KJOAʼMIYA XI CHOTʼAYA 10
Ánni nga menili kʼuínsʼenngindái
“Cha̱nisʼenngindáo yaono nga jngó jngó” (HECH. 2:38, TNM).
KJOAJNDA 34 Ñaki kixi kjuíkoa yaona
XI TÍNCHJA̱NI a
1, 2. 1) Jméni xi ma kʼianga ʼya xi fisʼenngindá. 2) Jmé xi chótʼayajiaan i̱ kjoaʼmiya jebi.
KʼIANGA sʼejna je kjoajtíntse, xi jetjíonda nga koaisʼenngindá ñaki tjíojngo kon nga tsjoá énle kʼianga kjonangile je ndsʼee xi tínchja̱ya, kʼoa je xínkjín kao xi miyole mani kʼoati tsjoa satío kon. Kʼoa kʼianga jebitjojinni nandá tsjoa tjío kon, kʼoa ngatsʼi xi ya tjío síjtsinya ntsja. Nga xki̱ xomana, jmi mani je chjota xi fisʼenngindá nga testigole Jeobá ma.
2 Kʼiatsa kʼoasʼin tinikjaʼaitsjain nga meli kʼuínsʼenngindái, kui xi tsonile nga je Jeobá tifasjai, kʼoa kui xi koasenkaoli nga nda kuijnai ningalani nʼio chʼao chon ndʼaibi (Sal. 14:1, 2). I̱ kjoaʼmiya jebi to janla koya si̱kʼaxkiaa xi kuitsoyaná ánni nga je Jeobá nixánilee ninga sʼa xtiaa kʼoa ninga jekoanjchíngaa. Kʼoa ñá xi jetsangínsʼenngindá kʼoati koasenkaoná nga tosi tonda je Jeobá si̱xálee ngantsjai nichxin.
TSJOACHA KATAMAA JE KJOATÉXOMAKIXI KAO XI KIXI TJÍN
Jenkjín jmi nó tjínle nga chʼaosʼin tísíkʼéjna Na̱i je jaʼaínle Niná (Chótsenlai párrafo 3, 4)
3. Ñá xi choʼndale Jeobá maa, ánni nga tsjoachañá je kjoatéxomakixi kao xi kixi tjín (Salmo 119:128, 163).
3 Je Jeobá kui kjoatéxoma kitsjoale choʼndale nga tsjoake katama xi kixi tjín (Zac. 8:19). Je Jesús kʼoati kitso nga kjoásje je kjoatéxomakixi (Mat. 5:6). Jebi kui xi tsonile nga kui kʼoasʼiaan xi tsje tjín, xi kixi tíjna kʼoa xi sasénle Niná. Tsjoachajin je kjoatéxomakixi kao xi kixi tíjna, kuijin nga tsín sasénnili je énndiso kao xi chʼaotjín (tʼexkiai Salmo 119:128, 163). b Jé Na̱i kjinentsja jme xi chon sonʼnde kʼoa jé kjenngile xi énndiso nchja̱ (Juan 8:44; 12:31). Je Na̱i kui xi mele chʼaosʼin sikʼéjna je jaʼaínle Niná. Jenʼio kjoatse nga énndiso tíbáne Niná, kʼoakitso ya ʼndenaxóle Edén nga ndiso Niná, nga to yaole fini kʼoa nga tsínkui xi ndatjín tsjoále chjota (Gén. 3:1, 4, 5). Nga kʼoatísʼín je Na̱i, nʼio nkjín chjota xi tsín nda síkʼaxki̱ Jeobá. Nga tsínkui matsjoake chjota xi kixi tíjna, kui xi mele je Na̱i nga kui kʼoakatasʼín xi tsín ndatjín kʼoa xi kjoatsʼen tjenkao (Rom. 1:25-31).
