1, 2. Jméni xi tjínnele sʼiaan nga sa̱sénle Niná josʼin ʼyaxkoán.

 KʼIANGA Niná ʼyaxkoán bixoán jméni xi fiya jkui. Tsakui nichxin kui fiya jkui nga jngo ndsʼee xi sénxkónyʼintʼa nachanle nga tíbʼétsʼoale Jeobá kʼoa tíbʼéyanajmíle jotjín kon. Kʼoa tsakui nichxin kui fiyaje̱ jkui jngo familia xi Énle Niná tjíokotʼayajtín.

² Je chjota xi kanikʼaxkiaa i̱bi jé Jeobá tjíobexkón. A sasénle Jeobá nga kʼoasʼin tjíobexkón. Je Jeobá sasénle nga kʼoasʼin ʼyaxkoán josʼin mele, nga bakoá kjoatsjoacha kao kjoaxkóntokon. Kuinga kʼoasʼin ʼyaxkónñá je Jeobá josʼin mele nga̱ tsjoachañá kʼoa bakinle nga jchaxkón.

3. Jmé xi chótʼayajiaan i̱ kjoaʼmiya jebi.

³ I̱ kjoaʼmiya jebi kui chótʼayajiaan nga kisasenle Jeobá josʼin tsaʼyaxkón nichxin kjoatse, kʼoa jin koya chótʼayajiaan josʼin tjínnele jchaxkoán nichxin xi tiyoaa ndʼaibi. Kʼianga chótʼayajiaan, si̱kjaʼaitsjenjiaan jósʼiaan nga ngisasa nda jchaxkoán je Niná. Kʼoati jchaa ánni nga tsjoa satíoni tokoán nga kʼoasʼin ʼyaxkoán Niná josʼin mele.

4. Kʼianga kjesa faʼaijin Jesús i̱ Sonʼnde, jósʼin tsakakó choʼndale Jeobá nga tsjoake koan kʼoa nga tsabexkón.

⁴ Kʼianga kjesa faʼaijin Jesús i̱ Sonʼnde, je Abel, Noé,  Abrahán kao Job tsabexkón je Jeobá kʼoa tsjoake koan. Kʼoasʼin tsakakóni nga tsakʼaʼén jmeni xi kitsole, nga koankjainle xi tʼatsʼe kʼoa nga kisitjosonle. Je Biblia alikui kʼoatsokixi josʼin tsabexkón Jeobá. Tonga jmeni xi kisʼin chjota jebi kisasenle Jeobá. Kʼianga jeki nichxin, je Niná kitsjoale kjoatéxoma je ntje̱le Abrahán. Kjoatéxoma jebi kʼoakitso josʼin tjínnele jchaxkón je Jeobá.

5. Jósʼin tsaʼyaxkón Niná kʼianga jekʼien kʼoa jaʼáyanile Jesús.

⁵ Kʼianga jekʼien kʼoa jaʼáyanile Jesús, je Jeobá alikui tikʼoakitsonile naxinandále nga kui kjoatéxomale Moisés katasítjoson (Rom. 10:4). Je chjotale Cristo tjínnele kui kjoatéxomale Cristo koaitjenngi (Gál. 6:2). Chjota jebi kui choa̱le Jesús tjínnele koaitjenngi kʼoa kao jmeni xi tsakakóya, ali tsakuijin nga tokʼoejinkon jotso je kjoatéxoma kao jmeni xi bʼéchjoa. Nichxin xi tiyoaa ndʼaibi, ñá xi chjotale Cristo maa bʼenelee yaoná nga kʼoanʼia jokisʼin Jesús ánni nga nda kuiyosíñá ngixko̱n Jeobá kʼoa nga nda sa̱tíoni tokoán (Mat. 11:29).

