Je Jack kao Marie-Line ñaki to xále Niná tjíosʼín tjen nó 1988. Kʼoasʼin ʼyale nga mangale tojñani bichó kʼoa nkjín koya xá jekisitjoson jinnaxinandále Niná ya jña Guadalupe kao jña Guayana Francesa ʼmi, ʼnde xi kjinentsja je sucursal xi tíjna Francia. Tjínla xi chjónangilee ndsʼee jebi.

Jókoanni nga ñaki to xále Niná kinʼiao.

Marie-Line: Yaa Guadalupe koanjchínga kʼoa bʼajnda nichxin tsakʼinyasuinjin kao mana, xi nʼio tsjoake koan nga kitsoyason. Nga mandosinna xinyale je chjota, kʼianga jejetʼana skuela jña kiskotʼaya nga nó 1985, tokjoan precursora sʼin kisixá.

Jack: Kʼianga sʼa xtia, jé kisimiyoa ndsʼee xi ñaki to xále Niná sʼín kʼoa xi nʼio tsjoake nga tsoyason. Precursor auxiliar sʼin kisixá nga kisʼena vacación nga sʼa skuela tsoʼba̱. Kʼianga jetífe xomana, sakʼoaa carro tsakiyoyaijin nga tsangínkʼinyasuinjin kao ndsʼee xi precursor sʼin tjíosíxá. Yaa ndaindáchikon nikjetʼanijin. Nʼio tsjoa kisatio tokuinjin.

Je Marie-Line kao an kʼiaa chixainjin nga nó 1988. Tochoatsee jaʼato nga i̱ kixian: “Machjénjin nga ngisasa tse si̱xálee Niná nga̱ tsín jme xi bʼéchjoaná”. Kuinga kʼoati precursor sʼin kisixáña joni Marie-Line. Nga kicho jngo nó, tsangínníjin je Skuela xi tsʼe precursor, kʼoa precursor especial sʼin kinikasénnajin. Nkjín ʼnde tsakʼinyasuinjin ya Guadalupe kʼoa nʼio tsjoa kisatio tokuinjin. Xijekoan, yaa Guayana Francesa kinikasénnajin.

Jokji jetífaʼato nó, jmé xi tíbinyakaono nga nkjín koya josʼin tinixálao Niná.

Marie-Line: Je ndsʼee xi tjío ya Betel xi tíjna ya Guayana Francesa be nga kui Isaías 6:8 je texto xi nʼio tsjoachaijin. Kʼianga nchja̱najin teléfono sakʼoaa fákaoskánajin kʼoa itsonajin: “A faʼaitsjenno jñánile je texto xi nʼio tsjoachao”. Kʼoa nga kʼoatso, majinnajin nga xin ʼnde sikasén ijngokʼangáninajin. Kʼoa i tsakixuínjin. “¡I tiyuijin! ¡Jin tikasénnáijin!”.

Alikui kui ningósonkoaijin josʼin kinixálaijin Niná ngasʼa kʼoa josʼin nixáijin nga xin bicho  ijngokʼaijin, tsa mai alikuijin tsjoa kisatio tokuinjin. Xi ijngosani, jin títjon nimiyuijin je ndsʼee jñani bichuijin.

Jack: Nga títjon, tjínkʼa je miyonajin xi kʼoakitsonajin nga tsín xin ʼnde koanngínjin, nga̱ kui xi mele nga ya kuiyokoaijin. Tonga kʼianga kitjuijin ya Guadalupe, jngo ndsʼee xi kui kisikʼaxki̱najin jmeni xi kitso je Jesús tojosʼin faʼaitʼa ya Mateo 13:38: “Je nangi jé ní xi sonʼnde”. Kʼianga xin ʼnde nikasénnajin, kui nikjaʼaitsjainjin nga tojo kui xále Niná tinʼiaijin tojñani kuichuijin. Nga̱ je xi ngisa chjíle jé chjota xi tjín ʼnde jñani bichuijin.