4. Jósʼin tíbakó Jeobá nga je “Niná xi ñaki kixi” (kʼoati chótsenlai sén xi faʼaitʼa).
4 Jé Jeobá “Niná xi ñaki kixi” kʼoa ngasin nganda tsoyale xi kixi tjín je xi tsjoake (Sal. 31:5). Kʼoasʼin beni je chjota xi kixi tjín kʼoa tsínkui sísin je énndiso xi tíkaníbason je Na̱i. Kʼoati bakóyaná je Jeobá nga kixi katamaa kʼoa nga tsín chʼa̱nachaa. Nga ʼyaa jebi chjí ʼyatokoán yaoná kʼoa nda satío tokoán (Prov. 13:5, 6). Jokjitse jetichotʼayai Biblia tiʼyajin nga tokui je kjoatéxomale Jeobá xi ngisa nda bándiaaná (Sal. 77:13). Kuinga menili si̱tjosuin jotso je kjoatéxomale Jeobá (Mat. 6:33). Kʼoajinti meli koakui nga to énndiso jmeni xi títso je Na̱i xi tʼatsʼe Niná. Jméni xi koa̱n sʼiain.
5. Jmé xi machjén nga sʼiain kʼianga si̱toánntjai je kjoatéxomakixi kao xi kixi tjín.
5 Jmeni xi sʼiain kʼoasʼin koakoni nga tsínkui nisin je énndiso xi tso je Na̱i, nga nitoánntjai xi kixi tíjna, nga meli nga je Jeobá koatexomali kʼoa nga meli si̱tjosuin jmeni xi tso. Nga kuitjosonli jebi tjínnele kʼoétsʼoalai Jeobá nga kʼoakʼuínlai nga toje si̱xálai ngantsjai nichxin. Xijekoa̱n, machjén nga kʼuínsʼenngindái nga̱ kʼoasʼin koakoni nga jetsakʼaitʼalai yaoli Jeobá. Kuinga kʼuínsʼenngindáni nga tsjoachai je kjoatéxomakixi kao xi kixi tjín.
TSJOACHA KATAMAA JE JESÚS
6. Tojo tso Salmo 45:4, ánni nga tsjoachañá Jesús.
6 Ánni nga tsjoachani je Jesús. Yaa tsoyaná xi tʼatsʼe jebi ya Salmo 45:4 c (tʼexkiai). Je Jesús sítoánntjai kʼoa tsoya xi kixi tjín, nangitokon kʼoa tsjoake je kjoatéxomakixi. Tsa kʼoati tsjoachai je kjoatéxomakixi kao xi kixi tjín, kʼoajinti tsjoachai je Jesús. Je Jesús nʼiojin koan nga kisitoánntjai xi kixi tjín kao kjoatéxomakixi (Juan 18:37). Jósʼin bakó Jesús nga nangitokon.
7. Jósʼe tokuin nga nangitokon je Jesús.
7 Jmeni xi tso je Jesús kʼoa jmeni xi sʼín kʼoasʼin bakóni nga nangitokon. Tobʼelañá, alikui yaole bʼasjengʼa, jé Jeobá bʼasjengʼa ngantsjai (Mar. 10:17, 18; Juan 5:19). Jósʼe tokuin nga nangitokon je Jesús. Tsjoachajin kʼoa mejinli chjénngilai. Ánni nga nangitokonni je Jesús. Kuinga nangitokon je Jeobá kʼoa je Jesús tsjoake je Nʼaile kʼoa nʼio nda kjenngile jokjoan (Sal. 18:35; Heb. 1:3). Nga ʼyaa jebi ngisaa machriantʼalee je Jesús.
8. Ánni nga tsjoa tjíoni tokoán nga je Jesús xi Rey sʼin tíjnaná.
8 Nʼio tsjoa tjío tokoán nga je Jesús xi Rey tíjnaná, nga̱ jé xi ngisa nda batéxoma, jesoaa Jeobá kitsoyale kʼoa jé tsakasénnda (Is. 50:4, 5). Xi ijngosani, tsakakó Jesús nga nʼio tsjoakená (Juan 13:1). Kʼoati tsjoachaa tsanda ñá nga Rey sʼin tíjnaná. Je Jesús kʼoakitso nga je xi tsjoake kjoaixi sítjoson kjoatéxomale kʼoa je Jesús miyo sʼin bekon chjota jebi (Juan 14:15; 15:14, 15). Nʼio tse kjoanda tjínná nga miyoná mani je Jesús, je ʼNdíle Niná.