6. Jósʼin koasenkaoná jmeni xi chótʼayajiaan i̱ kjoaʼmiya jebi.

⁶ Kʼianga kui chótʼayajiaan josʼin tjínnele jchaxkoán Jeobá, si̱kjaʼaitsjenjiaan jebi: “Jókji tibʼenele yaona nga tiʼbexkoán je Niná. A koaan tsa ngisasa ndasʼin skoexkoán”. Ningalani tsjoa tjín tokoán josʼin tiʼyaxkoán je Niná, koaan si̱jélee nganʼio nga katabasenkaoná nga ngisasa ndasʼin jchaxkoán.

7. Jósʼin bekon Jeobá nga ni̱ma̱ná nroajinni nga bʼetsʼoalee.

⁷ ʼYaxkónñá je Jeobá kʼianga bʼetsʼoalee. Je Biblia kui síngósonkao nga bʼetsʼoalee Niná josʼin kisʼenda je xongó xi tsakʼaitʼale ya ndʼianajño kʼoa xi tsakʼaitʼale ya yo̱ngo̱ nga jekoanskanni (Sal. 141:2). Naskákinje̱ je xongó xi tsakʼaitʼale Niná kʼoa kisasenle. Tikʼoasʼinni, je Niná sasénle kʼianga ni̱ma̱ná nroajinni nga bʼetsʼoalee ninga tokʼiakjoan kjoaʼaítsjenná jmeni xi kʼuínlee (Prov. 15:8; Deut. 33:10). Je Jeobá nda sʼe kon nga kʼoaʼmilee nga tsjoachaa kʼoa nga bʼailee kjoanda. Je Niná kui xi mele nga kʼoéyanajmílee jotjín tokoán, jmeni xi nikjáojiaan kʼoa jmeni xi choyalee. Kʼianga kjesa bʼetsʼoajinlee je Niná, machjén nga títjonkjoanla si̱kjaʼaitsjenjiaan jmeni xi kʼuínlee. Kʼiatsa kʼoasʼiaan, yaa koa̱nngóson nga bʼetsʼoalee joni tsakui tibʼaitʼalee je xongó xi ñaki nda.

8. Jméni xi nʼia nga chʼasjengʼaa je Niná.

⁸ ʼYaxkónñá je Jeobá kʼianga chʼasjengʼaa (Sal. 34:1). Kʼoasʼin chʼasjengʼañá Jeobá kʼianga nokjoañá jokjoan kʼoa jmeni xi kisinda. Kʼoa nga bʼailee kjoanda ni̱ma̱ná nroajinni nga chʼasjengʼaa. Kʼiatsa chʼa̱sjeʼaa nichxin nga si̱kjaʼaitsjenjiaan je kjoanda xi tíbakóná Jeobá kʼoa jmeni xi tísʼín xi tʼatsaan ntsjaintsjaijin chʼa̱sjengʼaa. Kʼianga ʼmiyasoán kʼoasʼin chʼasjengʼañá Niná nga nokjoañá xi tʼatsʼe (Heb. 13:15). Tojo nʼia kʼianga bʼetsʼoalee Jeobá nga títjonkjoanla chosonnilee jmeni xi ʼmilee, kʼoati tjínnele sʼiaan kʼianga ʼmiyasoán, títjonkjoanla nda si̱kjaʼaitsjeen jmeni xi kʼuínlee je chjota, nga̱ kui xi mená nga ndasʼin kʼuínyasoán. Kʼianga ʼmiyasoán ñaki kao kjoatsjoa bakoyalee je chjota.

