobá kʼoa kui xi basenkaoná nga tosi tonda je nixálee.
5. Jmé xi chótʼayajiaan i̱ kjoaʼmiya jebi.
5 Je Jesús kʼoakitso nga tjínnele tsjoacha koaan je Jeobá kao ngayeje ni̱ma̱ná, kjoabijnachonná, kjoafaʼaitsjenná kao nganʼioná (Mar. 12:30). Nga nikjaʼaitsjenjiaan nga tsjoakená Niná kui xosíkaoná nga tsjoacha maa kʼoa ʼyaxkónñá (1 Juan 4:19). I̱ kjoaʼmiya jebi kui chótʼayajiaan jméni xi koa̱n sʼiaan nga koa̱ntsjoachaa je Jeobá kʼoa nga kjuinsʼenngindá.
6. Tojo tso Romanos 1:20, jñánile xi jngo koya josʼin jchaa xi tʼatsʼe Jeobá.
6 Jchaní xi tʼatsʼe Jeobá nga si̱kjaʼaitsjenjin jmeni xi kisinda (tʼexkiai Romanos 1:20; * Apoc. 4:11). Tikjaʼaitsjenjinlai jósʼin bakó jmeni xi koannda nga nʼio chjine je Jeobá. Tobʼelañá, je jñá, xka̱, yá, naxó kʼoa kao cho̱. Tjasjaiyai josʼin tjínnda je yaoná xi chjotaa (Sal. 139:14). Kʼoa tikjaʼaitsjenjin jokji nganʼio tjínle je Tsʼuí, xi ya maxki̱kao jotjín jmi millón niño tjín (Is. 40:26). * Tsa kʼoasʼiain, ngisasa jchaxkuín je Jeobá. Kʼianga ʼyaa nga nʼio chjine je Jeobá kʼoa nga nʼio tse nganʼio tjínle ngisaa mamiyosaa. Tonga kʼianga ni̱ma̱ná kjuinroajinni nga tsjoacha koaan tjínnele nga jchasaa xi tʼatsʼe.
7. Nga ni̱ma̱li kjuinroajinni nga tsjoacha koai̱n je Jeobá, jmé tʼatsʼeni xi tsín jao kʼoái tokuin.
7 Tʼejngui tokuin nga tsjoakeli Jeobá. A tsí makjainli nga kuenta sʼínli kʼoa nga chjí bekonli je Niná xi kisinda ngʼajmi kao Sonʼnde. Tikjaʼaitsjain nga je Jeobá alikui “kjin tíjnaná nga jngójngoá” (Hech. 17:26-28). Je David kʼoakitsole je Salomón nga je Jeobá “tíkotʼajin ngayeje ni̱ma̱le” chjota. Je Niná kui xi mele nga kjoásjee (1 Crón. 28:9). Kʼiatsa jetichotʼayai Biblia, jé Jeobá xi kʼoasʼin koanmele nga kʼoakinʼiai, tojo tso ya Jeremías 31:3. Kʼianga ngisasa jchai jmeni xi tísʼín Jeobá xi tʼatsi, ngisasa tsjoacha koai̱n.
8. Jósʼin koakui nga bʼailai kjoanda je Jeobá nga tsjoakeli.
8 Jngo koya josʼin koakui nga bʼailai kjoanda je Jeobá nga tsjoakeli kʼiaa nga kʼoétsʼoalai. Ngisasa tsjoacha koai̱n kʼianga kʼoéyanajmílai jmeni xi makjáojinli kʼoa nga kʼoailai kjoanda jmeni xi tísʼín xi tʼatsi. Ngisaa koa̱nmiyosai kʼianga jchai nga nrʼoéná kʼianga bʼetsʼoalee (Sal. 116:1). Kʼoa sʼe̱jngo tokuin nga majinle Niná jotjín tokuin. Kʼianga ngisasa koa̱nchriantʼalai je Jeobá, machjén nga jchai josʼin síkjaʼaitsjen kʼoa jmeni xi mele nga sʼiain. Tokʼiaa koa̱njinli jebi kʼianga chótʼayai je Biblia.