9. Jósʼin mangóson nga kisʼenngindá je Jesús kʼoa nga fisʼenngindá je chjotatjenngile.
9 Je Jesús kʼoakitso nga tjínnele koaisʼenngindá je xi chjotatjenngile koa̱n (Mat. 28:19, 20). Jé títjon tsakʼéjna choa̱. Tjín jmeni xi mangóson kʼoa xi mai josʼin tíjna nga kisʼenngindá je Jesús kʼoa nga fisʼenngindá je chjotatjenngile (chótʼai je recuadro: “ Xi tsín mangóson josʼin tíjna nga kisʼenngindá je Jesús kao nga fisʼenngindá je chjotatjenngile”). Tobʼelañá, kui xá kisʼenngindáni je Jesús nga kʼoasʼin josʼin mele je Nʼaile (Heb. 10:7). Kʼoati kui xá mangínsʼenngindáñá xi chjotatjenngile maa, kʼoasʼin bakoñá nga jetsakʼaitʼalee yaoná je Jeobá, kʼoa kui ngisa bʼailee kjoandosin je xále Niná. Nga kʼoanʼia jé Jesús chjenngilee.
10. Ánni nga tsjoachani je Jesús, kʼoa jméni xi sʼiain nga tsjoachai.
10 Jemakjainli nga ʼNdítjonle Niná ma je Jesús kʼoa nga je xi Rey sʼin tíjnaná, ʼyaní nga nangitokon kʼoa nga je Jeobá kjenngile jokjoan. Kʼoati jetjínjinli nga kisikjen chjota xi baole, kisinʼio kon je xi tjíonroajen kon kʼoa saʼnda kisindayaa xi chʼin tjínle (Mat. 14:14-21). Kʼoati tiʼyai nga je tíbándiaale naxinandále Niná (Mat. 23:10). ʼYaní nga Rey sʼin tíjnale je Chjotaxále Niná kʼoa nga nʼio tse kjoanda kjoaʼaíkao nichxin xi sʼa nroa. Jósʼin koakoni nga tsjoachai. Kʼiaa nga chjénngilai je Jesús (Juan 14:21). Kuinga machjénni nga kʼoaitʼalai yaoli je Jeobá kʼoa kʼuínsʼenngindái.
TSJOACHA KATAMAA JE JEOBÁ
11. Ánni nga mangínsʼenngindáñá.
11 Ánni nga mangínsʼenngindáñá. Yaa tsoyaná jokitso je Jesús nga i̱ kitso: “Katamatsjoachai tsokʼoa je Nainá Nináli. Katamatsjoachani ngayije ni̱ma̱li, kao ngayije kjoatsjoali, kao ngayije kjoafaʼaitsjenli, kao ngayije nganʼioli” (Mar. 12:30). A kʼoasʼin tsjoachai Niná jotso texto jebi.
Jé Niná títsjoáná ngayeje xi ndatjín tjínná ndʼaibi kao xi sʼe̱ná nichxin xi sʼa nroa (Chótsenlai párrafo 12, 13)
12. Ánni nga tsjoachañá je Jeobá (kʼoati chótsenlai sén xi faʼaitʼa).
12 Nkjín koya anni nga tsjoachañá je Jeobá. Tobʼelañá, tʼatsʼe nga tiyochoán kʼoa jé tsjoáná “ngayije kjoatjao xi ñaki nda” (Sal. 36:9; Sant. 1:17). Ngayeje jmeni xi tjínná tʼatsʼe Jeobá tínroani. Kuinga tsjoániná nga nda chjota kʼoa nga tsjoakená.
13. Ánni nga nʼio chjínile nga tsakʼéchjíntjainá je Jesús.
13 Nʼio chjíle je kjoatjao xi kitsjoaná Jeobá nga tsakʼéchjíntjainá je ʼNdíle. Nʼio tsjoake xínkjín je Jeobá kao Jesús. Kʼoakitso je Jesús nga tsjoake je Nʼaile kʼoa nga je Nʼaile kʼoati tsjoake tsanda je (Juan 10:17; 14:31). Nga nʼio nkjín millón nó nga ya ñatjen tsakatio je Jeobá kao Jesús sa tjao sa tjao koanle xínkjín (Prov. 8:22, 23, 30). Kʼoa nʼiojin ba kisʼe kon je Jeobá nga tsabe je ʼNdíle nga kjoañʼai kinikjaʼá kʼoa nga kinikʼien. Tonga kuinga nʼio tsjoakená nga kisikasénni je ʼNdíle nga kʼienntjainá ánni nga koa̱n kuiyosíñá ngantsjai nichxin (Juan 3:16; Gál. 2:20). Kuinga tsjoachañá Jeobá nga kʼoasikji tse kjoanda tsakakóná.