9. Jósʼin basenkao je naxinandále Niná nga fi kjoajtín, kʼoa jósʼin basenkaoli ji.

 ⁹ ʼYaxkónñá je Jeobá kʼianga mangián kjoajtín. Nichxin kjoatse, i tsakʼinle je chjota israelita: “Jan kʼa nga jngo nó, ngatsʼi je xi xʼin tjínnele koai ya ʼnde jñani skoéjin je Jeobá Nináli” (Deut. 16:16). Kʼianga ki jñani tsakatiojtín tjínnele kisikatío niʼyale kao tsojmi xi kisʼele. Je Jeobá i kitsole: “Aliʼya xi kuitso kon nga nangili skoé kʼianga kʼuínkisenjnai ngixko̱n Jeobá Nináli” (Éx. 34:24). Jé Jeobá kisinʼiotʼa je chjota israelita kʼianga ki je kjoajtín xi xki̱ nó kisatiole. Nʼio tsakinyakao nga kʼoakisʼin, ngisaa nda koanjinle jotso je kjoatéxomale Niná, kisikjaʼaitsjenjin je kjoanda xi tsakakóle Jeobá kʼoa ngisaa koanmiyo xínkjín nga ñatjen tsakʼétsʼoale Jeobá (Deut. 16:15). Kʼoati nʼio binyakaoná tsanda ñá kʼianga mangián je kjoajtín. Kʼoa nʼiojin tsjoa sʼe kon je Jeobá nga tongini biyondaa nga bʼé comentarioná.

10. Ánni nga ʼyaxkónñá Jeobá kʼianga jndalee.

¹⁰ ʼYaxkónñá je Jeobá kʼianga jndalee (Sal. 28:7). Kisele Niná je chjota israelita kʼianga tsabexkón. Tobʼelañá, je rey David 288 chjota levita kiskoéjin xi kise ya yo̱ngo̱ (1 Crón. 25:1, 6-8). Nichxin xi tiyoaa ndʼaibi, kʼianga chʼasjengʼaa Niná kʼoati jndalee. Kʼianga jndaa ali tsakuijin jotso jta̱ná xi ngisa chjíle. Tobʼelañá, kʼianga nokjoanajmiá sakʼoa tsín nda nokjoaa, ninga kʼoalani, tojo nokjoañá nga satíoná kjoajtín kʼoa nga ʼmiyasoán (Sant. 3:2). Tikʼoasʼinni, alikui koa̱n nga kui kʼoechjoaná nga kuijndálee Jeobá ninga tsín nanda maná jndaa.

11. Tojo tso Salmo 48:13, ánni machjénsíni nga si̱kʼayaa nichxin nga chótʼayá Biblia kao familianá.

¹¹ ʼYaxkónñá je Jeobá kʼianga chotʼayá je Énle kʼoa nga ʼmiyalee ʼndíxtiná xi tʼatsʼe. Kʼianga xoto, je chjota israelita kui xá kisʼin nga ngisa kisimiyo je Jeobá kʼoa alikui tsʼe xá kisʼin (Éx. 31:16, 17). Je chjota israelita xi kixi kitʼale Niná kitsoyale ʼndíxtile xi tʼatsʼe Jeobá kʼoa kao kjoanda xi bakó. Kʼoati tjínnele si̱kʼayaa nichxinná nga kʼoéxkiaa kʼoa nga chótʼayá je Énle Niná. Kʼianga kʼoanʼia kʼoasʼin ʼyaxkónñá Jeobá kʼoa basenkaoná nga ngisa machriantʼalee (Sal. 73:28). Kʼianga chotʼayajtían kao familianá kʼoasʼin binyakaoñá ʼndíxtiná nga ngisa koa̱nmiyo je Jeobá (tʼexkiai Salmo 48:13). *

12. Jósʼin tsabekon Jeobá je xá xi kisʼin je chjota xi kui kisinda je tsojmi xi koanchjén ya ndʼianajño, kʼoa jmé xi bakóyaná jebi.

¹² ʼYaxkónñá je Jeobá kʼianga bʼainganʼioá nga matsje kʼoa nga sʼenda ndʼia jña ʼyaxkón. Je Biblia kʼoatso nga tsje je xá xi koan nga kisʼenda je ndʼianajño kao tsojmi xi ya koanchjén (Éx. 36:1, 4). Nichxin xi tiyoaa ndʼaibi, je Jeobá kʼoati tsje sʼin bekon je xá xi ma nga sʼenda Ndʼia jña chotʼayá kao ndʼia xi kʼoatisʼin machjén nga ʼyaxkón. Tjínkʼa ndsʼee xi tse nichxin síkʼaya kʼianga tsjoánganʼio, kʼoa bʼailee kjoanda nga kʼoasʼin síxá. Kʼoati síkʼaya nichxin nga tsoyason, kʼoa tjínkʼa ndsʼee jebi xi mele nga precursor sʼin sixá. Kʼoa kʼianga kʼoatso je xi chjotajchínga sʼin tjío nga koa̱n precursor sʼin sixá ndsʼee jebi  kʼoasʼin tsjoánganʼioni nga sʼenda ndʼia jña ʼyaxkón Niná. Ni maná kʼoa ni tsín maná bʼendaa ndʼia, kʼoati koa̱n kʼoainganʼioá nga matsje kʼoa nga masinle.