Kʼianga tosʼa bichuijin ya ʼnde jñani nikasénnajin, ʼyaníjin nga tsjoa tjío kon je chjota xi ya tsʼe. Kuinga kʼoatinʼianijin josʼín. Ningalani kjaʼaí kjoan tsojmi xi kjine, kʼoati kui chinaijin tsanda jinjin, kʼoa kʼoati kui ʼyuijin jmeni xi ʼbi, tonga nikuindaníjin yaonajin nga tsín katatjochʼinnajin. Nda nokjoanijin tʼatsʼe nga jngó jngó ʼnde jña tsakiyuijin.

Marie-Line: Kʼoati nʼio tse xi bakóyaná je ndsʼee xi ya tsʼe jñani bichoaa. Faʼaitsjenna jmeni xi koan nga tosʼa kichuijin ya Guayana Francesa. Nga tsakʼa je jtsí, kʼoasʼin kisikjaʼaitsjen nga kʼia kuitjoxinyasoan kʼianga jekoa̱nxa̱nya. Tonga jngo tichjaa xi i̱ kitsona: “A kjuinñá”. Tokʼoakoanna nga kʼoakitsona, kʼoa i kixinle: “Tonga jósʼin kjuinñá”. Kʼoakitsona nga skoe je sombrillana kʼoa nga bicicleta koanngínkoaijin. Koanna nga kikoa bicicleta kʼoa nga jngo ndsa̱ kitsoakaoña je sombrilla. Tsa tsín kʼoakisʼian, alikuijin kitjoxinyasoan nga cha̱njtsí.

Jela 15 kʼa nga xinxin ʼnde timangínkiyo. Jméni xi binyakaono nga tsín ñʼai mano.

Marie-Line: Nga xinxin ʼnde mangínkiyoaa alikui choa ñʼai ma sakʼoaná. Tonga kʼoati machjén nga nda katasʼe tokoán nga bichoaa jñani tiyoñá kʼianga jebichoñá nga ʼmiyasoán.

Jack: Kʼianga tosʼa bichuijin nga jngó jngó ʼnde sikʼiña je ndʼia jñani biyonijin. Kʼianga be sakʼoa je ndsʼee xi tjío ya sucursal nga tochoatse kuiyuijin jngo ʼnde, itsonajin: “Jack, ali nikʼijin ndʼai”.

Je Marie-Line nʼio be josʼin batíonda je chʼánajin. Tsen tsen binyáya je cartón tsojmi xi tjínnajin kʼoa bʼétʼaxoon jmeni xi batíoya nga jngó jngó cartón, tobʼelañá, “Baño”,  “Dormitorio” kʼoa tsa “Cocina”. Kʼoa nga jebichuijin jña kuiyonijin, jeʼyaijin jñani batiuijin. Kʼoa ngisaa choa ñʼai manajin nga tsen tsen bʼétʼaxo̱n je Marie-Line jmeni xi nya nga jngó jngó cartón.

Marie-Line: Nga manajin nda bʼendajinjin jmeni xi nʼiaijin, tokjoan kui xále Niná kʼoanʼiaijin jñani bichuijin.

Jósʼin bʼendajion nga bitjosonno je xále Niná (2 Tim. 4:5).

Marie-Line: Tokʼiaa nga lune nikjáyaijin kʼoa kʼiaa chotʼayajinjin jmeni xi faʼa ya kjoajtín. Kʼoa ngayeje xomana ʼmiyasonníjin.

Jack: Ningalani tjíchoa̱ jotjín hora ʼmiyasuinjin nga xki̱ sá, alikui kui mangínnijin. Kui xi ngisa mandosinnajin nga ʼmiyasuinjin. Nga tosʼa bitjonijin niʼya saʼnda nga feʼe̱nijin chjakaonajmínijin chjota je Énle Niná.

Marie-Line: Tobʼelañá, nga mangínkʼetsaojinjin, bʼa kʼa je tratado. Tjínkʼa je chjota xi síjénajin xo̱n xi Énle Niná yʼangini, ningalani tsín kʼoaʼmilaijin nga testigole Jeobá maijin. Kuinga chosonnilaijin jokjoan najño xi chʼakjáijin kʼoa jonʼiaijin. Nga̱ je chjota kui kuenta sʼín jebi.