14. Jméni xi ngisasa ndatjín xi sʼiain.
14 Sa tsjoacha sa tsjoachajin kjimai je Jeobá nga tiʼyasai xi tʼatsʼe. Kuijin xi meli nga tosi tonda si̱miyui ndʼaibi kʼoa tokʼia saʼndani. Tsjoa sʼe kon Jeobá tsa nda tso én kuinókjoai kʼoa tsa nda kʼuínkoai yaoli kʼoa kui xi mele nga kʼoasʼiain (Prov. 23:15, 16). Josʼiain yaa koakoni tsa tsjoacha kjoaixi je Jeobá (1 Juan 5:3). Kui xi ngisa ndatjín nga kʼoasʼin mangínkoaa yaoná josʼin mele Jeobá.
15. Jósʼin koakoni nga tsjoachai je Jeobá.
15 Jósʼin koakoni nga tsjoachai je Jeobá. Je xi títjon sʼiain kuinga kʼoétsʼoalai Jeobá kʼoa kʼoatʼinlai nga kʼoaitʼalai yaoli (Sal. 40:8). Kʼianga kʼuínsʼenngindái kʼoasʼin koakonilai xi ngikʼa nga jetsakʼaitʼalai yaoli Jeobá. Tojosʼin kanikʼaxkiaa i̱ kjoaʼmiya jebi nʼio tsjoa sʼe̱ tokuin nga kʼuínsʼenngindái kʼoa kʼiaa kʼoétsʼiakaoni nga Niná si̱xálai. Kʼianga jekʼuínsʼenngindái jelikui titoji kichʼani yaoli nga̱ jé Jeobá jetsakʼaitʼalai yaoli (Rom. 14:8; 1 Ped. 4:1, 2). Kʼiatsa kʼoasʼiain, ndasʼin kuijnai kʼoa tsjoa sʼe̱ tokuin. Kataʼyala ánni.
16. Tojo tso Salmo 41:12, jmé kjoanda xi tsjoále Jeobá xi je síxále.
16 Nʼio tjotʼa je Jeobá kʼoa tsʼato kʼoakji tsjoáli jokji kʼoailai (Mar. 10:29, 30). Kʼianga jekʼuínsʼenngindái, nda kuijnai kʼoa tsjoa sʼe̱ tokuin ningalani to jetífikjetʼa nichxin. Kʼoasʼe̱ tokuin ngantsjai nichxin nga je Jeobá si̱xálai. Sa tsjoacha sa tsjoacha koai̱n je Jeobá kʼoa je kʼoati tosi tonda tsjoake koa̱nli, kʼoa kuijnaní ngantsjai nichxin joni Jeobá (tʼexkiai Salmo 41:12). d
17. Jméni xi koa̱n kʼoailai je Jeobá.
17 Kʼianga kʼoaitʼalai yaoli Jeobá kʼoa nga kʼuínsʼenngindái kui xi ngisa nʼio tjínle kjoandosin xi koa̱n sʼiain. Jé Jeobá tísíchikontʼainli nga tsjoa tjín tokuin kʼoa jé títsjoáli ngayeje xi ndatjín. Kʼoa jméni xi koa̱n kʼoailai Jeobá nga̱ tsʼee ngʼajmi kao Sonʼnde. Je xi koa̱n sʼiain kuinga kixi kʼuíntʼalai kʼoa nga toje si̱xálai (Job 1:8; 41:11; Prov. 27:11). Kui xi ngisasa ndatjín xi koa̱n sʼiain, kʼoa kuinga tsjoachai Jeobá nga kʼuínsʼenngindáni.
