Tjínkʼa xi kjonangi
Ánni kʼoatsosíni ya 2 Samuel 21:7-9 nga je David tsakakóle kjoamatokon je Mefibóset kʼoa xijema kʼoatso nga kitsjoa je Mefibóset nga katanikʼien.
Kʼiatsa tsín kuenta sʼiaan jmeni xi tso texto jebi alikuijin koa̱njinná ánni nga kʼoatsoni. Nga kui nichxin jao koan chjota xi Mefibóset tsakʼin, kʼoa tsa chótʼayajiaan jmeni xi koan tsee jme xi koakoyaná.
Je rey Saúl xi tsakatéxoma ya naxinandá Israel, ñato xtixʼin kisʼele kʼoa jao koan xtiyánchjínle. Je xi titjonle koan jé xi Jonatán tsakʼin. Kʼoa je chjoónle rey Saúl, xi Rizpá tsakʼin, jngo ʼndí kisʼele xi Mefibóset tsakʼin. Kʼoa je tile Jonatán kʼoati Mefibóset tsakʼin. Je tindaile Saúl kʼoa kao tile ngóson tsakʼin.
Ánni nga nkjín chjota kitsjoani David nga katanikʼien. Je rey Saúl jtike koan chjota gabaonita xi ya tsakatiojinle chjota israelita kʼoa koanmele kisikjeson. Kʼoa kisikʼien kʼa. Je rey Saúl nʼio chʼao kisʼin nga kʼoakisʼin nga̱ je Josué kao chjota israelita kʼoasʼin tsakʼéndajin nga tsín josikao je chjota gabaonita (Jos. 9:3-27).
Jmeni xi kisʼendajin nga kui nichxin, tojo chjísale nga tsakʼejna je Saúl. ʼNdele nga skoe̱xkón jmeni xi kisʼendajin, tosaa koanmele kisikjeson chjota gabaonita. Nga kʼoakisʼin je Saúl kao xi ya tjíoʼya niʼyale kui jée tsakajngi nga njín tsakʼéjten (2 Sam. 21:1). Kʼianga jetsakatéxoma David, je chjota gabaonita xi kinjengile yaole tsakʼéyanajmíle jmeni xi koan. Je David kʼoakitsole je chjota gabaonita jósʼin kʼoechjínile tʼatsʼe je jée xi tsakajngi je Saúl, ánni nga sichikontʼain ijngokʼani Jeobá je naxinandá Israel. Je chjota gabaonita alikui tao̱n kisijé, tosaa kui kisijé nga katanikʼien nga ñato xtile je chjota xi kʼoasʼin tsakʼéndajin nga kisikjeson (Núm. 35:30, 31). Je David kʼoakisʼin jmeni xi tsakʼinle (2 Sam. 21:2-6).
Nga kui nichxin, je Saúl kao Jonatán to jekʼien. Tonga tíjnakon nga kʼia je Mefibóset, je tile Jonatán. Kʼianga sʼa ʼndí je Mefibóset kitsiʼaon, nga tsín ma fi alikui kikao je pajchále kʼianga kikʼetʼale je chjota gabaonita. Xi ijngosani, je David kʼoasʼin tsakʼéndajin nga tondiaa miyo koa̱nle xínkjín Jonatán kao ntje̱le, jolani je Mefibóset (1 Sam. 18:1; 20:42). Ya Biblia itso xi tʼatsʼe David: “Je rey koanmake je Mefibóset, tile Jonatán, tile Saúl, xi totʼatsʼe je én xi kitsjoale xínkjín je David kao Jonatán, […] ya ngixko̱n Jeobá” (2 Sam. 21:7).
Je David kisitjoson jmeni xi kisijéle chjota gabaonita. Jao xtile Saúl kitsjoale kʼoa jé jngo xti jebi xi Mefibóset tsakʼin, kʼoa aon xtindaile Saúl kitsjoale (2 Sam. 21:8, 9). Nga kisitjoson David jmeni xi kitsole je chjota gabaonita, tokʼoasʼin nga kichatʼa je jée xi tsakajngi Saúl.
Tsee jmeni xi bakóyaná jokoan nga kʼia. Tobʼelañá, je kjoatéxomale Niná kʼoakitso nga tsín koa̱n je jéentjaile koa̱n xi xti ma jmeni xi kisʼin je xijchále (Deut. 24:16). Tsa tsínlani jme jée kisʼele nga jao xtile Saúl kao nga aon xtindaile alikuijin kisasenle Jeobá jmeni xi kisʼin je David. Xi ijngosani, kʼoakitso je kjoatéxoma nga tokui jéele kuiyántjai nga jngó jngó chjota, kui xi tsonile jebi nga kʼoajin tiki nga jao xtile Saúl kao nga aon xtindaile kʼianga kisíkʼien je chjota gabaonita. Nga ñato xti jebi kʼoasʼin tsakʼéchjíni je jée xi tsakajngi.
Kui bakóyaná jebi nga tsín koa̱n kʼoasʼin si̱kjaʼaitsjeen kʼoa tsa kʼoakuixoán nga tokui kʼoakanʼiañá xi chʼaotjín nga kanitjosoán jmeni xi kaʼminá. Tosaa kui kuenta sʼiaan nga tsen tsen kichʼá yaoná jmeni xi nʼia. Jngo én xi i̱ tso: “Tindachonlai ndiaa je ndso̱kui, kʼoa ñaki ndasʼin kuitómjai” (Prov. 4:24-27; Efes. 5:15).