Jack: Kʼoatisʼin beni tʼatsʼe Énle Niná je chjota kʼianga binyakoaijin. Kʼoasʼin ngana nga bʼexkoá je xo̱n xi tjíotsʼotjen, fikʼejtenña je tjé kʼoa sitsjeña ya ndaindiaa. Je chjotandaindʼia be nga kʼoasʼian kʼoa itso sakʼoana: “A tsí kijna jngoli Biblia xi koa̱n kʼoainái”.

Me tongantsjai nga kjintʼa jñani mangínkʼinyason. Jñánile xi ngisa faʼaitsjenno.

Jack: Ya Guayana Francesa, tjín ʼnde jñani tsín choa ñʼai maná nga mangián. Nkjín kʼa nga 600 kilómetro (370 milla) tsakitsomaijin nga tojngo xomana, kʼoa chʼao chon je ndiaa. Faʼaitsjenna nga tsangínjin ya Saint Élie. Nga koan kichuijin nkjín hora nga carro tsakiyoyaijin, kʼoa xijekoan chitso tsangínkoaijin. Je chjota xi ya tsʼe oro básjai. Nga nʼio tsjoa kisatio kon nga tsakʼailaijin je xo̱n xi Énle Niná yʼangini kitsjoanajin je oro. Nga jekoanʼña jngo video tsakakolaijin kʼoa nʼio nkjín koanni xi kicho.

Marie-Line: Ñandia nga kʼoatsakʼinle je Jack nga je tsjoá kjoanokjoaya nga faʼaitsjenya Kjoabiyale Cristo ya Camopi. Ño hora nga chitso tsakiyoyaijin nga kitjatojinjin je xo̱ngá xi Oyapock ʼmi saʼnda nga kichuijin. Nʼio tsjoa kisatio tokuinjin.

Jack: Nʼio xkón jñani choa nanga kijna je nandá kʼoa jñani nʼio tífaʼa. Tokʼoamaná nga jebichochrian jñani kʼoachon. Je chjota xi síxákao je chitso tjínnele nʼio nda skoe̱ josʼin. Ninga kʼoalani nʼio tsjoa kisatio tokuinjin. Ninga to jaon mani je xi testigole Jeobá, ñachantela chjota kicho nga jaʼaitsjenya je Kjoabiyale Cristo, kʼoati kicho kʼa je chjota amerindia.

Marie-Line: Kui ngayeje jebi xi nʼio tsjoa koaya kon je xti xi mele nga ngisasa tse sixále je Jeobá. Nga kʼoachon jñani bichoaa, jé Jeobá ninʼiotʼaa kʼoa ngisaa nʼio sʼejna je kjoamakjainná. Me tongantsjai ʼyaa josʼin basenkaoná je Jeobá.

Nga nkjín én mano, a tsín ñʼai mano nga chotʼayao je xi kjaʼaí én.

Jack: Ñʼai manajin. Tjínnele nga kui én kinchja je én xi male chjota jñani kichuijin. Tobʼelañá, kʼianga tsakjandiaa nga kichotʼaya je Xo̱n xi Bájinkonná kui én sranangtongo * kinchja kʼoa saʼnda kje bʼexkiajian je texto xi tsʼe Biblia nga kui én. Jngo ndsʼee kiskonangile tsa koanjinle jme xi kixian, kʼoa i kitsona: “Tjín jmeni xi tsín koanjinnajin, tonga nda kisi”. Jé xtiʼndí xi ngisa nda tsakinyakaona. Je xi jejchínga alikui kʼoakitsona jñani tsín nda xian, tonga je xtiʼndí kʼoakitsokixina. Nʼio tsakinyakaona.

Marie-Line: Tjín ʼnde jñani nga én francés, portugués kao sranangtongo kinchja nga kixinyale Biblia je chjota. Jngo tichjaa xi kʼoakitsona nga je títjon kjuíxinyale Biblia chjota xi  ngisa ñʼai mana je énle kʼoa nga sikjetʼaña nga xínyale je xi ngisa choa ñʼai mana je énle. Kʼoatjín kjoaixi jokitsona je tichjaa.