Nga chotʼayá je Biblia basenkaoná nga machriantʼalee je Jeobá kʼoa yaa bakóyaná jmeni xi mele nga sʼiaan (Chótsenlai párrafo 9) *
9. Jósʼin koakoni nga ʼyachjí je Biblia.
9 Chjí jchatokuin je Énle Niná. Toyaa Biblia nga kui bakóya jotjínni xi tʼatsʼe Jeobá kʼoa jmeni xi mele nga sʼiain. Jósʼin koakoni nga ʼyachjí je Biblia. Kʼiaa nga nyaon nyaon kʼoéxkiai, nga tongini chótʼayajin nga ʼmiyali, kʼoa nga si̱tjosuin jmeni xi kjimajinli (Sal. 119:97, 99; Juan 17:17). A tjínndajinli jme horani bʼexkiai Biblia nga nyaon nyaon kʼoa a kʼoasʼin ʼmitjenngi josʼin tjínndajinli.
10. Jméni xi toya Biblia faʼaitʼa.
10 Toyaa Biblia nga kui bʼéyanajmí tʼatsʼe chjota xi tsabexkon je Jesús. Tokui je Biblia xi bʼéyanajmí jmeni xi kisʼin Jesús xi tʼatsi. Kʼianga koa̱njinli jmeni xi kisʼin kʼoa jmeni xi kitso je Jesús, koa̱nmeli nga miyole koai̱n.
11. Jmé xi koasenkaoli nga ngisa tsjoacha koai̱n je Jeobá.
11 Nga tsjoacha koai̱n je Jesús kʼoati tsjoacha koai̱n je Jeobá. Je Jesús tsakakó jokjoan je Nʼaile (Juan 14:9). Kʼianga ngisasa jchai xi tʼatsʼe Jesús ngisaa koa̱njinli jokjoan je Jeobá kʼoa ngisaa tsjoacha koai̱n. Tikjaʼaitsjenlai je kjoamatokon xi tsakakóle Jesús je chjota xi totaon tsaʼya, xi ma̱ kisijchá yaole, xi chʼin tjínle kʼoa xi tsín jme nganʼio kisʼele. Xi ijngosani, tsa si̱tjosuin je kjoafaʼaitsjen xi tsjoá ndasʼin kuijnai (Mat. 5:1-11; 7:24-27).
12. Kʼianga ngisasa koa̱nli xi tʼatsʼe Jesús, jméni xi koa̱nmeli sʼiain.
12 Ngisaa tsjoacha koai̱n je Jesús kʼianga si̱kjaʼaitsjenjin nga koa̱n jchatʼa je jéená xi totʼatsʼe nga tsakʼéchjíntjainá (Mat. 20:28). Kʼianga koa̱njinli nga kao kjoatsjoa kitsjoa je kjoabijnachonle nga tsakʼéchjíntjainá, kui xi koasenkaoli nga kʼoakoa̱nnili je jéeli kʼoa si̱jélai je Jeobá nga katasíchatʼali (Hech. 3:19, 20; 1 Juan 1:9). Kʼianga sa tsjoacha sa tsjoacha koai̱n je Jeobá kao Jesús, koa̱nmeli ya kuijnajinlai je chjota xi kʼoati tsjoake.
13. Jméni xi títsjoáli je Jeobá.
13 Tsjoacha katamai je familiale Jeobá. Tsakui nichxin likui koa̱njinle je xíngi xi tsín testigole Jeobá ma kao je xi miyoli koanni ánni nga menili je Niná kʼoaitʼalai yaoli, kʼoa tsakui nichxin koa̱njtikeli. Tonga jé Jeobá koasenkaoli nga̱ yaa kuijnajinlai je ndsʼee kao tichjaa xi tjío jinjtín, xi jngo familia mani. Tjao skoe̱li kʼoa kuinyakaoli (Mar. 10:29, 30; Heb. 10:24, 25). Kʼoa tsakui nichxin channi koa̱nmele skoe̱ xi tʼatsʼe Jeobá je xíngi kʼoa jeni sitjosonle (1 Ped. 2:12).