13. Jósʼin tjínnele jchatokoán je tao̱n xi batioá nga bʼainganʼiolee je xále Niná.

¹³ ʼYaxkónñá je Jeobá kʼianga batioá tao̱n. Je chjota israelita kitsjoaa jmeni xi tjínle nga ki jñani tsabexkón Jeobá (Deut. 16:16). Kitsjoaa je tsojmi xi tjínle jokji tjen kʼoakoanle. Kʼoasʼin kitsjoanile kjoanda Jeobá nga tsakʼinyale jotso je kjoatéxomale. Jósʼin koakoñá nga tsjoachaa je Jeobá kʼoa nga bʼailee kjoanda nga títsoyaná xi tʼatsʼe. Kʼiaa nga koatioá tao̱n jokji tjen kʼoakoa̱nná ya jtín jñani mangián kʼoa nga kʼoainganʼioá je xá xi kjima jngo tjíjtsa Sonʼnde. Je pastro Pablo i kitso: “Tsa jngo xi jyondi̱to̱nle, kʼoasʼin tjoé jo kji tjínle, likui jo kji xi tsínle” (2 Cor. 8:4, 12). Ni tse kʼoa ni choa tao̱n kʼoee, je Jeobá nʼio chjí be tsa ni̱ma̱ná kjuinroajinni nga kʼoasʼiaan (Mar. 12:42-44; 2 Cor. 9:7).

14. Tojo tso Proverbios 19:17, jósʼin bekon Jeobá nga binyakoaa je ndsʼee xi nganʼio machjénle.

¹⁴ ʼYaxkónñá je Jeobá kʼianga binyakoaa je ndsʼee xi nganʼio machjénle. Je Jeobá kʼoakitsole je chjota israelita nga sichikontʼain kʼiatsa kuinyakao je xi ma̱ tjío (Deut. 15:7, 10). Kʼianga binyakoaa je ndsʼee xi nganʼio machjénle joxi jéni Jeobá xi tjín xi tibʼaikjoatjaolee (tʼexkiai Proverbios 19:17). * Tobʼelañá, je chjotale Cristo xi Filipos tsʼe tsojmi kisikasénle Pablo nga tsakʼejnanʼio, kʼoa je Pablo kʼoakitso nga nʼio nda kisasenle Niná jmeni xi kisʼin chjota jebi (Filip. 4:18). Kuenta sʼiaan je ndsʼee xi tjío ya jinjtín kʼoa si̱kjaʼaitsjenjiaan jebi: “A tjío ʼyani xi koa̱n koasenkoa”. Je Jeobá nʼio tsjoa sʼe kon kʼianga binyakoaa je xi nganʼio machjénle, nga nikʼayalee nichxinná, nganʼioná kʼoa nga bʼailee jmeni xi tjínná. Nga kʼoanʼia kʼoasʼin ʼyaxkónñá je Jeobá (Sant. 1:27).

15. Ánni nga tsín ñʼai tjínsíni nga nikʼayalee nichxinná kao nganʼioná je Jeobá.

¹⁵ Kʼianga kʼoasʼin jchaxkoán Niná josʼin mele machjén nga si̱kʼayaa nichxinná kao nganʼioná, kʼoa alikui ñʼai tíjna nga kʼoanʼia (1 Juan 5:3). Kuinga kʼoanʼiañá nga tsjoachaa je Niná. Tobʼelañá, tsa jngo tiʼndí xi mele nga tjín xi tsjoákjoatjaole je nʼaile, ninga nkjín hora kʼoengi nga sinda jngo dibujo alikuijin koa̱nsile nga̱ tsjoake je nʼaile kʼoa mele nga kui tsjoákjoatjaole. Tikʼoasʼinni, nga tsjoachaa je Jeobá nikʼayañá nichxinná kao nganʼioná nga kʼoasʼin ʼyaxkoán josʼin mele.