A JETIJNANDAI NGA KʼUÍNSʼENNGINDÁI
18. Jmé xi koa̱n si̱kjaʼaitsjenjin.
18 Tojosʼin tiʼyaa ji xi síni tsa meli kʼuínsʼenngindái. Koaan sikjaʼaitsjenjin tsa jetijnandai nga kʼuínsʼenngindái (Hech. 8:36). Tikjaʼaitsjenjin nga jan koya xi kaʼyaa ánni nga mangínsʼenngindáñá. Xi títjon, kuinga tsjoachai je kjoatéxomakixi kao xi kixi tjín. Tikjaʼaitsjenjin jebi: A mena nga katafaʼai nichxin nga tsín tiʼya xi kʼoendisoni kʼoa nga kui kʼoasʼin xi ndatjín. Xi majaoni, kuinga tsjoachai je Jesús. Tikjaʼaitsjenjin jebi: A mena nga je Jesús koatexomana kʼoa a mena kjuítjenngia choa̱le. Xi majanni kʼoa xi ngisa chjíle, kuinga tsjoachai je Jeobá. Tikjaʼaitsjenjin jebi: A mena nga je Jeobá sixále kʼoa nga tsjoa koaya kon. Tsa jekʼoatjín tokuin, jméni xi bʼéchjoali nga tsín ʼmisʼenngindáni (Hech. 16:33).
19. Ánni nga tsín jao kʼoéni tokuin nga kʼuínsʼenngindái. Jngo choa̱ tʼejnai (Juan 4:34).
19 Kʼiatsa kje tsojin tokuin nga kʼuínsʼenngindái tikjaʼaitsjenjin je choa̱ xi tsakʼéjna Jesús (tʼexkiai Juan 4:34). e Je Jesús kʼoakitso nga ya mangóson joni tsojmi xi chinee kʼianga kʼoakisʼin josʼin mele Nʼaile. Kui kʼoakitsoni nga tsjoánganʼioná jmeni xi chinee. Je Jesús koanjinle nga kjoanda tsaanñá jmeni xi tsoná je Jeobá. Alikui kui kʼoatsoná Jeobá nga kui kʼoasʼiaan jmeni xi sikiʼaonná, je xi mele kuinga kʼuínsʼenngindái (Hech. 2:38). Kjoanda tsini tsa si̱tjosuin kjoatéxoma jebi. Chi̱nejin kʼiatsa kui tsojmi kʼoaili xi nʼio nda chine. Tikʼoasʼinni, ali jaojin bʼai tokuin nga kʼuínsʼenngindái.
20. Jmé xi chótʼayajiaan ya kjoaʼmiya xi ijngo.
20 Tjínkʼa xi kʼoasʼin síkjaʼaitsjen nga kje tjíondajin nga koaisʼenngindá. Nga nʼio tjínle kjoandosin nga bʼaitʼalee yaoná Jeobá kʼoa nga mangínsʼenngindá, machjén nga nda tikjaʼaitsjenjin kʼoa tʼenelai yaoli nga kʼoasʼiain jmeni xi koasenkaoli nga koa̱n kʼuínsʼenngindái. Tsa meli kʼuínsʼenngindái, jméni xi koasenkaoli nga kʼoasʼiain. Kui tʼatsʼe jebi chótʼayajiaan ya kjoaʼmiya xi ijngo.
KJOAJNDA 28 Jósʼiaan nga miyole koaan je Jeobá
a Nʼio tjínle kjoandosin nga koaisʼenngindá je chjota xi Biblia tjíokotʼaya. Kuinga tsjoake Niná nga koa̱nmenile koaisʼenngindá. I̱ kjoaʼmiya jebi kui chótʼayajiaan ʼyáni xi tjínnele tsjoake koa̱n kʼoa ánni nga tsjoake koa̱nni. Kʼoati jchaa jósʼin tjínnele koaikao yaole jngo chjotale Cristo xi jekisʼenngindá.
b Salmo 119:128, 163: “Kuinga kixi sʼin ʼbekonsíña ngayeje kjoatéxomali; jtike̱ña ngayeje ndiaa xi kjoandiso tjenkao. 163 Jtike̱ña énndiso, nʼio chʼaosʼin ʼbekoan. Tonga nʼio tsjoake̱ je kjoatéxomali”.
c Salmo 45:4: “Kʼoa kao kjoajeyali tʼin saʼnda nga si̱kinjai, titoánntjai je xi ñaki kʼoatjín, je kjoanangitokon kʼoa kao je xi kixi tíjna, kʼoa je ndsai ngakixi kui kʼoasʼin jmeni xi tokʼoamaná”.
d Salmo 41:12: “Bisenkaonái nga̱ kixi fitʼale; yaa ngixkuin si̱kʼéjnanái ngantsjai”.