14. Tojo tso 1 Juan 5:3, jméni xi tiʼyai xi tʼatsʼe kjoatéxomale Jeobá.
14 Chjí jchatokuin kʼoa titjosuin je kjoatéxomale Niná. Tsakui nichxin totsi kjoafaʼaitsjen kinichjain nga kjesa ʼyaxkonjin xi tʼatsʼe Jeobá, tonga jetiʼyai ndʼaibi nga ngisa ndatjín nga kui kjoatéxomale Jeobá mangíntjenngiaa (Sal. 1:1-3; tʼexkiai 1 Juan 5:3 *). Tikjaʼaitsjenlai je kjoafaʼaitsjen xi tsjoá je Biblia xi tʼatsʼe je xi xʼin, xi chjoón, xi xijchá ma kʼoa kao je ʼndíxti (Efes. 5:22-6:4). A ngisa nda tibiyo ya yaniʼyali nga kui kjoafaʼaitsjen xi faʼaitʼa Biblia timangíntjenngio. A ngisaa ndasʼin tiʼmikoai yaoli nga tiʼmitjenngi je kjoafaʼaitsjen xi tsjoá Biblia josʼin chjoéjin je miyoli. A ngisaa tsjoa tjín tokuin (Prov. 13:20; 1 Cor. 15:33). Tsakui nichxin jekʼoasʼin tibijnai.
15. Jméni xi sʼiain kʼiatsa ñʼai kjimali nga tinitjosuin je kjoafaʼaitsjen xi tsjoá je Biblia.
15 Tsakui nichxin sakʼoa tsín ʼyai josʼin si̱tjosuin je kjoafaʼaitsjen xi tsjoá je Biblia. Jé naxinandále síchjén Jeobá nga tsjoáná kjoafaʼaitsjen xi ya Biblia yʼangini nga ʼyaa jmeni xi ndatjín kʼoa jmeni xi chʼaotjín (Heb. 5:13, 14). Kʼianga kʼoéxkiai kʼoa nga chótʼayai jmeni xi tsoya je Biblia, jchaní nga nʼio basenkaoná je kjoafaʼaitsjen xi tsjoá kʼoa koa̱nmejinli nga ya kuijnajinlai je naxinandále Jeobá.
16. Jósʼin tíbándiaale Jeobá je naxinandále.
16 Tsjoacha katamai kʼoa tʼainganʼiolai je naxinandále Niná. Je Jeobá xki̱ jtín síkatíoxkó je choʼndale kʼoa jé Jesús xi jko̱ sʼin tíjnale (Efes. 1:22; 5:23). Kʼoa je Jesús jngojtín chjota kiskoejin xi ya ngʼajmi tjínle kjoachoya xi tíbánele jme xá xi kjima ndʼaibi jinnaxinandále Niná. Je chjotale Cristo jebi jéní xi “choʼnda xi nʼiotʼakon, xi nda be xá” sʼin ʼyale, kʼoa nda sítjoson je xá xi kjinele nga binyakaoná kʼianga machriantʼalee Niná kʼoa nga nda biyoaa ngixko̱n (Mat. 24:45-47). Jngo koya josʼin síkuindaná choʼnda jebi kuinga tsjoále xá je chjotale Cristo xi jetjínle kjoafaʼaitsjen nga bándiaale je jtín (Is. 32:1, 2; Heb. 13:17; 1 Ped. 5:2, 3). Je chjotale Cristo jebi xi xá sʼenele tjíondaa nga kuinyakaoli, sinʼio tokuin kʼoa tsjoánganʼioli nga ngisa koa̱nchriantʼalai je Jeobá. Tonga xi ngisa tjínle kjoandosin kuinga kuinyakaoli nga koa̱nli kʼuínyalai xi kjaʼaí xi tʼatsʼe Jeobá (Efes. 4:11-13).
17. Tojo tso Romanos 10:10, 13, 14, ánni nga nokjoakaoñá xi kjaʼaí chjota xi tʼatsʼe Jeobá.
17 Tisenkoai xi kjaʼaí nga tsjoake katama je Jeobá. Je Jesús kʼoakitsole je chjotatjenngile nga katatsoyale xi kjaʼaí xi tʼatsʼe Niná (Mat. 28:19, 20, TNM). Koa̱njin tsa tokjoanʼio si̱tjosoán je kjoatéxoma jebi. Tonga tsa sa tsjoacha sa tsjoacha koai̱n je Jeobá, kʼoajinti sʼe̱ tokuin joni je pastro Pedro kao Juan, nga kitso: “Alikui koa̱n nga jyó kuiyuijin xi tʼatsʼe xi tsaʼyaijin, xi kinoʼyaijin” (Hech. 4:20). Nʼio tsjoa sʼe tokoán nga binyakoaa xi kjaʼaí nga tsjoake ma je Jeobá. A fiyaa jkui jokji tsjoa kisʼe kon je Felipe kʼianga tsakasenkao je chjota etíope nga koanjinle jmeni xi tso je xo̱n escritura kʼoa nga kisʼenngindá. Kʼianga kʼuíntjenngi je choa̱le Felipe kʼoa si̱tjosuin je kjoatéxoma xi kitsjoa je Jesús nga tjínnele kʼuínyasuin, kʼoasʼin koakoni nga meli testigole Jeobá koai̱n (tʼexkiai Romanos 10:10, 13, 14). * Kʼoa kʼoajinti sí jokitso je chjota etíope, nga kitso: “Jmé xi bʼéchjoana nga koa̱n kjuísʼe̱nngindá” (Hech. 8:36, TNM).