16. Tojo tso Hebreos 6:10, jósʼe kon Jeobá kʼianga bʼenelai yaoli nga kʼoanʼiai josʼin sasénle.

¹⁶ Nga tsjoake ʼndíxtile je xi xijchá ma, majinle nga kjaʼaí kjaʼaí kjoan jmeni xi tsjoá je ʼndíxtile. Xijchá jebi kʼoati majinle nga kjaʼaí kjaʼaí sʼín je ʼndíxtile kʼoa nga tsín tongóson kji bichó nganʼiole nga jngó jngó. Kʼoatisʼinni xi kao Jeobá, majinle jokji tjen bichó nganʼioná nga jngó jngoá. Tsakui nichxin ngisa tse si̱xálai Jeobá tikʼoajinni xi ngikʼa,  kʼoa tsakui nichxin ngisa choa xi totʼatsʼe nga jekoanjchíngai, tsa chʼin tjínli kʼoa tsakuije̱ nga ji kjineli bijnyiʼai je familiali. Tonga ali nikinroajenjin tokuin (Gál. 6:4). Je Jeobá alikui chajinle jmeni xi tinʼiai. Tsa kʼoénelai yaoli jokji tjen bichó nganʼioli nga si̱xálai kʼoa tsakui kʼoasʼianni nga tsjoachai, je Jeobá nda sʼe̱ kon (tʼexkiai Hebreos 6:10). * Je Jeobá be jotjín je ni̱ma̱li. Kui xi mele nga tsjoa sʼe̱ tokuin josʼin nga ʼyaxkuín.

17. 1) Jméni xi sʼiaan kʼiatsa ñʼai maná josʼin ʼyaxkoán Niná. 2) A kabasenkao kʼali xi faʼaitʼa je recuadro “ Jósʼiaan nga tsjoa sa̱tío tokoán”.

¹⁷ Jósʼiaan kʼiatsa ñʼai maná nga chotʼayá nga toñá kʼoa nga ʼmiyasoán. Kʼiatsa si̱kʼayaa nichxinná jchajián nga nʼioni basenkaoná nga kʼoanʼia. Kʼianga ʼyaxkoán Niná yaa mangóson joni kʼianga ejercicio nʼia kʼoa tsa jme xi mená chótʼayá nga si̱kjanee. Kʼiatsa tsín ntsjaintsjai chótʼayá alikuijin nʼio tse jmeni xi koa̱nná. Tsakui nichxin ñʼai koa̱nná nga títjon, tonga tsa ntsjaintsjai chótʼayá ngisajin nda koa̱nná. Kʼianga jekoai nichxin ngisaa tsjoa sa̱tío tokoán kʼianga jekoa̱nná. Machjén nga kʼoati sʼiaan kʼianga ʼyaxkoán je Jeobá.

18. Jméni xi ngisa nʼio tjínle kjoandosin nga sʼiaan, kʼoa ánni nga tsjoa satíoni tokoán nga kʼoanʼia.

¹⁸ Kʼianga kʼoasʼin ʼyaxkoán Jeobá josʼin mele kʼoasʼin bakoñá nga kui xá tiyoñá. Nga kʼoanʼia tsjoa sʼe tokoán kʼoa ʼyañá nga koa̱n jchaxkoán Jeobá tokʼia saʼndani (Prov. 10:22). Nda tjío tokoán ndʼaibi nga̱ ʼyañá nga je Jeobá basenkaoná kʼianga kjoa bitjatojiaan (Is. 41:9, 10). Tsjoa satío tokoán kʼianga je Jeobá ʼyaxkoán, nga̱ tojé xi bakinle nga kuitjojeya kʼoa nga jchaxkón (Apoc. 4:11).