Ñandia kʼianga kjaʼaí kjaʼaí én male je chjota xi kixinyale Biblia, jngo xi én sranangtongo nchja̱ kʼoa xi ijngo én portugués nchja̱. Kʼianga jetixinyale Biblia je xi én portugués nchja̱, je tichjaa xi tjenkaona i kitsona: “Marie-Line, alikuingó kjimajinle jme xi tiʼmilai”. Kʼiaani koanjinna nga én sranangtongo tifakoa je chjoón xi én portugués male.

Nʼio tsjoakeno je ndsʼee xi ya tsʼe jñani tibʼainganʼio, jónʼianilao nga nimiyo je ndsʼee.

Jack: Ya Proverbios 11:25 itso: “Je chjota xi tjotʼa ngisaa ndasʼin kʼoéjna”. Tojo tso texto jebi binyakaoníjin xi ngikʼa. Kʼianga tsjoanganʼioa nga matsje ya Ndʼia jña chotʼayá, tjínkʼa ndsʼee xi i̱ tsona: “Jela katasítsje je ndsʼee xi publicador ma”. Kʼoa i xinle: “Kʼoati publicador ma tsanda an. Tsa tjín xá kʼoati mena tsjoanganʼioa”. Sakʼoaa machjénná nga toñá biyoaa, tonga je chjoónna kao an binyakaoníjin je ndsʼee.

Marie-Line: Mandosinnajin josʼin tjíoni je ndsʼee. Kʼoasʼin ʼyanijin tsa machjénle nga ʼya xi sikuinda je ʼndíxtile kʼoa tsakuije̱ nga koaichʼa nga jebitjoni skuela. Bʼendajinníjin nga binyakoaijin. Kʼoasʼin nimiyonijin je ndsʼee kʼoa binyakaoníjin nga nganʼio machjénle.

Jmé kjoanichikontʼain tjíosokóno nga ya tibʼainganʼio jñani ngisa machjén je xi tsoyason.

Jack: Nʼio tsjoa tjío tokuinjin nga ñaki to xále Niná tinʼiaijin. Me tongantsjai nga ya tibʼainganʼiuijin jñani ngisa ʼyaa jmeni xi kisinda je Jeobá. Ningalani kjoa bitjatojin sakʼoaijin nyʼán sʼe tokuinjin, nga̱ ʼyaníjin nga tsjoánganʼioná je naxinandále Niná tojñani tiyoaa.

Kʼianga sʼa xtia, ndoyá tsakatejnaʼya ya Guayana Francesa nga tsín servicio militar kisʼian. Alikuikʼia kiya jkoa nga jo misionero sʼin kuicho ijngokʼa kʼoa nga tjóʼndena nga kjoaʼasʼen ya ndoyá nga xále Niná tisʼian. Alikui jao tjínna nga síchikontʼainná je Jeobá.

Marie-Line: Nga basenkoa xi kjaʼaí kui xi ngisa tsjoa báya tokoan. Nʼio tsjoa tjío tokuinjin nga je Jeobá tinixálaijin. Kʼoa tíbinyakaonajin nga nda tiyuijin. Sakʼoaa kʼoatsona je Jack tsa koa̱n nga kʼoakʼuínlaijin je ndsʼee xi tjíosíkʼajenle kon nga kjoaʼaíkjenkaonajin. Kʼoa kʼoaxinle nga kʼoakjoan tikui xi sikjaʼaitsjen. Me tokjitʼa nga kʼoasʼin mangóson josʼin nikjaʼaitsjainjin.

Jack: Jekjoan nkjín nó nga kʼoatsakʼinna nga cáncer de próstata tjínna. Ningalani tsín sasénle je Marie-Line nga kʼoatso én nrʼoé, i xinle: “ʼNdíchjoón, kjesa nʼio jchíngajian, tonga ningalani kuiyá nyaon tsjoa tjín tokoan nga toje Jeobá kisixále jokjitse tsakatejnakoan, nga̱ kui xi ngisa chjíle” (Gén. 25:8).

Marie-Line: Alikuikʼia kiya jkuijin jokji tse kjoanda títsjoánajin je Jeobá. Tsee kjoanichikontʼain tísokónajin. Koanngínníjin tojñani sikasénnajin naxinandále Jeobá, nga̱ jé ninʼiotʼaijin.