18. Jméni xi jchaa ya kjoaʼmiya xi fisani.
18 Kʼianga kʼuínsʼenngindái, kui xi nʼio tjínle kjoandosin xi sʼiain. Nga tsín tokjoaská tjenkao jebi, tjínnele nda si̱kjaʼaitsjain jme xi tsoyanile nga mangínsʼenngindá. Jméni xi machjén nga jchai tʼatsʼe nga mangínsʼenngindá. Kʼoa jméni xi tjínnele sʼiain nga tongini kʼoa nga jekaʼmisʼenngindái. Kui jchaa xi tʼatsʼe jebi ya kjoaʼmiya xi fisani.
KJOAJNDA 2 Jeobá ʼmi jaʼaínli
^ párr. 5 Tjínkʼa chjota xi tsjoake Jeobá tonga xi tsín bele kon nga koaisʼenngindá kʼoa nga testigole Jeobá koa̱n. Kʼiatsa kʼoati tjín tokuin, je kjoaʼmiya jebi koasenkaoli nga jchai jméni xi sʼiain nga koa̱n kʼuínsʼenngindái.
^ párr. 2 Hechos 8:35-38, TNM: “Je Felipe tsakʼétsʼiakao nga kinchja̱, kʼoa kui kiskoeyani én xi tjítʼa xo̱n escritura xi tíbʼéxkia chjota jebi, nga kitsoyale je énnda xi tʼatsʼe Jesús. 36 Nga tjíofi nga tjenya yandiaa, kicho ya jña nyajnró nandá, kʼoa je chjota xi xángʼa tjínle kitso: Koeni, tjín nandá i̱bi; jmé xi bʼéchjoana nga kjuísʼe̱nngindá. 38 Kʼoa kʼoakitso nga katabasenjna je carreta, kʼoa Felipe kao chjota xi xángʼa tjínle kijin ya nandá. Kʼoa je Felipe kiskanisʼenngindá”.
^ párr. 6 Romanos 1:20: “Je kjoa xi tsínkui matsen xi tsʼe Niná, xi kui nganʼiole xi tíjnantsjai, kʼoa xi kui jo kjoan Niná, koantsen saʼnda nga kisʼenda sonʼnde. Je kjoabi tsaʼyale totʼatsʼe tsojmi xi kisʼenda. Kui nga ñaki tjínle jée chjota”.
^ párr. 6 Nkjínsa choa̱ koa̱nsjaitʼali ya folleto ¿Es la vida obra de un Creador? kao El origen de la vida. Cinco cuestiones dignas de análisis.
^ párr. 14 1 Juan 5:3: “Kʼoasʼin tjaochaa Niná, nga nikjitjosoán kjoatéxomale. Je kjoatéxomale ali ñʼaijin tjín”.
^ párr. 17 Romanos 10:10, 13, 14, TNM: “Nga̱ kao ni̱ma̱ná bakoñá je kjoamakjain nga kuichotjenngiaa kjoatéxoma xi kixi, tonga kao ndsoʼbaa nokjoañá ya jinle chjota kʼoa kui xi kʼoasjentjainá. 13 Nga̱ toʼyani xi sikʼaxki̱ je jaʼaínle Jeobá, kuitjontjainí. 14 Tonga jósʼin sikʼaxki̱ni tsa kje makjainjinle xi tʼatsʼe. Jósʼin koa̱nkjainnile tsa kje nrʼoéjin xi tʼatsʼe. Jósʼin kjuinrʼoéni tsa tsín ʼya xi kuitsoyason”.
^ párr. 64 XI TÍNCHJA̱NI SÉN XI FAʼAITʼA: Jngo tichjaa xi tjín xi tíbatse jngoo tratado títsjoále jngo tsoti.
